ꓛꓳꓽ ꓒꓯ, ꓞꓲ ꓠꓬꓲꓽ ꓣꓳ ꓔꓯ ꓢꓲˍ ꓟ

ꓡꓴ‐ꓘ꓿6ꓽ12‐19

ꓛꓳꓽ ꓒꓯ, ꓞꓲ ꓠꓬꓲꓽ ꓣꓳ ꓔꓯ ꓢꓲˍ ꓟ

ꓦꓬꓼ ꓠꓬꓲ ꓖꓳ ꓟ ꓗꓪ ꓬꓰ-ꓢꓴ ꓠꓬ ꓪꓽ ꓘꓴ ꓠꓹ ꓟ ꓪꓽ ꓚꓲ ꓗꓪ ꓓꓯ ꓙꓰ ꓢꓲ꓾ ꓕꓲ ꓦꓬꓼ ꓡꓱꓸꓼ ꓪꓴ-ꓢ ꓔꓯ ꓪꓽ ꓘꓴˍ ꓡꓳ꓿ ꓟꓲꓽ ꓕꓯꓽ ꓙꓲ ꓡ ꓕꓯ꓾ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓘꓴ ꓔꓯꓹ ꓡ ꓢꓲ꓾ ꓬꓲ ꓪꓽ ꓗꓪ ꓐꓰ ꓞꓲ ꓠꓬꓲꓽ ꓣꓳ ꓢꓲ ꓓꓳ ꓡ ꓢꓲ ꓠꓬꓲ꓾ ꓬꓲ ꓪꓽ ꓔꓯ꓾ ꓝꓲ-ꓓꓴ꓾ ꓐꓰ ꓟꓬꓱꓺ ꓖꓶˍ ꓡꓳ꓿ ꓕꓱꓻ ꓞꓲ ꓠꓬꓲꓽ ꓣꓳ ꓟ ꓠꓬ꓾ ꓒꓲ-ꓕꓱ ꓟꓬꓱ ꓔ ꓟ ꓢꓲ-ꓟꓴˍ ꓐꓰ ꓬꓲ ꓠꓬꓲ ꓤ ꓯ-ꓓꓱ-ꓣꓴ꓾ ꓬ-ꓗꓴˍ ꓐꓰ ꓬꓳ-ꓦ꓾ ꓒꓲ-ꓡꓲˍ ꓐꓰ ꓐ-ꓕꓳ-ꓡꓱ-ꓟꓲ꓾ ꓟ-ꓕꓲˍ ꓐꓰ ꓕꓳ-ꓟ ꓐꓰ ꓮ-ꓡꓱ-ꓒꓲ ꓬꓲ ꓮ ꓐꓲ ꓬ-ꓗꓴˍ ꓐꓰ ꓠꓲꓹ ꓡꓱ ꓢꓴ꓾ ꓐꓰ ꓘꓴˍ ꓟ ꓢꓲ-ꓟꓴˍ ꓐꓰ꓾ ꓬ-ꓗꓴ ꓬꓲ ꓤ ꓬꓴ-ꓔˍ ꓐꓰ ꓗꓸ ꓠꓯꓸ ꓕꓯ ꓢꓲ ꓒꓽ ꓔꓯ ꓪꓴꓽ ꓜ ꓢꓴ ꓒꓬꓱꓼ ꓡ ꓟ꓾ ꓘꓹ-ꓡꓲꓳ ꓢꓴ ꓬꓴ-ꓓ ꓕꓱ ꓞꓲ ꓠꓬꓲꓽ ꓣꓳ ꓥ ꓡꓳ꓿ 

ꓬꓰ-ꓢꓴ ꓠꓬ ꓬꓲ ꓪꓽˍ ꓐꓰ ꓬꓯꓼ ꓙꓰ ꓢꓲ꓾ ꓪꓽ ꓓꓰ ꓕꓲ ꓓꓰ ꓗꓪ ꓦꓰꓼ ꓞꓹ ꓡꓳ꓿ ꓖꓳ ꓗꓪ ꓬꓲ ꓛꓳꓽ ꓒꓯꓹ ꓐꓴ ꓬꓲ ꓜꓴ ꓓꓽ ꓟ ꓐꓰ꓾ ꓬꓴ-ꓔ ꓟꓵꓽ ꓮ ꓙꓵˍ ꓐꓰ ꓙꓱ-ꓣꓴ-ꓢ-ꓡꓱˍ ꓐꓰ ꓕꓲ-ꓬˍ ꓐꓰ ꓢꓲ-ꓓꓳ ꓟꓵꓽ ꓗꓪ ꓟ ꓬꓲꓻ ꓡꓴꓽ ꓐꓱ ꓓꓽ ꓟ ꓘꓶꓽ ꓗꓪ ꓐꓰ ꓡꓻ ꓟ ꓑ ꓫꓬꓼ ꓬꓲ ꓜꓴꓻ ꓓꓽ ꓟ ꓠꓬ꓾ ꓬꓲ ꓚ ꓟꓸ ꓖꓶˍ ꓟ ꓟꓸ ꓟꓲꓽ ꓔꓯ ꓠ ꓠꓹ ꓠꓹ ꓟ ꓐꓰ ꓠꓻ ꓫꓬꓹ ꓟꓶ ꓠꓹ ꓟ ꓡ ꓡꓳ꓿ ꓝꓮꓲ ꓟꓽ ꓫꓬ ꓠꓲꓽ ꓡꓰ ꓘꓶꓻ ꓡꓶꓽ ꓔꓬ ꓢꓴ ꓐꓴˍ ꓐꓰ꓾ ꓠꓻ ꓫꓵꓽ ꓠꓻ ꓙꓰ ꓠꓻ ꓔꓬ ꓢꓴ ꓐꓴ ꓔꓯ ꓫꓬꓹ ꓓꓻ ꓡꓰ ꓝꓲˍ ꓡꓳ꓿ ꓬꓰ-ꓢꓴ ꓖꓳ ꓓꓱꓽ ꓗꓪ ꓐꓰ ꓪꓽ ꓠꓬꓲˍ ꓟ ꓓꓳ ꓡ ꓢꓲ꓾ ꓬꓲ ꓪꓽ ꓮꓽ ꓙꓵ ꓢꓴ ꓔꓯ ꓫꓬꓹ ꓓꓻ ꓡꓰˍ ꓠꓬꓲ꓾ ꓡꓽ ꓞꓳ ꓬꓲ ꓜꓴ ꓮꓽ ꓙꓵ ꓠꓬ ꓬꓲ ꓔꓯ ꓫꓱꓹ ꓟꓶ ꓠꓹ ꓟ ꓢꓯꓼ ꓕꓵꓼˍ ꓡꓳ꓿

*****************************************************

ꓣꓳ ꓐꓴ꓾ ꓟꓬꓱꓽ ꓬꓰ ꓢꓴ ꓮ ꓙꓵꓽ꓾ ꓚꓲꓸ ꓛꓬ ꓔꓶ ꓙꓱꓼ ꓗꓪ ꓛꓲ ꓡꓰ ꓢꓴ ꓮ ꓙꓵꓽ ꓠꓬ꓾ ꓬꓲ ꓪ ꓮ ꓫꓵꓽ ꓪꓴꓸ ꓠꓬꓲ ꓟꓬꓱꓽ ꓕꓱ ꓟ ꓔꓯ ꓬꓰˍ ꓡ꓾ ꓮ ꓫꓵꓽ ꓑꓶꓸ ꓓꓴ ꓔꓶ ꓙꓱꓼ ꓗꓪ ꓛꓲ ꓬꓰˍ ꓗꓪ ꓛꓲ ꓧꓪꓸ ꓡꓰˍ ꓗꓪ ꓛꓲ ꓒꓬꓱꓼ ꓡˍ ꓡ꓾ ꓐꓯ ꓟ ꓔꓯ ꓢꓷꓸˍ ꓡꓳ= ꓟꓬꓱꓽ ꓟꓽ ꓬꓰ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓓꓴ ꓓꓳꓻ ꓓꓴ ꓐꓱ ꓶ ꓟꓽ ꓡꓳꓼ ꓡ= ꓧꓪꓸ ꓡꓰ ꓠꓲꓹ ꓫꓵˍ ꓠꓬ ꓟꓬꓱꓽ ꓟꓽ ꓢꓯꓼ ꓕꓵꓼ ꓠꓽ ꓟꓽ ꓓꓻ ꓐꓯˍ ꓟ ꓔꓯ ꓥˍ ꓟꓲ ꓟꓬꓱꓽ ꓬꓰ ꓢꓴ ꓮ ꓙꓵꓽ ꓠꓬ ꓢꓷꓸˍ ꓡꓳ= ꓡꓳꓽ ꓟꓲꓽ ꓥꓳꓽ ꓗꓪ ꓐꓰ “ꓮ ꓠ ꓘꓯ ꓟꓸ꓾ ꓮ ꓔ ꓢꓯ ꓬ” ꓐꓰ ꓐꓯˍ ꓟ꓾ ꓮ ꓘꓶꓸ ꓢꓯꓼ ꓕꓵꓼ ꓗꓷ ꓕꓯ ꓡꓰꓽ ꓧꓪꓸ ꓡꓰ ꓟ ꓟꓶˍ ꓥꓳ꓾ ꓐꓯ ꓟ ꓥ ꓡꓳ= ꓐꓯ ꓠꓲꓹ ꓫꓵˍ ꓟ ꓠꓬ ꓮ ꓫꓵꓽ ꓬꓰˍ ꓥˍ ꓟꓲ ꓢꓻ ꓢꓻ ꓡꓰꓽ ꓬꓰ ꓟꓽ ꓓꓻ ꓾ ꓐꓯ ꓟ ꓥ ꓡꓳ=

ꓠꓬꓲꓸ ꓠꓬꓲ ꓟ ꓶꓼ ꓓꓳ ꓫꓱꓹ ꓓꓳꓽ ꓕꓳꓽ ꓶ ꓗꓪ ꓢꓲ ꓒ ꓬꓰ-ꓢꓴ ꓬꓲ ꓟꓬꓱꓽ ꓗꓪ ꓬꓰ ꓙ ꓠꓹ ꓟ ꓐꓱ ꓶ ꓬꓰ ꓙ ꓢꓴ ꓣꓱꓽ ꓞꓹ ꓡꓳ= ꓖꓳ ꓡꓱ ꓥˍ ꓟꓲ ꓟꓳꓻ ꓢꓴ ꓥ ꓕ ꓑꓳꓸꓼ ꓔꓯ ꓬꓲ ꓟꓬꓱꓽ ꓗꓪ ꓧꓳꓽ ꓟꓽ ꓠ= ꓡꓳꓹ ꓬꓰˍ ꓗꓪ ꓛꓲ ꓚꓵ ꓚꓵ ꓬꓰ ꓖꓶ ꓐ ꓡ ꓢꓴ꓾ ꓬꓲ ꓘꓴ ꓜꓲꓼ ꓞꓳ ꓔꓯ ꓡꓳꓹ ꓬꓰˍ ꓗꓪ ꓛꓲ ꓑꓼ ꓗꓴꓸ ꓢꓴ ꓔꓯ ꓡꓰꓽ ꓬꓲ ꓢꓲꓺ ꓠ ꓔ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓬꓲ ꓐꓱ ꓶ ꓣꓱꓽ ꓬꓯꓼˍ ꓟ ꓝꓲ ꓓꓴ ꓔꓯ ꓢꓲꓺ ꓐ ꓡ ꓠꓹ ꓟ ꓐꓱ ꓶ ꓬꓲ ꓠꓬ꓾ ꓪ ꓚꓲ ꓗꓪ ꓓꓯꓻ ꓙꓰ ꓢꓲ ꓪꓴ-ꓢ ꓔꓬ ꓗꓪ ꓕꓲ ꓦꓬꓽ  ꓡꓱꓸꓼ ꓪꓽ ꓘꓴˍ ꓡꓳ꓾ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓡꓳ=

ꓮ ꓡꓲꓳ ꓐꓯ ꓠꓬ꓾ ꓔꓱꓹ ꓜꓳꓽˍ ꓟ꓾ ꓢꓯꓼ ꓕꓵꓼˍ ꓟ ꓝꓲ ꓓꓴ ꓟꓶ ꓠꓹ ꓟ ꓐꓱ ꓶ ꓪꓴ-ꓢ ꓕꓲ ꓣꓳˍ ꓡꓰꓽ ꓖꓶ ꓐ ꓡˍ ꓡꓳ꓾ ꓐꓯ ꓟ ꓔꓯ ꓣꓳ ꓮ ꓙꓵꓽ ꓔꓯ ꓢꓷꓸ ꓡꓰ ꓝꓲ ꓢꓲ꓾ ꓣꓳ ꓠꓬ ꓮ ꓫꓵꓽ ꓬꓰˍ ꓥˍ ꓟꓲ ꓟꓽ ꓬꓰ ꓧꓶꓸ ꓕꓯ ꓪꓴ-ꓢ ꓔꓯ ꓙꓵꓻ ꓠꓲꓹ ꓡꓰ ꓢꓯꓼ ꓕꓵꓼ ꓢꓲ ꓪꓽ ꓘꓴ ꓠꓹ ꓟ ꓣꓳ ꓔꓯ ꓟꓸ ꓖꓶ ꓡ ꓔꓬ ꓡꓳ=

ꓙꓲ-ꓢꓴ ꓠꓬ ꓕꓲ ꓦꓬꓽ ꓡꓱꓸꓼ ꓪꓴ-ꓢ ꓔꓯ ꓪꓽ ꓘꓴ ꓢꓲ꓾ ꓬꓲ ꓐꓱ ꓶ ꓝꓲ ꓓꓴ (12) ꓣꓳ ꓔꓯ ꓢꓲꓺ ꓐ ꓡ ꓗꓷ ꓟ ꓡꓰ ꓐꓰ꓾ ꓣꓳ ꓐꓴ ꓥˍ ꓟꓲ ꓪꓽ ꓘꓴ ꓢꓲ꓾ ꓢꓲ ꓒ ꓐꓰ ꓕꓲ ꓪꓽ ꓟꓬꓱꓽ ꓬꓰ ꓢꓲ ꓠꓬꓲ ꓧꓪꓸ ꓡꓰˍ ꓟ ꓔꓯ ꓟꓶ ꓡꓰ ꓠꓹ ꓟ꓾ ꓘꓳ ꓣꓴ ꓟꓶ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=