ꓛꓳꓽ ꓒꓯꓹ ꓫꓵꓽ ꓞꓲ ꓣꓳ ꓔꓯ ꓝꓲ ꓩꓴ ꓗꓷˍ ꓟ

“ꓶꓼ ꓫ ꓠꓯꓹ ꓟ ꓜꓽ ꓪꓳꓽ ꓡꓳ ꓪꓳꓽ ꓠꓬ ꓚꓵ ꓚꓵ ꓟꓬꓽˍ ꓡꓳ= ꓖꓳ ꓡꓱ ꓥ ꓟꓲ ꓟꓬꓱꓽ ꓬꓰ ꓢꓴ ꓠꓽ ꓠꓲꓸˍ ꓡꓳ=”

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓡꓴ-ꓘ 10ꓽ1-12 ꓥ ꓡꓳ= ꓢꓲꓽ ꓫꓬ ꓕꓳꓽ ꓶ ꓗꓪ ꓟꓴꓽ ꓗꓪ ꓗꓴꓷꓼ ꓟꓸ ꓟꓲꓽ ꓚ ꓠꓹ ꓟ ꓐꓱ ꓶ ꓡꓳ ꓒꓱ ꓮ ꓙꓵꓽ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ 72 ꓣꓳ ꓔꓯ ꓝꓲ ꓩꓴˍ ꓟ ꓟꓸ ꓟꓲꓽ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓠꓬꓲꓸ ꓠꓬꓲ ꓗꓪ ꓝꓲ ꓩꓴ ꓔꓬ ꓟ ꓥ ꓡꓳ= ꓐꓯ ꓠꓲꓹ ꓫꓵˍ ꓟ ꓠꓬ ꓠꓴ ꓐꓰ ꓥꓪ ꓥˍ ꓟꓲ ꓖꓳ ꓟ ꓐꓰ ꓕꓲ ꓡꓰꓹ ꓬꓰ ꓠꓹ ꓟ ꓥ ꓡꓳ= ꓮ ꓟꓶ ꓗꓪˍ ꓟꓲ ꓫ ꓠꓯꓹ ꓟ ꓜꓽ ꓪꓳꓽ ꓡꓳ ꓪꓳꓽ ꓮ ꓟꓬꓹ ꓙꓳˍ ꓢꓰꓽ ꓡꓳ= ꓢꓲ ꓒ ꓠꓬ ꓧꓶꓸ ꓕꓯ ꓟ ꓕꓯꓽ ꓢꓲꓽ ꓟꓬꓱꓽ ꓬꓰ ꓢꓴ ꓮ ꓟꓬꓹ ꓣꓱꓽ ꓞꓹ ꓔꓬ ꓡꓳ=

ꓜꓽ ꓪꓳꓽ ꓡꓳ ꓪꓳꓽ ꓠꓽ ꓟꓬꓽˍ ꓡꓳ= ꓠꓬꓲꓸ ꓠꓬꓲ ꓟ ꓦꓬꓼ ꓠꓬꓲ ꓗꓪ ꓟꓲ ꓠꓯ ꓕꓱ ꓟ ꓗꓪ ꓔꓬ ꓟ ꓞꓳ ꓤ ꓮ ꓟꓬꓹ ꓠꓬ ꓪꓴ-ꓢ ꓔꓯ ꓟꓽ ꓢꓷꓸ ꓟ꓾ ꓥ ꓠꓬ꓾ ꓪꓴ-ꓢ ꓙꓳˍ ꓡꓳ ꓐꓯ ꓟ ꓔꓯ ꓟꓽ ꓙꓵꓻ ꓟ ꓮ ꓟꓬꓹ ꓙꓳ ꓔꓬ ꓡꓳ= ꓕꓲ ꓐꓱ ꓠꓬ ꓚꓲꓸ ꓛꓬ ꓐꓱ ꓶ꓾ ꓚꓲꓸ ꓛꓬ ꓟꓬꓱ ꓓꓳꓽ ꓪꓴꓽ ꓡ ꓠꓹ ꓟ ꓐꓱ ꓶ ꓪꓴ-ꓢ ꓟꓬꓱ ꓔꓯ ꓮ ꓔꓳ ꓞꓲꓹ ꓔ ꓢꓴˍ ꓟꓲ ꓮ ꓟꓬꓹ ꓙꓳˍ ꓡꓳ=

ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓤ ꓮ ꓟꓬꓹ ꓠꓬ ꓜꓽ ꓠꓬꓲ꓾ ꓓꓳ ꓠꓬꓲ꓾ ꓑꓬꓮꓪ ꓠꓬꓲ ꓬꓰ ꓢꓲ ꓚꓲꓸ ꓛꓬ ꓬꓲ ꓒꓵꓽ ꓔꓯ ꓞꓰꓻ ꓡꓰ ꓝꓲ ꓔꓬ ꓡꓳ= ꓢꓻˍ ꓟ ꓚꓱꓹ ꓗꓪ ꓡꓰꓽ ꓙ ꓫꓱꓽ ꓙꓰ ꓔꓬ ꓡꓳ= ꓕꓲꓽ ꓦꓲ ꓘꓴ ꓢꓴ ꓐꓴ ꓥˍ ꓟꓲ ꓐꓬ ꓡꓰ ꓔꓬ ꓟ ꓠꓬ ꓕꓲ ꓠꓬꓲ ꓔꓬ ꓕꓲ ꓠꓬꓲ ꓟꓬꓽ ꓠꓬꓲ ꓡꓳꓸ ꓟꓳꓻ ꓡ ꓔꓬ ꓡꓳ= ꓬꓲ ꓚꓱꓹ ꓮ ꓟꓬꓹ ꓗꓪ ꓪꓴꓽ ꓟꓴ ꓡ ꓔꓬ ꓟ ꓗꓴꓷꓼ ꓐꓴ ꓗꓪˍ ꓟꓲ ꓪꓴ-ꓢ ꓟꓲꓽ ꓙꓬ ꓗꓪ ꓪꓵꓼ ꓘꓶꓽ ꓖꓶ ꓢꓲ ꓡꓯꓽ ꓒꓯꓹ ꓝ ꓔ ꓟ ꓔꓯ ꓐꓬ ꓡꓰ ꓝꓲ ꓔꓬ ꓡꓳ= ꓕꓱ ꓟ ꓐꓴ ꓠꓬ ꓠꓬꓲꓸ ꓠꓬꓲ ꓗꓪ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓶꓼ ꓫ ꓠꓯˍ ꓟ ꓜꓽ ꓪꓳꓽ ꓡꓳ ꓪꓳꓽ ꓐꓴ ꓥ ꓡꓳ꓾ ꓐꓰ ꓐꓯ ꓓꓹ ꓡꓳ=

ꓣꓳ ꓗꓳ ꓡꓳ ꓗꓪ ꓡꓳꓸ ꓠꓬꓲˍ ꓕꓯ ꓕꓱ ꓟ ꓔꓯ ꓟꓳꓻ ꓪ ꓓꓹˍ ꓡꓳ= ꓣꓳ ꓚꓳ ꓡꓳ ꓡꓳ ꓗꓪ ꓡꓳꓸ ꓠꓬꓲˍ ꓕꓯ ꓕꓱ ꓟ ꓔꓯ ꓟꓳꓻ ꓐ ꓡˍ ꓡꓳ= ꓬꓲ ꓪ ꓐꓴ ꓠꓬ ꓣꓳ ꓶꓼ ꓫ ꓠꓯꓹ ꓟ ꓜꓽ ꓪꓳꓽ ꓡꓳ ꓪꓳꓽ ꓐꓴ ꓥ ꓠꓬꓲ꓾ ꓣꓳꓽ ꓐꓴ ꓠꓬ ꓣꓳꓽ ꓫꓸ ꓕꓱ ꓚꓱꓹ꓾ ꓣꓳꓽ ꓞꓳ ꓙꓳ ꓚꓱꓹ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓮ ꓡꓲ ꓥ ꓟ ꓔꓯ ꓣꓳꓽ ꓟꓸ ꓖꓶ ꓐ ꓡˍ ꓡꓳ=

ꓣꓳꓽ ꓠꓬ ꓢꓲ ꓒ ꓬꓰ-ꓢꓴ ꓐꓰ ꓕꓲ ꓪ ꓔꓬ ꓟ ꓑꓶꓸ ꓓꓴ ꓮ ꓫꓵꓽ ꓙꓳꓺ ꓟꓽ ꓛꓵ= ꓬꓲ ꓠꓬ ꓣꓳꓽ ꓣꓱꓽ ꓬꓰˍ ꓟ ꓮ ꓙꓵꓽ ꓗꓪ ꓬꓰ ꓙ ꓔꓳꓹ ꓙ ꓖꓶ ꓡˍ ꓥꓳ=