ꓙꓵ ꓠꓲꓹ ꓐꓰ ꓠꓵ ꓠꓲꓹ ꓠꓬꓲꓽ ꓫꓵꓽ ꓟ ꓡꓳꓽ ꓡꓰ ꓠꓬ ꓓꓵꓽ ꓙ ꓮ' ꓓꓴ ꓓꓳꓺ ꓡ ꓟ

ꓠꓬꓲꓸ ꓠꓬꓲꓸ ꓟꓸ ꓟꓲꓽ ꓗꓪ ꓟꓯꓼ ꓕꓲꓽ ꓦꓬ ꓙꓵꓽ ꓒ ꓠꓬ ꓬꓲꓸ ꓚꓳ ꓒ ꓐꓱ ꓶ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓓꓰꓽ ꓡ ꓡꓳ= ꓬꓲꓸ ꓠꓬ ꓬꓲꓸ ꓚꓳ ꓑ ꓔꓯ ꓠꓲꓹ ꓠꓵ ꓡꓳ= ꓚꓳ ꓑ ꓐꓯ ꓟ ꓠꓬ ꓖꓳ ꓕꓯ ꓟ ꓦꓬꓼ ꓠꓬꓲ ꓗꓪ ꓮ ꓟꓽ ꓥˍ ꓟꓲ ꓟꓽ ꓒꓵꓽ ꓟꓽ ꓚꓬꓹ ꓔ꓾ ꓖꓳ ꓡꓱ ꓥˍ ꓟꓲ ꓟꓯꓼ ꓕꓲꓽ ꓦꓬ ꓙꓵꓽ ꓒ ꓕꓱ ꓕꓲꓽ ꓣꓳ ꓟ ꓠꓬ ꓮ ꓘꓶꓸ ꓓꓵꓽ ꓙ ꓟꓶ ꓓꓴ ꓥꓳ= ꓬꓲꓸ ꓔꓯ ꓠꓱꓸ ꓐꓯ ꓝꓲ ꓜ ꓓꓴ ꓟꓯꓼ ꓤ ꓜꓴ ꓜꓴ ꓔꓬꓹ ꓥˍ ꓟꓲ ꓬꓲꓸ ꓚꓳ ꓑ ꓠꓻ ꓔꓬ ꓕꓯ ꓬꓲꓸ ꓠꓬꓲ ꓡꓳꓸ ꓗꓪ ꓫꓵꓼ ꓖꓶꓽˍ ꓡꓳ= ꓬꓲꓸ ꓠꓬ ꓬꓲꓸ ꓚꓲꓸ ꓛꓬ ꓢꓯꓼ ꓪ ꓗꓪ ꓐꓰ ꓧꓪꓸ ꓟꓽ ꓓ ꓕꓯ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓙ ꓣꓳˍ ꓟ ꓠꓲꓹ ꓟ ꓡꓰ ꓓꓰꓽ ꓖꓶˍ ꓡ ꓡꓳ= ꓣꓳ-ꓟ ꓡ ꓞꓳ ꓐꓯ ꓟ ꓠꓬ ꓬꓲ-ꓢꓷ-ꓡꓰ ꓡꓰ ꓐꓰ ꓪꓴ-ꓢ ꓔꓯ ꓙꓵ ꓢꓴ ꓟꓽ ꓥ= ꓖꓳ ꓡꓱ ꓥˍ ꓟꓲ ꓕꓱ ꓬꓳ-ꓟ ꓟꓯꓼ ꓙꓵꓽ ꓒ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓙꓵˍ ꓡꓳ= ꓙ ꓣꓳ ꓟ ꓡꓰ ꓬꓲꓸ ꓚꓳ ꓑ ꓐꓱ ꓶ ꓓꓰꓽˍ ꓡꓳ= ꓬꓲꓸ ꓓꓰꓽ ꓟˍ ꓟꓲ ꓢꓴ ꓔꓯ ꓟꓽ ꓫꓱꓸ= ꓢꓲ ꓒ ꓬꓰ-ꓢꓴ ꓚꓲꓸ ꓛꓬ ꓡꓯ ꓟꓽ ꓛꓵꓽ ꓐꓯ ꓘꓶꓽ ꓕꓲꓽ ꓘꓶꓽ ꓙꓳˍ ꓕꓯ ꓠꓬ ꓥꓪ ꓚꓳ ꓑ ꓖꓳ ꓟ ꓠꓻ ꓔꓬꓹ ꓟ ꓗꓪ ꓐꓰ ꓓ ꓡꓰ ꓥꓳ ꓐꓰ ꓐꓯ ꓡꓳ= ꓢꓲ ꓒ ꓬꓰ-ꓢꓴ ꓡꓰꓸ ꓓꓵꓽ ꓙ ꓟꓶ ꓡꓰ ꓗꓪ ꓛꓲ ꓗꓷ ꓡꓰꓳ= ꓬꓲꓸ ꓓꓰꓽ ꓟ ꓡꓰ ꓒꓬꓱꓼ ꓡ ꓝꓲ ꓐꓰ ꓢꓲ ꓒ ꓬꓰ-ꓢꓴ ꓪꓵꓼ ꓘꓶꓽ ꓖꓶꓽ ꓗꓷ ꓠꓬ ꓚꓵꓺ ꓚꓵꓺ ꓓ ꓡꓰꓳ=

       ꓖꓳ ꓡꓱ ꓠꓬꓲ ꓠꓵ ꓠꓲꓹ ꓐꓰ ꓙꓵ ꓠꓲ ꓡꓳꓽ ꓡꓰ ꓠꓬ ꓪꓴ-ꓢ ꓖꓳ ꓗꓪ ꓔꓬꓹ ꓡꓳ ꓐꓯ ꓟ ꓬꓲꓸ ꓑꓰ ꓥˍ ꓐꓭ=