ꓙꓵꓻ ꓠꓲꓹ ꓙꓳˍ ꓟ ꓤ ꓟꓶ ꓤ

ꓟ-ꓘꓳ 7ꓽ24-30

ꓙꓵꓻ ꓠꓲꓹ ꓙꓳˍ ꓟ ꓤ ꓟꓶ ꓤ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓬꓴ-ꓔ ꓡ ꓞꓳ ꓟꓽ ꓥ ꓟ ꓤ ꓟꓶ ꓤ ꓕꓲ ꓣꓳ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓗꓷ ꓟ ꓙꓵꓻ ꓠꓲꓹ ꓓꓽ ꓟ ꓑꓶꓸ ꓓꓴ ꓬꓲ ꓮꓸ ꓟꓲꓽ ꓠꓬ ꓠꓲꓹ ꓜꓶꓽ ꓞꓹ ꓟ ꓗꓪ ꓐꓰ ꓡꓲꓹ ꓗꓷ ꓟꓶ ꓡꓰ ꓟ ꓥ ꓡꓳ= ꓦꓬꓼ ꓠꓬꓲ ꓖꓳ ꓟ ꓗꓪ ꓬꓴ-ꓔ ꓡ ꓞꓳ ꓐꓴ ꓠꓬ ꓠꓱꓸ ꓐꓯ ꓕꓲ ꓒꓳꓹ ꓗꓪ ꓟ ꓞꓳ ꓫꓵꓽ ꓐꓴ ꓐꓰ ꓟꓽ ꓙ ꓡꓯ ꓘꓳ=

ꓮ ꓡꓲꓳ ꓐꓯ ꓠꓬ ꓬꓲ ꓪ ꓐꓴ ꓠ: ꓪꓴ-ꓢ ꓡꓰ ꓢꓲꓺ ꓔ ꓟ ꓢꓲꓽ ꓫꓬꓹ ꓟ ꓞꓳ ꓫꓵꓽ ꓥ ꓢꓲ ꓠꓱꓸ ꓐꓯ ꓞꓳ ꓫꓵꓽ ꓐꓴ ꓠꓬ ꓪꓴ-ꓢ ꓡꓰ ꓢꓲꓺ ꓔ ꓟ ꓟꓽ ꓟꓶ꓾ ꓟꓽ ꓢꓲꓽ ꓫꓬ ꓢꓴ ꓡꓰꓽ ꓥ ꓡꓳ ꓐꓰ ꓙꓵꓻ ꓔ꓾ ꓘꓳꓹ ꓣꓴ ꓔ ꓟ ꓪꓴꓸ ꓠꓬꓲ ꓥ ꓡꓳ= ꓕꓲ ꓚꓱꓹ ꓐꓯ ꓪ ꓠꓬ ꓬꓲ ꓪ ꓐꓴ ꓡꓰꓽ ꓪꓴ-ꓢ ꓤ ꓠꓱ ꓐꓴ ꓥ ꓡꓳ꓾ ꓐꓰ ꓓꓵꓽ ꓙ ꓔ꓾ ꓫꓪꓸ ꓔ ꓟ ꓥ ꓡꓳ=

ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓟꓲ ꓠꓯ ꓗꓪ ꓬꓯꓼ ꓡ ꓕꓯ ꓠꓬ ꓬꓲ ꓚꓬꓴꓸ ꓙˍ ꓟ ꓟꓬꓱꓽ ꓠꓬ ꓬꓴ-ꓔ ꓡ ꓞꓳ ꓐꓴ ꓐꓱ ꓶꓽˍ ꓡꓰꓽ ꓟꓽ ꓥ꓾ ꓟꓲ ꓠꓯ ꓗꓪ ꓙꓳˍ ꓟ ꓪꓴ-ꓢ ꓬꓲ ꓤ ꓠꓱ ꓮ ꓙꓵꓽ ꓐꓱ ꓶ ꓥ ꓡꓳ= ꓐꓯ ꓠꓲꓹ ꓫꓵˍ ꓟ ꓠꓬ ꓮꓽ ꓟ ꓥˍ ꓟꓲ ꓬꓲ ꓪ ꓠꓯꓸꓼ ꓗꓪ ꓙꓵꓻ ꓠꓲꓹ ꓙꓳˍ ꓕꓯ ꓠꓽ ꓚꓬꓴꓸ ꓙˍ ꓟ ꓣꓱꓽ ꓛꓰꓽ ꓔꓯ ꓑꓯꓹ ꓟꓶˍ ꓟ ꓪ ꓙꓵꓽ ꓪ ꓙꓳˍ ꓟ ꓥ ꓡꓳ= ꓬꓴ-ꓔ ꓡ ꓞꓳ ꓟꓽ ꓥ ꓟ ꓤ ꓟꓶ ꓤ ꓕꓱ ꓕꓲ ꓣꓳ ꓟ ꓠꓬ ꓬꓲ ꓔꓯꓺ ꓐꓬꓱꓽ ꓥ ꓡꓳ=

ꓖꓳ ꓡꓱ ꓥ ꓟꓲ ꓒ-ꓡꓲ-ꓢꓷ ꓐꓴ ꓐꓰ ꓙꓵꓽ ꓗ ꓟꓸ ꓒ ꓕꓲ ꓐꓱ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓬꓰ ꓗꓷ ꓟ ꓓꓵꓽ ꓙ: ꓮ' ꓡꓰ ꓓꓴ ꓟꓬꓱꓽ ꓮ ꓟꓬꓹ ꓔꓯ ꓟꓳꓻ ꓗꓷˍ ꓥˍ ꓟꓲ ꓬꓲ ꓪ ꓠꓽ ꓙꓵꓻ ꓟꓽ ꓐ ꓡ꓾ ꓠꓲꓹ ꓟ ꓩꓴ ꓢꓲ ꓟꓽ ꓙꓵꓻ=

ꓖꓳ ꓟ ꓑꓶꓸ ꓓꓴ ꓣꓳ ꓐꓴ ꓠꓬ ꓤ ꓟꓶ ꓤ ꓕꓱ ꓕꓲ ꓣꓳ ꓟˍ ꓡꓰ ꓐꓰ ꓕꓶꓺ ꓞꓹ ꓟ ꓙꓵꓻ ꓠꓲꓹ ꓗꓪ ꓐꓰ ꓪꓴ-ꓢ ꓔꓯ ꓠꓶꓽ ꓙꓰ ꓔꓬ ꓡ꓾ ꓟꓽ ꓥ ꓠꓬ꓾ ꓚꓲꓸ ꓛꓬ ꓠꓬ ꓙꓲ-ꓢꓴ ꓢꓲꓺ ꓤ ꓟꓬꓱ ꓔꓯ ꓘꓳꓹ ꓣꓴ ꓔ ꓕꓲ ꓖ ꓚꓲꓸ ꓛꓬ ꓠꓲꓹ ꓫꓵˍ ꓟ ꓮ ꓙꓵꓽ ꓔꓯ ꓪꓴ-ꓢ ꓡꓰ ꓖꓶꓽ ꓡ ꓙꓲꓽ ꓙꓳˍ ꓡꓳ ꓐꓰ ꓥꓳꓽ ꓡꓰꓽ ꓟ꓾ ꓟꓽ ꓔꓱꓹ ꓟ ꓙꓵꓻ ꓠꓲꓹ ꓑꓶꓸ ꓓꓴ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓘꓳꓹ ꓣꓴ ꓟꓶ ꓔꓬ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓔꓯ ꓢꓷꓸ ꓙ ꓟꓳ ꓙ ꓟꓽ ꓐ ꓡ ꓢꓲ ꓪꓴ-ꓢ ꓔꓯ ꓝꓴꓲꓸ ꓓꓰꓺ ꓔꓬ ꓡ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓯ=