ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ ꓠꓯꓹ ꓟ

ꓡꓴ-ꓘ 6ꓽ27-38

ꓖꓳ ꓡꓱ ꓥ ꓟꓲ ꓥꓪ ꓔꓯ ꓠ ꓠꓹ ꓔꓬ ꓢꓴ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓔꓯ ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ ꓢꓲ꓾ ꓠꓴ ꓪꓽ ꓔꓯ ꓠꓲꓹ ꓜꓳ ꓢꓴ ꓔꓯ ꓙꓲˍ ꓟ ꓬꓰ ꓖꓶ꓿ ꓠꓴ ꓪꓽ ꓔꓯ ꓙꓱꓽ ꓢꓴ ꓔꓯ ꓶꓼ ꓥꓳ ꓙꓱꓽ ꓖꓶ꓿ ꓠꓴ ꓪꓽ ꓔꓯ ꓘꓶꓻ ꓙꓵ ꓢꓴ ꓐꓱ ꓶ ꓪꓽ ꓘꓴ ꓙ꓿ ꓠꓴ ꓪꓽ ꓒꓬꓱꓽ ꓟꓬ ꓕꓱ ꓕꓲ ꓒꓳꓹ ꓗꓪ ꓓꓶꓽ ꓡ ꓢꓴ ꓔꓯ ꓠꓬ꓾ ꓖꓳ ꓕꓲ ꓒꓳꓹˍ ꓟꓲ ꓟꓳꓸ ꓖꓶ꓿ ꓠꓴ ꓐꓵ ꓞꓶꓽ ꓕꓯꓽ ꓢꓲ ꓕꓲ ꓘꓳꓹ ꓟ ꓦꓴꓺ ꓡ ꓢꓴ ꓔꓯ ꓠꓬ ꓠꓯꓸ ꓘꓪ ꓕꓲ ꓘꓳꓹ ꓟˍ ꓟꓲ ꓖꓶ ꓩꓴ ꓗꓷ꓿ ꓠꓴ ꓔꓯ ꓓꓰꓽ ꓢꓴ ꓮꓽ ꓙꓵ ꓔꓯ ꓖꓶ꓿ ꓠꓴ ꓖꓴꓽ ꓙꓴ ꓦꓴꓺ ꓔꓯꓹ ꓙꓰ ꓢꓴ ꓔꓯˍ ꓐꓰ ꓝꓮꓲ ꓕꓽ ꓧꓪ ꓔꓯꓹ ꓬꓲꓼ ꓡ꓿ ꓠꓴ ꓪꓽ ꓔꓯ ꓢꓴ ꓡꓰ ꓮ ꓡꓲ ꓬꓰ ꓖꓶ ꓡ ꓝꓲ ꓠꓲꓹ ꓫꓵˍ ꓠꓬ꓾ ꓠꓴ ꓪꓽˍ ꓟꓲ ꓬꓲ ꓪꓽ ꓔꓯ ꓖꓳ ꓡꓱ ꓬꓰ ꓖꓶ꓿ ꓠꓴ ꓪꓽ ꓠꓽ ꓠꓴ ꓪꓽ ꓔꓯ ꓠꓲꓹ ꓠꓵ ꓢꓴ ꓔꓯˍ ꓡꓰ ꓠꓲ ꓠꓵˍ ꓠꓬ꓾ ꓮꓸ ꓫꓵ ꓙꓲ ꓖꓴ ꓙꓳˍ ꓡ? ꓮ ꓡꓲꓳ ꓐꓯ ꓠꓬ ꓝꓴꓲ ꓙꓳ ꓢꓴ ꓐꓴˍ ꓟꓲ꓾ ꓬꓲ ꓪꓽ ꓔꓯ ꓠꓲꓹ ꓠꓵ ꓢꓴ ꓔꓯ ꓬꓲ ꓪꓽ ꓠꓲ ꓠꓵˍ ꓡꓳ꓿ ꓠꓴ ꓪꓽ ꓠꓬ꓾ ꓠꓴ ꓪꓽ ꓔꓯ ꓙꓲˍ ꓟ ꓬꓰ ꓖꓶ ꓡ ꓢꓴ ꓔꓯˍ ꓡꓰꓽ ꓙꓲˍ ꓟ ꓬꓰ ꓡꓲꓸ ꓖꓶˍ ꓠꓬ꓾ ꓮꓸ ꓫꓵ ꓙꓲꓻ ꓖꓴ ꓙꓳˍ ꓡ? ꓮ ꓡꓲꓳ ꓐꓯ ꓠꓬ ꓝꓴꓲ ꓬꓰ ꓢꓴ ꓐꓴˍ ꓟꓲ ꓖꓳ ꓡꓱ ꓬꓰˍ ꓡꓳ꓿ ꓠꓴ ꓪꓽ ꓠꓬ ꓚꓱꓹ ꓖꓶꓽ ꓓꓴ ꓙꓳꓻ ꓢꓴ ꓔꓯˍ ꓡꓰꓽ ꓛꓵꓽ ꓖꓶ ꓥꓪꓸ ꓖꓶˍ ꓠꓬ꓾ ꓮꓸ ꓫꓵ ꓙꓲ ꓖꓴ ꓙꓳˍ ꓡ? ꓝꓴꓲ ꓬꓰ ꓢꓴˍ ꓟꓲ ꓚꓱꓹ ꓖꓶ ꓡ ꓝꓲ ꓠꓹ ꓟ ꓝꓴꓲ ꓬꓰ ꓢꓴ ꓔꓯ ꓛꓵꓽ ꓖꓶˍ ꓡꓳ꓿ ꓠꓴ ꓪꓽ ꓠꓽ ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ ꓢꓲ ꓬꓲ ꓪꓽ ꓔꓯ ꓙꓲˍ ꓟ ꓬꓰ ꓖꓶ꓿ ꓝꓮꓲ ꓠꓬ ꓢꓴꓻ ꓔꓯ ꓛꓵꓽ ꓖꓶꓽˍ ꓠꓬ꓾ ꓚꓱꓹ ꓖꓶ ꓡ ꓠꓹ ꓟ ꓔꓯ ꓕꓽ ꓥꓳ ꓡꓳꓸ꓿ ꓖꓳ ꓡꓱ ꓠꓬ ꓠꓴ ꓪꓽ ꓡꓯꓼ ꓫꓴ ꓠꓽ ꓬꓲ ꓓꓽ ꓟ ꓥ ꓢꓲ꓾ ꓟꓴꓺ ꓡꓳꓹ ꓬꓰ ꓢꓴ ꓬꓲ ꓤ ꓠꓱ ꓬꓰ ꓪꓺˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢˍ ꓟꓲ꓾ ꓫꓸ ꓟꓳ ꓠꓲꓹ ꓟꓽ ꓙꓳ ꓢꓴ ꓐꓴˍ ꓐꓰ ꓞꓳ ꓥꓶ ꓐꓴ ꓔꓯ ꓕꓲꓽ ꓡꓰꓹꓼ ꓐꓰ ꓙꓽ ꓗꓳˍ ꓡꓳ꓿ ꓟꓴꓽ ꓗꓪ ꓗꓪ ꓟ ꓠꓴ ꓪꓽ ꓐꓹ ꓐ ꓮ ꓡꓲ ꓫꓱꓸ ꓤˍ ꓠꓬ꓾ ꓠꓴ ꓪˍ ꓟꓲ ꓖꓳ ꓡꓱ ꓫꓱꓸ ꓤ ꓠ ꓗꓹ ꓡꓳ꓿ ꓠꓴ ꓪꓽ ꓠꓬ ꓢꓴ ꓔꓯ ꓕꓽ ꓙꓽ ꓘꓶꓽ꓾ ꓖꓳ ꓡꓱ ꓠꓬ ꓠꓴ ꓪꓽ ꓔꓯˍ ꓟꓲ ꓟꓽ ꓙꓽ ꓘꓶꓽ ꓡ꓿ ꓢꓴ ꓔꓯ ꓐꓯ ꓟꓴ ꓕꓽ ꓞꓷꓹ꓿ ꓖꓳ ꓡꓱ ꓠꓬ ꓠꓴ ꓪꓽ ꓔꓯˍ ꓟꓲ ꓐꓯ ꓟꓴ ꓟꓽ ꓞꓷꓹ ꓡ꓿ ꓢꓴ ꓔꓯ ꓖꓽ ꓖꓶ꓿ ꓖꓳ ꓡꓱ ꓠꓬ ꓠꓴ ꓪꓽ ꓔꓯˍ ꓟꓲ ꓖꓽ ꓖꓶ ꓡ ꓥꓳ꓿ ꓠꓴ ꓪꓽ ꓡꓰ ꓢꓴ ꓔꓯ ꓖꓶꓽˍ ꓠꓬ꓾ ꓠꓴ ꓪꓽ ꓔꓯ ꓖꓶ ꓡ ꓥꓳ꓿ ꓕꓰ ꓡꓱ ꓬꓰˍ ꓠꓬ꓾ ꓙꓳꓻ ꓓꓴ ꓪꓴꓽˍ ꓟ ꓗꓪ ꓶꓹ ꓠꓬꓲ ꓠꓬꓲꓸ ꓠꓬꓲ꓾ ꓡꓶꓽ ꓡꓶˍ ꓡꓰ ꓙꓳꓻ ꓢꓲ ꓠꓴ ꓪꓽ ꓔꓯ ꓧꓳꓽ ꓖꓶ ꓡ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓮꓸ ꓫꓵ ꓙꓳꓻ ꓓꓴ ꓡꓰ ꓢꓴ ꓔꓯ ꓙꓳꓻ ꓖꓶˍ ꓠꓬ꓾ ꓢꓴˍ ꓟꓲ ꓖꓳ ꓡꓱ ꓫꓵꓽ ꓙꓳꓻ ꓓꓴ ꓡꓰ ꓠꓴ ꓪꓽ ꓔꓯ ꓙꓳꓻ ꓡꓲꓸ ꓖꓶ ꓡ ꓥꓳ꓾ ꓐꓯˍ ꓡꓳ꓿  

Add new comment

3 + 16 =