ꓙꓲꓻ ꓟ ꓮ ꓣꓳ ꓡꓳ. ꓒ (Good Shepherd)

#rvalisu #Good Shepherd

Sunday, April 30, 2023

ꓙꓲꓻ ꓟ ꓮ ꓣꓳ ꓡꓳ. ꓒꓽ

ꓠꓬꓲ. ꓠꓬꓲ ꓠꓬ ꓢꓯ. ꓬꓲꓼ ꓡ ꓑꓮꓲꓽ ꓗꓳ. ꓙꓰ ꓗ. ꓠꓯ ꓡꓲ ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ ꓠꓬꓲ. ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 10ꓽ1‐10 ꓗꓪ ꓐꓰ ꓥ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓙꓲˍ ꓟ ꓮ ꓣꓳ ꓡꓳ. ꓒ ꓔꓯ ꓥꓳꓽ ꓟ. ꓟꓲ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓔꓯ ꓚꓬꓴ ꓙ ꓠ, ꓟ ꓢꓲꓺ ꓒ ꓬꓰ‐ꓢꓴ ꓠꓬ ꓗ ꓘꓶ ꓗꓪ ꓧꓳꓽ ꓙꓰ ꓟ ꓚꓱ, ꓔꓯ ꓡꓳ. ꓟꓳ ꓪ ꓡꓳ꓿ ꓝꓮꓲ ꓢꓲꓺ ꓒ ꓬꓰ‐ꓢꓴ ꓠꓬ ꓮ ꓣꓳ ꓡꓳ. ꓒ ꓥ ꓟ ꓔꓯ ꓟ. ꓖꓶ ꓡ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓙꓲˍ ꓟ ꓮ ꓣꓳ ꓡꓳ. ꓒ ꓥ ꓟ ꓔꓯ ꓡꓳ. ꓟꓳ ꓪ ꓡꓳ꓿ ꓙꓲˍ ꓟ ꓮ ꓣꓳ ꓡꓳ. ꓒ ꓠꓬ ꓬꓲ. ꓮ ꓣꓳ ꓜꓴꓻ ꓗꓪ ꓐꓰ ꓮ ꓣꓳ ꓐꓴ ꓟꓬꓱꓺ ꓔꓯ ꓢꓯ. ꓔ ꓟ ꓐꓰ ꓬꓲ. ꓮ ꓣꓳ ꓜꓴꓻ ꓐꓱ ꓶ ꓬꓲ. ꓢꓯꓼ ꓟꓬ ꓔꓯ ꓖꓶ ꓠ, ꓟ ꓙꓳˍ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ. ꓮ ꓣꓳ ꓜꓴꓻ ꓠꓬ ꓬꓲ. ꓢꓯꓼ ꓔꓯ ꓠ, ꓡꓳꓻ ꓢꓲ ꓠꓬꓲ ꓬꓲ. ꓗ. ꓠꓯ ꓛꓳꓽ ꓔꓬ ꓟ ꓚꓱ, ꓔꓯ ꓟ. ꓖꓶ ꓡ ꓡꓳ꓿ ꓮ ꓣꓳ ꓡꓳ. ꓒꓽ ꓠꓬ ꓬꓲ. ꓮ ꓣꓳ ꓜꓴꓻ ꓔꓯ ꓢꓷ. ꓔ ꓟ ꓡꓰ ꓐꓰ ꓮ ꓣꓳ ꓜꓴꓻ ꓥ ꓟꓲ ꓬꓲ. ꓮ ꓣꓳ ꓡꓳ. ꓒꓽ ꓔꓯ ꓢꓷ. ꓡꓳ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓡꓳ꓿ ꓕꓱ ꓥꓳꓽ ꓠꓬ ꓣꓳ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓝꓴꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓐꓴ ꓔꓯ ꓮ ꓟꓬ, ꓛꓲ ꓠꓲ, ꓠꓵ ꓟ ꓐꓰ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓡꓳ. ꓙ ꓔ ꓙ ꓢꓲ ꓠꓬꓲ ꓚꓬꓴ ꓙ ꓢꓴ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓐꓰ ꓬꓲ. ꓗ. ꓠꓯ ꓢꓲ ꓛꓳ ꓢꓴ ꓐꓴ ꓐꓰ ꓙ ꓡꓯ ꓘꓳ, ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓬꓲ. ꓗ, ꓠꓯ ꓢꓲ ꓛꓳ ꓢꓴ ꓐꓴ ꓠꓬ ꓢꓷ. ꓢꓲ ꓠꓬꓲ ꓛꓳꓽ ꓔꓬ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓐꓰ ꓬꓲ. ꓗ. ꓠꓯ ꓢꓲ ꓗꓪ ꓛꓳ ꓢꓴ ꓐꓴ ꓠꓬ ꓮ ꓕꓯ ꓥ ꓟꓲ ꓙꓽ ꓡꓯ ꓘꓳ, ꓟ ꓐꓰ ꓢꓲꓺ ꓒ ꓔꓯ ꓙꓵꓻ ꓢꓲ ꓠꓬꓲ ꓛꓳ ꓟ ꓔꓯ ꓣꓳ ꓠꓬꓲ. ꓠꓬꓲ ꓐ ꓙ ꓟꓶ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓚꓬꓴ ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓕꓲ ꓡꓰ ꓣꓳ ꓮ ꓕꓯ ꓥ ꓟꓲ ꓢꓲꓺ ꓒ ꓐꓰ ꓙ ꓡꓯ ꓘꓳ, ꓠ, ꓟ ꓣꓳꓻ ꓚꓵ. ꓟ ꓔꓯ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓘꓴ ꓜꓲꓼ ꓞꓳ ꓕꓲ ꓟ ꓘꓴꓽ ꓗꓪ ꓬꓲ. ꓮ ꓣꓳ ꓜꓴꓻ ꓔꓯ ꓔꓬ ꓝꓲ ꓠꓲ, ꓫꓵˍ ꓟ ꓚꓱ, ꓔꓯ ꓡꓳ. ꓟꓳ ꓪ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓮ ꓣꓳ ꓡꓳ. ꓒ ꓥ ꓢꓲ ꓠꓬꓲ ꓬꓲ. ꓗ. ꓠꓯ ꓢꓲ ꓛꓳ ꓢꓴ ꓐꓴ ꓠꓬ ꓬꓲ. ꓮ ꓣꓳ ꓜꓴꓻ ꓥ ꓟ ꓔꓯ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓝꓮꓲ ꓘꓴ ꓜꓲꓼ ꓞꓳ ꓔꓯ ꓠꓬ ꓢꓲꓺ ꓒ ꓬ ꓙꓠ ꓰ‐ꓢꓴ ꓡꓰ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓡꓳ. ꓙ ꓠꓬꓲˍ ꓙ ꓟ ꓔꓯ ꓣꓳ ꓔꓯ ꓟ. ꓖꓶ ꓡ ꓡꓳ꓿ ꓮ ꓣꓳ ꓜꓴꓻ ꓐꓰ ꓮ ꓣꓳ ꓡꓳ. ꓒ ꓐꓴ ꓔꓯ ꓥꓳꓽ ꓠꓬ ꓡꓳ. ꓙ ꓔ ꓙ ꓠꓬꓲˍ ꓙ ꓠ, ꓟ ꓡꓰ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓥ ꓟꓲ ꓕꓲ ꓣꓳ ꓛꓳ ꓕꓲ ꓣꓳ ꓬꓰ ꓙ ꓔ ꓙ ꓡꓯ ꓘꓳ, ꓠ, ꓟ ꓣꓳꓻ ꓚꓵ. ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓟ. ꓖꓶ ꓡ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓮ ꓣꓳ ꓡꓳ. ꓒ ꓥ ꓡꓳ꓿ ꓮ ꓣꓳ ꓡꓳ. ꓒꓽ ꓠꓬ ꓮ ꓣꓳ ꓮ ꓡꓰ ꓗꓷ ꓡꓰ ꓟ ꓮ ꓣꓳ ꓜꓴꓻ ꓔꓯ ꓠꓬꓲˍ ꓙ ꓡꓳ. ꓙ ꓢꓴ ꓥ ꓡꓳ꓿ ꓟꓽ ꓙꓲꓻ ꓢꓴ꓾ ꓬꓲ. ꓐꓯ ꓘꓶꓽ ꓟꓽ ꓚꓳ ꓢꓴ ꓐꓰ ꓬꓲ. ꓐꓯ ꓘꓶꓼ ꓔꓯ ꓟꓽ ꓠ, ꓡꓳ ꓢꓴ ꓐꓴ ꓔꓯ ꓬꓲ. ꓢꓷ. ꓡꓳ꓿ ꓖꓳ ꓡꓰ ꓥ ꓟꓲ ꓮ ꓣꓳ ꓮ ꓙꓵꓽ ꓔꓯ ꓡꓳ. ꓔ ꓠꓬꓲˍ ꓙ ꓢꓲ ꓠꓬꓲ ꓮ ꓣꓳ ꓜꓴꓻ ꓒ ꓕꓲ ꓗꓪ ꓬꓲ. ꓔꓬ ꓢꓲ ꓠꓬꓲ ꓬꓲ. ꓮ ꓘꓶ. ꓠꓲ, ꓠꓵ ꓡꓳ꓿ ꓣꓳ ꓚꓬꓴ ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓮ ꓣꓳ ꓡꓳ. ꓒ ꓐꓰ ꓣꓳ ꓙꓵꓻ ꓕꓯ ꓢꓲ ꓡꓲ ꓗ, ꓛꓲ ꓟ ꓐꓰ ꓟꓬ, ꓠꓬꓲ ꓙꓲꓻ ꓟ ꓟꓵꓽ ꓗꓪ ꓣꓳ ꓔꓯ ꓬꓲ. ꓡꓰ ꓧꓳꓽ ꓙꓰ ꓡ ꓓꓴ ꓥꓳ꓿ ꓣꓳ ꓞꓳ ꓙꓳ ꓟ ꓤꓶꓻ ꓗꓪ ꓠꓲ, ꓫ. ꓟꓬ, ꓫ. ꓓꓴ ꓮ ꓟꓬ, ꓙꓳ ꓥ ꓟꓲ ꓣꓳ ꓢꓲꓺ ꓒ ꓠꓬ ꓣꓳ ꓐꓰ ꓕꓲ ꓪ ꓮ ꓕꓯ ꓥ ꓟꓲ ꓣꓳ ꓐꓰ ꓔꓬ ꓡꓳ꓿ ꓣꓳ ꓢꓲꓺ ꓒ ꓠꓯ, ꓗꓪ ꓢꓲꓺ ꓒ ꓥꓪ ꓮ ꓣꓳ ꓡꓳ. ꓒ ꓥꓳ ꓙꓵꓻ ꓢꓲ ꓠꓬꓲ ꓣꓳ ꓞꓳ ꓙꓳ ꓟ ꓗꓪ ꓛꓳ ꓫꓱ, ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿