ꓞꓳ ꓜꓴ ꓞꓳ ꓟꓯꓼ ꓬꓰ-ꓢꓴ ꓔꓯ ꓛꓳ ꓡˍ ꓟ

ꓟ-ꓘꓳ 3ꓽ7-12

ꓖꓳ ꓗꓸ ꓠꓯꓸ ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓬꓲꓻ ꓡꓴꓽ ꓐꓱ ꓔꓯꓸ ꓟꓳꓸ ꓙꓵꓺ ꓙꓰ ꓠꓬ꓾ ꓖ-ꓡꓲ-ꓡꓲ ꓗꓪ ꓐꓰ ꓡꓻ ꓟ ꓞꓳ ꓜꓴ ꓞꓳ ꓟꓯꓼˍ ꓐꓰ꓾ ꓬꓴ-ꓔ ꓟꓵꓽ ꓢꓴˍ ꓟꓲ ꓬꓲ ꓔꓯ ꓛꓳ ꓙꓰˍ ꓡꓳ꓿ ꓝꓮꓲ ꓙꓱ-ꓣꓴ-ꓢ-ꓡꓱˍ ꓐꓰ ꓬꓲ-ꓓꓳ-ꓟꓷˍ ꓐꓰ ꓬꓳ-ꓔ ꓬꓲꓽ ꓟ ꓖꓳ ꓐ ꓢꓲ꓾ ꓕꓲ-ꓬˍ ꓐꓰ ꓢꓲ-ꓓꓳ ꓚꓳ ꓡꓳ ꓗꓪ ꓔꓬ ꓢꓴ ꓞꓳ ꓜꓴ ꓞꓳ ꓟꓯꓼ ꓐꓴˍ ꓟꓲ꓾ ꓬꓲ ꓬꓰˍ ꓟ ꓟꓬꓱꓽ ꓔꓯ ꓑ ꓙꓽ ꓢꓲ ꓬꓲ ꓔꓯ ꓡꓻ ꓡꓳ꓿ ꓞꓳ ꓜꓴ ꓡꓰ ꓬꓲ ꓔꓯ ꓟꓽ ꓝꓲꓽ ꓡ ꓠꓹ ꓟ꓾ ꓡꓲꓺ ꓤ ꓕꓲ ꓟ ꓧꓪ ꓔ ꓖꓶ꓾ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓐꓯ ꓖꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓡꓰ ꓡꓽ ꓞꓳ ꓮꓽ ꓟꓬꓹ ꓣꓳ ꓔꓯ ꓫꓬꓹ ꓓꓻ ꓡꓰ ꓠꓬꓲ꓾ ꓠꓻ ꓢꓴ ꓥ ꓕ ꓑꓳꓸ ꓬꓲ ꓔꓯ ꓫꓱꓹ ꓪ ꓠꓹ ꓟ ꓑꓵꓺ ꓡ ꓡꓳ꓿ ꓠꓲꓽ ꓟꓯꓹ ꓢꓴˍ ꓟꓲ ꓬꓲ ꓔꓯ ꓮ ꓕꓯꓽ ꓟꓳꓻ ꓠꓬ ꓖꓳ ꓕꓯꓽ ꓬꓲ ꓟꓲꓽ ꓙꓬꓽ ꓗꓪ ꓟꓳꓼ ꓡ ꓢꓲ꓾ ꓠꓴ ꓠꓬ ꓪꓴ-ꓢ ꓮ ꓐꓲ ꓥꓳ꓾ ꓐꓰ ꓘꓴꓻˍ ꓡꓳ꓿ ꓬꓲ ꓮꓽ ꓟ ꓥ ꓟ ꓢꓴ ꓔꓯ ꓕꓽ ꓢꓷꓸ ꓡꓰ ꓝꓲ꓾ ꓐꓰ ꓬꓲ ꓪꓽ ꓔꓯ ꓕꓵꓼ ꓪ ꓖꓶˍ ꓡꓳ꓿

ꓙꓲꓻˍ ꓟ ꓬꓰˍ ꓠꓬ꓾ ꓔꓱꓸ ꓜꓳꓽˍ ꓟ ꓬꓰˍ ꓠꓬ ꓟꓬꓱ ꓓꓳꓽ ꓙꓳ ꓢꓲ꓾ ꓟꓽ ꓙꓲꓻ ꓟꓽ ꓔꓱꓹ ꓟ ꓬꓰ ꓔ ꓕꓯ ꓠꓽ ꓚꓵ ꓔ ꓟꓽ ꓠ꓾ ꓞꓳ ꓤ ꓓꓳꓽ ꓠꓬ ꓤꓳ ꓤ ꓐꓴ ꓡꓰ ꓐꓯ ꓒꓬꓱˍ ꓡꓳ= 

ꓢꓲ ꓒ ꓬꓰ-ꓢꓴ ꓬꓲ ꓙꓲꓻˍ ꓟ ꓓꓳꓽ ꓑ ꓙꓽ ꓢꓴ ꓮ ꓙꓵꓽ ꓠꓬ ꓬꓰ-ꓢꓴ ꓔꓬ ꓗꓪ ꓡ ꓠꓹ ꓟ ꓘꓴ ꓟꓽ ꓛꓵ ꓛꓵ꓾ ꓑ ꓫꓬ ꓐꓴ ꓮ ꓟꓬꓹ ꓠꓬ ꓢꓲ ꓒ ꓔꓯ ꓧꓪ ꓢꓲ ꓬꓲ ꓔꓬ ꓗꓪ ꓜꓲꓼ ꓡˍ ꓟ ꓔꓯ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓑ ꓙꓽ ꓪˍ ꓡꓳ= 

ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓛꓳ ꓔꓬ ꓟ ꓣꓳ ꓐꓴ ꓥˍ ꓟꓲ ꓙꓲꓻˍ ꓟ ꓬꓰ ꓢꓲ꓾ ꓔꓯꓺ ꓢꓳ ꓓꓴ ꓬꓰ ꓢꓲ ꓠꓬꓲ ꓞꓳ ꓙꓳ ꓢꓯꓸ ꓔꓬ ꓕꓯ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ꓾ ꓬꓰ-ꓢꓴ ꓔꓯ ꓡ ꓢꓴ ꓮ ꓟꓬꓹ ꓟꓬꓽ ꓡˍ ꓥꓳ=

ꓣꓳ ꓡꓰ ꓙꓲꓻˍ ꓟ ꓬꓰˍ ꓟ ꓠꓬ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓠꓱꓸ ꓐꓯ ꓢꓴ ꓔꓯ ꓘꓴ ꓔꓯꓹ ꓙꓰ ꓐ ꓡ ꓕꓯ ꓠꓽ꓾ ꓣꓳ ꓡꓰ ꓟꓽ ꓙꓲꓻ ꓟ ꓬꓰˍ ꓕꓯ ꓟꓲ ꓠꓱꓸ ꓐꓯ ꓢꓴ ꓬꓰ-ꓢꓴ ꓔꓬ ꓗꓪ ꓟꓽ ꓛꓲ ꓬꓰ ꓠꓹ ꓟ ꓗꓽ ꓔ ꓓꓴ ꓒꓬꓱꓼ ꓡˍ ꓥꓳ꓾ ꓐꓯˍ ꓟ ꓔꓯˍ ꓟꓲ ꓣꓳꓽ ꓚꓲꓸ ꓔ ꓠ ꓗꓹ ꓟ ꓥ ꓡꓳ=