ꓞꓼ ꓐꓳˍ ꓐꓰ ꓠꓬꓲ ꓟꓳꓻ ꓓꓴ ꓔꓯ ꓥꓳꓽ

ꓠꓬꓲꓸ ꓠꓬꓲ ꓵ ꓠꓯꓹ ꓟ ꓟꓸ ꓟꓲꓽ ꓥ ꓟ ꓟ-ꓕꓲ ꓕꓳꓽ ꓶꓽ 5ꓽ13-16 ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓠꓴ ꓪ ꓠꓬ ꓟꓲ ꓠꓯ ꓞꓼ ꓐꓳ ꓥ ꓡꓳ= ꓞꓼ ꓐꓳ ꓕꓱ ꓟ ꓬꓲꓸ ꓛꓵ ꓒꓲꓼ ꓡꓰ ꓠꓬ ꓮ ꓫꓵꓽ ꓙꓲꓻ ꓖꓴ ꓙꓳˍ ꓡ꓾ ꓐꓰ ꓐꓯ ꓡꓳ= ꓝꓮꓲ ꓡꓯꓼ ꓫꓵ ꓬꓲ ꓡꓰ ꓕꓱ ꓡꓱ ꓐꓯ ꓡꓳ= ꓠꓴ ꓪ ꓠꓬ ꓟꓲ ꓠꓯ ꓠꓬꓲ ꓟꓳꓻ ꓓꓴ ꓥ ꓡꓳ= ꓠꓬꓲ ꓠꓯ ꓕꓱ ꓟ ꓔꓯ ꓞꓳ ꓤ ꓡꓰ ꓟꓳ ꓢꓲ ꓐꓹ ꓐ ꓔꓯ ꓫꓱꓸ ꓖꓶ ꓠꓹ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓠꓴ ꓪ ꓠꓬ ꓙꓲˍ ꓟ ꓬꓰ꓾ ꓔꓱꓹˍ ꓟ ꓬꓰ꓾ ꓥꓪ ꓐꓯ ꓘꓶꓽ ꓔꓯ ꓠ ꓠꓹ꓾ ꓐꓰ ꓬꓰ-ꓢꓴ ꓡꓰ ꓬꓲꓼ ꓠꓬꓲꓸ ꓖꓶ ꓡˍ ꓟ ꓥ ꓡꓳ=

ꓣꓳ ꓠꓬ ꓟꓲ ꓠꓯ ꓕꓱ ꓟ ꓗꓪ ꓢꓯꓸ ꓔꓬ ꓟ ꓥ ꓠꓬ꓾ ꓬꓰ-ꓢꓴ ꓗꓸ ꓠꓯꓸ ꓖꓼ ꓛꓳ ꓔꓬ ꓟ ꓬꓲ ꓔꓶꓻ ꓙꓱꓼ ꓠꓬ ꓪꓴ-ꓢ ꓔꓯ ꓫꓱꓸ ꓖꓶ ꓠꓹ ꓟ ꓥ ꓡꓳ= ꓪꓴ-ꓢ ꓔꓯ ꓦ ꓡꓱ ꓠꓹ ꓟ ꓥ ꓡꓳ= ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓲ ꓔꓯ ꓫꓱꓸ ꓖꓶ ꓠꓹ ꓟ ꓥ ꓡꓳ= ꓖꓳ ꓡꓱ ꓢꓲ ꓟꓲ ꓠꓯ ꓗꓪ ꓥˍ ꓟꓲ ꓬꓲ ꓔꓯ ꓫꓱꓸ ꓖꓶ ꓢꓲ ꓠꓬꓲ ꓕꓲ ꓞꓲꓼ ꓕꓲ ꓑ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰˍ ꓕꓯ ꓥ ꓟꓲ ꓪꓴ-ꓢ ꓔꓯ ꓫꓱꓸ ꓖꓶ ꓠꓹ ꓟ ꓥ ꓡꓳ= ꓕꓱ ꓟ ꓠꓬ ꓟꓲ ꓠꓯ ꓔꓶꓻ ꓙꓱꓼ ꓥ ꓡꓳ=

ꓞꓳ ꓤ ꓠꓬ ꓪꓴ-ꓢ ꓔꓯ ꓫꓱꓸ ꓖꓶˍ ꓕꓯ ꓢꓲꓸ ꓡꓰꓽ ꓠꓲꓹ ꓟ ꓗꓹ ꓛꓲˍ ꓟ ꓟꓶˍ  ꓡꓳ= ꓪꓴ-ꓢ ꓔꓯ ꓓꓳ ꓟꓴ ꓢꓲꓸ ꓡꓰꓽ ꓠꓲꓹ ꓟ ꓗꓹ ꓛꓲˍ ꓟ ꓟꓶˍ ꓡꓳ= ꓬꓲꓻ ꓙꓬ ꓯꓹ ꓠꓬ ꓬꓲꓻ ꓙꓬ ꓗꓪ ꓗꓳꓸ ꓙꓰ ꓔꓬ ꓕꓯ ꓮ ꓘꓶꓸ ꓗꓹ ꓛꓲˍ ꓟ ꓡꓰ ꓐꓰ ꓠꓬꓹ ꓐꓴˍ ꓟꓲ ꓟꓵꓽ ꓪꓴꓽ ꓗꓪ ꓐꓬꓱ ꓔꓬ ꓕꓯ ꓮ ꓘꓶꓸ ꓗꓹ ꓛꓲˍ ꓡꓳ= ꓕꓱ ꓡꓰ ꓬꓲꓻ ꓙꓬ꓾ ꓢꓲꓹ ꓜꓲ ꓐꓴ ꓮ ꓙꓵꓽ ꓠꓬ ꓬꓲ ꓪ ꓬꓰ ꓠ ꓔ ꓟ ꓟꓬꓱꓽ ꓬꓰˍ ꓕꓯ ꓮ ꓘꓶꓸ ꓗꓹ ꓛꓲ ꓢꓲ ꓬꓲ ꓪ ꓬꓰˍ ꓟ ꓟꓬꓱꓽ ꓗꓪ ꓐꓰ ꓪꓴ-ꓢ ꓔꓯ ꓓꓳ ꓟꓴꓹ ꓫꓱꓸ ꓖꓶ ꓔꓬ ꓡꓳ=

ꓞꓳ ꓤ ꓠꓬ ꓪꓴ-ꓢ ꓔꓯ ꓫꓱꓸ ꓖꓶ ꓠꓹ ꓟ ꓥ ꓡꓳ= ꓢꓲꓹ ꓜꓲ ꓡꓳ ꓜꓲ ꓪꓴ-ꓢ ꓔꓯ ꓫꓱꓸ ꓖꓶˍ ꓟ ꓡꓰ ꓐꓰ꓾ ꓠꓬꓹ ꓫꓵꓽ ꓠꓬꓹ ꓙꓰꓽ ꓪꓴ-ꓢ ꓔꓯ ꓫꓱꓸ ꓖꓶˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓪꓴ-ꓢ ꓔꓯ ꓫꓱꓸ ꓖꓶ ꓠꓹ ꓟ ꓥ ꓡꓳ= ꓠꓬꓲꓸ ꓠꓬꓲ ꓗꓪ ꓬꓰ-ꓢꓴ ꓣꓳ ꓔꓯ ꓘꓴˍ ꓟ ꓠꓬ ꓕꓱ ꓟ ꓬꓰ ꓠꓹ ꓟ ꓥ ꓡꓳ= ꓣꓳ ꓠꓬ ꓬꓰ-ꓢꓴ ꓔꓯ ꓛꓳ ꓢꓴ ꓐꓯ ꓔˍ ꓟꓲ ꓟꓬꓱꓺ ꓕꓲ ꓟˍ ꓡꓰꓽ ꓙꓳˍ ꓟ ꓮ ꓟꓬꓹ ꓙꓳˍ ꓡꓳ= ꓕꓱ ꓡꓰ ꓬꓰˍ ꓟ ꓠꓽ ꓟꓽ ꓥ=

ꓬꓰ-ꓢꓴ ꓗꓸꓠꓯꓸ ꓛꓳ ꓢꓴ ꓘ-ꓣꓲ-ꓢ-ꓔꓴ ꓢꓲꓺ ꓤ ꓮ ꓙꓵꓽ ꓠꓬ ꓬꓲ ꓐꓯ ꓘꓶꓽ ꓔꓯ ꓠ ꓠꓹ ꓢꓲ ꓣꓳ ꓔꓯ ꓠꓱꓸ ꓐꓯ ꓢꓴ ꓡꓳꓸ ꓠꓬꓲˍ ꓕꓯ ꓣꓳ ꓠꓬ ꓔꓯꓺ ꓢꓳꓺ ꓓꓴ ꓒꓬꓱꓼ ꓠꓹ ꓟ꓾ ꓣꓳ ꓫꓸ ꓕꓱ ꓘꓶꓽ꓾ ꓣꓳ ꓙꓰ ꓚꓱꓹ꓾ ꓣꓳ ꓛꓳ ꓫꓱꓽˍ ꓟ ꓙ ꓖꓴ ꓮ ꓙꓵꓽ ꓠꓬ ꓠꓱꓸ ꓐꓯꓼ ꓔꓯ ꓟꓽ ꓫꓱꓸ ꓫꓱꓸ ꓢꓲꓺ ꓒ ꓬꓰ-ꓢꓴ ꓐꓯ ꓔ ꓟ ꓠꓵꓻ ꓠꓲꓹ ꓙ ꓖꓴ ꓔꓯ ꓛꓳ ꓫꓱꓽˍ ꓕꓯ ꓠꓽ ꓕꓱ ꓟ ꓠꓬ ꓣꓳ ꓐꓹ ꓐ ꓪꓴ-ꓢ ꓔꓯ ꓟꓬꓱꓺ ꓓꓳꓽ ꓖꓶˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓛꓳ ꓫꓱꓽ ꓙꓰˍ ꓕꓯ ꓞꓼ ꓐꓳ ꓫꓱꓸˍ ꓟ꓾ ꓔꓱꓹ ꓟ ꓫꓸ ꓕꓱ ꓘꓶꓽ꓾ ꓙꓲˍ ꓟ ꓞꓳ ꓙꓳ ꓚꓱꓹ꓾ ꓙꓲˍ ꓟ ꓟꓬꓱꓽ ꓬꓰ ꓚꓱꓹ ꓥ ꓠꓬ꓾ ꓠꓵꓻ ꓠꓲꓹ ꓟꓬꓱꓽ꓾ ꓕꓱ ꓟ ꓠꓬ ꓞꓼ ꓐꓳ ꓔꓯ ꓫꓱꓸˍ ꓡꓳ= ꓣꓳ ꓔꓯ ꓠꓵꓻ ꓠꓲꓹ ꓕꓱ ꓟ ꓟꓽ ꓙꓳ ꓕꓯ ꓠꓽ ꓣꓳ ꓞꓳ ꓙꓳ ꓢꓯꓸ ꓔꓬˍ ꓟꓲ ꓬꓲ ꓖꓳꓽ ꓥꓳ= ꓞꓼ ꓐꓳˍ ꓟꓲ ꓬꓲ ꓛꓵ ꓟꓽ ꓓꓹ ꓟ ꓔꓯ ꓫꓱꓸˍ ꓡꓳ= ꓬꓲ ꓛꓵ ꓟꓽ ꓙꓳ ꓟ ꓞꓼ ꓐꓳ ꓠꓬ ꓮ ꓫꓵꓽ ꓙꓲꓻ ꓖꓴ ꓙꓳˍ ꓡꓳ=

ꓣꓳ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓐꓯ ꓘꓶꓽ ꓔꓯ ꓟꓽ ꓠ ꓠꓹ ꓕꓯ ꓘ-ꓣꓲ-ꓢ-ꓔꓴ ꓢꓲꓺ ꓤ ꓐꓯˍ ꓟˍ ꓾ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓖꓶꓽ ꓡˍ ꓟ ꓬꓲꓸ ꓔꓲꓽ ꓬꓲꓸ ꓔꓶꓻ ꓙꓱꓼ ꓟꓽ ꓙꓳ ꓗꓷ ꓡꓰˍ ꓥꓳ= ꓖꓳ ꓡꓱ ꓠꓬꓲ ꓣꓳ ꓘ-ꓣꓲ-ꓢ-ꓔꓴ ꓢꓲꓺ ꓤ ꓐꓴ ꓬꓰ-ꓢꓴ ꓔꓯ ꓖꓼ ꓛꓳ ꓔꓬ ꓢꓴ ꓠꓬ ꓬꓲꓸ ꓡꓰ ꓐꓯ ꓔ ꓟ ꓐꓯ ꓘꓶꓽ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓢꓲ ꓛꓳ ꓫꓱꓽˍ ꓠꓬ ꓐꓹ ꓐ ꓪꓴ-ꓢ ꓥˍ ꓟꓲ ꓟꓬꓱꓺ ꓓꓳꓽ ꓟꓶˍ ꓥꓳ= ꓣꓳ ꓥˍ ꓟꓲ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲꓺ ꓟ ꓢꓯꓼ ꓟꓬ ꓟꓶˍ ꓥꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ=

ꓝꓮꓲ ꓬꓲ ꓡꓰ ꓠꓴ ꓪ ꓠꓬ ꓠꓬꓲ ꓟꓳ ꓓꓴ ꓥ ꓡꓳ꓾ ꓐꓰ ꓐꓯ ꓔ ꓡꓳ= ꓥ ꓡꓳ꓾ ꓮ ꓟꓶ ꓟꓲ ꓠꓯ ꓕꓱ ꓟ ꓗꓪ ꓠꓬ ꓠꓯ ꓞꓲꓹ ꓟ ꓗꓪ ꓔꓬ ꓢꓴ ꓮ ꓟꓬꓹ ꓙꓳˍ ꓡꓳ= ꓬꓲ ꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓰ ꓔꓬ ꓟ ꓟꓬꓱꓽ ꓠꓬ ꓮꓸ ꓫꓵꓽ ꓥ ꓟꓽ ꓢꓷꓸ= ꓮ ꓡꓲ ꓐꓰ ꓛꓳ ꓫꓱꓽˍ ꓥ ꓟꓽ ꓢꓷꓸ= ꓠꓯ ꓞꓲꓹ ꓠꓯ ꓕꓳꓹ ꓟ ꓗꓪ ꓙꓰ ꓔꓬ ꓡꓳ= ꓮ ꓡꓲꓳ ꓐꓯ ꓠꓬ ꓟꓽ ꓙꓲ ꓟ꓾ ꓟꓽ ꓥ ꓟ ꓟꓷꓽ ꓠꓷꓹ ꓝ ꓢꓴ꓾ ꓟꓷꓽ ꓠꓷꓹ ꓝ ꓢꓴ ꓟꓸ ꓒ ꓟꓸ ꓟ ꓮ ꓟꓬꓹ ꓓꓳ ꓡ ꓢꓲ ꓔꓱꓹ ꓟ ꓗꓪ ꓐꓰ ꓧꓶꓸ ꓙꓰ ꓔꓬ ꓖꓴˍ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓠꓴ ꓪ ꓠꓬ ꓠꓬꓲ ꓟꓳꓻ ꓓꓴ ꓥ ꓡꓳ꓾ ꓐꓯ ꓔ ꓡꓳ= ꓕꓱ ꓟ ꓡꓰ ꓐꓰ ꓣꓳ ꓫ ꓕꓱˍ ꓟ ꓘꓶꓽ꓾ ꓙꓰˍ ꓟ ꓚꓱꓹ ꓮ ꓙꓵꓽ ꓐꓰ ꓣꓳ ꓟꓸ ꓖꓶ ꓠ ꓗꓹ ꓡꓳ= ꓕꓱ ꓡꓱ ꓬꓰˍ ꓠꓬ ꓣꓳ ꓠꓽ ꓟꓲ ꓠꓯ ꓠꓬꓲ ꓟꓳ ꓓꓴ ꓒꓬꓱꓼ ꓡˍ ꓥꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓬꓲꓼ ꓠꓬꓲꓸ ꓖꓶ ꓡˍ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓠꓵꓻ ꓠꓲꓹ ꓟꓬꓱꓽ ꓬꓰ ꓠꓹ ꓟ꓾ ꓔꓱꓹ ꓜꓳꓽˍ ꓟ ꓟꓬꓱꓽ ꓬꓰ ꓠꓹ ꓟ꓾ ꓙꓲˍ ꓟ ꓟꓬꓱꓽ ꓬꓰ ꓠꓹ ꓟ꓾ ꓪꓴ-ꓢ ꓔꓯ ꓫꓱꓸ ꓖꓶ ꓓꓳ ꓟꓴˍ ꓠꓹ ꓟ꓾ ꓣꓳ ꓔꓯ ꓟꓳ ꓢꓴ ꓮ ꓙꓵꓽ ꓠꓬ ꓪꓴ-ꓢ ꓔꓯ ꓫꓱꓸ ꓖꓶ ꓢꓲ ꓐꓹ ꓐ ꓪꓴ-ꓢ ꓟꓬꓱꓺ ꓓꓳꓽ ꓟꓶ ꓠꓹ ꓟ ꓥ ꓡꓳ꓾ ꓐꓰ ꓣꓳ ꓔꓯ ꓟꓳꓸ ꓖꓶ ꓡ ꓔꓬ ꓡꓳ=