ꓙꓵꓻ ꓠꓲꓹ ꓠꓬ ꓣꓳ ꓢꓯꓼ ꓪ ꓥ ꓡꓳ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ-ꓘ 5ꓽ1-11 ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓢꓲ-ꓟꓴ ꓒꓲ-ꓕꓱ ꓔꓯ ꓘꓴˍ ꓟ ꓟꓸ ꓟꓲꓽ ꓥ ꓡꓳ= 

ꓢꓲ-ꓟꓴ ꓒꓲ-ꓕꓱ ꓠꓬ ꓥꓪꓸ ꓧꓪ ꓒ ꓕꓲ ꓣꓳ꓾ ꓥꓪꓸ ꓓꓳꓽ ꓢꓴ ꓕꓲ ꓣꓳ ꓥ ꓡꓳ= ꓬꓲ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓥꓪꓸ ꓓꓳꓽ ꓔꓬ ꓢꓴ ꓥ ꓡꓳ= ꓬꓲ ꓠꓬ ꓥꓪꓸ ꓮ ꓟꓬꓹ ꓧꓪ ꓟꓶ ꓘꓴ ꓢꓴ ꓕꓲ ꓣꓳˍ ꓟꓲ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓕꓲ ꓦꓬꓼ ꓙꓳˍ ꓕꓯ ꓥꓪꓸ ꓕꓲ ꓟˍ ꓟꓲ ꓠꓸ ꓟꓽ ꓟꓶ꓾ ꓓꓳꓽ ꓟꓽ ꓟꓶ= ꓖꓳ ꓕꓯ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓔꓯ ꓡ ꓢꓲ꓾ ꓥꓪꓸ ꓑꓱꓸ ꓔꓯ ꓬꓲꓻ ꓙꓬ ꓠꓯꓸˍ ꓟ ꓗꓪ ꓩꓴ ꓬꓯꓼ ꓗꓷ꓾ ꓐꓰ ꓐꓯ ꓖꓶˍ ꓕꓯ ꓒꓲ-ꓕꓱ ꓡꓰ꓾ ꓥꓪ ꓠꓴꓽ ꓠꓽ ꓕꓲ ꓦꓬꓼ ꓡꓱꓸꓼ ꓓꓳꓽˍ ꓥ ꓟꓲ ꓮ ꓫꓵꓽ ꓓꓳꓽ ꓟꓽ ꓟꓶ= ꓖꓳ ꓡꓱ ꓥ ꓟꓲ ꓠꓴ ꓡꓰ ꓐꓯˍ ꓠꓬꓲ꓾ ꓥꓪꓸ ꓑꓱꓸ ꓩꓴ ꓬꓯꓼ ꓗꓷˍ ꓥꓳ꓾ ꓐꓰ ꓐꓯ ꓢꓲ ꓥꓪꓸ ꓑꓱꓸ ꓔꓯ ꓬꓲꓻ ꓙꓬ ꓠꓯꓸˍ ꓟ ꓗꓪ ꓩꓴ ꓬꓯꓼ ꓗꓷˍ ꓡꓳ= ꓖꓳ ꓕꓯ ꓬꓲ ꓪ ꓠꓬ ꓥꓪꓸ ꓑꓱꓸ ꓧꓽ ꓡꓰ ꓠ ꓗꓪ ꓛꓲ ꓥꓪꓸ ꓮ ꓟꓬꓹ ꓓꓳꓽ ꓟꓶ ꓡꓰꓳ= ꓖꓳ ꓟ ꓔꓯ ꓟꓳꓻ ꓡꓰ ꓕꓯ ꓬꓲ ꓠꓬ ꓢꓲ ꓒ ꓬꓰ-ꓢꓴ ꓟꓲꓽ ꓕꓯꓽ ꓢꓲ ꓗꓪ ꓟꓳꓼ ꓡꓰ ꓢꓲ꓾ ꓥꓪ ꓠꓬ ꓝꓴꓲꓸ ꓙꓳ ꓢꓴ ꓥ ꓡꓳ= ꓥꓪ ꓔꓯˍ ꓐꓰ ꓧꓹ ꓙꓰ꓾ ꓐꓰ ꓐꓯ ꓖꓶˍ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓟ ꓔꓯ ꓣꓳ ꓡꓳꓸ ꓠꓬꓲˍ ꓕꓯ ꓒꓲ-ꓕꓱ ꓠꓬ ꓮ ꓡꓲ ꓘꓶ ꓪꓽ ꓠꓬꓲˍ ꓥ ꓟꓲ꓾ ꓓꓻˍ ꓥ ꓟꓲ꓾ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓔꓬ ꓗꓪ ꓛꓲ ꓡˍ ꓕꓯ ꓢꓲ ꓒ ꓬꓰ-ꓢꓴ ꓬꓲ ꓪꓽ ꓠꓬꓲˍ ꓟ ꓔꓯ ꓒꓲ-ꓕꓱ ꓟꓳꓻˍ ꓡꓳ=  

ꓕꓲ ꓖ ꓕꓲ ꓧꓪꓹ ꓗꓪ ꓣꓳ ꓠꓬ ꓠꓲꓹ ꓟ ꓙꓬ ꓡꓰˍ ꓕꓯ꓾ ꓕꓲ ꓦꓬꓼ ꓡꓱꓸꓼ ꓥꓪꓸ ꓧꓪ ꓔꓬ ꓥ ꓟꓲ ꓧꓪ ꓟꓽ ꓟꓶ ꓟ ꓒꓲ-ꓕꓱˍ ꓡꓰ ꓐꓰ ꓣꓳ ꓮ ꓫꓵꓽˍ ꓟꓲ ꓬꓰ ꓟꓽ ꓟꓶ ꓟ ꓦꓬꓼ ꓠꓬꓲˍ ꓟꓲ ꓙꓳˍ ꓡꓳ= ꓧꓪ ꓜꓽ ꓧꓪ ꓓꓳˍ ꓟ ꓗꓪ꓾ ꓜꓽ ꓟꓲ ꓓꓰ ꓟꓲ ꓬꓰ ꓜꓽˍ ꓟ ꓗꓪ꓾ ꓒꓴ ꓫꓵꓺ ꓧꓪˍ ꓟ ꓗꓪ ꓣꓳ ꓮ ꓡꓲ ꓘꓶꓸ ꓪꓽ ꓠꓬꓲˍ ꓥ ꓟꓲ ꓮ ꓘꓶꓸ ꓓꓻˍ ꓥ ꓟꓲ꓾ ꓕꓲ ꓖ ꓕꓲ ꓧꓪꓹ ꓗꓪ ꓮ ꓫꓵꓽˍ ꓟꓲ ꓧꓪ ꓟꓽ ꓟꓶ ꓬꓰ ꓟꓽ ꓟꓶ ꓟ ꓦꓬꓼ ꓠꓬꓲˍ ꓟꓲ ꓙꓳ ꓡˍ ꓥꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ ꓬꓲꓻ ꓙꓬ ꓠꓯꓸˍ ꓟ ꓗꓪ ꓥꓪꓸ ꓑꓱꓸ ꓔꓯ ꓡꓳ ꓧꓳꓽ ꓗꓷ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ= ꓐꓯ ꓠꓲꓹ ꓫꓵˍ ꓟ ꓠꓬ ꓪꓴ-ꓢ ꓔꓯ ꓪ ꓜꓲ ꓮ ꓠꓯꓸ ꓠꓯꓸ ꓙꓵꓻ ꓢꓲ ꓠꓬꓲ ꓢꓯꓼ ꓕꓵꓼ꓾ ꓐꓰ ꓐꓯ ꓖꓶ ꓡ ꓔꓬ ꓟ ꓥ ꓡꓳ=

ꓙꓵꓻ ꓠꓲꓹ ꓕꓱ ꓟ ꓠꓬ ꓟꓬꓽ ꓠꓬꓲ ꓬꓳꓸ ꓚꓵˍ ꓟ ꓥ ꓡꓳ= ꓙꓵꓻ ꓠꓲꓹ ꓠꓬ ꓢꓯꓼ ꓪꓽ ꓥ ꓡꓳ= ꓙꓵꓻ ꓠꓲꓹ ꓠꓬ ꓣꓳ ꓡꓯꓼ ꓙꓴꓽ ꓥ ꓡꓳ= ꓡ ꓞꓳ ꓕꓲ ꓣꓳ ꓡꓯꓼ ꓙꓴꓽ ꓟꓽ ꓙꓳ ꓠꓬ ꓮ ꓫꓵꓽˍ ꓟꓲ ꓬꓰ ꓟꓽ ꓐ ꓡ= ꓞꓳ ꓤ ꓕꓲ ꓣꓳ ꓬꓲ ꓢꓯꓼ ꓪ ꓠꓬ ꓡꓯꓽ ꓪꓵꓽ ꓗꓪ ꓟꓽ ꓓꓹ꓾ ꓛꓲ ꓪꓵꓽ ꓗꓪ ꓟꓽ ꓓꓹ= ꓬꓲ ꓢꓯꓼ ꓪ ꓠꓬ ꓙꓵꓻ ꓠꓲꓹ ꓗꓪ ꓓꓹˍ ꓡꓳ=

ꓓ-ꓪꓵ ꓠꓬ ꓡ ꓞꓳ ꓓꓽ ꓟ ꓥ ꓟ ꓖꓳ-ꓡꓲ-ꓬ ꓔꓯ ꓧꓪꓸ ꓘꓴˍ ꓟ ꓠꓬ ꓬꓲ ꓢꓯꓼ ꓪꓽ ꓠꓬ ꓬꓲ ꓡꓯꓽ ꓪꓵꓽ ꓗꓪ ꓓꓹˍ ꓟ ꓑꓶꓸ ꓓꓴ ꓟꓽ ꓥ= ꓬꓲ ꓢꓯꓼ ꓪ ꓠꓬ ꓙꓵꓻ ꓠꓲꓹ ꓠꓯꓸꓼ ꓗꓪ ꓓꓹˍ ꓟ ꓪꓴꓸ ꓠꓬꓲ ꓥ ꓡꓳ= ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓪꓴ-ꓢ ꓠꓬ ꓥꓪ ꓔꓯ ꓬꓰ ꓙˍ ꓥꓳ ꓐꓰ ꓬꓲ ꓙꓵꓻ ꓔ ꓟ ꓙꓵꓻ ꓠꓲꓹ ꓗꓪ ꓢꓯꓼ ꓪ ꓖꓳ ꓟ ꓙꓳˍ ꓡꓳ=

ꓖꓳ ꓡꓱ ꓠꓬꓲ ꓒꓲ-ꓕꓱ ꓠꓬ ꓡꓯꓽ ꓙꓴꓽ ꓟꓽ ꓙꓳ= ꓕꓲ ꓦꓬꓼ ꓡꓱꓸꓼ ꓥꓪꓸ ꓧꓪˍ ꓥ ꓟꓲ ꓧꓪ ꓟꓽ ꓟꓶ= ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓕꓵꓼ ꓪꓽ ꓖꓶˍ ꓟ ꓑꓶꓸ ꓓꓴ ꓬꓲ ꓠꓬ ꓥꓪꓸ ꓮ ꓟꓬꓹ ꓓꓳꓽ ꓟꓶ ꓡꓰꓳ=

ꓕꓲ ꓖ ꓕꓲ ꓧꓪꓹ ꓣꓳ ꓥˍ ꓟꓲ ꓮ ꓫꓵꓽ ꓧꓪˍ ꓟꓲ ꓧꓪ ꓟꓽ ꓟꓶ꓾ ꓠꓲꓹ ꓟ ꓙꓬ ꓡꓰ ꓔꓬ꓾ ꓠꓲꓹ ꓟ ꓫꓸ ꓡꓰ ꓔꓬ ꓕꓯ꓾ ꓙꓰ ꓚꓱꓹ ꓔꓯ ꓟꓽ ꓟꓳꓻ ꓕꓯ ꓙꓵꓻ ꓠꓲꓹ ꓮ ꓔꓳꓸ ꓗꓪ ꓐꓰ ꓛꓳ ꓫꓱꓽ ꓙꓰ= ꓙꓵꓻ ꓠꓲꓹ ꓠꓬ ꓣꓳ ꓢꓯꓼ ꓪ ꓥ ꓡꓳ= ꓙꓵꓻ ꓠꓲꓹ ꓠꓬ ꓣꓳ ꓡꓯꓽ ꓙꓴꓽ ꓥ ꓡꓳ= ꓙꓵꓻ ꓠꓲꓹ ꓠꓬ ꓣꓳ ꓔꓯ ꓙꓰ ꓐ ꓡ ꓝꓲˍ ꓟ ꓧꓪꓽ ꓞꓶꓻ ꓥ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓡꓰ ꓣꓳ ꓔꓯ ꓐꓯ ꓖꓶ ꓡˍ ꓟ ꓙꓵꓻ ꓠꓲꓹ ꓔꓯ ꓪꓳ ꓫꓳꓸ ꓢꓲ ꓠꓬꓲ ꓡꓯꓼ ꓫꓵ ꓢꓯꓼ ꓕꓵꓼ=

ꓝꓮꓲ ꓕꓲ ꓫꓵꓽ ꓠꓬ ꓒꓲ-ꓕꓱ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓖꓼ ꓦ ꓗꓷˍ ꓡꓳ= ꓮ ꓫꓵꓽ ꓑꓶꓸ ꓓꓴ ꓥˍ ꓐꓯ ꓠꓬ꓾ ꓬꓲ ꓠꓽ ꓟꓽ ꓒꓵꓽ꓾ ꓬꓲ ꓠꓬ ꓝꓴꓲꓸ ꓙꓳ ꓢꓴ ꓥ ꓟ ꓬꓲ ꓢꓷꓸˍ ꓡꓳ= ꓕꓲ ꓖ ꓕꓲ ꓧꓪꓹ ꓣꓳ ꓠꓬ ꓝꓴꓲꓸ ꓬꓰ ꓗꓷ ꓕꓯ ꓪꓴ-ꓢ ꓠꓬ ꓣꓳ ꓐꓰ ꓶꓽ ꓤ ꓗꓶꓹ ꓶꓽ ꓡꓰꓳ꓾ ꓐꓰ ꓓꓵꓽ ꓙ ꓗꓴꓸˍ ꓡꓳ= ꓣꓳ ꓝꓴꓲꓸ ꓬꓰ ꓪ ꓡꓰ ꓕꓯ꓾ ꓟꓽ ꓙꓲꓻ ꓟꓽ ꓜꓳꓽ ꓟ ꓬꓰ ꓪ ꓡꓰ ꓕꓯ꓾ ꓪꓴ-ꓢ ꓠꓬ ꓥꓪ ꓐꓰ ꓶꓽ ꓡꓰꓳ= ꓪꓴ-ꓢ ꓠꓬ ꓶꓽ ꓤ ꓙꓰ ꓗꓷꓳ꓾ ꓐꓰ ꓓꓵꓽ ꓙ ꓟꓶˍ ꓥ ꓟꓲ ꓕꓱ ꓟ ꓠꓬ ꓣꓳ ꓠꓲꓹ ꓟ ꓡꓰꓽ ꓥ ꓡꓳ=

ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓒ ꓕꓲꓺ ꓗꓪ ꓔꓬ ꓡꓳ= ꓪꓴ-ꓢ ꓠꓬ ꓝꓴꓲꓸ ꓔꓯ ꓠꓲꓹ ꓜꓳˍ ꓥ ꓟꓲ ꓝꓴꓲꓸ ꓬꓰ ꓢꓴ ꓔꓯ꓾ ꓝꓴꓲꓸ ꓙꓳ ꓢꓴ ꓔꓯ ꓠꓬ  ꓠꓲꓹ ꓠꓵˍ ꓡꓳ ꓐꓰ ꓐꓯ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓒ ꓕꓲꓺ ꓗꓪ ꓔꓬ ꓡꓳ= ꓣꓳ ꓝꓴꓲꓸ ꓬꓰ ꓗꓷˍ ꓟ ꓑꓶꓸ ꓓꓴ ꓣꓳ ꓠꓬ ꓶꓽ ꓤ ꓗꓶꓹ ꓡꓰˍ ꓟˍ ꓡꓰ ꓐꓰ ꓠꓲꓹ ꓟ ꓠꓯꓸꓼ ꓗꓪ ꓓꓵꓽ ꓙ ꓟꓶˍ ꓥ ꓟꓲ ꓪꓴ-ꓢ ꓠꓬ ꓣꓳ ꓒ ꓕꓲꓺ ꓗꓪ ꓔꓬ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓝꓴꓲꓸ ꓬꓰ ꓪ ꓡꓰ ꓥ ꓟꓲ ꓮ ꓫꓵꓽ ꓠꓲꓹ ꓟ ꓙꓬ ꓓꓴ ꓟꓽ ꓙꓳ ꓙꓳ ꓝꓴꓲꓸ ꓬꓰˍ ꓟ ꓗꓪ ꓐꓰ ꓓꓵꓽ ꓙ ꓒꓳꓹ ꓬꓲꓼ ꓡ ꓢꓲ ꓠꓬꓲ ꓙꓵꓻ ꓠꓲꓹ ꓔꓯ ꓠꓯꓸˍ ꓟ ꓗꓪ ꓗꓶ ꓔ ꓢꓲ ꓠꓬꓲ ꓛꓳ ꓫꓱꓽˍ ꓥꓳ ꓐꓯ ꓠꓬ ꓣꓳ ꓐꓱ ꓶ ꓮ ꓫꓵꓽ ꓬꓰˍ ꓟꓲ ꓧꓪꓸ ꓡꓰ ꓢꓲ ꓠꓬꓲ ꓗꓹ ꓛꓲꓽˍ ꓟ ꓤꓶꓻ ꓒꓬꓱꓼ ꓡˍ ꓥꓳ ꓐꓰ ꓮ ꓙꓵꓽ ꓢꓴ ꓔꓯ ꓐꓯ ꓖꓶ ꓠꓲꓹ ꓫꓵˍ ꓡꓳ=