ꓞꓳ ꓫꓵꓽ ꓐꓴ ꓔꓯ ꓐꓯ ꓟꓴ ꓘꓶꓽˍ ꓟ (Christ King)

ꓞꓳ ꓫꓵꓽ ꓐꓴ ꓔꓯ ꓐꓯ ꓟꓴ ꓘꓶꓽˍ ꓟ (Christ King) (29.ꓠꓳꓐꓰꓟꓐꓰꓣ 2023)

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓼ ꓘꓳꓼ ꓗꓪ ꓐꓰ ꓬꓲ ꓟꓶ ꓕꓲ ꓫꓵꓽ ꓠ, ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓪ ꓔꓲ ꓑꓮꓲ ꓦꓬꓼ ꓠꓬꓲ ꓟꓲ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓼꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 25ꓽ31‐46) ꓝꓲ ꓥ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓟꓶ ꓕꓲ ꓠꓬꓲ ꓗꓪ ꓞꓳ ꓫꓵꓽ ꓐꓴ ꓔꓯ ꓐꓯ ꓟꓴ ꓘꓶꓽˍ ꓡ ꓟ ꓚꓱ, ꓔꓯ ꓐꓯ ꓟ. ꓖꓶ ꓟ ꓢꓲꓽ ꓫꓬ ꓕꓳ ꓶ ꓝꓲ ꓥ ꓡꓳ꓿

ꓠꓬꓲ. ꓠꓬꓲ ꓗꓪ ꓟꓵ ꓗꓳ, ꓓꓵ ꓓꓵ ꓗꓪ ꓔꓬ ꓟ ꓪ ꓔꓲ ꓓꓯ ꓢꓲ ꓪ ꓔꓲ ꓑꓮꓲ ꓔꓯ ꓬꓰ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓪ ꓔꓲ ꓮ ꓙꓵꓽ ꓐꓴ ꓕꓯ ꓢꓲ ꓗꓪ ꓟ ꓪ ꓔꓲ ꓥ ꓡꓳ꓿ ꓪ ꓔꓲ ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓥ ꓢꓲ ꓠꓬꓲ ꓠꓵꓻ ꓠꓲ, ꓢꓲꓺ ꓒ ꓟꓲ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓔꓯ ꓪ ꓔꓲ ꓢꓲꓺ ꓒ ꓬꓰ‐ꓢꓴ ꓙꓵꓽ ꓡ ꓟ ꓙꓵ, ꓕꓯ ꓠꓵꓻ ꓠꓲ, ꓔꓯ ꓣꓱ ꓛꓰ ꓡꓯꓼ ꓫꓴ ꓐꓰ ꓫꓵꓻ ꓟ ꓔꓯ ꓝꓮꓲ ꓢꓯ. ꓬꓯꓼ ꓡ ꓟ ꓐꓰ ꓙꓳꓺ ꓟ ꓔꓯ ꓙꓵꓻ ꓠꓲ, ꓐꓰ ꓒꓳ, ꓡꓶꓽ ꓡ ꓝꓲ ꓟ ꓢꓲꓺ ꓒ ꓥ ꓡꓳ꓿

ꓣꓳ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓟꓴ ꓗꓳ, ꓓꓵ ꓓꓵ ꓗꓪ ꓔꓬ ꓟ ꓪ ꓔꓲ ꓐꓴ ꓕꓯ ꓢꓲ ꓪ ꓔꓲ ꓐꓰ ꓘꓳ, ꓣꓴ ꓥ ꓟꓲ ꓣꓳ ꓤꓶꓻ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓙꓵꓽ ꓡ ꓠ, ꓟ ꓟꓽ ꓘꓳꓼ ꓣꓴ ꓥ ꓐꓯ ꓮ ꓫꓵꓽ ꓙꓲ ꓖꓴ ꓟꓽ ꓙꓳ ꓟ ꓥ ꓡꓳ꓿ ꓠꓴ ꓥꓪ ꓔꓯ ꓙꓵꓽ ꓢꓴ ꓐꓰ ꓣꓳ ꓤꓶꓻ ꓗꓪ ꓘꓳ, ꓣꓴ ꓠꓯ, ꓟ ꓥ ꓡꓳ꓿

ꓣꓳ ꓢꓲꓺ ꓒ ꓠꓯ, ꓗꓪ ꓙꓰ ꓕꓯ ꓢꓲꓺ ꓒ ꓣꓳ ꓔꓯ ꓠꓵꓻ ꓠꓲ, ꓗꓪ ꓐꓰ ꓮ ꓕꓯ ꓥ ꓟꓲ ꓮ ꓡꓰ ꓗꓷ ꓡꓰ ꓥ ꓟꓲ ꓘꓳ, ꓣꓴ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓛꓬ ꓡꓰ ꓟ ꓝꓴꓲ ꓝꓮꓲ ꓕꓯ ꓖꓽ ꓖꓶ ꓢꓲ ꓠꓬꓲ ꓣꓳ ꓚꓲ ꓚꓲ ꓓꓵ ꓙ ꓒꓳ, ꓡꓶꓽ ꓠꓬ ꓣꓳ ꓔꓯ ꓕꓲ ꓞꓲꓼ ꓕꓲ ꓒ ꓢꓯꓼ ꓟꓬ, ꓔꓯ ꓖꓶ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓕꓲ ꓒꓳ, ꓗꓪ ꓐꓰ ꓢꓲꓺ ꓒ ꓔꓯ ꓖꓶ ꓠ, ꓟ ꓙꓳˍ ꓟ ꓥ ꓡꓳ꓿

ꓕꓱ ꓟ ꓠꓬ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓬꓲ ꓚꓲ ꓛꓬ ꓦꓰꓼ ꓟꓷꓼ ꓢꓴ꓾ ꓬꓲꓻ ꓙꓬ ꓢꓲꓼ ꓔꓬ ꓢꓴ꓾ ꓐꓰ ꓬꓲ ꓞꓳ ꓬꓯꓼ ꓟꓴ ꓢꓴ ꓐꓰ ꓐꓱ ꓓꓵ ꓗꓪ ꓔꓬ ꓢꓴ ꓐꓰ ꓐꓯ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓐ, ꓐ ꓡꓰ ꓖꓶ ꓔ ꓟ ꓶꓼ ꓤ ꓫꓱ, ꓤ ꓟꓶ ꓢꓴ ꓠꓴ ꓪ ꓠꓬ ꓟꓵꓽ ꓚꓱꓼ ꓟꓲ ꓚꓱꓼ ꓕꓯ ꓡꓰ ꓠꓴ ꓪ ꓐꓱ ꓶ ꓙꓽ ꓖꓶ ꓔ ꓟ ꓡꓯꓼ ꓪ ꓗꓴꓓꓼ ꓘꓳ ꓣꓴ ꓡꓯ꓿ ꓮ ꓡꓲꓳ ꓐ ꓠꓬ ꓥꓪ ꓦꓰꓼ ꓟꓷꓼ ꓕꓯ ꓠꓴ ꓪ ꓥꓪ ꓔꓯ ꓖꓶ ꓜꓽ ꓡꓺꓳ꓿

ꓥꓪ ꓢꓲꓼ ꓕꓯ ꓠꓴ ꓪ ꓥꓪ ꓔꓯ ꓖꓶ ꓓꓳꓻ ꓡꓺꓳ꓿ ꓥꓪ ꓞꓳ ꓬꓯꓼ ꓟꓴ ꓔꓬ ꓟ ꓕꓯ ꓠꓴ ꓪ ꓥꓪ ꓔꓯ ꓘꓳ ꓣꓴ ꓡꓺꓳ꓿ ꓥꓪ ꓙꓬꓽ ꓡꓯꓽ ꓟ ꓗ ꓪꓠꓴ ꓪ ꓥꓪ ꓔꓯ ꓖꓶ ꓖꓪꓽ ꓡꓺ ꓳ꓿ ꓥꓪ ꓠꓻ ꓕꓯ ꓠꓴ ꓪ ꓥꓪ ꓔꓯ ꓠꓬꓲ ꓙ ꓡꓺ ꓳ꓿ ꓐꓱ ꓓꓴꓽ ꓗꓪ ꓔꓬ ꓕꓯ ꓠꓴ ꓪ ꓥꓪ ꓔꓯ ꓔꓱ, ꓠꓬꓲ ꓡꓺꓳ ꓐꓯ ꓡꓳ꓿ ꓟꓵꓽ ꓚꓱꓼ ꓟꓲ ꓚꓱꓼ ꓕꓯ ꓡꓰ ꓠꓴ ꓪ ꓐꓱ ꓶ ꓙꓽ ꓖꓶ ꓔ ꓟ ꓡꓯꓼ ꓪ ꓗꓴꓓꓼ ꓘꓳ ꓣꓴ ꓡꓯ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓖꓶ ꓔ ꓡꓳ꓿

ꓕꓲ ꓠꓬꓲ ꓙꓳ ꓕꓯ ꓠꓴ ꓥꓪ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓠ, ꓟ ꓥ ꓡꓳ꓿ ꓖꓳ ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓥꓪ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓝꓲ ꓔꓯ ꓠꓽ ꓠꓬꓲ ꓡ ꓓꓴ ꓥ ꓡꓳ꓿ ꓠꓻ ꓔꓬ ꓢꓴ ꓔꓯ ꓬꓰ ꓙ ꓗꓷ ꓡ ꓝꓮꓲ ꓣꓱ ꓞ ꓣꓱ ꓬꓯꓼ ꓔꓬ ꓢꓴ ꓐꓴ ꓔꓯ ꓬꓰ ꓙ ꓗꓷ ꓡ? ꓜ ꓓꓴ ꓓꓳꓻ ꓓꓴ ꓟꓽ ꓙꓳ ꓢꓴ ꓔꓯ ꓬꓰ ꓙ ꓗꓷ ꓡ ꓐꓰ ꓠ ꓠꓬꓲˍ ꓡ ꓓꓴ ꓙꓳ ꓡꓳ ꓖꓳ ꓡꓰ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓡꓰ ꓐꓯ ꓔ ꓟ ꓐꓯ ꓘꓶꓽ ꓔꓯ ꓣꓳ ꓘꓴ ꓣꓴ ꓢꓲ ꓠꓬꓲ ꓬꓲ ꓐꓯ ꓘꓶꓽ ꓔꓯ ꓒꓵꓽ ꓛꓳꓽ ꓓꓴ ꓬꓰ ꓡꓯ ꓿

ꓕꓱ ꓡꓱ ꓣꓳ ꓬꓰ ꓠꓬ ꓪꓴ‐ꓢ ꓗꓪ ꓐꓰ ꓡꓯꓼ ꓫꓴ ꓮ ꓟꓬ, ꓘꓳ, ꓣꓴ ꓪ ꓓꓴ ꓥꓳ꓿ ꓢꓲꓺ ꓒ ꓔꓯ ꓧꓪ, ꓓꓴ ꓬꓰ ꓡꓯ꓿ ꓢꓲꓺ ꓒ ꓐꓯ ꓘꓶꓽ ꓔꓯ ꓛꓳꓽ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿