ꓞꓼ ꓐꓳˍ ꓐꓰ ꓠꓬꓲ ꓟꓳꓻ ꓓꓴ ꓔꓯ ꓥꓳꓽ

ꓞꓼ ꓐꓳ ꓠꓬ ꓣꓳ ꓜꓽ ꓓꓴ ꓪꓳꓽ ꓒꓬꓽ ꓔꓯ ꓜꓽ ꓟꓲꓺ ꓡꓰ ꓝꓲˍ ꓡꓳ= ꓜꓽ ꓙꓲꓻ ꓡꓰ ꓝꓲˍ ꓡꓳ= ꓜꓽ ꓓꓴ ꓔꓯ ꓟꓶ ꓤ ꓗꓷ ꓔ ꓓꓴ ꓐꓱ ꓶˍ ꓟꓲ ꓞꓼ ꓐꓳ ꓔꓯ ꓣꓱꓽ ꓔꓬ ꓟ ꓥ ꓡꓳ= ꓕꓲ ꓛꓱꓽ ꓗꓪ ꓠꓬꓲ ꓟꓳꓻ ꓓꓴ ꓠꓬ ꓠꓯ ꓞꓲꓹ ꓟ ꓔꓯ ꓣꓴ ꓦ ꓗꓷ ꓖꓶˍ ꓡꓳ= ꓠꓬꓲ ꓟꓳꓻ ꓓꓴ ꓗꓪ ꓐꓰ ꓣꓳ ꓗꓳ ꓡꓳ ꓗꓪ ꓙꓳˍ ꓟ ꓮ ꓙꓵꓽ ꓔꓯ ꓟꓳꓻ ꓐ ꓡˍ ꓟ ꓥ ꓢꓲ꓾ ꓣꓳ ꓙ ꓖꓴ ꓔꓯˍ ꓟꓲ ꓫꓬꓽ ꓫꓬꓽ ꓡꓰ ꓟꓳ ꓡꓰ ꓝꓲˍ ꓡꓳ= ꓞꓼ ꓐꓳ ꓟꓽ ꓧꓳꓽ ꓔ ꓟ ꓜꓽ ꓓꓴ ꓠꓬ ꓜꓽ ꓟꓽ ꓟꓲ꓾ ꓜꓽ ꓟꓽ ꓙꓲꓻ ꓟˍ ꓡꓰ ꓐꓰ ꓠꓬꓲ ꓟꓳꓻ ꓓꓴ ꓟꓽ ꓙꓳ ꓠꓬ ꓠꓯ ꓞꓲꓹ ꓟ ꓠꓯꓸꓼ ꓗꓪ ꓣꓳ ꓐꓴ ꓠꓬ ꓛꓲ ꓕꓲꓽ ꓡꓰˍ ꓡꓳ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓟ-ꓕꓲ 5ꓽ13-16 ꓗꓪ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓠꓱꓸ ꓐꓯ ꓢꓴ ꓔꓯ ꓙꓲˍ ꓟ ꓟꓸ ꓖꓶ ꓢꓴ ꓒꓬꓱꓼ ꓡ ꓠꓹ ꓟ ꓐꓱ ꓶ ꓞꓼ ꓐꓳ ꓐꓰ ꓠꓬꓲ ꓟꓳꓻ ꓓꓴ ꓔꓯ ꓥꓳꓽ ꓔꓯ ꓣꓱꓽ ꓢꓲ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓟꓸ ꓖꓶ ꓔ ꓟ ꓥ ꓡꓳ= ꓟꓬꓽ ꓠꓬꓲ ꓢꓲ ꓒ ꓠꓬ ꓬꓲ ꓪ ꓐꓴ ꓔꓯ ꓑ ꓫꓬ ꓐꓴ ꓐꓱ ꓶ ꓙꓲˍ ꓟ ꓦꓻ ꓙ ꓖꓴ ꓟꓸ ꓖꓶ ꓢꓴ ꓐꓴ ꓒꓬꓱꓼ ꓡ ꓝꓲ ꓠꓲꓹ ꓫꓵˍ ꓡꓳ= ꓞꓼ ꓐꓳˍ ꓡꓰ ꓐꓰ꓾ ꓠꓵꓻ ꓠꓲꓹ ꓙꓳˍ ꓟ ꓪꓴ-ꓢ ꓤ ꓠꓱ ꓐꓴ ꓠꓬ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵ ꓛꓳ ꓒꓵꓽ ꓡꓯ ꓘꓳ ꓠꓯꓹ ꓟ ꓔꓯ ꓟꓸ ꓖꓶ ꓠꓹ ꓟ ꓥ ꓡꓳ- ꓠꓬꓲ ꓟꓳꓻ ꓓꓴˍ ꓡꓰ ꓐꓰ꓾ ꓝꓲ ꓓꓴ ꓐꓴ ꓠꓬ ꓠꓱꓸ ꓐꓯ ꓢꓴ ꓔꓯ ꓦꓻ ꓔꓯ ꓟꓳꓸ ꓔꓱꓹ ꓚꓵˍ ꓟ ꓔꓱꓹ ꓜꓳꓽˍ ꓟ ꓔꓯ ꓢꓷꓸ ꓡꓰ ꓝꓲ ꓠꓹ ꓟ ꓥ ꓡꓳ= ꓦ ꓡꓱ ꓐꓳ ꓐꓳ ꓡꓰ ꓬꓰ ꓢꓲ ꓙꓲˍ ꓟ ꓚꓱꓹ ꓔꓯ ꓣꓱꓽ ꓬꓰ ꓠ ꓗꓹ ꓟ ꓥ ꓡꓳ= ꓖꓳ ꓡꓱ ꓢꓲ ꓡꓰꓽ ꓞꓳ ꓤ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓝꓲ ꓓꓴ ꓐꓴ ꓠꓯꓸꓼ ꓗꓪ ꓟꓳꓻ ꓐ ꓡ ꓢꓲ ꓢꓲ ꓒ ꓔꓯ ꓙꓵꓻˍ ꓕꓯ ꓠꓬ ꓟꓲ ꓠꓯ ꓐꓱ ꓶ ꓥꓳ ꓡꓳꓸ ꓓꓴ ꓓꓽ ꓟ ꓟꓶˍ ꓟ ꓠꓬ ꓚꓵ ꓚꓵ ꓥ ꓡꓳ꓾ ꓐꓯ ꓟ ꓔꓯ ꓙꓵꓻ ꓡ ꓝꓲ ꓠꓹ ꓟ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓠꓬ ꓠꓬꓲ ꓟꓳꓻ ꓓꓴ ꓥ ꓢꓲ꓾ ꓬꓲ ꓕꓲ ꓣꓳˍ ꓡꓰꓽ ꓣꓳ ꓠꓬꓲ ꓟꓳꓻ ꓓꓴ ꓬꓲ ꓚꓰꓺ ꓥ ꓡꓳ= ꓬꓲ ꓐꓰ ꓟꓽ ꓥ ꓠꓬ ꓣꓳ ꓠꓽ ꓠꓯ ꓞꓲꓹ ꓟ ꓠꓯꓸꓼ ꓗꓪ ꓡꓰꓽ ꓔꓬ ꓪ ꓥꓳ=ꓬꓲ ꓠꓬ ꓣꓳ ꓞꓼ ꓐꓳˍ ꓟꓲ ꓥ ꓡꓳ= ꓬꓲ ꓟꓽ ꓥ ꓕꓯ ꓠꓽ ꓣꓳ ꓤꓶꓻ ꓠꓬ ꓢꓲ ꓡꓲˍ ꓟ ꓐꓰ ꓗꓹ ꓛꓲꓽ ꓓꓴ ꓐꓰ ꓶꓽ ꓤ ꓗꓶꓹ ꓡꓰˍ ꓡꓳ= ꓖꓳ ꓟ ꓑꓶꓸ ꓓꓴ ꓣꓳ ꓠꓬ ꓪꓴ-ꓢ ꓠꓯꓸꓼ ꓗꓪ ꓔꓬ ꓕꓯ ꓢꓲˍ ꓡꓰꓽ ꓣꓳ ꓐꓴ ꓠꓬ ꓠꓱꓸ ꓐꓯ ꓢꓴ ꓔꓯ ꓠꓬꓲ ꓟꓳꓻ ꓝꓲ ꓢꓲ ꓗꓹ ꓛꓲꓽ ꓓꓴ ꓔꓯ ꓖꓶꓽ ꓐ ꓡˍ ꓡꓳ= ꓕꓱ ꓡꓱ ꓬꓰˍ ꓟ ꓗꓪ ꓐꓰ ꓣꓳ ꓐꓴ ꓠꓬ ꓟꓴ ꓗꓪ ꓗꓪ ꓔꓬ ꓟ ꓣꓳ ꓐꓹ ꓐ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶˍ ꓟ ꓥ ꓡꓳ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓡꓳꓹ ꓬꓰˍ ꓕꓲ ꓝꓲꓸ ꓥ ꓟ ꓟ-ꓕꓲ 5ꓽ16 ꓗꓪ ꓬꓰ-ꓢꓴ ꓡꓰ ꓕꓱ ꓡꓱ ꓐꓯ ꓔ ꓡꓳ= ꓣꓳ ꓠꓯꓸꓼ ꓗꓪ ꓙꓲˍ ꓟ ꓔꓯ ꓢꓴ ꓟꓳꓻ ꓡꓰ ꓕꓯ꓾ ꓬꓲ ꓪ ꓐꓴ ꓥˍ ꓟꓲ ꓐꓹ ꓐ ꓪꓴ-ꓢ ꓔꓯ ꓟꓬꓱꓽ ꓓꓳꓽ ꓖꓶˍ ꓥꓳ꓾ ꓐꓯ ꓔ ꓡꓳ= ꓡꓳꓹ ꓬꓰˍ ꓗꓪ ꓞꓼ ꓐꓳ ꓐꓰ ꓠꓬꓲ ꓟꓳꓻ ꓓꓴ ꓠꓬ ꓐꓹ ꓐ ꓪꓴ-ꓢ꓾ ꓤ ꓔꓲꓸ ꓬꓰ-ꓢꓴ ꓐꓰ ꓢꓲꓽ-ꓫꓬ-ꓟ-ꓦ ꓐꓬꓱꓼ ꓡꓱꓼ ꓡꓱꓼ ꓟ ꓟꓬꓱ ꓓꓳꓽ ꓐꓰ ꓗꓴꓸ ꓙꓲ ꓙꓳˍ ꓟ ꓮ ꓙꓵꓽ ꓔꓯ ꓐꓯ ꓟ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓞꓼ ꓐꓳ ꓬꓲ ꓚꓰꓺ꓾ ꓠꓬꓲ ꓟꓳꓻ ꓓꓴ ꓬꓲ ꓝꓳꓹ ꓟꓶ ꓥ ꓑꓶꓸ ꓓꓴ꓾ ꓬꓰ-ꓢꓴ ꓟꓽ ꓙꓳ ꓠꓬ ꓣꓳ ꓠꓽ ꓮ ꓫꓵꓽˍ ꓟꓲ ꓬꓰ ꓟꓽ ꓐ ꓡ ꓠꓬꓲ ꓣꓳ ꓐꓴ ꓠꓬ ꓟꓲ ꓠꓯ ꓐꓱ ꓶ ꓞꓼ ꓐꓳ ꓐꓰ ꓠꓬꓲ ꓟꓳꓻ ꓓꓴ ꓒꓬꓱꓼ  ꓡ ꓠꓹ ꓟ ꓐꓱ ꓶ ꓬꓰ ꓙ ꓖꓶ ꓠꓹ ꓟ ꓪꓽ ꓘꓴ ꓡꓯ=