ꓙꓵꓽ ꓗ ꓟꓸ ꓒ ꓐꓴ ꓔꓯ ꓟꓳꓸ ꓐꓯ ꓓꓳ ꓡ_ ꓟ

ꓟ-ꓕꓲ 23ꓽ1-12

ꓠꓬꓲꓸ ꓠꓬꓲ ꓣꓳꓽ ꓑ ꓙ ꓗꓷ ꓟ ꓶꓼ ꓓꓳ ꓫꓱꓹ ꓓꓳ ꓕꓳꓽ ꓶ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓡꓲꓽˍ ꓟ ꓶꓻ ꓫꓬꓹ ꓢꓲ ꓡ ꓞꓳ ꓐꓴ ꓡꓯꓼ ꓒꓶ ꓗꓪ ꓚꓰꓹ ꓖꓶˍ ꓟ ꓒ-ꓡꓲ-ꓢꓷ ꓐꓴ ꓔꓯ ꓟꓳꓸ ꓐꓯˍ ꓟ ꓟꓸ ꓟꓲꓽ ꓥ ꓡꓳ= ꓣꓳ ꓑ ꓙ ꓗꓷ ꓟ ꓡꓰ ꓐꓰ ꓬꓲ ꓪ ꓠꓬ ꓙꓵꓽ ꓗ ꓮ ꓟꓬꓹ ꓫꓬꓹ ꓢꓲ ꓬꓲ ꓪ ꓚꓲꓸ ꓛꓬ ꓠꓬ ꓟꓽ ꓛꓳ ꓫꓱꓽ ꓥˍ ꓟꓲ ꓢꓴ ꓔꓯ ꓠꓽ ꓙꓵꓽ ꓗ ꓖꓳ ꓟ ꓔꓯ ꓛꓳ ꓫꓱꓽ ꓝꓲˍ ꓡꓳ= 

ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓽ ꓖꓳ ꓡꓱ ꓟꓽ ꓥ= ꓟ-ꓕꓲ 11ꓽ28 ꓗꓪ "ꓢꓯꓼ ꓕꓵꓼ ꓪꓴꓽ ꓧꓶ ꓢꓲ ꓶꓻ ꓡꓲꓽ ꓓꓽ ꓟ ꓟꓯꓻ ꓢꓴ ꓠꓴ ꓪ ꓮ ꓙꓵꓽ ꓥꓪ ꓔꓯ ꓡꓯ= ꓥꓪ ꓡꓰ ꓠꓴ ꓪ ꓔꓯ ꓪꓴꓽ ꓧꓶ ꓠꓽ ꓝꓲˍ ꓥꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓡꓳ= ꓬꓲ ꓠꓬ ꓣꓳ ꓶꓻ ꓔꓯ ꓡꓳꓻ ꓡꓰ ꓝꓲ ꓢꓴ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓔꓯ ꓛꓳ ꓢꓴ ꓐꓴ ꓔꓯ ꓡꓲꓽˍ ꓟ ꓶꓻ ꓟꓽ ꓚꓰꓹ ꓖꓶ= ꓟꓲ ꓠꓯ ꓞꓳ ꓤ ꓐꓴ ꓡꓯꓼ ꓒꓶ ꓗꓪ ꓣꓱꓽ ꓟꓽ ꓝꓳꓹ ꓟ꓾ ꓣꓱꓽ ꓟꓽ ꓬꓯꓼ ꓟ ꓶꓻ ꓐꓴ ꓔꓯ ꓣꓴ ꓦ ꓗꓷ ꓢꓲ꓾ ꓡꓳꓻ ꓡꓰ ꓝꓲ ꓢꓴ ꓥ ꓡꓳ=

ꓟꓲ ꓠꓯ ꓞꓳ ꓤ ꓥ ꓟ ꓣꓳꓽ ꓐꓴ ꓠꓬ꓾ ꓣꓳ ꓕꓲ ꓤꓶꓻ ꓡꓱꓸꓼ ꓗꓪ ꓕꓲ ꓚꓱꓹ ꓟꓽ ꓥ ꓕꓲ ꓚꓱꓹ ꓗꓪ ꓐꓰ ꓡꓲꓽˍ ꓟ ꓶꓻ ꓟꓯꓻ ꓔꓬ ꓪˍ ꓡꓳ= ꓠꓲꓹ ꓫ ꓟꓬ ꓫˍ ꓟ ꓶꓻ꓾ ꓫꓸ ꓙꓵ ꓟꓷꓼ ꓙꓵˍ ꓟ ꓶꓻ꓾ ꓝꓴꓲꓸ ꓶꓻ꓾ ꓠꓻ ꓤ ꓒꓬꓽ ꓤ꓾ ꓒꓴ ꓟꓽ ꓙꓳ ꓟ꓾ ꓦꓲꓻ ꓘꓴꓽ ꓗꓪ ꓟꓽ ꓢꓲ ꓡꓲ ꓟꓽ ꓗꓹ ꓛꓲ ꓟ꓾ ꓢꓴ ꓡꓰ ꓠꓬꓲꓸ ꓤꓲˍ ꓟ꓾ ꓗꓴꓷꓼ ꓘꓶꓻ ꓡꓶˍ ꓟ꓾ ꓕꓱ ꓟꓬ ꓟ ꓶꓻ ꓔꓯ ꓟꓯꓻ ꓔꓬ ꓪ ꓡꓳ=

ꓖꓳ ꓡꓱ ꓐꓯ ꓥ ꓟꓲ ꓶꓻ ꓕꓲ ꓐꓱ ꓔꓯ ꓠꓬ ꓟꓽ ꓟꓯꓻ ꓟꓽ ꓓ ꓟꓯꓻ ꓠ ꓗꓹ ꓡꓳ= ꓖꓳ ꓟ ꓠꓬ ꓠꓵꓻ ꓠꓲꓹ ꓶꓻ ꓥ ꓡꓳ= ꓢꓴ ꓔꓯ ꓖꓶˍ ꓟ ꓗꓪ ꓐꓰ ꓟꓶ ꓡˍ ꓟ ꓘꓳ ꓣꓴ ꓟꓶˍ ꓟ꓾ ꓣꓳ ꓔꓯ ꓚꓱꓹ ꓬꓲꓼ ꓡˍ ꓟ ꓠꓵꓻ ꓠꓲꓹ ꓶꓻ ꓥ ꓡꓳ= ꓕꓱ ꓟ ꓠꓬ ꓢꓴ ꓔꓯ ꓠꓵꓻ ꓠꓲꓹ ꓟꓸ ꓖꓶ ꓠꓹ ꓟ ꓔꓯ ꓐꓯˍ ꓟ ꓥ ꓡꓳ=

ꓢꓲ ꓒ ꓬꓰ-ꓢꓴ ꓠꓬ ꓠꓱꓸ ꓐꓯ ꓢꓴ ꓔꓯ ꓟꓽ ꓣꓱꓽ ꓞꓹ ꓟ ꓶꓻ꓾ ꓣꓱꓽ ꓟꓽ ꓝꓳꓹ ꓟ ꓶꓻ ꓚꓰꓹ ꓖꓶ ꓢꓴ ꓔꓯ ꓝꓴꓲꓸ ꓓꓰˍ ꓡꓳ= ꓣꓳ ꓐꓴ ꓥˍ ꓟꓲ ꓒ-ꓡꓲ-ꓢꓷ ꓐꓴ ꓡꓰ ꓐꓰ ꓢꓴ ꓔꓯ ꓡꓲꓽˍ ꓟ ꓶꓻ ꓚꓰꓹ ꓖꓶˍ ꓕꓯ꓾ ꓣꓳ ꓐꓯ ꓘꓶꓽ ꓕꓲ ꓘꓶꓽ ꓗꓪ ꓐꓰ꓾ ꓥ ꓠꓬ꓾ ꓣꓳ ꓣꓱꓽ ꓬꓰˍ ꓟ ꓗꓪ ꓐꓰ ꓢꓴ ꓔꓯ ꓠꓲꓹ ꓟ ꓫꓸ ꓡꓰ ꓝꓲˍ ꓕꓯ ꓣꓳꓽ ꓠꓬ ꓝꓴꓲꓸ ꓒꓬꓱꓼ ꓡˍ ꓡꓳ=  ꓖꓳ ꓡꓱ ꓟꓽ ꓬꓰ ꓬꓰ꓾ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓡꓲꓽˍ ꓟ ꓶꓻ ꓔꓯ ꓡꓳꓻ ꓡꓰ ꓝꓲ ꓠꓹ ꓟ꓾ ꓐꓯ ꓠꓲꓹ ꓫꓵˍ ꓟ ꓠꓬ ꓕꓲ ꓣꓳ ꓛꓳ ꓕꓲ ꓣꓳ ꓔꓳꓹ ꓙ ꓖꓶ ꓠꓹ ꓟ꓾ ꓕꓲ ꓣꓳ ꓟꓽ ꓐ ꓡ ꓗꓪ ꓕꓲ ꓣꓳ ꓬꓰ ꓙ ꓖꓶ ꓠꓹ ꓟ ꓪꓴ-ꓢ ꓡꓰ ꓠꓬꓲꓸ ꓠꓬꓲ ꓣꓳ ꓔꓯ ꓘꓴ ꓔꓬ ꓡꓳ=

ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓮ ꓙꓵꓽ ꓔꓯ ꓬꓰ ꓙ ꓔꓬ ꓡꓳ= ꓣꓳ ꓞꓳ ꓙꓳ ꓔꓬ ꓟ ꓗꓪ ꓮ ꓫꓵꓽ ꓔꓳꓹ ꓜꓳꓽ ꓡ ꓥ ꓟꓲ ꓢꓲ ꓒ ꓬꓲ ꓢꓯꓼ ꓪ ꓗꓪ ꓐꓰ ꓧꓪꓸ ꓡꓰ ꓐ ꓡ ꓠꓹ ꓟ ꓬꓲ ꓡꓰ ꓮ ꓕꓯ ꓟꓲ ꓣꓳ ꓔꓯ ꓬꓰ ꓙ ꓔꓬ ꓟ ꓥ ꓡꓳ=