ꓙꓵꓻ ꓠꓲꓹ ꓙꓳ ꓢꓴ ꓠꓽ ꓮ ꓙꓵꓽ ꓔꓯ ꓧꓪꓸ ꓡꓰ ꓓꓻˍ ꓟ ꓥꓳ

ꓙꓵꓻ ꓠꓲꓹ ꓙꓳ ꓢꓴ ꓠꓽ ꓮ ꓙꓵꓽ ꓔꓯ ꓧꓪꓸ ꓡꓰ ꓓꓻˍ ꓟ ꓥꓳ꓾ ꓐꓯ ꓟ ꓔꓯ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓟ-ꓘꓳ 10ꓽ46-52 ꓗꓪ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓦ ꓢꓯꓼ ꓪ ꓣꓴ ꓓꓴ ꓥꓳ= ꓠꓬꓲꓸ ꓠꓬꓲ ꓢꓲꓽꓫꓬ ꓕꓳꓽ ꓶ ꓗꓪ ꓬꓲ ꓕꓲꓽ ꓟꓴꓽ ꓠꓬ ꓕꓱ ꓡꓱ ꓥꓳ= ꓢꓲ ꓒ ꓬꓰ-ꓢꓴ ꓐꓰ ꓬꓲ ꓝꓲ ꓓꓴ ꓐꓴ ꓠꓬ ꓙꓱ-ꓣꓴ-ꓘꓳ ꓡꓳ ꓒꓱ ꓗꓪ ꓐꓰ ꓓꓳ ꓡ ꓔꓬ ꓕꓯ ꓟꓬ ꓢꓶꓽ ꓠꓬꓲ ꓟꓽ ꓟꓳꓻ ꓢꓲ ꓓꓰꓽ ꓜꓽ ꓢꓴ ꓕꓲ ꓣꓳ ꓔꓬ ꓡꓳ= ꓖꓳ ꓕꓯ ꓠꓬ ꓟꓬ ꓢꓶꓽ ꓠꓬꓲ ꓟꓽ ꓟꓳꓻ ꓢꓴ ꓓꓰꓽ ꓜꓽ ꓢꓴ ꓬꓲ ꓟꓬꓱꓺ ꓠꓬ ꓢꓰ-ꓟꓰ ꓬꓲ ꓤ ꓐ-ꓕꓱ-ꓟꓱ-ꓴ ꓥ ꓡꓳ= ꓬꓲ ꓠꓬ ꓢꓲ ꓒ ꓬꓰ-ꓢꓴ ꓗꓳꓸ ꓙꓰˍ ꓟ ꓔꓯ ꓑ ꓙꓽˍ ꓠꓬꓲ ꓬꓲ ꓠꓬ ꓕꓱ ꓡꓱ ꓘꓴꓻˍ ꓡꓳ=

“ꓠ-ꓢ-ꓡꓱ ꓢꓴ ꓬꓰ-ꓢꓴꓳ꓾ ꓥꓪ ꓔꓯ ꓫꓱꓸ ꓤ ꓡꓯ꓾ ꓥꓪ ꓔꓯ ꓫꓱꓸ ꓤ ꓡꓯ꓾ ꓐꓰ ꓘꓴꓻˍ ꓡꓳ= ꓖꓳ ꓕꓯ ꓠꓬ ꓢꓴ ꓡꓰ ꓬꓲ ꓔꓯ “ꓠꓴ ꓢꓲ ꓡꓲ ꓐꓰ ꓔꓬ꓾ ꓠꓴ ꓕꓽ ꓘꓴꓻ” ꓐꓰ ꓐꓯ ꓢꓲ ꓬꓲ ꓔꓯ ꓕꓽ ꓔ ꓗꓽ ꓔ ꓡꓳ= ꓖꓳ ꓡꓱ ꓥ ꓟꓲ ꓬꓲ ꓠꓬ ꓝꓸ ꓢꓲ ꓘꓴꓻˍ ꓡꓳ= ꓓ-ꓪꓵ ꓬꓲ ꓤ ꓢꓲ ꓒ ꓬꓰ-ꓢꓴꓳ꓾ ꓥꓪ ꓔꓯ ꓫꓱꓸ ꓤ ꓡꓯ꓾ ꓥꓪ ꓔꓯ ꓫꓱꓸ ꓤ ꓡꓯ꓾ ꓐꓰ ꓘꓴꓻˍ ꓡꓳ= ꓖꓳ ꓕꓯ ꓢꓲ ꓒ ꓬꓰ-ꓢꓴ ꓠꓬ ꓑ ꓙꓽ ꓡꓰ ꓢꓲ ꓬꓲ ꓔꓬ ꓗꓪ ꓘꓴꓻ ꓔꓯꓹ ꓡ ꓠꓹ ꓟ ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ ꓪꓸ ꓔ ꓟ ꓐꓵꓻ ꓞꓶꓽ ꓡꓵꓸ ꓗꓷ ꓢꓲ꓾ ꓢꓲ ꓒ ꓔꓬ ꓗꓪ ꓞꓼ ꓐꓰ ꓗꓳꓸ ꓡˍ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓠꓴ ꓮ ꓫꓵꓽ ꓠꓲꓹ ꓫꓵˍ ꓡ꓾ ꓐꓰ ꓐꓯ ꓡꓳ= ꓖꓳ ꓕꓯ ꓬꓲ ꓠꓬ ꓥꓪ ꓟꓬ ꓢꓶꓽ ꓠꓬꓲ ꓟꓳꓻ ꓠꓲꓹ ꓫꓵˍ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓔꓯ ꓒꓳꓹ ꓖꓶˍ ꓡꓳ= ꓠꓴ ꓙꓵꓻ ꓠꓲꓹ ꓠꓬ ꓠꓴ ꓔꓯ ꓚꓬꓴꓸ ꓗꓷꓳ꓾ ꓐꓰ ꓢꓲ ꓒ ꓬꓰ-ꓢꓴ ꓐꓯ ꓗꓷ ꓕꓯ ꓬꓲ ꓟꓬ ꓢꓶꓽ ꓠꓬꓲ ꓟꓳꓻ ꓡꓺꓳ= ꓖꓳ ꓕꓯ ꓬꓲ ꓠꓬ ꓪꓴ-ꓢ ꓔꓯ ꓫꓱꓸ ꓖꓶˍ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓟꓬ ꓢꓶꓽ ꓠꓬꓲ ꓟꓽ ꓟꓳꓻ ꓢꓴ ꓕꓱ ꓕꓲ ꓣꓳ ꓔꓯ ꓡꓳꓸ ꓠꓬꓲ ꓡꓯ= ꓧꓶꓸ ꓕꓯ ꓢꓲ ꓒ ꓬꓰ-ꓢꓴ ꓔꓯ ꓬꓲ ꓟꓽ ꓟꓶ ꓡꓰ ꓕꓯ ꓠꓽ ꓬꓲ ꓤꓶꓻ ꓠꓯꓸꓼ ꓗꓪ ꓮ ꓫꓵꓽ ꓥꓳ ꓡꓳꓸ ꓓꓴ ꓟꓽ ꓙꓳ= ꓬꓲ ꓙꓰ ꓠꓲꓹ ꓫꓵˍ ꓟ ꓗꓪ ꓬꓲ ꓙꓰ ꓟꓽ ꓐ ꓡ= ꓬꓲ ꓬꓰ ꓠꓲꓹ ꓫꓵˍ ꓟ ꓔꓯˍ ꓟꓲ ꓬꓰ ꓟꓽ ꓠ= ꓬꓲ ꓮ ꓫꓵꓽ ꓥꓳ ꓡꓳꓸ ꓔ ꓥˍ ꓟꓲ ꓟꓽ ꓒꓬꓱꓼ ꓡ= ꓬꓲ ꓫꓵꓽ ꓤ ꓧꓪ ꓤˍ ꓟꓲ ꓟꓽ ꓡꓳꓸ ꓠꓬꓲ ꓟ ꓑꓶꓸ ꓓꓴ ꓬꓲ ꓠꓬ ꓓꓰꓽ ꓜꓽ ꓓꓴ ꓕꓲ ꓣꓳ ꓒꓬꓱꓼ ꓡ ꓟ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓬꓲ ꓤꓶꓻ ꓠꓯꓸꓼ ꓗꓪ ꓠꓲꓹ ꓫ ꓟꓬ ꓫ ꓓꓴ꓾ ꓟꓬ ꓐꓲ ꓞꓰꓻ ꓓꓴ꓾ ꓬꓲ ꓔꓯ ꓢꓴ ꓡꓰ ꓕꓽ ꓔ ꓗꓽ ꓔ ꓥˍ ꓟꓲ ꓢꓲ ꓒ ꓬꓰ-ꓢꓴ ꓕꓯꓽ ꓢꓲ ꓬꓲ ꓗꓶ ꓔ ꓟ ꓙꓵꓻ ꓠꓲꓹ ꓪꓴꓽˍ ꓟ ꓑꓶꓸ ꓓꓴ꓾ ꓙꓵꓻ ꓠꓲꓹ ꓖꓳ ꓟ ꓠꓬ ꓮ ꓫꓵꓽ ꓔꓯ ꓥˍ ꓟꓲ ꓬꓲꓸ ꓔꓯ ꓧꓪꓸ ꓡꓰ ꓝꓲˍ ꓡꓳ꓾ ꓐꓰ ꓣꓳ ꓢꓷꓸ ꓔ ꓠ ꓗꓹ ꓡꓳ=

ꓦꓬꓼ ꓠꓬꓲ ꓖꓳ ꓟ ꓗꓪ ꓓꓰꓽ ꓜꓽ ꓓꓴ ꓐꓴ ꓠꓬ ꓐꓵ ꓞꓶꓽ ꓪꓸ ꓔ ꓠ ꓗꓹ ꓡꓳ= ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓘꓴꓻ ꓢꓯꓼ ꓬꓲ ꓑ ꓙꓽ ꓡꓰ ꓕꓯ ꓬꓲ ꓪꓸ ꓔ ꓟ ꓐꓵ ꓞꓶꓽ ꓔꓯ ꓞꓼ ꓐꓰ ꓡꓵꓸ ꓩꓴ ꓗꓷˍ ꓡꓳ ꓐꓯ ꓟ ꓬꓲꓸ ꓬꓲ ꓢꓲ ꓠꓬ “ꓥꓪ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓶ ꓡꓰꓳ= ꓥꓪ ꓠꓬ ꓧꓶꓸ ꓕꓯ ꓟ ꓡꓰ ꓠꓲꓹ ꓟ ꓫꓸ ꓓꓴ ꓠꓲꓹ ꓟ ꓙꓬ ꓓꓴ ꓥꓪ ꓤꓶꓻ ꓠꓯꓸꓼ ꓗꓪ ꓟꓽ ꓓꓻꓳ= ꓥꓪ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓶ ꓡꓰ ꓟ ꓑꓶꓸ ꓓꓴ ꓮ ꓙꓵꓽ ꓔꓯ ꓧꓪꓸ ꓡꓰ ꓟ ꓥ ꓡꓳ” ꓐꓯ ꓟ ꓔꓯ ꓐꓯ ꓬꓯꓼˍ ꓡꓳ=

ꓠꓲꓹ ꓠꓵꓻ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓥˍ ꓟꓲ ꓢꓲ ꓒ ꓬꓰ-ꓢꓴ ꓡꓰ ꓠꓬꓲꓸ ꓠꓬꓲ ꓣꓳ ꓔꓯ ꓘꓴꓻ ꓔꓬ ꓡꓳ= ꓮꓸ ꓟꓲꓸ ꓡꓯ= ꓥꓪ ꓔꓯ ꓙꓵꓻ= ꓠꓴ ꓪ ꓙꓽ ꓫꓸ ꓔꓬ ꓟ꓾ ꓠꓴ ꓪ ꓫꓸ ꓙꓵ ꓔꓬ ꓟ꓾ ꓠꓴ ꓪ ꓠꓲꓹ ꓟ ꓠꓯꓸꓼ ꓗꓪ ꓠꓲꓹ ꓟ ꓠꓻ ꓔꓬ ꓓꓴ꓾ ꓠꓴ ꓪ ꓦꓲꓻ ꓘꓴꓽ ꓠꓯꓸꓼ ꓗꓪ꓾ ꓠꓴ ꓪ ꓦꓲꓻ ꓘꓴꓽ ꓠꓯꓸꓼ ꓗꓪ꓾ ꓠꓴ ꓪ ꓗꓴꓷꓼ ꓠꓯꓸꓼ ꓗꓪ ꓠꓲꓹ ꓫ ꓟꓬ ꓫ ꓓꓴ ꓙꓳˍ ꓡ= ꓠꓴ ꓪ ꓥ ꓔꓯ ꓙꓵꓻ꓾ ꓠꓴ ꓪ ꓠꓬ ꓥꓪ ꓔꓯ ꓙꓵˍ ꓟ ꓑꓶꓸ ꓓꓴ ꓧꓶꓸ ꓕꓯ ꓟ ꓡꓰ ꓠꓴ ꓪ ꓠꓲꓹ ꓟ ꓠꓯꓸꓼ ꓗꓪ ꓟꓽ ꓒꓬꓱꓼ ꓡꓻꓳ= ꓠꓴ ꓪ ꓠꓲꓹ ꓫꓸ ꓟꓬ ꓫꓸ ꓓꓴ꓾ ꓠꓴ ꓪ ꓔꓯ ꓗꓽ ꓔ ꓓꓴ ꓮ ꓙꓵꓽ ꓔꓯ ꓠꓴ ꓪ ꓧꓪꓸ ꓡꓰ ꓐ ꓡˍ ꓥꓳ= ꓠꓴ ꓪ ꓥꓪ ꓔꓯ ꓙꓵꓻˍ ꓟ ꓙꓵꓻ ꓠꓲꓹ ꓠꓬ ꓖꓳ ꓟ ꓮ ꓙꓵꓽ ꓔꓯ ꓧꓪꓸ ꓡꓰ ꓓꓻˍ ꓟ ꓥꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ= ꓢꓯꓼ ꓪ ꓖꓶ ꓡ ꓔꓬ ꓡꓳ= ꓣꓳ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓲ ꓠꓬꓲ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓜꓽ ꓓꓰꓽ ꓢꓴ ꓕꓲ ꓣꓳ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓔꓯ ꓮ ꓡꓲ ꓓꓹ ꓥˍ ꓟꓲ꓾ ꓟꓽ ꓠꓽ ꓠꓽ ꓘꓴꓻ ꓓꓰꓽ ꓢꓲ ꓠꓬꓲ ꓙꓵꓻ ꓠꓲꓹ ꓖꓳ ꓟ ꓗꓪ ꓐꓰ ꓣꓳꓽ ꓧꓪꓸ ꓡꓰ ꓓꓴ ꓬꓰ ꓡꓯ=