ꓙ ꓖꓴ ꓗꓪ ꓛꓳꓽ ꓒꓯꓹ ꓠꓬꓲꓽ ꓣꓳ ꓔꓯ ꓟꓳꓸ ꓖꓶ_ ꓟ

ꓠꓴ ꓪ ꓠꓬ ꓬꓲ ꓔꓯ ꓟꓽ ꓟꓳ ꓠꓬꓲ_ ꓟꓲ ꓬꓲ ꓔꓯ ꓠꓲꓹ ꓠꓵ_ ꓡꓳ= ꓮ ꓟꓶ ꓬꓲ ꓔꓯ ꓟꓽ ꓟꓳ ꓥ ꓟꓲ ꓬꓲ ꓔꓯ ꓙꓵꓻ ꓢꓲ꓾ ꓠꓴ ꓪ ꓶꓻ ꓟꓬ ꓔꓯ ꓢꓯꓼ ꓟꓬ ꓝꓸ ꓟꓶ_ ꓟ ꓙꓵꓻ ꓠꓲꓹ ꓡꓰ ꓓꓱꓼ ꓓꓳ ꓡ_ ꓟ ꓐꓯ ꓖꓴ ꓟꓽ ꓓ ꓓ ꓠꓲꓹ ꓒꓴ ꓗꓹ ꓛꓲ_ ꓟ ꓙꓳ_ ꓡꓳ꓾ ꓐꓰ 1 ꓒꓲ-ꓕꓱ 1ꓽ 8-9 ꓗꓪ ꓐꓯ ꓔ ꓡꓳ= ꓕꓱ ꓟ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓡꓰ ꓬꓲ ꓔꓯ ꓟꓽ ꓟꓳ ꓠꓬꓲ ꓥ ꓟꓲ ꓬꓲ ꓔꓯ ꓙꓵꓻ ꓟ꓾ ꓠꓲꓹ ꓒꓴ ꓗꓹ ꓛꓲ_ ꓟ ꓥꓳ= ꓝꓮꓲ ꓢꓲ ꓒ ꓬꓰ-ꓢꓴ ꓫꓵꓻ ꓟ ꓗꓪ ꓐꓰ ꓢꓯꓸ ꓬꓲꓼ ꓡ ꓟ ꓠꓬ ꓣꓳ ꓔꓯ ꓥꓳ ꓡꓳꓸ ꓓꓴ ꓖꓶ_ ꓟ ꓬꓲꓸ ꓚꓰꓻ ꓓꓽ ꓟ ꓥ ꓡꓳ= ꓙꓵꓻ ꓠꓲꓹ ꓙꓳ ꓢꓴ ꓐꓴ ꓣꓳ ꓥ ꓟꓲ ꓢꓯꓸ ꓔꓬ ꓟ ꓪꓴ-ꓢ ꓔꓯ ꓙꓵꓻ ꓢꓲ꓾ ꓬꓲ ꓟꓬꓱꓺ ꓓꓳꓽ ꓔꓯ ꓠꓲꓹ ꓒꓴ ꓗꓹ ꓛꓲ ꓡꓯ=

ꓠꓬꓲꓸ ꓠꓬꓲ ꓟ ꓢꓲ ꓫꓬ ꓕꓳ ꓶ ꓗꓪ ꓥ ꓟꓲ ꓛꓳꓽ ꓒꓯꓹ ꓠꓬꓲ ꓣꓳ ꓠꓬ ꓬꓲ-ꓟ-ꓪꓴ-ꓢꓶ ꓟꓬꓱ ꓔ ꓟ ꓘꓹ ꓕꓲ ꓘꓹ ꓗꓪ ꓙꓰ ꓔꓬ ꓕꓯ ꓬꓰ-ꓢꓴ ꓔꓯ ꓜꓲ ꓥ ꓟꓲ ꓟꓳ ꓥ ꓟꓲ ꓬꓲ ꓪ ꓠꓬ ꓬꓰ-ꓢꓴ ꓐꓰ ꓟꓽ ꓓꓵꓽ ꓙ ꓔꓬ ꓟ ꓥꓳ= ꓝꓮꓲ ꓘꓹ ꓕꓲ ꓘꓹ ꓗꓪ ꓛꓲ ꓬꓰ ꓕꓯ ꓬꓲ ꓪ ꓐꓰ ꓕꓲ ꓪ ꓔꓲꓹ ꓠꓹ ꓟ ꓔꓬ ꓠꓹ ꓟ ꓐꓯ_ ꓟ ꓑꓶ ꓓꓴ ꓬꓰ-ꓢꓴ ꓬꓲ ꓪ ꓐꓰ ꓔꓬ ꓠꓹ ꓟ ꓓꓵꓽ ꓙꓰ ꓡꓳ= ꓬꓲ ꓪ ꓐꓰ ꓕꓲ ꓪ ꓜ ꓜ ꓐꓰ ꓗꓳ ꓔꓬ ꓕꓯ꓾ ꓬꓰ-ꓢꓴ ꓡꓰ ꓑ ꓑ ꓣꓴ ꓢꓲ ꓶꓼ ꓥꓳꓽ ꓙꓱꓽ ꓢꓲ ꓠꓬꓲ ꓦꓶꓹ ꓢꓲ ꓬꓲ ꓪ ꓔꓯ ꓖꓶ ꓜ ꓗꓷ ꓗꓸ ꓠꓯꓸ ꓬꓲ ꓪ ꓠꓬ ꓬꓲ ꓪ ꓐꓰ ꓕꓲ ꓪ ꓙꓻ ꓫꓱꓽ ꓡ ꓢꓴ ꓠꓬ ꓮꓽ ꓟ ꓥ ꓟ ꓔꓯ ꓡꓳꓸ ꓢꓷꓸ ꓟ ꓚꓱꓹ ꓥ ꓡꓳ=

ꓬꓲ ꓪ ꓙꓵꓻ_ ꓟ ꓢꓲ ꓒ ꓬꓰ-ꓢꓴ ꓠꓬ ꓡꓯ ꓐꓳ ꓔꓶꓸ ꓓꓴ ꓕꓯ ꓢꓲ ꓫꓵꓻ ꓢꓲ ꓢꓯꓸ ꓬꓲꓼ ꓡ ꓥꓳ ꓐꓰ ꓟꓽ ꓓꓵꓽ ꓙ ꓔ ꓟ ꓥꓳ= ꓖꓳ ꓟ ꓑꓶ ꓓꓴ ꓬꓲ ꓪ ꓠꓬ ꓥꓳ ꓡꓳꓸ ꓓꓴ ꓟꓶꓽ ꓡꓰ ꓟ ꓗꓪ ꓐꓰ ꓝꓮꓲ ꓒꓳꓹ ꓔꓴ ꓟꓽ ꓐ ꓡ ꓝꓮꓲ ꓢꓯꓼ ꓪ ꓣꓴ ꓟꓽ ꓐ ꓡ꓾  ꓠꓲꓹ ꓟ ꓫꓸ ꓔ ꓟ-ꓸ ꓘꓳꓹ ꓣꓴ ꓟꓽ ꓐ ꓡ ꓟ-ꓸ ꓬꓲ ꓪ ꓠꓲꓹ ꓟ ꓘꓴꓽ ꓗꓪ ꓕꓱ ꓡꓱ ꓓꓵꓽ ꓙ ꓟꓶ ꓓꓴ ꓮ ꓟꓬꓹ ꓐꓰ ꓥ ꓡꓳ= ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓬ ꓬꓲ ꓪ ꓐꓰ ꓕꓲ ꓪ ꓙꓻ ꓫꓱꓽ ꓢꓲ ꓥꓳ ꓡꓳꓸ ꓓꓴ ꓠꓬꓲ ꓟꓳ ꓓꓴ ꓡꓯ ꓖꓶ_ ꓟ ꓔꓯ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓟꓳ ꓪ ꓡꓳ=

ꓕꓱ ꓛꓳ ꓒꓯꓹ ꓠꓬꓲ ꓣꓳ ꓡꓰ ꓐꓰ ꓣꓳ ꓥ ꓟꓲ ꓠꓲꓹ ꓟ ꓫꓸ ꓓꓴ ꓥꓳ ꓡꓳꓸ ꓓꓴ ꓟꓶꓽ ꓡꓰ ꓟ ꓑꓶ ꓓꓴ ꓣꓳ ꓠꓯꓼ ꓗꓪ ꓢꓲ ꓒ ꓬꓰ-ꓢꓴ ꓑ ꓕꓲ ꓗꓪ ꓔꓬ ꓥ ꓟꓲ ꓟꓽ ꓟꓳ ꓟꓽ ꓢꓷꓸ ꓔ ꓟ ꓙꓵꓹ ꓙꓳ_ ꓥꓳ= ꓖꓳ ꓟ ꓑꓶ ꓓꓴ ꓣꓳ ꓠꓯꓼ ꓗꓪ ꓮ ꓫꓵ ꓘꓶꓻ ꓡꓶꓽ ꓗ ꓕ ꓓꓴ ꓙꓳ ꓥ ꓟꓲ ꓙꓵꓻ ꓠꓲꓹ ꓐꓰ ꓕꓶ ꓕꓶ ꓡꓰ ꓙꓻ ꓫꓱꓽ ꓠꓬ ꓪꓴ-ꓢ ꓡꓰ ꓠꓬꓲ ꓟꓳ ꓓꓴ ꓥꓳ ꓡꓳꓸ ꓓꓴ ꓖꓶ_ ꓟ ꓣꓳ ꓑ ꓕꓲ ꓗꓪ ꓔꓬ ꓟ ꓔꓯ ꓣꓳ ꓟꓳ ꓪ ꓡ ꓥꓳ= ꓬꓰ-ꓢꓴ ꓠꓬ ꓠꓲꓹ ꓟ ꓑꓬ ꓡꓰ ꓢꓴ ꓫꓸ ꓔꓬ ꓢꓴ ꓐꓴ ꓐꓰ ꓕꓲ ꓪꓼ ꓙꓸꓹ ꓫꓱꓽ ꓔꓬ ꓟ ꓔꓯ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓢꓷꓸ ꓡꓰ ꓝꓲ_ ꓡꓳ= ꓥꓳ ꓡꓳꓸ ꓓꓴ ꓖꓶ ꓠꓹ ꓟ ꓮ ꓕꓯ ꓥ ꓟꓲ ꓣꓳ ꓐꓰ ꓕꓲ ꓪꓼ ꓔꓬ ꓡꓳ=