ꓜ ꓚꓵꓸ ꓚꓵꓸ ꓔ ꓟ ꓠꓬ ꓠꓲꓹ ꓟ ꓡꓶ ꓔ ꓟ (Arsh Wednesday- Homily)

ꓜ ꓚꓵꓸ ꓚꓵꓸ ꓦꓬꓼ ꓠꓬꓲ꓾ ꓘꓴ ꓦ ꓟꓲ ꓖꓶˍ ꓟ ꓦꓬꓼ ꓠꓬꓲ

ꓬꓳ-ꓶ ꓕꓳꓽ ꓶ 2: 12-18

ꓬꓰ-ꓧꓳ-ꓧꓪ ꓠꓬ ꓕꓱ ꓡꓱ ꓐꓯ_ ꓡꓳ꓾ ꓠꓴ ꓪ ꓠꓬ ꓜ ꓓꓴ ꓟꓽ ꓜ ꓬꓰ ꓢꓲ꓾ ꓠꓲꓹ ꓥꓴ ꓨ꓿ ꓮ ꓛꓬ ꓙꓱ ꓢꓲ ꓠꓬꓲ꓾ ꓕꓲ ꓠꓲꓹ ꓟ ꓡꓱꓸꓼ ꓮ ꓟꓶ ꓥꓪ ꓔꓯ ꓒꓳꓹ ꓬꓲꓼ ꓡꓯ꓿ ꓠꓴ ꓪ ꓐꓵ ꓞꓶ ꓕꓽ ꓚꓵꓹ ꓧꓽ ꓗꓷ꓿ ꓠꓲꓹ ꓟ ꓔꓯ ꓠꓽ ꓚꓵꓹ ꓧꓽ ꓗꓷ ꓢꓲ꓾ ꓬꓰ-ꓧꓳ-ꓧꓪ ꓠꓴ ꓪ ꓪꓴ-ꓢ ꓔꓯ ꓒꓳꓹ ꓬꓲꓼ ꓡꓯ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓬ ꓣꓱ ꓛꓰ_ ꓐꓰ ꓫꓱ ꓤ ꓠꓲꓹ ꓡꓰ ꓐꓲ ꓞ ꓢꓲ꓾ ꓞꓼ ꓐꓰ ꓠꓲꓹ ꓟ ꓟꓽ ꓦꓶ ꓢꓲ ꓠꓬꓲ꓾ ꓠꓲꓹ ꓙ ꓟꓬ ꓗꓳ_ ꓟ ꓬꓲ ꓓꓽ ꓟ ꓙꓳ ꓢꓲ꓾ ꓥꓶ_ ꓟ ꓗꓷ ꓡꓰ ꓝꓲ ꓠꓹ ꓟ ꓗꓪ ꓐꓰ ꓙ ꓡꓰꓼ ꓡ_ ꓡꓳ꓿ꓮ ꓧꓪꓹ ꓬꓲ ꓫꓬꓹ ꓓꓵ ꓙ ꓢꓲ꓾ ꓙꓽ ꓡꓰꓼ ꓡ ꓢꓲ ꓠꓬꓲ꓾ ꓬꓲ ꓗ ꓠꓯ ꓢꓲ ꓗꓪ ꓶꓼ ꓤ ꓫꓱ ꓤ ꓝꓰ ꓔꓲ ꓬꓰ_ ꓟ ꓮ ꓟ ꓢꓷ_ ꓡꓳꓺꓽ꓿ ꓖꓳ ꓡꓱ ꓥ ꓕꓯ꓾ ꓫꓪ ꓧꓶ ꓔꓲ ꓓꓴ_ ꓐꓰ ꓧꓳꓸ ꓔꓲ ꓓꓴ ꓬꓰ ꓠꓹ ꓟ꓾ ꓬꓰ-ꓧꓳ-ꓧꓪ ꓠꓴ ꓪ ꓪꓴ-ꓢ ꓔꓯ ꓔꓲ ꓖꓶ ꓓꓴ ꓙꓳ_ ꓥꓳ꓿ ꓜꓲ-ꓬꓴ ꓗꓪ ꓐꓵꓻ ꓛꓲ ꓟꓵꓺ ꓔꓴ ꓡꓯ꓿ ꓜ ꓓꓴ ꓟꓽ ꓜ ꓟ ꓦꓬ ꓠꓬꓲ ꓢꓲꓺ ꓚꓰꓸ ꓢꓲ꓾ ꓚꓲꓸ_ ꓟ ꓜꓲꓼ ꓓꓴ ꓘꓴ ꓜꓲꓼ ꓡꓯ꓿ ꓑ ꓫꓬ ꓐꓴ ꓔꓯ ꓜꓲꓼ ꓡ ꓝꓲ ꓢꓲ꓾ ꓜꓲꓼ ꓓꓴ ꓔꓯ ꓢꓲꓺ ꓚꓰꓸ ꓗꓷ꓿ ꓞꓳ ꓪꓴ ꓞꓳ ꓔꓲ ꓐꓴ ꓔꓯ_ ꓟꓲ ꓘꓴ ꓜꓲꓼ ꓡꓯ꓿ ꓤ ꓠꓱ ꓤ ꓐꓴ_ ꓐꓰ ꓮ ꓚꓵꓹ ꓛꓵꓼ ꓤ ꓔꓯ_ ꓟꓲ ꓘꓴ ꓜꓲꓼ ꓡꓯ꓿ ꓟꓯꓸ ꓡꓯ ꓒ ꓔꓯ_ ꓟꓲ ꓬꓲ ꓘꓷꓹ ꓖꓳꓼ ꓗꓪ ꓐꓰ ꓓꓳ ꓡ ꓝꓲ꓿ ꓟꓯꓸ ꓡꓯ ꓟ ꓔꓯ_ ꓟꓲ ꓬꓲ ꓗꓳꓹ ꓗꓪ ꓐꓰ ꓓꓳ ꓡ ꓝꓲ꓿ ꓬꓰ-ꓧꓳ-ꓧꓪ ꓔꓯ ꓣꓱ ꓙ ꓢꓴ ꓔꓲ ꓒ ꓐꓴ ꓔꓯ ꓠꓬ꓾ ꓔꓲ ꓖꓴ_ ꓐꓰ ꓡꓽ ꓦꓲ ꓒꓰ ꓠꓬꓲ ꓗꓴ ꓚꓸꓼ ꓗꓪ ꓥꓴ ꓔꓬ ꓝꓲ ꓢꓲ꓾ ꓬꓲ ꓪ ꓔꓯ ꓕꓱ ꓡꓱ ꓐꓯ ꓝꓲ꓾ ꓬꓰ-ꓧꓳ-ꓧꓪꓳ꓾ ꓠꓴ ꓑ ꓫꓬ ꓔꓯ ꓟꓽ ꓗꓹ ꓐꓽ ꓕꓽ ꓬꓰ꓿ ꓠꓴ ꓡꓯꓼ ꓪ ꓔꓯ ꓠꓬ ꓐꓶꓽ ꓒ ꓐꓴ ꓡꓰ ꓙꓵꓽ ꓢꓲ ꓫꓸ ꓔꓳ ꓡꓰ ꓠꓹ ꓟ ꓗꓪ ꓕꓽ ꓡꓯ ꓙꓱ ꓗꓷ꓿ ꓮ ꓫꓵ ꓪꓴ ꓠꓬꓲ ꓐꓶꓽ ꓒ ꓑ ꓫꓬ ꓡꓰ꓾ ꓬꓲ ꓪ ꓪꓴ-ꓢ ꓮ ꓡꓲ ꓗꓪ ꓔꓬ_ ꓡꓳꓺꓽ꓾ ꓐꓰ ꓐꓯ ꓪ ꓝꓲ_ ꓡꓳꓺꓽ꓾ ꓐꓰ ꓐꓯ ꓝꓲ꓿ ꓖꓳ ꓕꓯ ꓬꓰ-ꓧꓳ-ꓧꓪ ꓠꓬ ꓬꓲ ꓚꓲ ꓛꓬ ꓟꓵꓽ ꓐꓱ ꓶ ꓟꓬ ꓔꓳꓹ_ ꓡꓳ꓿ ꓬꓲ ꓑ ꓫꓬ ꓔꓯ_ ꓟꓲ ꓫꓱꓸ ꓤ_ ꓡꓳ=

2 ꓘꓳ-ꓡꓱ-ꓕꓴ 5ꓽ 20-6ꓽ 2

ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓥꓪ ꓠꓴꓽ ꓗꓪ ꓐꓰ ꓠꓴ ꓪꓽ ꓔꓯ ꓘꓶꓸ ꓖꓶˍ ꓟ ꓡꓰ ꓐꓰ꓾ ꓥꓪ ꓠꓴꓽ ꓠꓬ ꓙꓲ-ꓢꓴ ꓬꓲ ꓗꓴꓷ ꓝꓲ ꓓꓴ ꓥ ꓢꓲ꓾ ꓙꓲ-ꓢꓴ ꓐꓱ ꓶ ꓠꓴ ꓪꓽ ꓔꓯ ꓓꓰꓽˍ ꓠꓬꓲ꓾ ꓪꓴ-ꓢˍ ꓐꓰ ꓧꓳꓹ ꓡꓰ Gꓽ꓿ꓣꓳ ꓔꓯ ꓙꓲ-ꓢꓴ ꓠꓯꓸꓼ ꓗꓪ ꓪꓴ-ꓢ ꓬꓲ ꓔꓱꓹ ꓜꓳꓽˍ ꓟ ꓒꓬꓱꓼ ꓡ ꓝꓲ ꓠꓹ ꓟ꓾ ꓪꓴ-ꓢ ꓡꓰ ꓝꓴꓲ ꓟꓽ ꓙꓳ ꓢꓴ ꓖꓳ ꓕꓲ ꓣꓳ ꓔꓯ꓾ ꓣꓳ ꓐꓱ ꓶ ꓝꓴꓲ ꓒꓬꓱꓼ ꓡ ꓝꓲꓳ꓿ꓪꓴ-ꓢˍ ꓐꓰ ꓕꓲ ꓛꓳꓺꓼ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓥꓪ ꓠꓴꓽ ꓡꓰ ꓘꓶꓸ ꓖꓶꓽˍ ꓠꓬꓲ꓾ ꓠꓴ ꓪꓽ ꓟꓶꓺ ꓗꓷ ꓟ ꓪꓴ-ꓢ ꓣꓱꓽ ꓛꓰ ꓔꓯ ꓮꓽ ꓔꓳ ꓕꓽ ꓗꓷ ꓡꓰ ꓝꓲ꓿ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ꓾ ꓘꓳ ꓣꓴ ꓓꓻˍ ꓟ ꓝꓲꓸ ꓗꓪ ꓠꓴ ꓔꓯ ꓥꓪ ꓠ ꓠꓹ ꓗꓷꓳ꓿ ꓢꓯꓼ ꓟꓬ ꓟꓶ ꓓꓻˍ ꓟ ꓦꓬꓼ ꓠꓬꓲ ꓗꓪ ꓠꓴ ꓔꓯ ꓥꓪ ꓬꓰ ꓙ ꓗꓷꓳ꓾ ꓐꓰ ꓐꓯˍ ꓡꓳ꓿ ꓠꓬꓲ ꓠꓹ꓾ ꓪꓴ-ꓢ ꓡꓰ ꓘꓳ ꓣꓴ ꓓꓻˍ ꓟ ꓝꓲꓸ ꓠꓬ ꓮ ꓟꓶ ꓥꓳ꓿ ꓠ ꓠꓹ꓾ ꓢꓯꓼ ꓟꓬ ꓟꓶ ꓓꓻˍ ꓟ ꓦꓬꓼ ꓠꓬꓲˍ ꓟꓲ ꓮ ꓟꓶ ꓥꓳ꓿

ꓟ-ꓕꓲ 6ꓽ 1-6ꓹ 16-18

 ꓠꓴ ꓪꓽ ꓠꓬ ꓙꓲꓻˍ ꓟ ꓟꓬꓱꓽ ꓬꓰˍ ꓕꓯꓽ꓾ ꓢꓴ ꓟꓲꓽ ꓕꓯꓽ ꓗꓪ ꓟꓬꓱ ꓓꓳꓽ ꓟꓶ ꓠꓹ ꓟ ꓬꓰˍ ꓟ ꓕꓽ ꓗꓷ ꓡꓰ ꓝꓲ꓿ ꓟꓽ ꓥ ꓠꓬ꓾ ꓟꓴꓽ ꓗꓪ ꓗꓪ ꓔꓬ ꓟ ꓠꓴ ꓐꓹ ꓐ ꓬꓲ ꓡꓯꓼ ꓫꓴ ꓠꓴ ꓪꓽ ꓟꓽ ꓟꓶ꓿ꓖꓳ ꓡꓱ ꓠꓬꓲ꓾ ꓠꓴ ꓪꓽ ꓫꓱꓸ ꓤ ꓓꓴ ꓟꓬꓱꓽ ꓬꓰˍ ꓕꓯ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱ ꓢꓴˍ ꓡꓰ ꓐꓰ ꓞꓳ ꓤ ꓟꓲ ꓙꓬꓽ ꓗꓪ ꓟꓬꓱ ꓓꓳꓽ ꓟꓶ ꓠꓹ ꓟ꓾ ꓜꓲꓼ ꓦꓲˍ ꓐꓰ ꓙꓵꓺ ꓙ ꓖꓴ ꓓꓽ ꓟ ꓗꓪ ꓬꓰˍ ꓟ ꓡꓰ ꓐꓰ꓾ ꓠꓴ ꓪꓽ ꓟꓲꓽ ꓙꓬ ꓢꓲ ꓗꓪ ꓐꓽ ꓡ ꓕꓽ ꓟꓵ꓿ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓖꓳ ꓡꓱ ꓬꓰ ꓢꓴ ꓠꓬ ꓬꓲ ꓪꓽ ꓡꓯꓼ ꓫꓴ ꓮꓽ ꓙꓵꓽ ꓬꓲ ꓪꓽ ꓟꓶ ꓗꓷꓳ꓿ꓠꓴ ꓠꓽ ꓫꓱꓸ ꓤ ꓓꓴ ꓟꓬꓱꓽ ꓬꓰˍ ꓕꓯ꓾ ꓠꓴ ꓡꓯꓼ ꓙꓺ ꓐꓽ ꓡꓰ ꓬꓰˍ ꓟ ꓠꓬ꓾ ꓡꓯ ꓶꓸ ꓐꓽ ꓔꓯ ꓕꓽ ꓢꓷꓸ ꓡꓰ ꓝꓲ꓿ꓖꓳ ꓡꓱ ꓬꓰˍ ꓠꓬ ꓘꓳ ꓫꓱ ꓫꓱˍ ꓗꓪ ꓬꓰ ꓗꓷ ꓟ ꓔꓯ ꓡꓳꓸ ꓟꓳꓻˍ ꓟ ꓠꓴ ꓐꓹ ꓐ ꓡꓰ ꓠꓴ ꓔꓯ ꓡꓯꓼ ꓫꓴ ꓖꓶ ꓡ ꓥꓳ꓿ꓠꓴ ꓪꓽ ꓪꓽ ꓘꓴˍ ꓕꓯ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴˍ ꓡꓰ ꓐꓰ ꓕꓽ ꓬꓰ꓿ ꓬꓲ ꓪꓽ ꓠꓽ ꓞꓳ ꓤ ꓔꓯ ꓟꓳ ꓝꓲ ꓠꓹ ꓟ꓾ ꓜꓲꓼ ꓦꓲ ꓠꓯꓸꓼˍ ꓐꓰ ꓙ ꓫꓬꓸ ꓗꓪ ꓦꓰꓼ ꓞ ꓢꓲ ꓪꓽ ꓘꓴ ꓠꓲꓹ ꓫꓵˍ ꓡꓳ꓿ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓖꓳ ꓡꓱ ꓬꓰ ꓢꓴ ꓠꓬ ꓬꓲ ꓪꓽ ꓡꓯꓼ ꓫꓴ ꓮꓽ ꓙꓵ ꓬꓲ ꓪꓽ ꓟꓶ ꓗꓷꓳ꓿ꓠꓴ ꓪꓽ ꓪꓽ ꓘꓴˍ ꓕꓯ꓾ ꓘꓷꓹ ꓖꓳꓼ ꓗꓪ ꓓꓵꓽ ꓡꓰ ꓢꓲ꓾ ꓗ ꓘꓶꓽ ꓚꓵꓸ ꓗꓷ ꓢꓲ ꓠꓬꓲ꓾ ꓘꓳ ꓫꓱ ꓫꓱˍ ꓗꓪ ꓠꓴ ꓐꓰ ꓔꓬ ꓟ ꓠꓴ ꓐꓹ ꓐ ꓔꓯ ꓪꓽ ꓘꓴ꓿ ꓖꓳ ꓡꓱ ꓠꓬ ꓘꓳ ꓫꓱ ꓫꓱˍ ꓗꓪ ꓠꓴ ꓔꓯ ꓡꓳꓸ ꓟꓳˍ ꓟ ꓠꓴ ꓐꓹ ꓐ ꓡꓰ ꓠꓴ ꓔꓯ ꓡꓯꓼ ꓫꓴ ꓖꓶ ꓡ ꓥꓳ꓿ ꓠꓴ ꓪꓽ ꓠꓬ ꓜꓽ ꓓꓴ ꓚꓲꓸˍ ꓕꓯ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱ ꓢꓴˍ ꓡꓰ ꓐꓰ ꓠꓲꓹ ꓟ ꓫꓸ ꓒꓬꓱꓽ ꓕꓽ ꓶꓻ ꓝꓲ꓿ ꓬꓲ ꓪꓽ ꓠꓽ ꓜꓽ ꓓꓴ ꓚꓲꓸˍ ꓕꓯ ꓢꓴ ꓔꓯ ꓡꓳꓸ ꓓꓳ ꓡ ꓝꓲ ꓠꓹ ꓟ꓾ ꓬꓲ ꓪꓽ ꓒꓬꓱꓽ ꓟꓬ ꓡꓳꓸ ꓫꓸ ꓫ ꓟꓴꓽ ꓗꓷ ꓡꓰ ꓝꓲˍ ꓡꓳ꓿ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓬꓲ ꓪꓽ ꓡꓯꓼ ꓫꓴ ꓮꓽ ꓙꓵꓽ ꓬꓲ ꓪꓽ ꓟꓶ ꓗꓷꓳ꓿-ꓠꓴ ꓪꓽ ꓠꓽ ꓜꓽ ꓓꓴ ꓚꓲꓸˍ ꓕꓯ꓾ ꓢꓴ ꓔꓯ ꓟꓽ ꓡꓳꓸ ꓓꓳ ꓡ ꓝꓲ ꓠꓹ ꓟ꓾ ꓒꓬꓱꓽ ꓟꓬ ꓞꓲꓽ ꓠꓬꓲ꓾ ꓪꓴꓸ ꓓꓵ ꓗꓪ ꓟꓰꓺ ꓞꓶ ꓟꓰ ꓢꓲ ꓪꓴꓸ ꓓꓵ ꓑꓶꓸ ꓠꓬꓲ ꓬꓰ꓿ ꓖꓳ ꓡꓱ ꓠꓬ ꓘꓳ ꓫꓱ ꓫꓱˍ ꓗꓪ ꓠꓴ ꓪꓽ ꓔꓯ ꓡꓳꓸ ꓟꓳꓻˍ ꓟ ꓠꓴ ꓪꓽ ꓐꓹ ꓐ ꓡꓰ ꓠꓴ ꓪꓽ ꓔꓯ ꓡꓯꓼ ꓫꓴ ꓖꓶ ꓡ ꓥꓳ꓿