ꓞꓳ ꓐꓳˍ ꓐꓰ ꓡ-ꓢ-ꓣꓴ ꓟꓸ ꓟꓲꓽ

ꓡꓴ-ꓘ 16ꓽ19-31

ꓮꓽ ꓠꓱ ꓕꓯ ꓞꓳ ꓐꓳ ꓕꓲ ꓣꓳ ꓙꓳˍ ꓡꓳ= ꓬꓲ ꓠꓬ ꓠꓲ ꓛꓵꓼ ꓟ ꓟꓶˍ ꓐꓰ ꓪꓰ ꓜꓲꓽ ꓟꓶ ꓐꓵ ꓞꓶꓽ ꓖꓪꓽ ꓢꓲ꓾ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓐꓳ ꓓꓳ ꓐꓳ ꓢꓲ ꓜꓽ ꓢ ꓔꓬ ꓢˍ ꓡꓳ= ꓝꓮꓲ ꓠꓬ ꓕꓲ ꓖꓳ ꓕꓲ ꓓꓱꓽ ꓐꓶ ꓠ ꓛꓲꓸ ꓓꓲˍ ꓟ꓾ ꓡ-ꓢ-ꓣꓴ ꓟꓬꓱ ꓔ ꓟ ꓜ ꓓꓰꓽ ꓢꓴ ꓕꓲ ꓣꓳ ꓔꓯ꓾ ꓞꓳ ꓐꓳ ꓖꓳ ꓕꓲ ꓣꓳ ꓗ ꓘꓶꓽ ꓓꓴꓽ ꓗꓪ ꓧꓳꓽ ꓔ ꓢꓲ ꓖꓳ ꓗꓪ ꓓꓳꓽ ꓞꓹ ꓝꓲˍ ꓡꓳ= ꓖꓳ ꓡꓱ ꓢꓲ ꓬꓲ ꓠꓬ ꓞꓳ ꓐꓳ ꓢꓽ ꓡ ꓗꓪ ꓐꓰ ꓞꓰ ꓡꓰ ꓟ ꓜ ꓟꓰꓽ ꓖꓳ ꓜꓽ ꓟꓶ ꓡꓰ ꓝꓲ ꓠꓲꓹ ꓫꓵˍ ꓡꓳ= ꓮꓸ ꓠꓽˍ ꓟꓲ ꓬꓲ ꓐꓶꓻ ꓠꓻ ꓔꓯ ꓡꓷꓼ ꓡˍ ꓡꓳ=

ꓖꓳ ꓗ ꓠꓯꓸ ꓜ ꓓꓰꓽ ꓢꓴ ꓖꓳ ꓕꓲ ꓣꓳ ꓫꓵꓻ ꓠꓬ꓾ ꓟꓴꓽ ꓗꓪ ꓝꓲ ꓓꓴ ꓐꓴ ꓡꓰ ꓬꓲ ꓔꓯ ꓮ-ꓐ-ꓡ-ꓦ ꓔꓬ ꓗꓪ ꓧꓳꓽ ꓛꓲ ꓬꓰˍ ꓡꓳ= ꓞꓳ ꓐꓳˍ ꓟꓲ ꓫꓵꓻ ꓢꓲ ꓔꓵꓸ ꓗꓷꓳ= ꓬꓲ ꓠꓬ ꓟꓸ ꓟꓲꓽ ꓟꓵꓽ ꓮ ꓘꓶꓸ ꓫꓸ ꓙꓵˍ ꓟ ꓗꓪ ꓔꓬ ꓢꓲ ꓡꓳꓸ ꓠꓬꓲ ꓠꓬ꓾ ꓶꓽ ꓤ ꓗꓪ ꓡ-ꓢ-ꓣꓴˍ ꓐꓰ ꓮ-ꓐ-ꓡ-ꓦ ꓔꓯ ꓟꓳˍ ꓡꓳ= ꓬꓲ ꓠꓬ ꓘꓴ ꓢꓲ꓾ ꓒꓵꓽ ꓒ ꓮ-ꓐ-ꓡ-ꓦꓺꓳ꓾ ꓥꓪ ꓔꓯ ꓫꓱꓸ ꓤ ꓡꓯ= ꓡ-ꓢ-ꓣꓴ ꓬꓲ ꓡꓯꓼ ꓠꓬꓲ ꓪꓴꓸ ꓓꓵ ꓠꓬ ꓬꓲꓻ ꓙꓬ ꓗꓪ ꓔꓲꓹ ꓢꓲ꓾ ꓥꓪ ꓡ ꓛꓱ ꓗꓪ ꓠꓱꓽ ꓖꓶ ꓡ ꓝꓲ= ꓥꓪ ꓠꓬ ꓮ ꓔꓳꓸ ꓡ ꓡꓱ ꓕꓱ ꓟ ꓗꓪ ꓫꓸ ꓙꓵꓻ ꓠꓬꓲ ꓟꓽ ꓓꓻꓳ꓾ ꓐꓯˍ ꓡꓳ= ꓖꓳ ꓕꓯ ꓮ-ꓐ-ꓡ-ꓦ ꓡꓰ꓾ ꓥꓪ ꓤꓽꓳ꓾ ꓠꓴ ꓢꓯꓸ ꓔꓬ ꓕꓯ ꓠꓴ ꓠꓬ ꓙꓳ ꓢ ꓔꓬ ꓢ ꓟ ꓦꓬꓼ ꓠꓬꓲ ꓗꓳꓸ ꓪ ꓢꓲ꓾ ꓡ-ꓢ-ꓣꓴ ꓠꓬ ꓫꓸ ꓙꓵ ꓗꓷ ꓟ ꓔꓯ ꓓꓵꓽ ꓙ ꓔ= ꓮ ꓟꓶ ꓬꓲ ꓠꓽ ꓕꓱ ꓗꓪ ꓠꓲꓹ ꓟ ꓗꓴ ꓖꓶˍ ꓟ ꓟꓶˍ ꓡꓳ= ꓠꓴ ꓠꓽ ꓮꓽ ꓘꓶꓸ ꓫꓸ ꓙꓵꓻ ꓔꓬ ꓡꓳ= ꓣꓳ ꓠꓬꓲꓽ ꓗꓴꓸ ꓚꓸꓼ ꓗꓪ ꓡꓳ ꓘꓴꓽ ꓓꓽ ꓟ ꓕꓲ ꓟ ꓗꓷꓹ ꓞꓹ ꓠꓬꓲ꓾ ꓕꓻ ꓐꓽ ꓗꓪ ꓐꓰ ꓖꓳ ꓐꓽ ꓢꓲ ꓠꓴ ꓪ ꓔꓬ ꓗꓪ ꓙꓰ ꓠꓲꓹ ꓫꓵ ꓢꓴ ꓙꓳˍ ꓟꓲ ꓙꓰ ꓟꓽ ꓐ ꓡ= ꓖꓳꓻ ꓐꓽ ꓢꓲ ꓗꓪ ꓐꓰ ꓕꓻ ꓐꓽ ꓗꓪ ꓡ ꓠꓹ ꓫꓵ ꓢꓴ ꓙꓳˍ ꓟꓲ ꓡ ꓟꓽ ꓐ ꓡ꓾ ꓐꓯ ꓖꓶˍ ꓡꓳ=

ꓞꓳ ꓐꓳ ꓡꓰ꓾ ꓒꓵꓽ ꓒꓽꓳ꓾ ꓖꓳ ꓡꓱ ꓥ ꓠꓬ ꓡ-ꓢ-ꓣꓴ ꓔꓯ ꓥꓪ ꓐꓹ ꓐꓽ ꓦꓲ ꓗꓪ ꓝꓲ ꓩꓴ ꓗꓷ꓾ ꓐꓰ ꓠꓴ ꓔꓯ ꓥꓪ ꓓꓰꓽˍ ꓥꓳ= ꓮ ꓡꓲꓳ ꓐꓯ ꓠꓬ ꓥꓪ ꓬꓲꓼ ꓥꓪ ꓠꓬꓲ ꓥꓪꓽ ꓣꓳ ꓙꓳˍ ꓡꓳ= ꓬꓲ ꓪ ꓔꓯ ꓫꓸ ꓙꓵˍ ꓟ ꓟꓵꓽ ꓕꓱ ꓟ ꓗꓪ ꓟꓽ ꓡ ꓠꓹ ꓟ ꓙꓳꓺ ꓗꓽ ꓖꓶ ꓬꓰ ꓝꓲ꓾ ꓐꓯˍ ꓡꓳ= ꓮ-ꓐ-ꓡ-ꓦ ꓡꓰ꓾ ꓬꓲ ꓪ ꓠꓬ ꓟꓳ-ꓫꓲˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓙꓳˍ ꓡꓳ= ꓠꓴ ꓬꓲꓼ ꓠꓬꓲ ꓐꓴ ꓠꓬ ꓬꓲ ꓪ ꓔꓯ ꓠ ꓠꓹ ꓝꓲ꓾ ꓐꓯ ꓖꓶˍ ꓡꓳ=

ꓬꓲ ꓡꓰ꓾ ꓒꓵꓽ ꓒ ꓮ-ꓐ-ꓡ-ꓦꓺꓳ꓾ ꓟꓽ ꓥ= ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓢꓴ ꓕꓲ ꓣꓳ ꓬꓲ ꓪ ꓔꓯ ꓙꓰˍ ꓕꓯ ꓠꓽ꓾ ꓬꓲ ꓪ ꓓꓵꓽ ꓙ ꓒꓳꓹ ꓬꓲꓼ ꓡˍ ꓥꓳ꓾ ꓐꓯˍ ꓡꓳ= ꓮ-ꓐ-ꓡ-ꓦ ꓡꓰ ꓬꓲ ꓔꓯ꓾ ꓟꓳ-ꓫꓲˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓔꓯ ꓬꓲ ꓪ ꓟꓽ ꓠ ꓠꓹ ꓕꓯ ꓠꓽ꓾ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓢꓴ ꓕꓲ ꓣꓳ ꓝꓲ ꓩꓴ ꓗꓷˍ ꓟꓲ ꓟꓽ ꓠ ꓠꓹ ꓡ꓾ ꓐꓯ ꓖꓶˍ ꓡꓳ=

ꓣꓳ ꓙꓲ-ꓢꓴ ꓢꓲ ꓤ ꓐꓴ ꓙꓵꓽ ꓗ ꓙꓳˍ ꓟ ꓡꓰ ꓐꓰ ꓠꓱꓸ ꓐꓯ ꓢꓴ ꓔꓯ ꓬꓰ ꓙ ꓠ ꓗꓹ ꓡꓳ꓾ ꓐꓯˍ ꓟ ꓔꓯ ꓔꓯꓺ ꓥꓳꓽ ꓕꓱ ꓟ ꓗꓪ ꓐꓰ ꓟꓸ ꓖꓶ ꓔꓬ ꓡꓳ= ꓪꓴ-ꓢ ꓡꓰ ꓖꓶ ꓔ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓔꓯ ꓣꓳ ꓟꓬ ꓛꓲ ꓟꓽ ꓙꓳ ꓢꓴ ꓔꓯ ꓐꓱ ꓖꓶ ꓠ ꓗꓹ ꓡꓳ= ꓣꓳ ꓟꓬ ꓛꓲ ꓟꓽ ꓢꓷꓸ ꓢꓴ ꓔꓯ ꓟꓸ ꓖꓶ ꓠ ꓗꓹ ꓡꓳ= ꓣꓳ ꓢꓶꓸ ꓟꓽ ꓞꓲꓺ ꓫꓸ ꓙꓵ ꓔꓬ ꓢꓴ ꓐꓴ ꓔꓯ ꓬꓰ ꓙ ꓔꓳꓹ ꓙ ꓖꓶ ꓠꓹ ꓟ ꓣꓳ ꓔꓯ ꓶꓻ ꓙꓳˍ ꓡꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=