ꓞꓳ ꓐꓳ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓫˍ ꓟ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵ ꓢꓴ ꓧꓪꓸ ꓧꓪꓸꓼ꓾

ꓠꓬꓲꓸ ꓠꓬꓲ ꓠꓽ ꓠꓬꓲꓽ ꓠꓬꓲ ꓗꓪ ꓦ ꓢꓯꓼ ꓪ ꓣꓴ ꓓꓴ ꓟꓸ ꓟꓲꓽ ꓝꓲ ꓠꓬ ꓟ-ꓕꓲ 19ꓽ23-30 ꓥ ꓡꓳ= ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓥꓪ ꓠꓴ ꓪ ꓔꓯ ꓔꓱꓹ ꓔꓱꓹ ꓐꓯ ꓖꓶˍ ꓠꓬꓲ ꓞꓳ ꓐꓳ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓫ ꓡꓳ= ꓥꓪ ꓝꓮꓲ ꓠꓴ ꓪ ꓔꓯ ꓐꓯ ꓖꓶˍ ꓠꓬꓲ ꓡꓳꓽ ꓕꓳ ꓕꓲ ꓘꓹ ꓪꓳꓼ ꓠ ꓗ ꓗꓪ ꓙꓻ ꓙꓰˍ ꓟ ꓠꓬ ꓞꓳ ꓐꓳ ꓕꓲ ꓣꓳ ꓪꓴ-ꓢ ꓗꓴꓷꓼ ꓠꓯꓸꓼ ꓗꓪ ꓓꓵꓽ ꓡꓰˍ ꓟ ꓢꓶꓸ ꓟꓽ ꓞꓲꓺ ꓢˍ ꓡꓳ꓾ ꓐꓯ ꓡꓳ= ꓐꓯ ꓘꓶ ꓕꓱ ꓟ ꓑ ꓙ ꓗꓷ ꓕꓯ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓮ ꓘꓶꓸ ꓓꓵꓽ ꓙ ꓟꓶ ꓡꓰ ꓢꓲ꓾ ꓖꓳ ꓡꓱ ꓥ ꓠꓬ ꓮꓽ ꓟ ꓢꓯꓼ ꓟꓬ ꓚꓬꓴ ꓟꓶ ꓓ ꓢꓰ꓾ ꓐꓯ ꓡꓳ= ꓬꓰ-ꓢꓴ ꓠꓬ ꓬꓲ ꓪ ꓔꓯ ꓡꓳꓸ ꓢꓲ ꓬꓲ ꓪ ꓔꓯ ꓞꓳ ꓤ ꓠꓽ ꓟꓽ ꓐ ꓡ= ꓪꓴ-ꓢ ꓠꓽ ꓮ ꓫꓵꓽˍ ꓟꓲ ꓐ ꓡˍ ꓡꓳ꓾ ꓐꓯ ꓡꓳ= ꓖꓳ ꓡꓱ ꓠꓬꓲ ꓒꓲ-ꓕꓱ ꓡꓰ ꓒꓳꓹ ꓖꓶ ꓢꓲ ꓬꓲ ꓔꓯ꓾ ꓠꓬꓲ ꓠꓹ꓾ ꓥꓪ ꓠꓴꓽ ꓠꓬ ꓮ ꓙꓵꓽ ꓡꓱꓸꓼ ꓡꓳ ꓗꓷ ꓢꓲ ꓠꓴ ꓔꓯ ꓛꓳˍ ꓡꓳ= ꓖꓳ ꓡꓱ ꓠꓬ ꓥꓪ ꓠꓴꓽ ꓮ ꓫꓵꓽ ꓟꓶˍ ꓥꓳ ꓪ꓾ ꓐꓯ ꓡꓳ= ꓬꓰ-ꓢꓴ ꓡꓰ ꓬꓲ ꓪ ꓔꓯ ꓕꓰ ꓡꓰ ꓐꓯ ꓡꓳ= ꓥꓪ ꓠꓴ ꓪ ꓔꓯ ꓔꓱꓹ ꓔꓱꓹ ꓐꓯ ꓖꓶˍ ꓠꓬꓲ ꓥꓪ ꓔꓯ ꓛꓳ ꓢꓴ ꓠꓴ ꓪ ꓠꓬ ꓟꓲ ꓠꓯ ꓫꓵꓼ ꓗꓪ ꓡ-ꓞꓳ-ꓮ-ꓐꓲ ꓬꓲ ꓐꓬꓱꓼ ꓡꓱꓼ ꓡꓱꓼ ꓟ ꓙꓵ ꓠꓬꓲꓸ ꓕꓲꓽ ꓗꓪ ꓠꓬꓲ ꓠꓸ ꓕꓯ ꓠꓴ ꓪꓴˍ ꓟꓲ ꓙꓵ ꓠꓬꓲꓸ ꓕꓲꓽ ꓞꓲꓺ ꓠꓬꓲꓽ ꓟ ꓗꓪ ꓠꓬꓲꓸ ꓠꓸ ꓢꓲ ꓬꓲ-ꓢꓷ-ꓡꓰ ꓞꓲꓺ ꓠꓬꓲꓽ ꓪꓳꓼ ꓔꓯ ꓐꓯ ꓟꓴ ꓘꓶꓽˍ ꓥꓳ= ꓥꓪ ꓟꓬꓱꓺ ꓐꓱ ꓶ꓾ ꓥ ꓠꓬ꓾ ꓬꓲꓼ ꓤ ꓠꓬꓲ ꓤ ꓮ ꓝꓲ ꓠꓬꓲ ꓟ꓾ ꓟꓽ ꓥ ꓠꓬ꓾ ꓮꓽ ꓐ ꓮ ꓟ ꓐꓰ ꓤ ꓠꓱ꓾ ꓥ ꓠꓬ꓾ ꓓꓰ ꓟꓲ ꓡꓳ ꓔ ꓬꓰ ꓢꓴ ꓥ ꓕ ꓑꓳꓸ ꓕꓲ ꓦꓬ ꓝ ꓟꓶ ꓢꓲ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶˍ ꓥꓳ=

ꓟꓸ ꓟꓲꓽ ꓕꓱ ꓟ ꓔꓯ ꓠ ꓠꓹ ꓗꓷˍ ꓕꓯ ꓪꓴ-ꓢ ꓠꓬ ꓞꓳ ꓐꓳ ꓔꓯ ꓮ ꓔꓳꓺ ꓐꓯ ꓟ ꓟꓽ ꓥ= ꓪꓴ-ꓢ ꓠꓬ ꓞꓳ ꓐꓳ ꓔꓯ ꓠꓲꓹ ꓙꓳˍꓟ ꓟꓽ ꓥ= ꓖꓳ ꓡꓱ ꓥˍ ꓟꓲ ꓞꓳ ꓐꓳ ꓠꓬ ꓬꓲ ꓪ ꓠꓲꓹ ꓟ ꓮ ꓡꓲ ꓗꓪ ꓓꓹ ꓡ ꓐꓯ ꓟ ꓔꓯ ꓪꓴ-ꓢ ꓡꓰ ꓟꓸ ꓖꓶ ꓠꓲꓹ ꓫꓵˍ ꓟ ꓥ ꓡꓳ= ꓞꓳ ꓐꓳ ꓥˍ ꓟꓲ꓾ ꓞꓳ ꓫ ꓥˍ ꓟꓲ꓾ ꓬꓲ ꓪ ꓠꓲꓹ ꓟ ꓠꓬ ꓪꓴ-ꓢ ꓔꓬ ꓗꓪ ꓟꓽ ꓙꓳ ꓙꓳ ꓬꓲ ꓪ ꓦ ꓡꓱ ꓖꓴ ꓠꓬ ꓪꓴ-ꓢ ꓕꓯ ꓢꓲꓺ ꓗꓪ ꓟꓽ ꓥ ꓕꓯ꓾ ꓬꓲ ꓪ ꓥꓳ ꓡꓳꓸ ꓖꓴ ꓬꓲ ꓪ ꓓꓵꓽ ꓙ ꓖꓴ ꓮ ꓙꓵꓽ ꓠꓬ꓾ ꓬꓲ ꓪ ꓢꓯꓼ ꓪ ꓮ ꓙꓵꓽ ꓠꓬ ꓪꓴ-ꓢ ꓔꓯ ꓡꓰꓽ ꓟꓽ ꓥ ꓥ ꓠꓱꓸ ꓐꓯ ꓔꓯ ꓥꓳ ꓡꓳꓸ ꓔꓬ ꓕꓯ ꓚꓬꓴꓸ ꓟꓶ ꓟꓽ ꓓ ꓟ ꓔꓯ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓞꓳ ꓐꓳ ꓥ ꓟꓲ꓾ ꓞꓳ ꓫ ꓥ ꓟꓲ ꓮ ꓙꓵꓽ ꓠꓬ ꓣꓳ ꓥꓳ ꓡꓳꓸ ꓖꓴ ꓠꓬ ꓢꓲ ꓒ ꓕꓲ ꓣꓳˍ ꓡꓰꓽ ꓥ ꓡꓳ= ꓣꓳ ꓠꓬ ꓪꓴ-ꓢ ꓔꓯ ꓙꓵꓻ ꓢꓴ ꓥ ꓡꓳ= ꓪꓴ-ꓢ ꓔꓯ ꓙꓵꓻ ꓢꓴ ꓠꓬ ꓮ ꓙꓵꓽ ꓔꓯ ꓢꓶꓸ ꓟꓽ ꓞꓲꓺ ꓪꓴ-ꓢ ꓔꓯ ꓥꓳ ꓡꓳꓸ ꓓꓴ ꓥ ꓡꓳ= ꓪꓴ-ꓢ ꓔꓯ ꓙꓵꓻ ꓓꓴ ꓥ ꓡꓳ꓾ ꓐꓯ ꓟ ꓠꓬꓲꓸ ꓠꓬꓲ ꓣꓳ ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓐꓯ ꓟꓳꓸ ꓖꓶ ꓡ ꓔꓬ ꓟ ꓥ ꓡꓳ= ꓞꓳ ꓐꓳ ꓤ ꓖꓴ ꓡꓯꓸ ꓕꓲ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓙꓰ ꓢꓲ ꓠꓬꓲ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓮ ꓫꓵꓽ ꓬꓰ ꓠꓯꓹ ꓡ꓾ ꓐꓰ ꓠ ꓠꓬꓲˍ ꓟ ꓔꓯ ꓢꓲꓺ ꓒ ꓬꓰ-ꓢꓴ ꓡꓰ ꓒꓳꓹ ꓖꓶˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳ ꓠꓬꓲꓸ ꓠꓬꓲ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓮ ꓫꓵꓽ ꓬꓰ ꓠꓯꓹ ꓡ꓾ ꓐꓰ ꓠ ꓠꓬꓲ ꓗꓷ ꓟ ꓞꓳ ꓐꓳ ꓤ ꓖꓴ ꓡꓯꓸ ꓕꓲ ꓣꓳ ꓔꓯ ꓒꓳꓹ ꓖꓶ ꓗꓷ ꓟ ꓢꓲ ꓒ ꓬꓰ-ꓢꓴ ꓬꓲ ꓒꓳꓹ ꓖꓶ ꓘꓶꓽ ꓔꓯ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓡꓯ= ꓣꓳ ꓔꓯ ꓙꓳˍ ꓟ ꓮ ꓙꓵꓽ ꓪꓴꓽ ꓗꓷ꓾ ꓐꓰ ꓢꓲꓺ ꓒ ꓬꓰ-ꓢꓴ ꓐꓯ ꓟ ꓠꓬ ꓣꓳ ꓔꓯ ꓙꓳˍ ꓟ ꓝꓴꓲꓸ꓾ ꓣꓳ ꓔꓯ ꓙꓳˍ ꓟ ꓥꓶˍ ꓟ ꓠꓲꓹ ꓟ꓾ ꓣꓳ ꓔꓯ ꓙꓳˍ ꓟ ꓟꓬ ꓔꓳꓹ ꓟ ꓠꓲꓹ ꓟ꓾ ꓝꓮꓲ ꓣꓳ ꓔꓯ ꓙꓳˍ ꓟ ꓒꓴ ꓫꓵꓺ ꓔꓯ ꓡꓰꓽ ꓟꓬ ꓠꓯꓸ ꓟ꓾ ꓣꓳ ꓔꓯ ꓙꓳˍ ꓟ ꓟꓽ ꓥ ꓟ ꓮ ꓙꓵꓽ ꓟꓽ ꓔꓱꓹ ꓟ ꓮ ꓙꓵꓽ ꓪꓴꓽ ꓗꓷ ꓢꓲ ꓠꓬꓲ ꓪꓴ-ꓢ ꓔꓯ ꓖꓼ ꓛꓳ ꓡꓯ= ꓔꓱꓹ ꓜꓳꓽˍ ꓟ ꓗꓪ ꓙꓰ ꓡꓯ꓾ ꓐꓰ ꓢꓲꓺ ꓒ ꓬꓰ-ꓢꓴ ꓐꓯ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓟꓴꓽ ꓗꓪ ꓗꓴꓷꓼ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓲꓹ ꓫꓵˍ ꓥꓳ ꓐꓯ ꓠꓬ ꓬꓲ ꓔꓯ ꓙꓵꓻ ꓢꓲ ꓠꓬꓲ ꓬꓲ ꓐꓯ ꓘꓶꓽ ꓔꓯ ꓛꓳ ꓫꓱꓽ ꓠꓹ ꓟ ꓪꓴ-ꓢ ꓡꓰ ꓣꓳ ꓔꓯ ꓙ ꓖꓴ ꓟꓸ ꓖꓶ ꓔꓬ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓮ ꓙꓵꓽ ꓢꓴ ꓢꓯꓼ ꓕꓵꓼ ꓙꓰ ꓡꓯ= ꓮ ꓙꓵꓽ ꓢꓴ ꓔꓯ ꓪꓴ-ꓢ ꓡꓰ ꓶꓼ ꓥꓳ ꓙꓱꓽ ꓖꓶ ꓝꓲ=