ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳ ꓔꓯ ꓝꓲ ꓩꓴ ꓗꓷˍ ꓟ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓟ-ꓘꓳ=6ꓽ7-13 ꓗꓪ ꓐꓯ ꓔ ꓟ ꓠꓬ꓾ ꓢꓲꓺ ꓒ ꓬꓰ-ꓢꓴ ꓠꓬ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓔꓯ ꓬꓲ ꓔꓬ ꓗꓪ ꓘꓴꓻ ꓔꓯꓹ ꓡ ꓢꓲ꓾ ꓠꓬꓲꓽ ꓣꓳ ꓠꓬꓲꓽ ꓣꓳ ꓐꓰ ꓝꓲ ꓩꓴ ꓗꓷ ꓪꓴꓸ ꓔꓴˍ ꓡꓳ= ꓝꓮꓲ ꓟꓽ ꓫꓬ ꓠꓲꓽ ꓔꓯ ꓙꓵꓽ ꓠꓹ ꓟ꓾ ꓬꓲ ꓡꓰ ꓬꓲ ꓪ ꓔꓯ ꓙꓵꓽ ꓪ ꓖꓶˍ ꓡꓳ꓾ ꓐꓰ ꓐꓯ ꓔ ꓡꓳ=ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓓꓵꓽ ꓙ ꓠꓬꓲ ꓠꓹ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓠꓬꓲꓽ ꓣꓳ ꓠꓬꓲꓽ ꓣꓳ ꓐꓰ ꓝꓲ ꓩꓴˍ ꓟ ꓥ ꓡꓳ= ꓮ ꓫꓵꓽ ꓪꓴ ꓠꓬꓲ ꓥ? ꓮ ꓡꓲꓳ ꓐꓯˍ ꓠꓬ ꓟꓸ ꓟꓲꓽ ꓚ ꓒ ꓕꓳꓽ ꓶ 4ꓽ9 “ꓠꓬꓲꓽ ꓣꓳ ꓠꓬ ꓕꓲ ꓣꓳ ꓢꓶꓸ ꓟꓽ ꓞꓲ ꓙꓲˍ ꓡꓳ=” ꓐꓰ ꓐꓯ ꓔ ꓟ ꓙꓳˍ ꓡꓳ= ꓟꓬꓱꓽ ꓬꓰˍ ꓟ ꓗꓪ ꓕꓲ ꓣꓳˍ ꓡꓰꓽ ꓬꓰˍ ꓟ ꓕꓯꓽ ꓢꓲ ꓠꓬꓲꓽ ꓣꓳ ꓬꓰˍ ꓠꓬ ꓟꓬꓽ ꓠꓬꓲ ꓬꓰ ꓟꓶˍ ꓟ ꓥꓳ= ꓖꓳ ꓡꓱ ꓥˍ ꓟꓲ ꓕꓱ ꓟ ꓕꓯꓽ ꓢꓲ ꓦꓻ ꓕꓲ ꓒꓳꓹ ꓗꓪ ꓕꓲ ꓣꓳ ꓛꓳꓽ ꓕꓲ ꓣꓳ ꓬꓰ ꓙ ꓔꓳꓹ ꓙ ꓟꓶˍ ꓥꓳ= ꓪꓴ-ꓢ ꓟꓬꓱꓽ ꓬꓰˍ ꓟ꓾ ꓪꓴ-ꓢ ꓬꓲ ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰˍ ꓟ ꓠꓬ ꓤꓹ ꓠꓬꓲ ꓓꓴ ꓮ ꓟꓬꓹ ꓔꓳꓹ ꓜꓳꓽˍ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓟꓸ ꓟꓲꓽ ꓚ ꓒ ꓕꓳꓽ ꓶ 4ꓽ10 ꓗꓪ “ꓬꓲ ꓪ ꓕꓲ ꓣꓳ ꓡꓱꓸ ꓗꓷ ꓐꓭ ꓠꓬ ꓕꓲ ꓣꓳ ꓠꓬ ꓬꓲ ꓛꓳ ꓒꓯ ꓔꓯ ꓖꓳꓻ ꓔꓴ ꓖꓶˍ ꓥꓳ”꓾ ꓐꓰ ꓐꓯ ꓔ ꓡꓳ=

ꓝꓮꓲ ꓕꓲ ꓫꓵꓽ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓕꓲ ꓠꓲꓹ ꓕꓲ ꓪ ꓟꓬꓱꓽ ꓬꓰ ꓐ ꓡ ꓠꓹ ꓟ ꓢꓳ ꓣꓴ ꓝꓲ ꓠꓲꓹ ꓫꓵˍ ꓟ ꓪꓴꓸ ꓠꓬꓲ ꓥ ꓡꓳ꓾ ꓐꓰ ꓐꓯ ꓓꓹ ꓡꓳ= ꓕꓱ ꓟ ꓠꓬ ꓕꓲ ꓣꓳ ꓔꓵꓸꓼ ꓬꓰˍ ꓟ ꓗꓪ ꓥꓳꓽ ꓡꓰ ꓓꓴ ꓛꓳꓸ ꓡꓰ ꓓꓴ ꓙꓳ ꓡˍ ꓟ ꓔꓯ ꓗꓽ ꓕ ꓖꓶˍ ꓟ ꓡꓰ: ꓟꓽ ꓞꓲꓺ ꓕꓲ ꓣꓳ ꓬꓰ ꓟꓽ ꓐ ꓡ ꓟ ꓗꓪ ꓝꓮꓲ ꓕꓲ ꓣꓳ ꓬꓰ ꓐ ꓡˍ ꓟ ꓥ ꓡꓳ= ꓘꓴ ꓜꓲꓼ ꓞꓳ ꓟꓬꓱꓽ ꓐꓰ ꓗꓴꓸ ꓙꓲ ꓙꓳ ꓢꓲ ꓠꓬꓲ ꓝꓲ ꓓꓴ ꓐꓴ ꓠꓬ ꓕꓲ ꓣꓳ ꓔꓵꓸ ꓬꓰ ꓗꓷˍ ꓟ ꓟꓽ ꓙꓳ= ꓕꓱ ꓟ ꓔꓯ ꓮ ꓠꓱ ꓘꓴ ꓜꓲꓼ ꓞꓳ ꓡꓰ ꓛꓳꓻ ꓫꓱꓽ ꓔꓬ꓾ ꓖꓼ ꓛꓳꓻ ꓔꓬ ꓟ ꓥ ꓡꓳ= ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓠꓬ ꓶꓼ ꓫ ꓠꓯꓹ ꓟ ꓜꓽ ꓪꓳꓽ ꓡꓳ ꓪꓳꓽ ꓠꓽ ꓟꓬꓽˍ ꓡꓳ꓾ ꓶꓼ ꓫ ꓢꓴ ꓠꓽ ꓠꓲˍ ꓡꓳ꓾ ꓐꓯ ꓟ ꓐꓯ ꓘꓶꓽ ꓔꓯ ꓣꓴ ꓢꓲ ꓪꓴ-ꓢ ꓟꓬꓱꓽ ꓬꓰˍ ꓟ ꓗꓪ ꓕꓲ ꓣꓳ ꓔꓵꓸꓼ ꓬꓰ ꓠꓹ ꓟ ꓠꓲꓹ ꓡꓶꓽ ꓙꓳ ꓡˍ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓟꓬꓱꓽ ꓬꓰˍ ꓟ ꓗꓪ꓾ ꓥ ꓠꓬ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓱꓽ ꓬꓰ ꓔꓬ ꓟ ꓗꓪ ꓧꓪꓸ ꓡꓰ ꓠꓲꓹ ꓫꓵˍ ꓕꓯ ꓠꓽ ꓢꓲꓺ ꓒ ꓬꓰ-ꓢꓴ ꓡꓰ ꓠꓬꓲꓽ ꓣꓳ ꓠꓬꓲꓽ ꓣꓳ ꓝꓲ ꓩꓴˍ ꓟ ꓬꓲ ꓚꓱꓹ ꓔꓯ ꓣꓱꓽ ꓢꓲ ꓬꓰ ꓠ ꓗꓹ ꓟ ꓥ ꓡꓳ=

Add new comment

8 + 3 =