ꓚꓳ ꓑꓸ ꓡꓰ ꓬꓲ ꓢꓲ ꓒ ꓔꓯ ꓣꓱꓽ ꓙˍ ꓟ (ꓡꓴ-ꓘ = 17ꓽ7-10)

ꓡꓴ-ꓘ  17:7-10

ꓚꓳ ꓑꓸ ꓡꓰ ꓬꓲ ꓢꓲ ꓒ ꓔꓯ ꓣꓱꓽ ꓙˍ ꓟ ꓔꓯ ꓥꓳꓽ  ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ= ꓠꓴ ꓪ ꓗꓪ ꓟ ꓮ ꓡꓲ ꓕꓲ ꓣꓳ ꓠꓬ ꓚꓳ ꓑꓸ ꓙꓳ ꓢꓲ꓾ ꓬꓲ ꓠꓬ ꓦ ꓟꓲ ꓟꓽ꓾ ꓥ ꓠꓬ ꓮ ꓣꓳ ꓡꓳꓸ ꓢꓲ ꓬꓲꓼ ꓡˍ ꓕꓯ꓾ ꓬꓲ ꓔꓯ ꓮꓸ ꓟꓲꓸ ꓗꓳ ꓢꓲ ꓜ ꓜꓽ ꓡꓯ꓾ ꓐꓰ ꓐꓯ ꓖꓶˍ ꓥꓳ ꓪ? ꓬꓲ ꓠꓽ ꓬꓲ ꓚꓳ ꓑꓸ ꓔꓯ꓾ ꓙꓽ ꓧꓷꓹ ꓧꓷꓹ ꓢꓲ ꓥꓪ ꓔꓯ ꓟꓶꓽ ꓘꓶꓼ ꓜ ꓫꓬꓹ ꓖꓶ ꓜꓽ ꓡꓯ= ꓥꓪ ꓜꓽ ꓐꓳ ꓓꓳꓻ ꓐꓳ ꓡꓰ ꓕꓯꓽ ꓢꓲˍ ꓡꓰꓽ ꓠꓴ ꓜꓽ ꓓꓳ ꓛꓵˍ ꓡꓳ꓾ ꓐꓯˍ ꓥꓳ꓾ ꓟꓽ ꓥ ꓡ?

ꓬꓲ ꓚꓳ ꓑꓸ ꓠꓬ ꓬꓲ ꓢꓲ ꓒ ꓡꓰ ꓝꓲ ꓔ ꓟ ꓮ ꓙꓵꓽ ꓬꓰ ꓓꓳ ꓡꓰˍ ꓟꓲ꓾ ꓬꓲ ꓢꓲ ꓒ ꓠꓬ ꓬꓲ ꓔꓯ ꓫꓸ ꓟꓳ꓾ ꓟꓽ ꓐꓯ= ꓖꓳ ꓟˍ ꓡꓰ ꓐꓰ ꓠꓴ ꓪ ꓔꓯ ꓝꓲ ꓔ ꓟ ꓮ ꓙꓵꓽ ꓬꓰ ꓓꓳ ꓡꓰˍ ꓟꓲ ꓠꓴ ꓪ ꓠꓽ꓾ ꓥꓪ ꓠꓴꓽ ꓠꓬ ꓟꓽ ꓒꓵꓽ ꓟ ꓚꓳ ꓑꓸ ꓐꓴ ꓥꓳ= ꓥꓪ ꓠꓴꓽ ꓬꓰ ꓗꓷ ꓟ ꓠꓬ ꓥꓪ ꓠꓴꓽ ꓬꓰ ꓙꓲꓽ ꓙꓳˍ ꓡꓳ ꓫꓵꓽˍ ꓡꓰꓽ ꓥꓳ꓾ ꓐꓰ ꓐꓯ ꓠ ꓗꓹ ꓡꓳ꓾ ꓐꓯˍ ꓡꓳ=

ꓦ ꓟꓲ ꓟꓽˍ ꓟ ꓟꓬꓱꓽ꓾ ꓫꓵꓸ ꓟꓲ ꓗꓪ ꓮꓸ ꓣꓳ ꓡꓳꓸˍ ꓟ ꓟꓬꓱꓽ ꓐꓯ ꓟ ꓠꓬ ꓮ ꓘꓶꓸ ꓪꓴꓽ ꓧꓶ ꓢꓲ꓾ ꓠꓲꓹ ꓟ ꓫꓵ ꓢꓲ ꓠꓬꓲ ꓢꓯꓼ ꓩꓴ ꓪˍ ꓟ ꓟꓬꓱꓽ ꓥ ꓡꓳ= ꓠꓱꓸ ꓐꓯ ꓟꓬꓱꓽ ꓢꓶꓸ ꓟꓽ ꓞꓲꓺ ꓢꓯꓼ ꓩꓴ ꓪ꓾ ꓢꓯꓼ ꓣꓱꓽ ꓪˍ ꓟ ꓥ ꓡꓳ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓔꓯ ꓛꓳ ꓢꓴ ꓐꓴ ꓔꓯ ꓦꓻ ꓔꓯ ꓚꓬꓴꓸˍ ꓟ ꓟꓬꓱꓽ ꓔꓯ ꓬꓰˍ ꓕꓯˍ ꓟꓲ ꓦ ꓟꓲꓽ ꓟꓽ ꓢꓴ꓾ ꓮꓸ ꓣꓳ ꓡꓳꓸ ꓢꓴ ꓐꓴ ꓡꓰ ꓐꓰ ꓮ ꓘꓶꓸ ꓢꓯꓼ ꓩꓴ ꓢꓲ ꓢꓯꓼ ꓕꓵꓼ ꓠꓹ ꓟ ꓘꓴꓻ ꓔꓬ ꓟ ꓥ ꓡꓳ= ꓚꓵ ꓚꓵ ꓣꓳ ꓟꓬꓱꓽ ꓢꓲ ꓒ ꓠꓬ ꓢꓲ ꓒ ꓪꓴ-ꓢ ꓥ ꓢꓲ꓾ ꓣꓳ ꓐꓴ ꓠꓬ ꓪꓴ-ꓢ ꓬꓲ ꓚꓳ ꓑꓸ ꓐꓴ ꓡꓰꓽ ꓥ ꓡꓳ=

ꓖꓳ ꓟ ꓪꓴꓸ ꓠꓬꓲ ꓪꓴ-ꓢ ꓔꓯ ꓙꓵꓻˍ ꓟ ꓙꓵꓻ ꓠꓲꓹ ꓗꓪ ꓐꓰ ꓢꓯꓼ ꓕꓵꓼ ꓢꓲ ꓬꓰˍ ꓟ ꓗꓪ ꓐꓰ ꓣꓳ ꓐꓴ ꓧꓪꓸ ꓡꓰˍ ꓕꓯ꓾ ꓖꓳ ꓡꓱ ꓧꓪꓸ ꓡꓰ ꓟ ꓑꓶꓸ ꓓꓴ ꓣꓳꓽ ꓠꓬ ꓘꓶꓽ ꓘꓹ ꓟꓽ ꓛꓵ= ꓚꓲꓸ ꓛꓬ ꓪꓽ ꓘꓴ ꓖꓶ ꓗꓷ ꓟ ꓪꓴꓸ ꓠꓬꓲ꓾ ꓚꓲꓸ ꓛꓬ ꓡꓰ ꓬꓰ ꓙ ꓗꓷ ꓟ ꓑꓶꓸ ꓓꓴ꓾ ꓕꓲ ꓐꓱ ꓠꓬ ꓠꓻ ꓤ ꓒꓬꓽ ꓤ ꓓꓻ ꓡꓰ ꓟ꓾ ꓬꓲ ꓪ ꓤꓶꓻ ꓗꓪ ꓪꓴꓽ ꓡ ꓟꓴ ꓡ ꓟ꓾ ꓣꓳ ꓪꓽ ꓘꓴ ꓖꓶ ꓗꓷ ꓢꓴ ꓖꓳ ꓕꓲ ꓣꓳ ꓬꓲ ꓠꓲꓹ ꓟ ꓔꓯ ꓡꓶꓸ ꓗꓷ ꓟ ꓠꓬ ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓢꓯꓼ ꓪ ꓗꓪ ꓐꓰ ꓡꓰꓽ ꓥ ꓡꓳ= ꓣꓳ ꓠꓬ ꓓꓻˍ ꓟ ꓑꓶꓸ ꓓꓴ꓾ ꓣꓳ ꓢꓷꓸˍ ꓟ ꓑꓶꓸ ꓓꓴ꓾ ꓣꓳꓽ ꓪꓽ ꓠꓬꓲˍ ꓟ ꓑꓶꓸ ꓓꓴ ꓠꓽ ꓟꓽ ꓥ=

ꓖꓳ ꓟ ꓪꓴꓸ ꓠꓬꓲ ꓪꓴ-ꓢ ꓕꓲ ꓣꓳˍ ꓡꓰꓽ ꓮ ꓙꓵꓽ ꓟ ꓗꓪ ꓬꓳꓸ ꓚꓰꓽ ꓓꓰ ꓡꓰ ꓢꓴ ꓥ ꓡꓳ= ꓣꓳ ꓐꓴ ꓠꓬ ꓪꓴ-ꓢ ꓬꓲ ꓚꓳ ꓑꓸ ꓐꓴ ꓡꓰꓽ ꓥ ꓡꓳ ꓐꓯˍ ꓟ ꓔꓯ ꓮ ꓕꓯ ꓟꓲ ꓣꓷꓠꓸ ꓠ ꓗꓹ ꓡꓳ= ꓚꓳ ꓑꓸ ꓕꓲ ꓣꓳ꓾ ꓣꓱꓽ ꓙ ꓢꓴ ꓕꓲ ꓣꓳ ꓬꓰ ꓠ ꓔ ꓟ ꓟꓬꓱꓽ ꓠꓬ ꓡꓳꓹ ꓬꓰˍ ꓟ ꓟꓽ ꓙꓳ= ꓠꓬꓲꓸ ꓠꓬꓲ ꓬꓰ ꓗꓷ ꓠꓬ ꓟꓬꓱꓽ ꓕꓱ ꓟ ꓬꓰ ꓓꓳ ꓡꓰꓳ꓾ ꓐꓯˍ ꓟˍ ꓟꓲ ꓟꓽ ꓙꓳ ꓟ ꓥ ꓡꓳ= ꓕꓲ ꓠꓬꓲ ꓖꓴ ꓡꓰ ꓕꓯ ꓝꓮꓲ ꓕꓲ ꓠꓬꓲ ꓗꓪˍ ꓟꓲ ꓟꓬꓱꓽ ꓬꓰ ꓠ ꓔ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓚꓲꓸ ꓛꓬ ꓦꓻ ꓚꓬꓴꓸ ꓟꓶ ꓠꓹ ꓟ ꓐꓱ ꓶˍ ꓡꓰꓽ ꓟꓽ ꓞꓲꓺ꓾ ꓠꓱꓸ ꓐꓯ ꓢꓴ ꓐꓱ ꓶˍ ꓟꓲ ꓮ ꓕꓯ ꓟꓲ ꓪꓽ ꓘꓴ ꓙ ꓢꓲ꓾ ꓬꓰ ꓙ ꓖꓶ ꓠꓹ ꓟ ꓠꓬ ꓪꓴ-ꓢ ꓬꓲ ꓚꓳ ꓑꓸ ꓚꓳ ꓟ ꓐꓴ ꓥ ꓟ ꓣꓳ ꓐꓴ ꓶꓻˍ ꓡꓰꓽ ꓟꓽ ꓥ ꓡ? ꓣꓳ ꓬꓰ ꓠ ꓔ ꓟ ꓟꓬꓱꓽˍ ꓡꓰꓽ ꓟꓽ ꓥ ꓡ?