ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ꓾ ꓣꓳ ꓔꓯ ꓗꓸ ꓧꓪ ꓡ ꓢꓴ ꓔꓯ ꓝꓴꓲꓸ ꓖꓼ ꓖꓶ꓾

ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ꓾ ꓣꓳ ꓔꓯ ꓗꓸ ꓧꓪ ꓡ ꓢꓴ ꓔꓯ ꓝꓴꓲꓸ ꓖꓼ ꓖꓶ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓔ ꓡꓳ= ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ-ꓕꓲ 5ꓽ43-48 ꓥ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓗꓪ ꓣꓳ ꓔꓯ ꓠꓲꓹ ꓠꓵꓻ ꓢꓴ꓾ ꓣꓳ ꓔꓯ ꓠꓲꓹ ꓟ ꓠ ꓢꓴ꓾ ꓣꓳ ꓕꓯꓽ ꓢꓲ ꓗꓪ ꓓꓵꓽ ꓙ ꓗꓴꓸ ꓢꓴ ꓔꓯ ꓠꓬ ꓣꓳ ꓡꓰ ꓠꓲꓹ ꓠꓵꓻ ꓠꓹ ꓟ ꓮ ꓘꓶꓸ ꓢˍ ꓡꓳ= ꓢꓴ ꓡꓰ ꓣꓳ ꓔꓯ ꓠꓲꓹ ꓟ ꓠꓹ ꓟ ꓗꓪ ꓐꓰ꓾ ꓫꓱꓸ ꓤˍ ꓟ ꓗꓪ ꓐꓰ ꓕꓱ ꓡꓱ ꓬꓰ ꓖꓶ ꓡˍ ꓠꓬ꓾ ꓣꓳ ꓥ ꓟꓲ ꓬꓲ ꓪ ꓔꓯ ꓪ ꓜꓲ ꓠꓲꓹ ꓠꓵ ꓐ ꓡ ꓠꓹ ꓟ ꓢꓯꓼ ꓕꓵꓼ ꓠꓹ ꓟ ꓮ ꓘꓶꓸ ꓢˍ ꓡꓳ= ꓬꓲ ꓪ ꓣꓳ ꓔꓯ ꓫꓱꓸ ꓤꓹ ꓟ ꓪꓴꓸ ꓠꓬꓲ ꓐꓵ ꓞꓶꓽ ꓕꓲ ꓘꓳꓹ ꓖꓶ ꓡ ꓠꓬ꓾ ꓣꓳ ꓡꓰ ꓬꓲ ꓪ ꓔꓯ ꓠꓬꓲꓽ ꓘꓳꓹˍ ꓟꓲ ꓖꓶ ꓐ ꓡˍ ꓡꓳ=

ꓖꓳ ꓟˍ ꓡꓰ ꓐꓰ ꓠꓱꓸ ꓐꓯ ꓢꓴ ꓡꓰ ꓣꓳ ꓔꓯ ꓠꓲꓹ ꓠꓵˍ ꓟ ꓑꓶꓸ ꓓꓴ ꓕꓲ ꓙꓰꓽ ꓬꓰ ꓖꓶ ꓡˍ ꓠꓬ꓾ ꓣꓳ ꓠꓽ ꓠꓬꓲꓽ ꓙꓰꓽ ꓬꓰ ꓖꓶˍ ꓟꓲ ꓓꓹ ꓡꓳ= ꓢˍ ꓡꓳ= ꓮ ꓫꓵꓽ ꓑꓶꓸ ꓓꓴ ꓥ ꓡ? ꓢꓴ ꓡꓰ ꓣꓳ ꓔꓯ ꓠꓲꓹ ꓠꓵˍ ꓕꓯ ꓬꓲ ꓪ ꓔꓯ ꓝꓮꓲ ꓕꓲ ꓧꓪꓹ ꓖꓶ ꓠꓹ ꓟ꓾ ꓬꓲ ꓪ ꓖꓶ ꓡ ꓟ ꓢꓶꓸ ꓟꓽ ꓞꓲꓺ ꓙꓲˍ ꓟ ꓖꓶ ꓠꓹ ꓟ ꓣꓳ ꓠꓬ ꓮ ꓘꓶꓸ ꓢˍ ꓡꓳ꓾ ꓬꓰ ꓢˍ ꓟ ꓥ ꓡꓳ= ꓕꓱ ꓟ ꓠꓬ ꓟꓲ ꓠꓯ ꓞꓳ ꓤ ꓬꓰ ꓡꓲꓽ ꓬꓰ ꓒꓰꓼ ꓕꓲ ꓟ ꓥ ꓡꓳ=

ꓖꓳ ꓡꓱ ꓐꓯ ꓥˍ ꓟꓲ ꓣꓳ ꓔꓯ ꓠꓲꓹ ꓜꓳ ꓢꓴ ꓔꓯ ꓠꓬ ꓠꓲꓹ ꓠꓵ ꓠꓹ ꓟ ꓟꓽ ꓢ= ꓬꓲ ꓪ ꓣꓳ ꓔꓯ ꓕꓲ ꓘꓶꓽ ꓐꓯ ꓗꓸ ꓡˍ ꓕꓯ ꓣꓳ ꓠꓬ ꓠꓬꓲꓽ ꓘꓶꓽ ꓐꓯ ꓗꓸ ꓠꓲꓹ ꓫꓵˍ ꓡꓳ= ꓣꓳ ꓔꓯ ꓕꓲ ꓕꓷꓹ ꓓꓶꓽ ꓡ ꓠꓬ ꓣꓳ ꓠꓽ ꓠꓬꓲꓽ ꓕꓷꓹ ꓓꓶꓽ ꓠꓲꓹ ꓫꓵˍ ꓡꓳ= ꓕꓱ ꓟ ꓠꓬ ꓟꓲ ꓠꓯ ꓞꓳ ꓤ ꓬꓰ ꓡꓲꓽ ꓕꓲ ꓟ ꓥ ꓡꓳ=

ꓮ ꓫꓵꓽ ꓑꓶꓸ ꓓꓴ ꓥ ꓡ? ꓣꓳ ꓔꓯ ꓕꓲ ꓧꓪꓹ ꓠꓻ ꓡꓰ ꓝꓲˍ ꓠꓬ ꓣꓳ ꓠꓬ ꓬꓲ ꓔꓯ ꓠꓬꓲꓽ ꓧꓪꓹ ꓠꓻ ꓡꓰ ꓝꓲ ꓠꓲꓹ ꓫꓵˍ ꓡꓳ= ꓞꓳ ꓤ ꓟꓬꓽ ꓠꓬꓲ ꓠꓬ ꓚꓲꓸ ꓛꓬ ꓔꓯ ꓕꓲ ꓝꓸ ꓧˍ ꓟ ꓬꓰ ꓖꓶ꓾ ꓙꓲˍ ꓟ ꓬꓰ ꓖꓶ ꓡˍ ꓕꓯ ꓬꓲ ꓪ ꓕꓯꓽ ꓢꓲ ꓗꓪ ꓠꓬꓲꓽ ꓝꓸ ꓧ ꓖꓶ꓾ ꓙꓲˍ ꓟ ꓬꓰ ꓖꓶˍ ꓟ ꓡꓰ ꓐꓰ꓾ ꓢꓴ ꓡꓰ ꓣꓳ ꓔꓯ ꓕꓲ ꓧꓪꓹ ꓗꓸ ꓧꓪˍ ꓕꓯ ꓧꓪꓸ ꓜꓽ ꓡˍ ꓕꓯ꓾ ꓣꓳ ꓠꓬ ꓬꓲ ꓪ ꓕꓯꓽ ꓢꓲ ꓗꓪ 2 ꓧꓪꓹ ꓬꓲ ꓪ ꓔꓯ ꓠꓻ ꓡꓰ ꓝꓲ ꓠꓹ ꓟ ꓐꓱ ꓶ ꓢꓯꓼ ꓕꓵꓼˍ ꓡꓳ= ꓮ ꓡꓲꓳ ꓐꓯ ꓠꓬ ꓣꓳ ꓠꓲꓹ ꓟ ꓠꓬ ꓮ-ꓓꓯ ꓰ-ꓪ ꓝꓴꓲꓸ ꓗꓪ ꓐꓰ ꓝꓴꓲꓸ ꓖꓳ ꓟ ꓗꓪ ꓗꓹ ꓛꓲꓽ ꓠꓹ ꓟ꓾ ꓝꓮꓲ ꓕꓲ ꓚꓱꓹ ꓐꓯ ꓠꓬ꓾ ꓣꓳ ꓠꓲꓹ ꓟ ꓐꓬ ꓡꓰ ꓟ ꓥ ꓡꓳ=

ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓬꓲ ꓪꓴꓸ ꓚꓰꓼ ꓗꓷˍ ꓕꓯ ꓮ-ꓓꓯ ꓰ-ꓪ ꓠꓲꓹ ꓟ ꓠꓬ ꓖꓳ ꓡꓱ ꓟꓽ ꓥ= ꓠꓵ ꓠꓲꓹ ꓡꓰꓽ ꓐꓲ ꓞꓹ ꓡꓳ= ꓖꓳ ꓟ ꓑꓶꓸ ꓓꓴ ꓢꓲꓺ ꓒ ꓬꓰ-ꓢꓴ ꓬꓯꓼ ꓡˍ ꓕꓯ ꓬꓲ ꓠꓬ ꓠꓲꓹ ꓟ ꓖꓳ ꓟ ꓔꓯ ꓝꓮꓲ ꓕꓲ ꓧꓪꓹ ꓫꓬꓹ ꓔꓶ ꓖꓶ ꓠꓹ ꓟ꓾ ꓬꓲ ꓫꓵꓼ ꓗꓷ ꓡꓰ ꓠꓹ ꓟ ꓬꓲ ꓡꓰ ꓬꓯꓼ ꓡ ꓟ ꓥ ꓡꓳ=

ꓣꓳ ꓠꓲꓹ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓠꓲꓹ ꓟ ꓔꓯ ꓫꓱꓸ ꓠꓹ ꓟ꓾ ꓢꓲ ꓒ ꓬꓰ-ꓢꓴˍ ꓡꓰ ꓐꓰ ꓠꓲꓹ ꓟ ꓟꓯꓻ ꓠꓹ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓟꓳꓸ ꓖꓶ ꓔ ꓡꓳ= ꓘꓳ-ꓡꓱ-ꓕꓴ ꓕꓳ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓠꓲꓹ ꓟ ꓔꓯ ꓔꓯꓺ ꓢꓳ꓾ ꓐꓰ ꓐꓯ ꓔ ꓡꓳ= ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓔꓯ ꓢꓰꓼ ꓢꓴ꓾ ꓬꓲ ꓔꓯ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓔꓶꓸ ꓗꓷ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙ ꓖꓶˍ ꓡꓳ= ꓕꓱ ꓟ ꓠꓬ ꓪꓴ-ꓢ ꓠꓵꓻ ꓠꓲꓹ ꓥ ꓡꓳ=

ꓣꓳ ꓪꓴ-ꓢ ꓔꓯ ꓖꓼ ꓛꓳ ꓢꓴ ꓐꓴ ꓥˍ ꓟꓲ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ꓾ ꓣꓳ ꓦ ꓐꓱ ꓶ ꓠꓬ ꓠꓵꓻ ꓠꓲꓹ ꓕꓱ ꓟ ꓐꓲ ꓞꓹ ꓕꓯ ꓢꓲ ꓡꓰꓽ ꓐꓲ ꓜꓲꓼˍ ꓟ ꓥ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ=

ꓣꓳ ꓔꓯ ꓠꓲꓹ ꓠꓵ ꓢꓴ ꓥˍ ꓟꓲ꓾ ꓣꓳ ꓔꓯ ꓗꓸ ꓧꓪ ꓢꓴ ꓥˍ ꓟꓲ꓾ ꓣꓳ ꓔꓯ ꓛꓴꓽ ꓙꓳ ꓢꓴ ꓥ ꓟꓲ꓾ ꓮ ꓡꓲ ꓫꓵꓽ ꓣꓳ ꓔꓯ ꓟꓽ ꓔꓱꓹ ꓟꓽ ꓜꓳꓽ ꓟ ꓬꓰ ꓡˍ ꓥ ꓟꓲ ꓣꓳ ꓠꓬ ꓠꓵ ꓠꓲꓹ ꓗꓪ ꓐꓰ ꓟꓳꓸ ꓖꓶ ꓠꓹ ꓟ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓢꓯꓼ ꓪ ꓖꓶ ꓡˍ ꓟ ꓥ ꓡꓳ= ꓕꓱ ꓡꓱ ꓬꓰ ꓠꓹ ꓟ ꓠꓽ ꓟꓽ ꓢ= ꓖꓳ ꓡꓱ ꓐꓯ ꓥ ꓟꓲ ꓪꓴ-ꓢ ꓣꓱꓽ ꓛꓰꓽ ꓗꓪ ꓐꓰ ꓟꓽ ꓐ ꓡ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ=

ꓮ ꓠꓱ ꓕꓯ ꓙꓲꓻ ꓫꓬ ꓢꓴ ꓐꓴ ꓥ ꓟꓲ ꓬꓲ ꓪ ꓤꓶꓻ ꓔꓯ ꓣꓳ ꓡꓳꓸ ꓠꓬꓲˍ ꓕꓯ ꓪꓴ-ꓢ ꓢꓯꓼ ꓪ ꓗꓪ ꓐꓰ ꓬꓲ ꓪ ꓠꓬ ꓬꓲ ꓪ ꓔꓯ ꓢꓰꓼ ꓢꓴ꓾ ꓬꓲ ꓪ ꓔꓯ ꓗꓸ ꓧꓪ ꓢꓴ ꓔꓯ ꓠꓵ ꓠꓲꓹ ꓗꓪ ꓐꓰ ꓧꓪꓸ ꓡꓰꓳ= ꓢꓲꓽ ꓫꓬ ꓕꓳꓽ ꓶ ꓗꓪ ꓓꓵˍ ꓟ ꓡꓰ ꓐꓰ ꓟꓽ ꓙꓲꓻ ꓟ ꓔꓯ ꓙꓲˍ ꓟ ꓡꓰ ꓧꓪꓸ ꓡꓰ ꓝꓲ꓾ ꓐꓯ ꓟ ꓡꓰ ꓐꓰ ꓣꓳ ꓔꓯ ꓗꓸ ꓧꓪ ꓢꓴ ꓙꓳˍ ꓠꓬ꓾ ꓣꓳ ꓠꓬ ꓔꓱꓹ ꓜꓳꓽˍ ꓟ ꓬꓰ ꓔꓬ ꓥ ꓟꓲ ꓣꓳ ꓔꓯ ꓐꓯ ꓞꓷꓹ ꓢꓴ꓾ ꓐꓯ ꓗꓸ ꓢꓴ꓾ ꓧˍ ꓟ ꓟꓽ ꓟꓳꓻ ꓢꓴ ꓙꓳˍ ꓥ ꓟꓲ ꓝꓴꓲꓸ ꓕꓽ ꓓꓰꓺ ꓗꓷ= ꓠꓵꓻ ꓠꓲꓹ ꓟꓯꓻ ꓢꓲ ꓞꓳ ꓙꓳ=

ꓠꓵꓻ ꓠꓲꓹ ꓐꓯ ꓟ ꓮ ꓫꓵꓽ ꓥ ꓡ? ꓙꓲꓻ ꓫꓬ ꓢꓴ St. Thomas Aquinas ꓠꓬ ꓕꓱ ꓡꓱ ꓐꓯ ꓔ ꓡꓳ= To love is to will the good of the other ꓐꓰ ꓐꓯ ꓔ ꓡꓳ= ꓠꓵꓻ ꓠꓲꓹ ꓐꓯ ꓟ ꓠꓬ ꓠꓱꓸ ꓐꓯ ꓢꓴ ꓐꓱ ꓶ ꓙꓲˍ ꓟ ꓟꓶ ꓠꓹ ꓟ ꓐꓱ ꓶ ꓠꓲꓹ ꓡꓶꓽ ꓙꓳˍ ꓟ꓾ ꓐꓯ ꓟ ꓬꓲ ꓬꓲ ꓢꓲ꓾ ꓬꓲ ꓟꓸ ꓟꓲꓽ ꓥ ꓡꓳ= ꓣꓳ ꓠꓬ ꓢꓴ ꓔꓯ ꓠꓲꓹ ꓠꓵˍ ꓐꓰ ꓐꓯ ꓕꓯ ꓬꓲ ꓐꓱ ꓶ ꓙꓲˍ ꓟ ꓟꓶ ꓠꓹ ꓟ꓾ ꓬꓲ ꓐꓱ ꓶ ꓧ ꓝꓲ꓾ ꓬꓲ ꓐꓱ ꓶ ꓪ ꓙꓲ ꓣꓱꓽ ꓛꓰꓽ ꓙꓳ ꓝꓲ꓾ ꓐꓰ ꓠꓲꓹ ꓡꓶꓽ ꓙꓳˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳ ꓔꓯ ꓗꓸ ꓧꓪ ꓢꓴ꓾ ꓥ ꓠꓬ꓾ ꓣꓳ ꓠꓱꓸ ꓐꓯ ꓔꓯ ꓠꓲꓹ ꓠꓵˍ ꓐꓰ ꓐꓯ ꓕꓯ ꓬꓲ ꓪ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓓꓵꓽ ꓙ ꓠꓹ ꓟ ꓬꓳꓸ ꓚꓵˍ ꓡꓳ= ꓔꓯ ꓥꓳꓽ ꓐꓯ ꓠꓬ ꓣꓳ ꓔꓯ ꓟꓽ ꓔꓱꓹ ꓟꓽ ꓜꓳꓽ ꓟ ꓐꓯ ꓢꓴ꓾ ꓕꓲ ꓚꓱꓹ ꓐꓯ ꓠꓬ ꓣꓳ ꓔꓯ ꓗꓸ ꓧꓪ ꓢꓴ꓾ ꓣꓳ ꓟꓬꓱ ꓓꓳꓽ ꓒꓬ ꓢꓴ ꓔꓯ ꓣꓳ ꓔꓳꓹ ꓜꓳꓽˍ ꓕꓯ ꓣꓳ ꓠꓬ ꓬꓲ ꓪ ꓔꓯ ꓠꓲꓹ ꓠꓵˍ ꓐꓰ ꓐꓯ ꓕꓯ ꓠꓬ ꓬꓲ ꓪ ꓟꓬꓱ ꓓꓳꓽ ꓔꓯ ꓣꓳꓽ ꓟꓽ ꓒꓬ ꓒꓬ꓾ ꓬꓲ ꓪ ꓔꓯ ꓖꓼ ꓖꓶ ꓢꓲ ꓠꓬꓲ꓾ ꓬꓲ ꓪ ꓙꓲˍ ꓟ ꓟꓶ ꓠꓹ ꓟ ꓐꓱ ꓶ ꓙꓲꓻ ꓓꓴ ꓫꓸ ꓕꓱˍ ꓟ꓾ ꓕꓱ ꓟ ꓠꓬ ꓠꓵ ꓠꓲꓹ ꓥ ꓡꓳ=

ꓢꓲ ꓒ ꓬꓰ-ꓢꓴ ꓫꓬꓽ ꓫꓬꓽ ꓡꓰꓽ ꓐꓯ ꓔ ꓡꓳ= ꓠꓴ ꓪ ꓠꓬ ꓠꓴ ꓪ ꓔꓯ ꓠꓲꓹ ꓠꓵ ꓢꓴ ꓔꓯ ꓡꓰꓽ ꓠꓲꓹ ꓠꓵ  ˍ ꓥꓳ ꓐꓯ ꓠꓬ ꓮ ꓫꓵꓽ ꓙꓲꓻ ꓖꓴ ꓙꓳˍ ꓡ? ꓖꓳ ꓡꓱ ꓠꓬꓲ ꓣꓳ ꓢꓲꓺ ꓒ ꓬꓰ-ꓢꓴ ꓔꓯ ꓛꓳ ꓢꓴ ꓠꓬ꓾ ꓠꓱꓸ ꓐꓯ ꓢꓴˍ ꓡꓰ ꓐꓰ ꓟꓽ ꓥ= ꓠꓱꓸ ꓐꓯ ꓢꓴ ꓕꓯꓽ ꓢꓲ ꓕꓲ ꓝꓸ ꓓꓯ ꓢꓲ ꓣꓳ ꓔꓯ ꓛꓴꓽ ꓙꓳ ꓢꓴ꓾ ꓣꓳ ꓔꓯ ꓗꓸ ꓧꓪ ꓢꓴ ꓔꓯ ꓠꓲꓹ ꓠꓵ ꓐ ꓡ ꓠꓹ ꓟ ꓢꓯꓼ ꓕꓵꓼ ꓠ ꓗꓹ ꓡꓳ꓾ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓟ ꓥ ꓢꓲ꓾ ꓣꓳ ꓮ ꓙꓵꓽ ꓥˍ ꓟꓲ ꓣꓳ ꓔꓯ ꓛꓴꓽ ꓙꓳ ꓢꓴ ꓗꓸ ꓧꓪ ꓡ ꓢꓴ ꓔꓯ ꓠꓲꓹ ꓠꓵ ꓐ ꓡ ꓠꓹ ꓟ ꓪꓴ-ꓢ ꓔꓬ ꓗꓪ ꓣꓱꓽ ꓛꓰꓽ ꓓꓰꓽ ꓡꓯ=