ꓙꓵꓽ ꓗ ꓟꓸ ꓒ ꓐꓴ ꓔꓯ ꓟꓳꓸ ꓐꓯ ꓓꓳ ꓡˍ ꓟ

ꓟ-ꓕꓲ = 23ꓽ1-12

ꓠꓬꓲꓸ ꓠꓬꓲ ꓣꓳ ꓟꓲ ꓠꓯ ꓞꓳ ꓤ ꓘꓴꓽ ꓗꓪ ꓪꓴ-ꓢ ꓡꓲꓽ ꓪꓴ-ꓢ ꓚꓱꓹ ꓗꓪ ꓥˍ ꓟꓲ꓾ ꓞꓳ ꓡꓲꓽ ꓪ ꓚꓱꓹ ꓗꓪ ꓥˍ ꓟꓲ ꓓꓵꓽ ꓙ ꓟꓽ ꓜꓳꓽ ꓟ ꓕꓲ ꓟ ꓙꓳˍ ꓡꓳ= ꓕꓱ ꓟ ꓠꓬ ꓣꓳ ꓠꓬ ꓣꓳ ꓔꓯ ꓧꓳꓽ ꓣꓱꓽ ꓔꓬ ꓢꓴ꓾ ꓥ ꓠꓬ꓾ ꓬꓲ ꓡꓰ ꓬꓰ ꓔꓬ ꓟ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓟꓽ ꓢꓷꓸ ꓢꓷꓸ ꓐꓰ ꓦ ꓡꓱ ꓔꓬ ꓗꓴˍ ꓟ ꓦꓬꓼ ꓠꓬꓲ ꓙꓳˍ ꓡꓳ= ꓔꓯꓺ ꓥꓳꓽ ꓐꓯ ꓠꓬ ꓣꓳ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓪꓴ-ꓢ ꓔꓯ ꓓꓳ ꓟꓴ ꓫꓱꓸ ꓖꓶ꓾ ꓪꓴ-ꓢ ꓔꓯ ꓪꓽ ꓘꓴ ꓔꓬ ꓕꓯ ꓣꓳ ꓔꓯ ꓧꓳꓽ ꓣꓱꓽ ꓔꓬ ꓟ ꓟꓸ ꓒ ꓐꓴ꓾ ꓟꓸ ꓟ ꓐꓴ꓾ ꓔꓲꓺ ꓒ ꓔꓲꓺ ꓟ ꓐꓴ ꓔꓯ ꓡꓳꓸ ꓢꓲ ꓞꓳ ꓙꓳ ꓔꓬ ꓡꓳ= ꓕꓲ ꓖ ꓕꓲ ꓧꓪꓹ ꓠꓬ ꓬꓲ ꓪ ꓬꓰˍ ꓟ ꓐꓰ ꓬꓲ ꓪ ꓫ ꓕꓱˍ ꓟ ꓟꓽ ꓪꓽ ꓡꓯ ꓘꓳ ꓟ ꓦꓬꓼ ꓠꓬꓲ ꓥˍ ꓟꓲ ꓙꓳˍ ꓡꓳ= ꓬꓲ ꓪ ꓠꓬ ꓧˍ ꓟ ꓙꓲˍ ꓟ ꓕꓱ ꓔꓬ ꓥˍ ꓟꓲ ꓬꓲ ꓪ ꓬꓰ ꓔꓬ ꓟ ꓕꓲ ꓙꓰꓽ ꓟꓳˍ ꓡꓳ= ꓖꓳ ꓕꓯ ꓣꓳ ꓠꓲꓹ ꓟ ꓠꓬ ꓮ ꓡꓲ ꓐꓰ ꓗꓷ ꓡꓰˍ ꓡ= ꓪꓴ-ꓢ ꓔꓯ ꓦ ꓡꓱ ꓠꓲꓹ ꓟꓽ ꓫꓵ ꓟ ꓠꓲꓹ ꓟˍ ꓟꓲ ꓙꓳ ꓡ ꓗꓴˍ ꓡꓳ ꓟꓽ ꓥ ꓡ=

ꓕꓱ ꓟ ꓡꓰꓽ ꓟꓽ ꓞꓲ ꓣꓳ ꓠꓲꓹ ꓟ ꓠꓬ ꓓꓵꓽ ꓙ ꓟꓬꓽ ꓡ ꓢꓲ꓾ ꓣꓳ ꓟꓽ ꓒ ꓡꓰꓸ ꓕꓱ ꓡꓱ ꓬꓰ ꓔꓬ ꓫꓵꓽ= ꓣꓳ ꓔꓲꓺ ꓒ ꓡꓰꓸ ꓕꓱ ꓡꓱ ꓬꓰ ꓔꓬ꓾ ꓐꓯ ꓢꓲ ꓠꓲꓹ ꓟ ꓙꓬ ꓢꓲ ꓠꓬꓲ ꓠꓲꓹ ꓟ ꓒꓳꓹ ꓬꓰ ꓢꓴ ꓮ ꓟꓬꓹ ꓙꓳˍ ꓡꓳ= ꓕꓱ ꓟ ꓠꓬ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓣꓳ ꓔꓯ ꓫꓬꓽ ꓫꓬꓽ ꓡꓰꓽ ꓐꓯ ꓟꓳꓸ ꓖꓶ ꓡ ꓔꓬ ꓡꓳ= ꓟ-ꓕꓲ 23ꓽ1-12 ꓗꓪ ꓣꓳ ꓑ ꓙˍ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓠꓴ ꓪ ꓠꓬ ꓒ-ꓡꓲ-ꓢꓷ ꓐꓴ ꓐꓰ ꓟꓸ ꓒ ꓐꓴ ꓬꓲ ꓪ ꓬꓰˍ ꓟ ꓔꓯ ꓕꓽ ꓛꓳꓻ= ꓬꓲ ꓪ ꓐꓯ ꓘꓶꓽ ꓔꓯ ꓠꓬ ꓠ ꓠꓹ= ꓖꓳ ꓡꓱ ꓥˍ ꓟꓲ ꓬꓲ ꓪ ꓬꓰˍ ꓟ ꓡꓰ ꓕꓽ ꓬꓰ= ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓽ ꓟꓳ-ꓫꓲ ꓠꓬꓹ ꓖꓴ ꓠꓬꓲ ꓔ ꓢꓲ ꓬꓲ ꓪ ꓠꓬ ꓙꓵꓽ ꓪ ꓙꓳˍ ꓥ ꓟꓲ ꓬꓲ ꓪ ꓠꓬ ꓕꓱˍ ꓟ ꓕꓲ ꓙꓰꓽ ꓬꓰˍ ꓟ ꓕꓲ ꓙꓰꓽ ꓬꓰ ꓔꓬ ꓡꓳ= ꓖꓳ ꓡꓱ ꓠꓬꓲ ꓠꓴ ꓪ ꓠꓬ ꓬꓲ ꓪ ꓐꓯ ꓟ ꓬꓰ= ꓕꓱˍ ꓟ ꓔꓯ ꓖꓼ ꓛꓳꓻ= ꓖꓳ ꓡꓱ ꓥˍ ꓟꓲ ꓬꓲ ꓪ ꓬꓰˍ ꓟ ꓡꓰ ꓐꓰ ꓕꓽ ꓬꓰ ꓐꓰ ꓐꓯ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓐꓯ ꓘꓶꓽ ꓔꓯ ꓣꓳ ꓠ ꓠꓹ ꓠ ꓗˍ ꓡꓳ= ꓣꓳ ꓠꓬ ꓪꓴ-ꓢ ꓔꓯ ꓦ ꓡꓱ ꓔꓬ ꓟ ꓥ ꓡꓳ= ꓞꓳ ꓤ ꓔꓯ ꓦ ꓡꓱ ꓔꓬ ꓟ ꓟꓽ ꓥ= ꓞꓳ ꓤ ꓠꓬ ꓢꓯꓼ ꓐˍ ꓡꓳ= ꓬꓲ ꓪ ꓙꓲˍ ꓟ ꓬꓰˍ ꓟ ꓦꓬꓼ ꓠꓬꓲˍ ꓙꓳˍ ꓥꓳ= ꓟꓽ ꓙꓲꓻ ꓟ ꓬꓰˍ ꓟ ꓦꓬꓼ ꓠꓬꓲ ꓥˍ ꓟꓲ ꓙꓳˍ ꓥꓳ= ꓖꓳ ꓟ ꓔꓯ ꓡꓳꓸ ꓢꓲ ꓣꓳ ꓠꓬ ꓪꓴ-ꓢ ꓔꓯ ꓠꓲꓹ ꓦꓯꓸ ꓟꓽ ꓓ= ꓪꓴ-ꓢ ꓗꓪ ꓐꓰ ꓧꓶꓸ ꓙꓰ ꓟꓽ ꓓ= ꓮ ꓡꓲꓳ ꓐꓯ ꓠꓬ ꓣꓳ ꓦ ꓡꓱ ꓔꓬ ꓟ ꓠꓬ ꓪꓴ-ꓢ ꓥ ꓡꓳ= ꓞꓳ ꓤ ꓟꓽ ꓥ= ꓖꓳ ꓟ ꓔꓯ ꓡꓳꓸ ꓢꓲ ꓬꓲ ꓪ ꓬꓰˍ ꓟ ꓔꓯ ꓟꓽ ꓡꓳꓸ ꓡꓳꓸ ꓐꓰ ꓬꓲ ꓪ ꓡꓰ ꓪꓴ-ꓢ ꓚꓱꓹ ꓐꓯ ꓖꓶ ꓡˍ ꓟ ꓔꓯ ꓠ ꓠꓹ ꓢꓲ ꓛꓳ ꓔꓬ ꓠꓬ ꓶꓼ ꓙꓳ ꓫꓱꓹ ꓙꓳˍ ꓡꓳ= ꓶꓼ ꓤ ꓫꓱꓹ ꓤ ꓟꓶˍ ꓡꓳ ꓐꓯ ꓟ ꓫꓬꓽ ꓫꓬꓽ ꓡꓰꓽ ꓐꓯ ꓟꓳꓸ ꓖꓶ ꓡ ꓔꓬ ꓡꓳ=

ꓕꓱ ꓟ ꓡꓰꓽ ꓟꓽ ꓞꓲꓺ ꓣꓳ ꓥˍ ꓟꓲ ꓠꓬꓲꓸ ꓠꓬꓲ ꓕꓳ ꓶ ꓐꓳ ꓒ ꓡꓰ ꓐꓰ꓾ ꓒ-ꓡꓲ-ꓢꓷ ꓐꓴ ꓟꓸ ꓟꓲꓽ ꓚ ꓟꓸ ꓒ ꓐꓴ ꓡꓰ ꓐꓰ ꓣꓳ ꓥˍ ꓟꓲ ꓕꓲ ꓖ ꓕꓲ ꓧꓪꓹ ꓗꓷ ꓡꓰ ꓗꓴˍ ꓡꓳ= ꓢꓲꓺ ꓒ ꓬꓰ-ꓢꓴ ꓔꓯ ꓛꓳꓻ ꓢꓴ ꓕꓲ ꓖ ꓕꓲ ꓣꓳ ꓥˍ ꓟꓲ ꓬꓰˍ ꓟ ꓕꓲ ꓙꓰꓽ ꓫ ꓕꓱˍ ꓟ ꓕꓲ ꓙꓰꓽ ꓓꓹ ꓗꓴˍ ꓡꓳ= ꓕꓱ ꓟ ꓔꓯ ꓩꓼ ꓔ ꓠꓹ ꓟ꓾ ꓕꓱ ꓟ ꓓꓵꓽ ꓙ ꓗꓴꓸ ꓠꓹ ꓟ ꓠꓬꓲꓸ ꓠꓬꓲ ꓣꓳ ꓔꓯ ꓐꓯ ꓖꓶꓽ ꓡ ꓔꓬ ꓟ ꓥ ꓡꓳ= ꓣꓳ ꓠꓬ ꓠꓱꓸ ꓐꓯ ꓢꓴ ꓔꓯ ꓐꓯ ꓟꓸ ꓖꓶ ꓠꓹ ꓟ ꓮ ꓘꓶꓸ ꓢˍ ꓡꓳ= ꓖꓳ ꓡꓱ ꓥˍ ꓟꓲ ꓣꓳ ꓚꓲ ꓛꓬ ꓣꓳ ꓐꓯ ꓟꓳꓸ ꓖꓶ ꓠꓹ ꓟ ꓠꓬ ꓮ ꓘꓶꓸ ꓫˍ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓢꓯꓼ ꓪ ꓖꓶ ꓡ ꓔꓬ ꓡꓳ= ꓣꓳ ꓔꓯ ꓢꓷꓸ ꓡꓰ ꓓꓴ ꓟꓸ ꓖꓶ ꓡ ꓔꓬ ꓡꓳ= ꓣꓳ ꓕꓱˍ ꓟ ꓔꓯ ꓣꓳ ꓖꓼ ꓛꓳ= ꓕꓱ ꓡꓱ ꓬꓰˍ ꓠꓬ ꓶꓼ ꓙꓳ ꓫꓱꓹ ꓙꓳˍ ꓡꓳ=

ꓣꓳ ꓔꓯ ꓧꓳꓽ ꓣꓱꓽ ꓔꓬ ꓢꓴ꓾ ꓪꓴꓸ ꓓꓵꓺ ꓢꓴ ꓐꓴ ꓥˍ ꓟꓲ ꓬꓲ ꓪ ꓙꓲˍ ꓟ ꓬꓰ ꓔꓬ ꓟ ꓔꓯ ꓟꓳˍ ꓕꓯ ꓫꓱꓸ ꓖꓶ= ꓓꓳ ꓟꓴ꓾ ꓔꓯꓺ ꓢꓳ ꓓꓴ ꓬꓰ ꓡꓯ= ꓬꓲ ꓪ ꓟꓽ ꓙꓲꓻ ꓟ꓾ ꓥ ꓠꓬ꓾ ꓬꓲ ꓪ ꓕꓱˍ ꓟ ꓡꓰ ꓬꓲ ꓪ ꓟꓽ ꓬꓰ ꓔꓬ ꓕꓯ ꓠꓬ ꓬꓲ ꓪ ꓐꓱ ꓶ ꓪ ꓙꓲ ꓪꓽ ꓘꓴ ꓙ ꓖꓶ ꓢꓲ ꓠꓬꓲ ꓣꓳ ꓥˍ ꓟꓲ ꓬꓲ ꓪ ꓬꓰˍ ꓟ ꓔꓯ ꓟꓽ ꓔꓯꓺ ꓢꓳ ꓢꓳ꓾ ꓬꓲ ꓪ ꓐꓯˍ ꓟ ꓔꓯꓺ ꓢꓳ ꓢꓲ ꓢꓯꓼ ꓕꓵ ꓠ ꓗˍ ꓡꓳ= ꓝꓮꓲ ꓕꓲ ꓙꓰꓽ ꓠꓬ ꓣꓳ ꓚꓲ ꓛꓬ ꓢꓴ ꓔꓯ ꓐꓯ ꓟꓸ ꓖꓶˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓣꓳ ꓐꓯ ꓘꓶꓽ ꓔꓯ ꓣꓳ ꓒꓵꓽ ꓗ ꓬꓰ ꓢꓲ ꓛꓳꓻ ꓙꓰˍ ꓠꓬ ꓪꓴ-ꓢ ꓡꓰ ꓖꓶ ꓡˍ ꓟ ꓶꓼ ꓤ ꓫꓱꓹ ꓤ ꓪ ꓙꓲ ꓘꓳꓹ ꓣꓴ ꓟꓶˍ ꓥꓳ=