ꓜꓽ ꓓꓴ ꓚꓲꓸ_ ꓕꓯ ꓟꓬꓱ ꓓꓳꓽ ꓕꓽ ꓧꓪ ꓠꓯꓹ ꓟ

ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴ‐ꓳ ꓠꓬꓲ. ꓠꓬꓲ ꓠꓬ ꓣꓳ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓯꓼ ꓗꓪ ꓜ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓓꓵꓽ ꓙꓰ ꓟ ꓥꓳ꓿ ꓠꓬꓲ. ꓠꓬꓲ ꓗꓪ ꓐꓰ 40 ꓦꓬꓽ 40 ꓠꓬꓲ ꓣꓳꓽ ꓜ ꓚꓲ. ꓧꓪꓽ ꓚꓲ. ꓠ, ꓟ ꓥꓳ꓿

ꓜ ꓚꓲ. ꓧꓪꓽ ꓚꓲ. ꓟ ꓦꓬꓼ ꓠꓬꓲ ꓓꓵꓽ ꓙꓰ ꓟ ꓠꓬꓲ. ꓠꓬꓲ ꓗꓪ ꓠꓬ ꓣꓳꓽ ꓠꓻ ꓖꓼ (ꓠꓬ ꓘꓶꓽ ꓛꓵ) ꓗꓪ ꓘꓳ ꓦ (ꓗꓳ ꓒꓴ) ꓟꓲ., ꓠ, ꓟ ꓟꓲ ꓥꓳ꓿ ꓣꓳꓽ ꓠꓬ ꓠꓱ. ꓦꓱꓽ ꓗꓪ ꓐꓰ ꓡˍ ꓟ ꓑꓶ. ꓓꓴ ꓠꓱ. ꓦꓱꓽ ꓗꓪ ꓬꓲꓼ ꓙꓰ ꓥꓳ ꓐꓯ ꓟ ꓢꓷ. ꓓꓴ ꓕꓱ ꓡꓱ ꓟ ꓘꓳ ꓦ ꓟꓲˍ ꓟ ꓥꓳ꓿ ꓠꓬꓲ. ꓠꓬꓲ ꓠꓬ ꓣꓳꓽ ꓮ ꓙꓵꓽ ꓢꓴ ꓜ ꓚꓲ. ꓧꓪꓽ ꓚꓲ. ꓠ, ꓟ ꓥꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ ꓠꓬꓲ. ꓠꓬꓲ ꓣꓳ ꓵ ꓠ, ꓟ ꓢꓲꓽ ꓫꓬ ꓕꓳ ꓶ ꓬꓲ. ꓪꓴ. ꓕꓲꓽ ꓔꓳ ꓟ ꓠꓬ (ꓬꓳ‐ꓶ 2ꓽ12‐18) ꓕꓳ ꓶ ꓥꓳ꓿ “ ꓠꓴ ꓐꓵ ꓞꓶ ꓔꓯ ꓟꓽ ꓥ ꓠꓲ, ꓟ ꓔꓯ ꓚꓵ, ꓧꓽ ꓢꓲ ꓥꓪ ꓔꓬ, ꓖꓴ ꓗꓪ ꓬꓰ ꓡꓯ” ꓐꓰ ꓢꓲ ꓒ ꓐꓯ ꓔ ꓡꓳ꓿ ꓪꓴ‐ꓢ ꓠꓬ ꓠꓲ, ꓟ ꓔꓯ ꓡꓳ. ꓢꓴ ꓪꓴ‐ꓢ ꓥꓳ꓿ ꓗꓳ. ꓡ ꓟ ꓦꓬꓼ ꓠꓬꓲ ꓗꓪ ꓣꓳꓽ ꓬꓰ ꓛꓬ ꓗꓷ ꓟ ꓝꓴꓲ. ꓗꓪ ꓐꓰ ꓓꓵꓽ ꓙ ꓒꓳ ꓬꓲꓼ ꓡ ꓠꓯ ꓟ ꓠꓬꓲ ꓠꓬꓲ ꓪꓴ‐ꓢ ꓡꓰ ꓕꓵꓼ ꓪ ꓖꓶꓽ ꓔ ꓡꓳ꓿

ꓓꓵꓽ ꓙ ꓒꓳ ꓬꓲꓼ ꓙꓰ ꓐꓰ ꓐꓯ ꓕꓯ꓾ ꓟꓷ ꓠꓷ ꓗꓪ ꓐꓰ ꓡꓰ ꓐꓯ ꓕꓲꓽ ꓖꓼ ꓟꓽ ꓓ꓾ ꓠꓲ, ꓟ ꓗꓪ  ꓒꓳ, ꓬꓲꓼ ꓙꓰ ꓠ, ꓟ ꓬꓮꓳ. ꓚꓲ ꓡꓳ꓿ ꓣꓳ ꓬꓰ ꓛꓬ ꓗꓷ ꓟ ꓝꓴꓲ. ꓔꓯ ꓓꓵꓽ ꓙ ꓟꓷ ꓢꓲ. ꓠꓬꓲ꓾ ꓥꓴ ꓠꓯ, ꓟ꓾ ꓠꓲ, ꓟ ꓫ ꓠꓯ ꓟ꓾ ꓚꓲ. ꓛꓬ ꓝꓴꓲ. ꓐꓱ ꓶ ꓝꓴꓲ. ꓪꓽ ꓒꓴ ꓚꓱ, ꓠꓯ ꓟ ꓣꓳ ꓢꓯꓼ ꓕꓵꓼ ꓠꓯ ꓟ ꓥꓳ꓿ ꓮ ꓟꓶ ꓜ ꓚꓲ. ꓧꓪꓽ ꓚꓲ.ˍ ꓟ ꓦꓬꓼ ꓠꓬꓲ ꓟ ꓠꓬ ꓣꓱꓽ ꓛꓰꓽ ꓦꓬꓼ ꓠꓬꓲˍ ꓟꓲ ꓥꓳ꓿ ꓪꓴ‐ꓢ ꓬꓲ. ꓶ ꓤ ꓫꓱ, ꓤ ꓮ ꓘꓶ. ꓖꓶꓽ ꓟ ꓦꓬꓼ ꓠꓬꓲ ꓥꓳ꓿ ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓣꓳꓽ ꓝꓴꓲ. ꓗꓪ ꓐꓰ ꓠꓲ, ꓟ ꓫ. ꓟ ꓡꓰ ꓐꓰ ꓢꓲ ꓒ ꓔꓯ ꓓꓵꓽ ꓙ ꓒꓳ ꓬꓰꓼ ꓙꓰ ꓡꓯ꓿ ꓓꓵꓽ ꓙ ꓒꓳ ꓬꓲꓼ ꓙꓰˍ ꓕꓯ ꓢꓲ ꓒ ꓖ ꓖꓶꓽ ꓟꓽ ꓐ ꓡ ꓫꓵꓽ ꓕꓲꓽ ꓫꓵˍ ꓟꓲ ꓟꓽ ꓙꓳ꓿

ꓶ ꓓꓳꓽ ꓫꓱ, ꓓꓳꓽ ꓪꓴ‐ꓢ ꓐꓯ ꓘꓶꓽ ꓗꓪ ꓥˍ ꓟꓲ (ꓟ‐ꓕꓲ 6ꓽ1‐4) ꓣꓳꓽ ꓮ ꓫꓵˍ ꓬꓰ ꓥˍ ꓟꓲ ꓘꓳ ꓫꓱ ꓫꓱ ꓡꓰ ꓬꓰ ꓠ, ꓟ ꓢꓯꓼ ꓕꓵꓼ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓟ. ꓔ ꓖꓶꓽ ꓡꓳ꓿

ꓣꓳ ꓪꓴ‐ꓢ ꓔꓯ ꓙꓵ ꓢꓴ ꓐꓱ ꓶ ꓣꓱꓽ ꓛꓰ ꓟꓶ ꓟ ꓚꓱ ꓠꓬ ꓕꓱ ꓕꓲꓽ ꓚꓱ ꓡꓰ ꓙꓳ ꓡꓳ꓿ ꓣꓳꓽ ꓬꓰˍ ꓟ ꓮ ꓙꓵꓽ ꓠꓬ ꓪꓴ‐ꓢ ꓠꓬ ꓓ‐ꓳ ꓐꓰ ꓘꓳ ꓣꓴ ꓠꓯ ꓟ ꓥꓳ꓿ ꓣꓳ ꓬꓰ ꓟ ꓮ ꓙꓵꓽ ꓠꓬ ꓞꓳ ꓤ ꓐꓴ ꓢꓷ. ꓟꓽ ꓛꓵ꓾ ꓑ ꓫꓬ ꓐꓴ ꓡꓰ ꓓꓳ ꓟꓴ ꓫꓱ. ꓖꓶꓽ ꓟꓽ ꓛꓵ꓾ ꓪꓴ‐ꓢ ꓢꓷ. ꓠꓬ ꓓꓳ ꓐꓰ ꓐꓯ ꓢꓲ ꓢꓯꓼ ꓕꓵꓼ ꓠꓯ ꓟ ꓥꓳ꓿

ꓪꓴ‐ꓢ ꓠꓬ ꓘꓳ ꓫꓱ ꓫꓱ ꓗꓪ ꓔꓬ ꓢꓲ ꓣꓳꓽ ꓔꓯ ꓣꓱ ꓛꓰꓽ ꓖꓶꓽ ꓔꓬ, ꓟ ꓥꓳ꓿

ꓖꓳ ꓡꓱ ꓠꓬꓲ ꓕꓱ ꓕꓲꓽ ꓘꓳꓼ ꓜ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓗꓪ ꓣꓳ ꓠꓲ, ꓟ ꓔꓯ ꓪꓴ‐ꓢ  ꓐꓰ ꓙ ꓡꓯ ꓘꓳ ꓢꓲ꓾ ꓣꓳ ꓬꓰˍ ꓟ ꓮ ꓙꓵꓽ ꓠꓬ ꓢꓲ ꓒ ꓢꓷ. ꓟ ꓔꓯ ꓙꓵ ꓢꓲ ꓢꓯꓼ ꓕꓵꓼ ꓡꓯ꓿

ꓘꓳ ꓫꓱ ꓫꓱ ꓗꓪ ꓔꓬ ꓢꓲ ꓣꓱꓽ ꓛꓰ ꓖꓶꓽ ꓟ ꓪꓴ‐ꓢ ꓔꓯ ꓣꓳꓽ ꓪꓴ. ꓓꓵ ꓕꓱꓽ ꓔꓬ, ꓟ ꓑꓶ.ꓓꓴ ꓣꓳꓽ ꓬꓰˍ ꓟ ꓮ ꓙꓵꓽ ꓠꓬ ꓬꓲ. ꓕꓯ ꓢꓲ ꓗꓪ ꓡꓰ ꓟꓽ ꓥ ꓥ ꓐꓰ ꓠꓲ, ꓟ ꓠꓯ.ꓼ ꓗꓪ ꓐꓰ ꓔꓱ, ꓙꓳ ꓟ ꓡꓰ ꓬꓰ ꓠꓯ ꓟ ꓢꓯꓼ ꓕꓵꓼ ꓙꓰ ꓡꓯ꓿ ꓪꓴ‐ꓢ ꓠꓬ ꓠꓲ, ꓟ ꓔꓯ ꓡꓳ. ꓢꓴ ꓥ ꓡꓳ꓿ ꓠꓲ, ꓟ ꓔꓯ ꓒꓴ ꓡꓰ ꓠ, ꓟ ꓡꓰ ꓣꓳꓽ ꓢꓯꓼ ꓕꓵꓼ ꓙꓰ ꓡꓯ꓿

ꓜ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓖꓴ ꓡꓰ ꓢꓲ ꓢꓯꓼ ꓬꓲꓼ ꓡ ꓑꓮꓲꓽ ꓗꓪ ꓗ ꓛꓲ ꓛꓲ ꓡꓰ ꓔ, ꓬꓰ ꓐ ꓡ  ꓠ, ꓟ ꓢꓯꓼ ꓕꓵꓼ ꓙꓰ ꓡꓯ꓾

ꓮ ꓙꓵꓽ ꓢꓴ ꓔꓯ ꓪꓴ‐ꓢ ꓶ ꓤ ꓫꓱ, ꓤ ꓖꓶꓽ ꓡ ꓝꓲ꓿ ꓮ ꓟꓰꓠ