ꓙꓽ ꓣꓳˍ ꓟ ꓐꓰ ꓖꓴꓽ ꓘˍ ꓟ (Homily)

ꓘꓴ ꓜꓲꓼ ꓞꓳ ꓟꓶꓽ ꓘꓳꓼ 22 ꓠꓽ

ꓢꓰ-ꓣꓼ 3ꓽ 19-21ꓹ 30-31

ꓥꓪ ꓤꓽ ꓳ꓾ ꓠꓴ ꓬꓰ ꓠ ꓔ ꓟ ꓟꓬꓱꓽ ꓮꓽ ꓙꓵꓽ ꓔꓯ ꓠꓲꓹ ꓠꓵ ꓢꓲ ꓠꓲꓹ ꓒꓴ ꓒꓴ ꓐꓰ ꓬꓰ꓾ ꓖꓳ ꓕꓯ꓾ ꓠꓴ ꓠꓬ ꓡꓯꓽ ꓫꓵ ꓮꓽ ꓟꓬꓹ ꓖꓶ ꓔ ꓟ ꓡꓽ ꓞꓳ ꓢꓷꓸ ꓟꓽ ꓞꓲ ꓠꓴ ꓔꓯ ꓟꓬꓽ ꓠꓬꓲ ꓠꓲꓹ ꓠꓵꓹ ꓟ ꓘꓳꓹ ꓣꓴ ꓟꓶˍ ꓥꓳ= ꓠꓴ ꓟꓬꓽ ꓠꓲ ꓪꓴꓽ ꓡ ꓟꓴ ꓡ ꓕꓯ꓾ ꓟꓬꓽ ꓠꓬꓲ ꓠꓴ ꓠꓲꓹ ꓟ ꓱ ꓡꓰ ꓝꓲ= ꓖꓳ ꓕꓯꓽ ꓢꓲꓺ ꓒꓽ ꓟꓬꓽ ꓙꓬꓽ ꓗꓪ ꓟꓬꓽ ꓠꓬꓲ ꓠꓲꓹ ꓒꓴˍ ꓟ ꓘꓳꓹ ꓣꓴ ꓟꓶˍ ꓥꓳ= ꓮ ꓡꓲꓳ ꓐꓯ ꓠꓬ ꓢꓲꓺ ꓒꓽ ꓬꓲ ꓪꓽ ꓠꓬꓲꓹ ꓟ ꓢꓯꓼ ꓪꓽ ꓠꓬ꓾ ꓟꓴ ꓡꓳꓹ ꓬꓲ ꓟ ꓥ ꓠꓬꓲ꓾ ꓚꓵ. ꓛꓬꓽ ꓔꓯ ꓱ ꓡꓰ ꓝꓲ ꓔꓬꓹ ꓢꓴ ꓔꓯ ꓬꓲ ꓘꓳꓹ ꓣꓴˍ ꓡꓳ= ꓟꓬꓱ ꓓꓳꓽ ꓧꓪ ꓔꓬꓹ ꓢꓴ ꓫꓱꓹ ꓕꓯ ꓮ ꓟˍ ꓟꓲ ꓫꓬꓹ ꓔꓱꓹ ꓐ ꓡ?= ꓮ ꓡꓲꓳ ꓐꓯ ꓠꓬꓲ꓾ ꓟꓽ ꓙꓲ ꓟꓽ ꓫꓬꓹ ꓟ ꓠꓲꓹ ꓟ ꓬꓲ ꓠꓲꓹ ꓟ ꓗꓪ ꓐꓲ ꓡꓶꓽ ꓡꓰꓳ= ꓠꓲꓹ ꓟ ꓢꓲꓽ ꓢꓴ ꓠ꓾ ꓥꓳꓽ ꓙꓱ ꓐꓯ ꓘꓶꓽ ꓔꓯ ꓠꓲꓹ ꓡꓱ ꓢꓲ꓾ ꓠꓲꓹ ꓟ ꓗꓪ ꓓꓵꓽ ꓙꓽ ꓠꓬꓲ ꓔꓬˍ ꓡꓳ= ꓟꓸ ꓘꓶꓽ ꓑꓱ ꓘꓶꓽ ꓔꓯ ꓠꓺ ꓡꓳꓸ ꓢꓴ ꓟꓲ꓾ ꓢꓷꓸ ꓠꓲꓹ ꓙꓳ ꓢꓴ ꓟꓸ ꓒꓽ ꓔꓯ ꓠꓲꓹ ꓒꓴ ꓢꓻ ꓡꓰ ꓝꓲˍ ꓡꓳ=

ꓦꓲ-ꓐꓱ-ꓣꓴ 12ꓽ 18-19ꓹ 22-24

ꓠꓴ ꓪꓽ ꓠꓽ ꓫꓱꓹ ꓟꓶ ꓓꓻˍ ꓟ ꓐꓰ ꓮꓸ ꓔꓳꓸ ꓐꓬꓻ ꓞꓹ ꓟ ꓪꓽ ꓚꓲˍ ꓐꓰ꓾ ꓟꓴ ꓗꓴꓸ ꓠꓯꓺˍ ꓐꓰ ꓠꓯ ꓞꓲꓹ ꓟ ꓐꓰ ꓕꓳꓽ ꓥꓳꓽˍ ꓐꓰ꓾ 19 ꓐꓽ ꓡ ꓢꓯꓼˍ ꓐꓰ ꓫꓸ ꓕꓱˍ ꓟ ꓢꓯꓼ ꓔꓯ ꓕꓲꓺ ꓡ ꓟ ꓟꓽ ꓥ꓿ ꓢꓯꓼ ꓕꓱ ꓟ ꓔꓯ ꓑ ꓙꓽ ꓢꓴ ꓠꓬ꓾ ꓬꓲ ꓪꓽ ꓔꓯ ꓝꓮꓲ ꓟꓽ ꓫꓸ ꓕꓱ ꓡ ꓠꓹ ꓟ ꓓꓰꓽ ꓗꓷꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ ꓜꓲ-ꓬꓴ ꓪ ꓚꓲˍ ꓐꓰ꓾ ꓢꓯꓸ ꓔꓬ ꓟ ꓪꓴ-ꓢ ꓬꓲ ꓡꓳ ꓒꓱ꓾ ꓟꓴꓽ ꓗꓪ ꓗꓪ ꓟ ꓙꓱ-ꓣꓴ-ꓢ-ꓡꓱˍ ꓐꓰ꓾ ꓟꓴꓽ ꓗꓪ ꓝꓲ ꓓꓴ ꓬꓲ ꓔꓴ ꓬꓲ ꓟꓶꓽˍ ꓐꓰ꓾ 23 ꓟꓴꓽ ꓗꓪ ꓕꓯ ꓢꓲ ꓗꓪ ꓟꓬꓱ ꓐꓳ ꓔ ꓟ ꓤ ꓪꓴꓽ ꓐꓴ ꓘꓴ ꓜꓲ ꓞꓳ ꓔꓯ ꓕꓲ ꓡꓺꓳ꓿ ꓝꓮꓲ ꓠꓴ ꓪꓽ ꓠꓬ ꓞꓳ ꓫꓵꓽ ꓞꓳ ꓙꓰꓽ ꓔꓯ ꓐꓯ ꓟꓴ ꓘꓶꓽ ꓢꓴ ꓢꓲ ꓒꓽ ꓪꓴ-ꓢˍ ꓐꓰ꓾ ꓬꓲ ꓡꓰ ꓜꓳꓽ ꓓꓰ ꓡꓰ ꓝꓲ ꓟ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓢꓴ ꓐꓴ ꓦꓻˍ ꓐꓰ꓾ 24 ꓘꓶꓽ ꓫꓵꓽ ꓫꓵꓼ ꓜꓲꓽ ꓟꓳꓽ ꓣꓱꓽ ꓢꓴ ꓬꓰ-ꓢꓴˍ ꓐꓰ꓾ ꓮ-ꓐꓱ ꓫꓵꓽ ꓫꓸ ꓕꓱˍ ꓟ ꓕꓯ ꓢꓲ ꓙꓲˍ ꓟ ꓐꓯ ꓘꓶ ꓫꓸ ꓕꓱˍ ꓟ ꓬꓰ-ꓢꓴ ꓫꓵꓽ ꓔꓯ ꓕꓲ ꓡꓰˍ ꓟ ꓥ ꓡꓳ꓿

ꓡꓴ-ꓘ 14ꓽ 1ꓹ 7-14

ꓠꓽ ꓦꓬꓼ ꓠꓬꓲ ꓗꓪ ꓬꓰ-ꓢꓴ ꓠꓬ ꓒ-ꓡꓲ-ꓢꓷ ꓐꓴ ꓗꓪ ꓟ ꓙꓵꓽ ꓢꓴ ꓕꓲ ꓣꓳ ꓦꓲ ꓗꓪ ꓜ ꓜꓽˍ ꓐꓰ ꓓꓵꓽ ꓡꓰˍ ꓡꓳ꓿ ꓬꓲ ꓪꓽ ꓠꓬ ꓬꓲ ꓔꓯ ꓬꓲ ꓜꓶꓻ ꓕꓺ ꓡꓳꓸ ꓔꓬ ꓡꓳ꓿ ꓪꓰ ꓤ ꓐꓴ ꓠꓬ ꓞꓳ ꓪꓴꓽ ꓠꓬꓲꓸ ꓠꓸ ꓖꓴ ꓔꓯ ꓢꓲ ꓣꓴꓻˍ ꓟ ꓔꓯ ꓬꓰ-ꓢꓴ ꓟꓳꓻˍ ꓕꓯ꓾ ꓔꓯ ꓥꓳꓽ ꓡꓰ ꓬꓲ ꓪꓽ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ꓿ 8 ꓠꓴ ꓪꓽ ꓔꓯ ꓤ ꓟꓶꓻ ꓝꓱ ꓑꓮꓲꓽ ꓗꓪ ꓢꓴ ꓡꓰ ꓘꓴꓻ ꓡ ꓕꓯ꓾ ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬꓲꓸ ꓠꓸ ꓖꓴ ꓗꓪ ꓕꓽ ꓠꓬꓲꓸ ꓠꓸ ꓬꓰ꓿ ꓟꓽ ꓥ ꓠꓬ ꓦꓲ ꓢꓲ ꓒꓽ ꓡꓰ ꓠꓴ ꓢꓶꓸ ꓟꓽ ꓞꓲ ꓒꓵꓽˍ ꓟ ꓕꓲ ꓣꓳ ꓘꓴ ꓔ ꓟ ꓙꓳ ꓢꓲ꓾ 9 ꓠꓴˍ ꓐꓰ ꓖꓳ ꓕꓲ ꓣꓳ ꓔꓯ ꓘꓴ ꓢꓴ ꓡ ꓢꓲ ꓠꓴ ꓔꓯ꓾ ꓕꓱ ꓕꓲ ꓣꓳ ꓔꓯ ꓠꓬꓲꓸ ꓠꓸ ꓖꓴ ꓙꓵ ꓖꓶ ꓟꓴꓽ꓾ ꓐꓰ ꓐꓯ ꓡ ꓠꓬ꓾ ꓠꓴ ꓠꓽ ꓟꓽ ꓒꓵꓽ ꓟ ꓠꓬꓲꓸ ꓠꓸ ꓖꓴ ꓗꓪ ꓫꓸ ꓔꓳ ꓔꓳˍ ꓐꓰ ꓬꓯꓼ ꓙꓰ ꓠ ꓗꓷ ꓡꓰˍ ꓥꓳ꓿ 10 ꓢꓴ ꓡꓰ ꓠꓴ ꓔꓯ ꓘꓴ ꓡ ꓕꓯ꓾ ꓟꓽ ꓒꓵˍ ꓟ ꓠꓬꓲꓸ ꓠꓸ ꓖꓴ ꓗꓪ ꓧꓶꓸ ꓕꓯꓽ ꓠꓬꓲꓸ ꓠꓸ꓿ ꓖꓳ ꓡꓱ ꓠꓬ ꓠꓴ ꓔꓯ ꓘꓴ ꓢꓴ ꓛꓲ ꓡ ꓕꓯ꓾ ꓗꓪ ꓛꓳꓽꓳ꓾ ꓖꓼ ꓑꓳꓸ ꓟꓴˍ ꓟ ꓗꓪ ꓠꓬꓲꓸ ꓠꓸ ꓡꓯ꓾ ꓐꓰ ꓠꓴ ꓔꓯ ꓐꓯ ꓖꓶ ꓡ ꓥꓳ꓿ ꓖꓳ ꓕꓯ ꓠꓴˍ ꓐꓰ ꓕꓲꓽ ꓪꓺꓼ ꓜ ꓜꓽˍ ꓐꓰ ꓠꓬꓲꓸ ꓠꓸ ꓔꓬ ꓢꓴ ꓮꓽ ꓙꓵ ꓟꓲꓽ ꓙꓬ ꓗꓪ ꓠꓴ ꓠꓬ ꓟꓬꓱ ꓓꓳꓽ ꓙꓳˍ ꓥꓳ꓿ 11 ꓮ ꓡꓲꓳ ꓐꓯ ꓠꓬ ꓬꓲ ꓚꓲꓸ ꓛꓬ ꓔꓯ ꓓꓳꓹ ꓟꓴ ꓢꓴ ꓥ ꓕ ꓑꓳꓸ ꓠꓬ ꓱ'ꓺ ꓡꓰˍ ꓥꓳ꓿ ꓚꓲꓸ ꓛꓬ ꓔꓯ ꓙꓻ ꓣꓳꓽ ꓡꓰ ꓝꓲ ꓢꓴ ꓠꓽ ꓓꓳꓹ ꓟꓴˍ ꓟ ꓟꓶˍ ꓥꓳ꓾ ꓐꓯˍ ꓡꓳ꓿ 12 ꓖꓳ ꓗꓸ ꓠꓯꓸ ꓬꓰ-ꓢꓴ ꓡꓰ ꓬꓲ ꓔꓯ ꓘꓴ ꓢꓴ ꓦꓲ ꓢꓲ ꓒꓽ ꓔꓯ꓾ ꓠꓴ ꓠꓬ ꓢꓴꓻ ꓔꓯ ꓜ ꓘꓴꓻ ꓖꓶ ꓜꓽˍ ꓕꓯ꓾ ꓥ ꓠꓬ ꓟꓶꓼ ꓘꓶꓼ ꓜ ꓫꓬꓹ ꓖꓶ ꓜꓽ ꓕꓯ꓾ ꓠꓴ ꓗꓪ ꓛꓳꓽ ꓐꓴ ꓔꓯ ꓥ ꓟꓲ꓾ ꓠꓴ ꓬꓲꓼ ꓠꓴ ꓠꓬꓲ ꓐꓴ ꓔꓯ ꓥ ꓟꓲ꓾ ꓠꓴ ꓫꓵꓽ ꓠꓴ ꓧꓪ ꓐꓴ ꓔꓯ ꓥ ꓟꓲ꓾ ꓜꓽ ꓓꓴ ꓓꓳꓻ ꓓꓴ ꓙꓳˍ ꓟ ꓠꓶꓽ ꓛꓳ ꓕꓲꓺ ꓛꓳ ꓐꓴ ꓔꓯˍ ꓟꓲ ꓕꓽ ꓘꓴ꓿ ꓟꓽ ꓥ ꓠꓬ ꓬꓲ ꓪꓽˍ ꓟꓲ ꓠꓴ ꓔꓯ ꓘꓴꓻ ꓚꓱꓹ ꓖꓶ ꓜꓽ ꓡ ꓥꓳ꓿ 13 ꓠꓴ ꓜꓻ ꓕꓲ ꓜ ꓫꓳꓺˍ ꓕꓯ꓾ ꓞꓳ ꓫꓸˍ ꓐꓰ ꓛꓲ ꓐꓬ ꓡꓯꓼ ꓐꓬ ꓢꓴˍ ꓐꓰ꓾ ꓛꓲꓺ ꓫꓳˍ ꓐꓰ ꓟꓬ ꓔꓶ ꓔꓯ ꓘꓴ ꓖꓶ ꓜꓽ꓿ 14 ꓬꓲ ꓪꓽ ꓠꓽ ꓠꓴ ꓔꓯ ꓮꓸ ꓫꓵ ꓡꓲꓸ ꓖꓶꓽ ꓓꓴ ꓟꓽ ꓙꓳ ꓠꓬꓲ꓾ ꓠꓴ ꓠꓬ ꓶꓼ ꓤ ꓫꓱꓹ ꓤ ꓟꓶ ꓢꓲ꓾ ꓔꓱꓹ ꓜꓳꓽ ꓢꓴ ꓐꓴ ꓢꓯꓸ ꓬꓲꓼ ꓡ ꓕꓯ ꓠꓴ ꓔꓯ ꓡꓲꓸ ꓖꓶ ꓡ ꓥꓳ꓾ ꓐꓯˍ ꓡꓳ꓿