ꓙꓵꓽ ꓗ ꓒꓽ ꓐꓴ ꓔꓯ ꓕꓼˍ ꓟ

ꓡꓴ-ꓘ 11ꓽ47-54

ꓟꓷꓼ ꓠꓷꓹ ꓝ ꓢꓴ ꓐꓴ ꓔꓯ ꓢꓰꓼˍ ꓟ ꓢꓲꓽ ꓫꓬ ꓕꓳ ꓶ ꓗꓪ ꓟ ꓞꓳ ꓫꓵꓽ ꓐꓴ ꓕꓯꓽ ꓢꓲ ꓣꓳ ꓐꓴ ꓠꓬ ꓪ ꓜꓲ ꓙꓲꓻˍ ꓡꓳ ꓐꓰ ꓐꓯ ꓓꓹ ꓡ? ꓟꓽ ꓙꓲꓻ ꓟ ꓝꓴꓲꓸ ꓥ ꓕ ꓑꓳꓸ ꓔꓯ ꓤ ꓟꓴ ꓢꓲ ꓶꓼ ꓓꓳ ꓫꓱꓹ ꓓꓳ ꓔꓯ ꓚꓺ ꓔꓬ ꓟ ꓟꓷꓽ ꓠꓷꓹ ꓝ ꓢꓴ ꓐꓴ ꓬꓲ ꓪ ꓬꓰˍ ꓟ ꓟꓬꓱꓽ ꓔꓯ ꓓꓵꓽ ꓙ ꓠꓬꓲ ꓡꓯ=

ꓟꓷꓽ ꓠꓷꓹ ꓝ ꓢꓴ ꓐꓯ ꓟ ꓠꓬ ꓪꓴ-ꓢ ꓡꓰ ꓕꓵꓼ ꓪ ꓖꓶˍ ꓟ ꓗꓪ ꓐꓰ ꓪꓴ-ꓢ ꓡꓰ ꓐꓯ ꓖꓶ ꓡˍ ꓟ ꓔꓯ ꓕꓲ ꓝꓸ ꓞꓳ ꓤ ꓐꓴ ꓔꓯ ꓐꓯ ꓟꓸ ꓖꓶ ꓢꓴ ꓥ ꓡꓳ= ꓬꓲ ꓠꓬ ꓠ ꓠꓹ ꓢꓴ ꓐꓴ ꓮ ꓙꓵꓽ ꓔꓯ ꓪꓴ-ꓢ ꓠꓲꓹ ꓡꓶꓽꓟ ꓔꓯ ꓐꓯ ꓟꓸ ꓖꓶˍ ꓡꓳ= ꓘꓶꓽ ꓫꓵꓽ ꓡꓵꓺ ꓕꓳꓽ ꓶ ꓗꓪ ꓡꓰꓽ ꓟꓽ ꓞꓲꓺ ꓘꓶꓽ ꓫꓵꓽ ꓫꓵꓼ ꓕꓳ ꓶꓽ ꓗꓪˍ ꓟꓲ ꓙꓵꓽ ꓪ ꓙꓳ ꓢꓴ ꓐꓴ ꓟꓽ ꓙꓲꓻ ꓟꓽ ꓜꓳꓽ ꓟ ꓬꓰ ꓔꓬ ꓟ ꓔꓯ ꓐꓯ ꓟꓸ ꓖꓶ ꓗꓷ ꓟ ꓑꓶꓸ ꓓꓴ ꓢꓰꓼ ꓗꓷ ꓟꓶˍ ꓟ ꓟꓷꓽ ꓠꓷꓹ ꓝ ꓢꓴ ꓮ ꓟꓬꓹ ꓙꓳˍ ꓡꓳ=

ꓪꓴ-ꓢ ꓗꓪ ꓐꓰ ꓡˍ ꓟ ꓙꓲˍ ꓟ ꓓꓳꓽ ꓐꓴ ꓔꓯ ꓡꓰꓽ ꓐꓯ ꓑꓶˍ ꓕꓯ ꓠꓽ ꓟꓷꓽ ꓠꓷꓹ ꓝ ꓢꓴ ꓐꓴ ꓠꓬ ꓟꓽ ꓫ ꓙꓵ ꓡꓰ ꓫꓵꓽ ꓥꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓐꓴ ꓠꓬ ꓟꓲ ꓠꓯ ꓞꓳ ꓤ ꓟꓽ ꓙꓲꓻ ꓟꓽ ꓜꓳꓽ ꓟ꓾ ꓞꓳ ꓤ ꓛꓬꓻ ꓡꓰ ꓟ ꓝꓴꓲꓸ ꓐꓴ ꓔꓯ ꓐꓯ ꓑꓶˍ ꓕꓯ ꓠꓽ ꓕꓲ ꓚꓱꓹ ꓗꓷ ꓡꓰˍ ꓡꓳ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓡꓴ-ꓘ 11ꓽ47-54 ꓗꓪ ꓥˍ ꓟꓲ ꓙꓵꓽ ꓗ ꓟꓸ ꓒ ꓐꓴ ꓐꓰ ꓒ-ꓡꓲ-ꓢꓷ ꓐꓴ ꓠꓬ ꓬꓰ-ꓢꓴ ꓡꓰ ꓟꓸ ꓟꓲꓽ ꓚ ꓖꓶˍ ꓕꓯ꓾ ꓬꓲ ꓪ ꓟꓽ ꓔꓱꓹ ꓟ ꓬꓰ ꓔꓬ ꓟ ꓔꓯ ꓐꓯ ꓟꓸ ꓖꓶˍ ꓕꓯ ꓬꓲ ꓪ ꓠꓬ ꓮ ꓘꓶꓸ ꓠꓲꓹ ꓟ ꓦꓶ ꓡꓰ ꓢꓲ ꓬꓲ ꓪ ꓟꓽ ꓙꓲꓻ ꓟꓽ ꓜꓳꓽ ꓟ ꓔꓯ ꓫꓬꓹ ꓔꓱꓹ ꓠꓹ ꓟ꓾ ꓬꓲ ꓪ ꓠꓲꓹ ꓟ ꓔꓯ ꓒꓳꓹ ꓡꓶꓸ ꓠꓹ ꓟ ꓟꓽ ꓬꓰ ꓬꓰ꓾ ꓔꓱꓹ ꓚꓵˍ ꓟ ꓔꓯ ꓐꓯ ꓟꓸ ꓖꓶ ꓡ ꓢꓴ ꓬꓰ-ꓢꓴ ꓔꓯ ꓢꓰꓼ ꓗꓷ ꓠꓹ ꓟ ꓬꓰˍ ꓡꓳ= ꓬꓰ-ꓢꓴ ꓬꓲ ꓐꓯ ꓘꓶꓽ ꓗꓪ ꓐꓰ ꓬꓲ ꓫꓸ ꓙꓵ ꓡꓰ ꓠꓹ ꓟ ꓢꓯꓼ ꓕꓵꓼˍ ꓟ ꓣꓳ ꓑ ꓙ ꓪˍ ꓡꓳ=

ꓣꓳ ꓐꓴ ꓥˍ ꓟꓲ ꓣꓳ ꓔꓯ ꓙꓳˍ ꓟ ꓟꓽ ꓙꓲꓻ ꓟ ꓫꓱꓹ꓾ ꓟꓽ ꓙꓲꓻ ꓟ ꓠꓲꓹ ꓟ ꓓꓵꓽ ꓙ ꓚꓱꓹ ꓾ ꓟꓽ ꓙꓲꓻ ꓟ ꓣꓱꓽ ꓬꓰ ꓚꓱꓹ ꓐꓴ ꓔꓯ ꓫꓬꓽ ꓫꓬꓽ ꓡꓰꓽ ꓖꓴ ꓟꓳꓸ ꓖꓶ ꓡ ꓢꓴ ꓐꓴ ꓔꓯ ꓣꓳ ꓮ ꓡꓰ ꓟꓳˍ ꓡ= ꓟꓬꓽ ꓠꓬꓲ ꓠꓬ ꓣꓳ ꓬꓲ ꓔꓯ ꓠꓲꓹ ꓟ ꓦꓶˍ ꓡꓳ ꓟꓽ ꓥ ꓡ=

ꓣꓳ ꓟꓽ ꓓꓻ ꓟ꓾ ꓣꓳ ꓟꓽ ꓙꓲꓻ ꓟ ꓬꓰ ꓔꓬ ꓟ ꓔꓯ ꓙ ꓜꓲꓼ ꓡꓰ ꓠ ꓛꓲꓺ ꓐꓯ ꓟꓸ ꓖꓶ ꓡ ꓢꓴ꓾ ꓖꓴ ꓟꓳꓸ ꓖꓶ ꓡ ꓢꓴ ꓐꓴ ꓔꓯ ꓣꓳ ꓠꓲꓹ ꓟ ꓦꓶˍ ꓕꓯ ꓠꓽ ꓣꓳ ꓥˍ ꓟꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓟꓷꓽ ꓠꓷꓹ ꓝ ꓢꓴ ꓐꓴ ꓔꓯ ꓢꓰꓼ ꓢꓴ ꓖꓳ ꓕꓲ ꓧꓳꓽ ꓟ ꓕꓯꓽ ꓢꓲ ꓙꓲꓻˍ ꓟ ꓞꓳ ꓤ ꓟꓽ ꓒꓬꓱꓼ ꓡꓻꓳ= ꓣꓳ ꓐꓴ ꓥˍ ꓟꓲ ꓬꓲ ꓪ ꓐꓴˍ ꓡꓰ ꓐꓰ ꓟꓽ ꓙꓲꓻ ꓢꓴ꓾ ꓟꓷꓼ ꓠꓷꓹ ꓝ ꓢꓴ ꓐꓴ ꓔꓯ ꓢꓰꓼ ꓢꓴˍ ꓡꓰ ꓐꓰ ꓗꓷ ꓡꓰ ꓟ ꓥ ꓡꓳ=