ꓙꓵꓽ ꓗ ꓟꓸ ꓒ ꓐꓴ ꓔꓯ ꓟꓳꓸ ꓐꓯ ꓓꓳ ꓡ ꓟ

ꓖꓳ ꓕꓯ ꓬꓰ-ꓢꓴ ꓠꓬ ꓡ ꓞꓳ ꓬꓲ ꓜꓴ ꓬꓲ ꓟꓯꓼ_ ꓐꓰ ꓬꓲ ꓛꓳ ꓒꓯ ꓐꓴ ꓔꓯ ꓕꓱ ꓡꓱ ꓐꓯ_ ꓡꓳ꓾

ꓕꓳ ꓶ ꓐꓳ ꓒ ꓐꓴ_ ꓐꓰ ꓒ-ꓡꓲ-ꓢꓷ ꓐꓴ ꓠꓬ ꓟꓳ-ꓫꓲ ꓠꓬꓲꓸ ꓠꓸ ꓖꓴ ꓗꓪ ꓠꓬꓲꓸ ꓠꓸ ꓔꓬ_ ꓡꓳ꓿

ꓖꓳ ꓡꓱ ꓠꓬꓲ ꓬꓲ ꓪ ꓡꓰ ꓠꓴ ꓪ ꓔꓯ ꓟꓸ ꓖꓶ_ ꓟ ꓮ ꓙꓵ ꓔꓯ ꓠꓬ ꓠꓴ ꓪ ꓒꓵꓽ ꓢꓲ ꓛꓳ ꓠ ꓗ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓲ ꓪ ꓬꓰ_ ꓟ ꓔꓯ ꓕꓽ ꓢꓳ꓾ ꓮ ꓡꓲꓳ ꓐꓯ ꓠꓬ ꓬꓲ ꓪ ꓐꓯ ꓠꓽ ꓐꓯ ꓢꓲ ꓟꓽ ꓬꓰ꓿

ꓬꓲ ꓪ ꓠꓬ ꓡꓲꓽ_ ꓟ_ ꓐꓰ ꓟꓯꓻ ꓫꓸ ꓟ ꓶꓻ ꓞꓳꓹ ꓢꓲ꓾ ꓞꓳ ꓤ ꓡꓯꓼ ꓒꓶꓻ ꓗꓪ ꓚꓰꓹ ꓖꓶ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓲ ꓪ ꓚꓲ ꓛꓬ ꓠꓽ ꓡꓯꓼ ꓠꓬꓲ ꓕꓲ ꓠꓬꓲ_ ꓟꓲ ꓶꓻ ꓔꓯ ꓡꓵꓺ ꓠꓲꓹ ꓟꓽ ꓫꓵ꓿

 

ꓬꓲ ꓪ ꓬꓰ_ ꓟ ꓮ ꓙꓵ ꓠꓬ ꓞꓳ ꓤ ꓔꓯ ꓟꓳꓻ ꓝꓲ_ ꓐꓰ ꓬꓰ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓒꓰꓹ ꓐꓳ ꓢꓲ ꓓꓱꓼ ꓔ_ ꓟ ꓕꓳ ꓶ ꓠꓬ ꓫꓬꓹ ꓦꓲꓺ_ ꓡꓳ꓾ ꓐꓵ ꓞꓶ ꓟꓶꓽ ꓬꓲ ꓟꓬꓸ_ ꓟꓲ ꓫꓬꓹ ꓫꓵꓺ_ ꓡꓳ꓿

ꓝꓮꓲ ꓠꓬ ꓑꓮꓲ ꓗꓪ ꓒꓵꓽ_ ꓟ ꓗꓳꓺ ꓖꓴ_ ꓐꓰ꓾ ꓜꓲꓼ ꓦꓲ ꓗꓪ ꓒꓵꓽ_ ꓟ ꓠꓬꓲꓸ ꓠꓸ ꓖꓴ_ ꓐꓰ꓾

ꓙꓵꓺ ꓗꓪ ꓒꓵꓽ ꓗ ꓬꓰ ꓡ_ ꓟ_ ꓐꓰ꓾ ꓡ ꓞꓳ ꓡꓰ꓾ ꓣ-ꓐꓲ꓾ ꓐꓰ ꓐꓯ ꓡ_ ꓟ ꓔꓯ ꓠꓲꓹ ꓫꓵ_ ꓡꓳ꓿

ꓢꓴ ꓠꓴ ꓪ ꓔꓯ꓾ ꓣ-ꓐꓲ꓾ ꓐꓰ ꓕꓽ ꓘꓴ ꓝꓲ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓟꓸ ꓒ ꓕꓲ ꓣꓳ_ ꓡꓰꓽ ꓙꓳ_ ꓡꓳ꓿ ꓠꓴ ꓪ ꓮ ꓙꓵ ꓠꓬ ꓬꓲꓼ ꓤ ꓠꓬꓲ ꓤ ꓥ ꓡꓳ꓿

ꓝꓮꓲ ꓠꓬ ꓟꓲ ꓠꓯ ꓗꓪ ꓟ ꓡ ꓞꓳ ꓔꓯ ꓐꓹ ꓐ ꓕꓽ ꓘꓴ꓿ ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓗꓪ ꓔꓬ_ ꓟ ꓬꓲ ꓕꓲ ꓣꓳ_ ꓡꓰꓽ ꓠꓴ ꓪ ꓐꓹ ꓐ ꓥ ꓡꓳ꓿

ꓢꓴꓻ ꓠꓴ ꓪ ꓔꓯ꓾ ꓢꓲꓺ ꓒ꓾ ꓕꓽ ꓘꓴ ꓝꓲ꓾ ꓮ ꓡꓲꓳ ꓐꓯ ꓠꓬ ꓠꓴ ꓪ ꓢꓲꓺ ꓒ ꓕꓲ ꓣꓳ_ ꓡꓰꓽ ꓙꓳ_ ꓡꓳ꓿ ꓕꓱ ꓟ ꓠꓬ ꓙꓲ-ꓢꓴ ꓥ ꓡꓳ꓿

 

11 ꓠꓴ ꓪ ꓗꓳ ꓡꓳ ꓗꓪ ꓪꓴꓽ ꓓꓰ ꓢꓴ ꓠꓬ꓾ ꓠꓴ ꓪ ꓔꓯ ꓣꓱꓽ ꓙ ꓢꓴ ꓬꓰ_ ꓥꓳ꓿

ꓚꓲ ꓛꓬ ꓔꓯ ꓓꓳꓹ ꓟꓴ ꓢꓴ ꓥ ꓕ ꓑꓳ ꓠꓬ ꓱꓺ ꓡꓰ_ ꓥꓳ꓿ ꓚꓲ ꓛꓬ ꓙꓻ ꓣꓳꓽ ꓢꓴ ꓔꓯ ꓠꓬ ꓓꓳꓹ ꓟꓴ_ ꓟ ꓗꓷ ꓡꓰ_ ꓥꓳ꓿

ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓕꓳ ꓶ ꓐꓳ ꓒ ꓐꓴ_ ꓐꓰ ꓒ-ꓡꓲ-ꓢꓷ ꓐꓴ ꓠꓴ ꓪ ꓠꓽ ꓫ ꓙꓵ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓠꓽ ꓞꓳ ꓤ ꓟꓲꓽ ꓙꓬ ꓗꓪ ꓟꓴ ꓗꓪ ꓗꓴꓷꓼ ꓗ ꓘꓶ ꓚꓵꓸ ꓔ_ ꓡꓳ꓿ ꓚꓲ ꓛꓬ ꓠꓽ ꓟꓽ ꓓꓵ ꓙꓰ꓾ ꓓꓵꓽ ꓙꓰ ꓔꓬ_ ꓟ ꓡ ꓞꓳ ꓔꓯ_ ꓟꓲ ꓠꓴ ꓪ ꓟꓽ ꓓꓵ ꓙꓰ ꓝꓲ꓿

ꓹꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓕꓳ ꓶ ꓐꓳ ꓒ ꓐꓴ_ ꓐꓰ ꓒ-ꓡꓲ-ꓢꓷ ꓐꓴ ꓠꓴ ꓪ ꓠꓽ ꓫ ꓙꓵ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓠꓽ ꓟꓶꓽ ꓛꓵꓽ ꓟ ꓐꓴ ꓦꓲ ꓦꓴꓺ ꓜꓽ ꓢꓲ꓾ ꓢꓴ ꓔꓯ ꓗꓶꓸ ꓠꓹ ꓟ ꓮꓽ ꓫꓵꓹ ꓫꓵ ꓐꓰ ꓪ ꓘꓴ_ ꓡꓳ꓿ ꓖꓳ ꓡꓱ ꓠꓬꓲ ꓪ ꓜꓲ ꓡꓲꓽ_ ꓟ ꓛꓬꓻ ꓒꓵꓽ ꓠꓴ ꓪ ꓟꓶ_ ꓥꓳ]꓿

ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓕꓳ ꓶ ꓐꓳ ꓒ ꓐꓴ_ ꓐꓰ ꓒ-ꓡꓲ-ꓢꓷ ꓐꓴ ꓠꓴ ꓪ ꓠꓽ ꓫ ꓙꓵ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓢꓲꓺ ꓤ ꓕꓲ ꓣꓳ ꓘꓶꓸ ꓟꓶ ꓠꓹ ꓟ꓾ ꓬꓲꓻ ꓡꓴ ꓐꓱ_ ꓐꓰ ꓟꓵꓽ ꓕꓯ ꓗꓳꓹ ꓕꓯ ꓚꓳ ꓙꓰ_ ꓡꓳ꓿ ꓘꓶꓸ ꓟꓶ ꓡꓰ ꓠꓬ꓾ ꓠꓴ ꓪ ꓠꓽ ꓬꓲ ꓔꓯ ꓠꓴ ꓪ ꓕꓯ ꓢꓲ ꓕꓲ ꓝꓸ ꓛꓬꓼ ꓟꓵꓽ ꓬꓲ ꓤꓽ ꓬꓰ ꓝꓲ_ ꓡꓳ꓿

Add new comment

1 + 15 =