ꓚꓲ. ꓛꓬ ꓡꓯꓼ ꓐꓳ ꓔꓶ. ꓓꓴ ꓑꓶ. ꓔ ꓢꓲ ꓠꓬꓲ ꓢꓲꓺ ꓒ ꓔꓯ ꓛꓳ ꓠꓯ, ꓟ ( Take up Your Cross and Follow Me)

ꓚꓲ. ꓛꓬ ꓡꓯꓼ ꓐꓳ ꓔꓶ. ꓓꓴ ꓑꓶ. ꓔ ꓢꓲ ꓠꓬꓲ ꓢꓲꓺ ꓒ ꓔꓯ ꓛꓳ ꓠꓯ, ꓟ ( Take up Your Cross and Follow Me)

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓗꓪ ꓐꓰ 22 ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ (16ꓽ21‐27) ꓝꓲ ꓗꓪ  ꓝꓲ ꓗꓪ ꓐꓰ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ. ꓝꓲ ꓓꓴ ꓐꓴ ꓔꓯ ꓬꓲ ꓠꓬ ꓫꓵꓻ ꓢꓲ ꓝꓮꓲ ꓢꓯ. ꓬꓯꓼ ꓡ ꓟ ꓚꓱ, ꓔꓯ ꓐꓯ ꓟ ꓖꓶ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓙꓱ‐ꓣꓴ‐ꓢꓡꓱ ꓡꓳ ꓒꓱ  ꓗꓪ ꓫ. ꓙꓵ ꓟ ꓮ ꓟꓬ, ꓜꓲꓽ ꓠ ꓗ, ꓟ ꓐꓰ ꓢꓰꓼ ꓗꓷ ꓟꓲ ꓟ ꓔꓳ, ꓜꓳꓽ ꓢꓲ ꓢ ꓠꓬꓲ ꓕꓲ ꓠꓬꓲ ꓗꓪ ꓢꓯ. ꓬꓲꓼ ꓡ ꓠ ꓗ, ꓟ ꓚꓱ, ꓔꓯ ꓬꓲ. ꓝꓲ ꓓꓴ ꓐꓴ ꓔꓯ ꓐꓯ ꓟ ꓖꓶ ꓟ ꓥ ꓡꓳ꓿

ꓣꓳ‐ꓟ ꓪ ꓔꓲ ꓐꓴ ꓙꓵꓽ ꓟ ꓦꓬꓼ ꓠꓬꓲ ꓗꓪ ꓡꓯꓼ ꓐꓳ ꓔꓶ. ꓓꓴ ꓗꓪ ꓢꓰꓼ ꓗꓷ ꓢꓴ ꓐꓴ ꓠꓬ ꓟꓽ ꓙꓲ ꓟꓬꓱꓽ ꓬꓰ ꓢꓴ ꓐꓴ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓠꓬ ꓝꓴꓲ ꓟꓽ ꓙꓳˍ  ꓥ ꓟꓲ ꓣꓳ ꓟ ꓟꓯꓼ ꓐꓴ ꓡꓰ ꓢꓰꓼ ꓗꓷ ꓡ ꓡꓳ ꓐꓰ ꓐꓯ ꓟ ꓙꓵ, ꓕꓯ ꓝꓲ ꓓꓴ ꓒꓲ‐ꓕꓱ ꓠꓬ ꓟꓽ ꓙꓲˍ ꓟꓬꓱꓽ ꓬꓰ ꓢꓴ ꓫꓵꓻ ꓟ ꓔꓲ ꓗꓪ ꓫꓵꓻ ꓟ ꓔꓯ ꓟꓽ ꓘꓳ ꓣꓴ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓡꓯꓼ ꓐꓳ ꓔꓶ. ꓓꓴ ꓕꓯ ꓢꓲ ꓗꓪ ꓫꓵꓻ ꓙ ꓗꓷ ꓟ ꓠꓬ ꓬꓲ ꓝꓲ ꓓꓴ ꓐꓴ ꓐꓰ ꓣꓳ ꓝꓴꓲ ꓙꓳˍ ꓢꓴ ꓟꓲ ꓠꓯ ꓡ ꓞꓳ ꓮ ꓙꓵꓽ ꓢꓴ ꓐꓴ ꓐꓱ ꓶ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓮꓽ ꓟ ꓥ ꓟꓲ ꓥꓪ ꓔꓯ ꓛꓳ ꓠꓲ, ꓫꓵˍ ꓠꓬ ꓚꓲ ꓛꓬ ꓙꓲ ꓖꓴ ꓡꓳ ꓗꓷ ꓢꓲ ꓬꓲ ꓡꓯꓼ ꓐꓳ ꓔꓶ. ꓓꓴ ꓑꓱ. ꓔ ꓢꓲ ꓠꓬꓲ ꓥꓪ ꓔꓯ ꓛꓳ ꓡ ꓠꓯ, ꓡꓳ ꓐꓰ ꓝꓲ ꓐꓴ ꓔꓯ ꓘꓴꓽ ꓗꓷ ꓟ ꓥ ꓡꓳ꓿

ꓝꓮꓲ ꓢꓲꓺ ꓒ ꓗ ꓠꓯ, ꓛꓳ ꓠꓬ ꓝꓮꓲ ꓢꓲꓺ ꓒ ꓐꓱ ꓶ ꓢꓯꓼ ꓟꓬ, ꓖꓶ ꓗꓷ ꓠꓬ ꓬꓲ ꓚꓲ ꓛꓬ ꓢꓯꓼ ꓟꓬ ꓔꓯ ꓠꓲ, ꓥꓳ ꓢꓴ ꓮꓽ ꓟ ꓥ ꓟꓲ ꓬꓲ ꓢꓯꓼ ꓟꓬ ꓒꓲꓼ ꓬꓰ ꓥꓳ ꓭꓪ ꓐꓱ ꓶ ꓬꓲ ꓢꓯꓼ ꓟꓬ ꓔꓯ ꓟꓽꓠꓲ, ꓥꓳ ꓢꓴ ꓠꓽ ꓬꓲ ꓢꓯꓼ ꓟꓬ ꓧꓪ ꓟꓶˍ ꓥꓳ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓔꓯ ꓦꓻ ꓡꓰ ꓢꓴ ꓬꓲ ꓗ. ꓠꓯ, ꓢꓲ ꓗꓪ ꓛꓳ ꓔꓬ ꓟ ꓣꓳ ꓙꓲ‐ꓢꓴ ꓢꓴ ꓢꓲꓺ ꓤ ꓐꓴ ꓔꓯ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓚꓵ ꓒꓬꓱꓼ ꓠ, ꓟ ꓠꓴ ꓥꓪ ꓔꓯ ꓘꓴ ꓔꓬ ꓟ ꓥ ꓡꓳ꓿ ꓟꓲ ꓠꓯ ꓗꓪ ꓮ ꓡꓰ ꓐꓰ ꓢꓯ. ꓔꓬ ꓠ, ꓟ ꓔꓯ ꓡꓰ ꓣꓳ ꓢꓯꓼ ꓕꓵꓼ ꓢꓲ ꓠꓬꓲ ꓦꓻ ꓕꓲ ꓒꓳ, ꓗꓪ ꓢꓯꓼ ꓕꓵꓼ ꓠ, ꓟ ꓟꓲ ꓡꓰ ꓢꓴ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓟꓬ, ꓔꓬ ꓟ ꓥ ꓡꓳ꓿ ꓖꓳ ꓡꓱ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓬ ꓠꓴ ꓥꓪ ꓔꓯ ꓠꓵ ꓠꓲ ꓚꓵ ꓗꓪ ꓐꓰ ꓬꓲ ꓗ. ꓠꓯ ꓛꓳ ꓠ, ꓟ ꓮ ꓕꓯ ꓟꓲ ꓘꓴꓽ ꓔꓬ ꓟ ꓥ ꓡꓳ꓿

ꓟꓲ ꓠꓯ ꓒꓴ ꓫꓵꓽ ꓐꓱ ꓶ ꓣꓳ ꓢꓯꓼ ꓟꓬ ꓖꓶ ꓗꓷ ꓟ ꓕꓯ ꓢꓲ ꓢꓲꓺ ꓒ ꓐꓱ ꓶ ꓣꓳ ꓢꓯꓼ ꓟꓬ ꓔꓯ ꓖꓶ ꓠ, ꓟ ꓝꓮꓲ ꓢꓲꓺ ꓒ ꓐꓰ ꓛꓳ ꓫꓱ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓖꓶ ꓠ, ꓟ ꓢꓲꓺ ꓒ ꓡꓰ ꓠꓴ ꓥꓪ ꓔꓯ ꓐꓯ ꓖꓶ ꓔꓬ ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓥ ꓟꓲ ꓔꓱ ꓚꓵ ꓟ ꓙꓲ‐ꓢꓴ ꓢꓲꓺ ꓤ ꓢꓲꓺ ꓒ ꓒꓬꓱꓼ ꓡ ꓠ,  ꓟ ꓣꓳ ꓞꓳ ꓙꓳ ꓢꓯ. ꓔꓬ ꓓꓴ ꓬꓰ ꓡꓯ꓿

ꓣꓳ ꓚꓲ ꓛꓬ ꓡꓯꓼ ꓐꓳ ꓔꓶ. ꓓꓴ ꓔꓯ ꓑꓱ. ꓢꓲ ꓠꓬꓲ ꓢꓲꓺ ꓒ ꓠꓯ, ꓗꓪ ꓛꓳ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿