ꓟ‐ꓖ‐ꓓ‐ꓡꓲ ꓢꓴ ꓟ‐ꓡꓲ ꓔꓯ ꓬꓰ‐ꓢꓴ ꓟꓳ. ꓖꓶˍ ꓟ

ꓢꓯꓸ ꓬꓲꓼ ꓡ ꓑꓮꓲꓽ ꓠꓽ ꓠꓬꓲꓽ ꓠꓬꓲ꓾ ꓠꓬꓲꓸ ꓠꓬꓲ ꓗꓪ ꓦ ꓢꓯꓼ ꓣꓴ ꓠꓹ ꓟ ꓢꓲꓽ ꓫꓬ ꓕꓳ ꓶ ꓝꓲ ꓠꓬ ꓬꓳ-ꓦ 20ꓽ11-18 ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓫꓸ ꓙꓵ ꓟꓶ ꓙꓵ ꓪˍ ꓟ꓾ ꓫꓵꓻ ꓪˍ ꓟ ꓐꓰ ꓫꓵꓻ ꓢꓲ ꓢꓽ ꓦꓬ ꓗ ꓠꓯꓸ ꓠꓬ ꓢꓯꓸ ꓬꓲꓼ ꓡˍ ꓟ ꓔꓯ ꓧꓶꓸ ꓕꓯ ꓡꓰ ꓐꓯ ꓟꓸ ꓖꓶ ꓗꓷ ꓥˍ ꓟꓲ ꓕꓱ ꓟ ꓔꓯ ꓟ-ꓖ-ꓓ-ꓡꓲ ꓢꓴ ꓟ-ꓡꓲ ꓐꓰ ꓝꓲ ꓓꓴ ꓐꓴ ꓠꓬ ꓬꓲ ꓪ ꓠꓲꓹ ꓟ ꓠꓯꓸꓼ ꓗꓪ ꓟꓽ ꓓꓹ= ꓖꓳ ꓟ ꓑꓶꓸ ꓓꓴ ꓮ ꓫꓵˍ ꓟꓽ ꓓꓹ ꓟ ꓡꓱꓼ ꓜꓴ ꓔꓯ ꓟꓳꓻ ꓡꓰ ꓕꓯ ꓢꓲꓺ ꓒ ꓬꓰ-ꓢꓴ ꓬꓲ ꓖꓳ ꓓꓱꓽ ꓔꓯ ꓢꓴ ꓡꓰ ꓘꓴꓽ ꓔꓯꓹ ꓙꓰꓳ꓾ ꓐꓰ ꓟ-ꓡꓲ ꓡꓰ ꓓꓵꓽ ꓙ ꓟꓶˍ ꓡꓳ=ꓬꓲ ꓮ ꓘꓶꓸ ꓥꓴꓻ ꓔꓬ ꓕꓯ ꓢꓯꓸ ꓬꓲꓼ ꓡˍ ꓟ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓟꓲꓽ ꓙꓬꓼ ꓗꓪ ꓦꓰꓼ ꓡˍ ꓡꓳ=

ꓤ ꓟꓶ ꓤꓽꓳ꓾ ꓠꓴ ꓮ ꓫꓵꓽ ꓪꓴꓸ ꓠꓬꓲ ꓥꓴˍ ꓡ? ꓠꓴ ꓮꓽ ꓟ ꓔꓯ ꓧꓪˍ ꓡ? ꓐꓰ ꓬꓰ-ꓢꓴ ꓡꓰ ꓠꓺ ꓠꓬꓲˍ ꓡꓳ=

ꓠꓺ ꓠꓬꓲ ꓘꓶꓽ ꓕꓱ ꓟ ꓠꓬ ꓟ-ꓖ-ꓓ-ꓡꓲ ꓢꓴ ꓟ-ꓡꓲˍ ꓡꓰꓽ ꓟꓽ ꓞꓲꓺ ꓠꓬꓲꓸ ꓠꓬꓲ ꓗꓪ ꓟ ꓣꓳ ꓐꓱ ꓶ ꓥˍ ꓟꓲ ꓓꓵꓽ ꓙ ꓠꓬꓲ ꓠꓯꓹ ꓟ ꓠꓺ ꓠꓬꓲ ꓘꓶꓽ ꓕꓲ ꓟ ꓥ ꓡꓳ= ꓣꓳ ꓐꓴ ꓥꓴꓻ ꓔꓬ ꓟ ꓬꓲ ꓚꓱꓹ ꓮ ꓟꓬꓹ ꓙꓳˍ ꓥˍ ꓟꓲ꓾ ꓢꓲꓺ ꓒ ꓬꓰ-ꓢꓴ ꓠꓬ ꓫꓵˍ ꓟ ꓗꓪ ꓐꓰ ꓢꓯꓸ ꓬꓲꓼ ꓡꓺꓳ꓾ ꓐꓯ ꓟ ꓔꓯ ꓠꓽ ꓣꓳ ꓮ ꓕꓯ ꓟꓲ ꓟꓽ ꓟꓲ ꓡꓰˍ ꓗꓷ ꓠꓯꓹ ꓟ ꓬꓳꓸ ꓚꓵˍ ꓡꓳ= ꓫꓵˍ ꓟ ꓠꓬ ꓬꓲ ꓟꓶꓽ ꓟꓽ ꓥ꓾ ꓡꓳꓹ ꓬꓰˍ ꓟ ꓟꓽ ꓥ꓾ ꓫꓵˍ ꓟ ꓠꓬ ꓣꓳ ꓗꓳꓸ ꓙꓰ ꓪˍ ꓟ꓾ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓠꓹ ꓟ ꓐꓱ ꓶ ꓟꓽ ꓗꓳꓸ ꓟꓽ ꓓ ꓗꓳꓸ ꓪˍ ꓟ ꓕꓲ ꓟ ꓥ ꓟ ꓔꓯ ꓢꓷꓸ ꓔ ꓠꓹ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓠꓲꓹ ꓒꓴ ꓡꓯ= ꓮ ꓟꓶ ꓕꓯ ꓣꓳ ꓐꓴ ꓠꓬ ꓫꓸ ꓙꓵ ꓟꓶ ꓙꓵˍ ꓟ ꓔꓯ ꓗꓳꓸ ꓙꓰ ꓢꓲ ꓧꓪꓸ ꓡꓰˍ ꓟ ꓟꓶ ꓥꓳ꓾ ꓐꓯ ꓟ ꓔꓯ ꓙꓻ ꓟꓳ ꓔ ꓟ ꓟꓶ ꓗꓷꓳ=  

“ꓥꓪ ꓔꓯ ꓕꓽ ꓣꓴ ꓔ” ꓐꓰ ꓬꓰ-ꓢꓴ ꓡꓰ ꓟ-ꓡꓲ ꓔꓯ ꓐꓯ ꓡꓳ= ꓝꓮꓲ ꓬꓲ ꓡꓰ “ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓐꓹ ꓐ ꓔꓯ ꓟꓽ ꓓꓯ ꓙꓰ ꓢꓰꓽ= ꓥꓪ ꓐꓹ ꓐˍ ꓐꓰ ꓠꓴ ꓪ ꓐꓹ ꓐ꓾ ꓥꓪ ꓪꓴ-ꓢˍ ꓐꓰ ꓠꓴ ꓪ ꓪꓴ-ꓢ ꓔꓯ ꓥꓪ ꓓꓯ ꓙꓰˍ ꓥꓳ= ꓕꓱ ꓟ ꓔꓯ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓔꓯ ꓙꓰ ꓢꓲ ꓬꓲ ꓪ ꓔꓯ ꓐꓯ ꓖꓶ ꓬꓰ꓾” ꓐꓯ ꓖꓶˍ ꓡꓳ=

ꓣꓳ ꓤꓶꓻ ꓗꓪ ꓔꓳꓹ ꓜꓳꓽ ꓠ ꓔ ꓟ ꓫꓸ ꓙꓵ ꓓꓴ꓾ ꓠꓲꓹ ꓟ ꓙꓬ ꓡꓰ ꓓꓴ꓾ ꓝꓮꓲ ꓣꓳ ꓠꓲꓹ ꓠꓵꓻ ꓢꓴ ꓕꓲ ꓣꓳ ꓣꓳ ꓐꓰ ꓐꓰꓽ ꓡꓯ ꓘꓳ ꓪˍ ꓟ ꓠꓲꓹ ꓫꓸ ꓓꓴ ꓐꓰ ꓠꓱꓸ ꓐꓯ ꓵꓻ ꓖꓴ ꓟꓽ ꓓ ꓟ ꓠꓲꓹ ꓫꓸ ꓓꓴ ꓔꓯ ꓣꓳ ꓗꓳꓸ ꓙꓰ ꓔꓬ ꓪˍ ꓡꓳ= ꓖꓳ ꓡꓱ ꓐꓯ ꓥˍ ꓟꓲ ꓣꓳ ꓤꓶꓻ ꓔꓯ ꓝꓸ ꓢꓲ ꓙꓰ ꓔꓬ ꓪ ꓟ ꓥ ꓡꓳ= ꓠꓲꓹ ꓟ ꓫꓸ ꓡꓳ ꓐꓯ ꓢꓲ ꓣꓳ ꓤꓶꓻ ꓠꓬ ꓟꓽ ꓡꓳꓹ ꓬꓰ= ꓫꓸ ꓥˍ ꓟꓲ꓾ ꓢˍ ꓥˍ ꓟꓲ ꓣꓳ ꓠꓬ ꓝꓸ ꓢꓲ ꓢꓯꓸ ꓔꓬ ꓪˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓠꓲꓹ ꓫ ꓟꓬ ꓫꓸ ꓓꓴ꓾ ꓫꓸ ꓙꓵ ꓟꓶꓼ ꓙꓵ ꓓꓴ ꓗꓪ ꓐꓰ ꓡꓲꓹ ꓓꓳ ꓡ ꓢꓲ ꓗꓹ ꓛꓲꓽ ꓡꓯ= ꓣꓳ ꓠꓲꓹ ꓟ ꓗꓪ ꓐꓰ ꓐꓶꓽ ꓓꓳ ꓡˍ ꓟ ꓬꓲ ꓧꓶꓽ ꓬꓲ ꓐꓯ ꓐꓴ ꓔꓯ ꓖꓳ ꓗꓷ ꓢꓲ ꓡꓯ ꓫꓵ ꓙ ꓫꓱꓽ ꓙꓰ ꓡꓯ= ꓟꓽ ꓗꓹ ꓛꓲꓽ ꓟ ꓘꓴꓽ ꓗꓪ ꓟꓬꓽ ꓠꓬꓲ ꓒꓬꓱꓼ ꓟꓬꓽˍ ꓟ ꓬꓲ ꓚꓱꓹ ꓘꓴꓽ ꓗꓪ ꓕꓲ ꓟ ꓠꓬ ꓞꓳ ꓤ ꓐꓴ ꓠꓬ ꓮ ꓡꓰ ꓐꓰ ꓟꓲꓽ ꓙꓬ ꓙꓰ ꓠꓹ ꓟ ꓔꓯ ꓟꓽ ꓢꓷꓸ ꓟ ꓑꓶꓸ ꓓꓴ ꓥ ꓡꓳ꓾ ꓐꓰ ꓐꓯ ꓔ ꓟ ꓙꓳˍ ꓡꓳ=

ꓥ ꓡꓳ꓾ ꓣꓳ ꓐꓴ ꓠꓬ ꓚꓲꓸ ꓛꓬ ꓤꓶꓻ ꓔꓯ ꓚꓲꓸ ꓛꓬ ꓙꓵꓽ ꓟꓽ ꓐ ꓡ= ꓖꓳ ꓟ ꓑꓶꓸ ꓓꓴ ꓣꓳ ꓐꓴ ꓠꓬ ꓣꓳ ꓤꓶꓻ ꓔꓯ ꓙꓵꓽ ꓠꓹ ꓟ ꓐꓱ ꓶ ꓪꓴ-ꓢ ꓔꓯ ꓣꓱꓽ ꓞꓹ ꓟ ꓥ ꓡꓳ= ꓣꓳ ꓐꓴ ꓠꓬ ꓕꓲ ꓖ ꓕꓲ ꓘꓴ ꓗꓪ ꓕꓶꓺˍ ꓟ ꓠꓲꓹ ꓟ ꓙꓳˍ ꓥˍ ꓟꓲ ꓪꓴ-ꓢ ꓔꓯ ꓣꓳ ꓤꓶꓻ ꓔꓯ ꓙꓵꓽ ꓗꓷ ꓝꓲˍ ꓕꓯ ꓠꓽ꓾ ꓣꓳ ꓐꓴ ꓠꓬ ꓣꓳ ꓚꓲꓸ ꓛꓬ ꓐꓰ ꓮ ꓙꓵꓽ ꓐꓱ ꓶ ꓩꓴ ꓗꓷˍ ꓟ꓾ ꓡꓲꓹ ꓗꓷˍ ꓟ ꓟꓶˍ ꓥꓳ=

ꓟ-ꓖ-ꓓ-ꓡꓲ ꓢꓴ ꓟ-ꓡꓲ ꓗꓪ ꓐꓰ ꓣꓳ ꓢꓳ ꓣꓴ ꓡꓯ= ꓬꓲ ꓠꓬ ꓟꓽ ꓙꓲꓻ ꓟ ꓗꓪ ꓟꓬꓱ ꓓꓳꓽ ꓪꓴꓽ ꓢꓴ ꓕꓲ ꓣꓳ ꓥ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓠꓬ ꓬꓰ-ꓢꓴ ꓔꓯ ꓠꓲꓹ ꓪꓴꓽˍ ꓟ ꓐꓰ ꓬꓰ-ꓢꓴ ꓔꓯ ꓠꓲꓹ ꓒꓵꓽ ꓠꓲꓹ ꓡꓱ ꓢꓴ ꓥ ꓟ ꓑꓶꓸ ꓓꓴ ꓢꓲꓺ ꓒ ꓬꓰ-ꓢꓴ ꓢꓯꓸ ꓬꓲꓼ ꓡˍ ꓟ ꓓꓳꓽ ꓔꓯ ꓬꓲ ꓪꓴꓸ ꓢꓷꓸ ꓙ ꓟꓳ ꓙ ꓠꓹ ꓟ ꓙꓵꓽ ꓪ ꓬꓲ ꓔꓯ ꓖꓶꓽ ꓗꓷꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓬꓰ-ꓢꓴ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓐꓯ ꓟꓸ ꓖꓶ ꓙꓰ ꓠꓹ ꓟ ꓟꓬꓱꓽ ꓕꓲ ꓟ ꓬꓲ ꓟꓶ ꓗꓷꓳ= ꓮ ꓟꓶ ꓕꓯ ꓬꓲ ꓠꓬ ꓙꓲꓻ ꓫꓬ ꓢꓴ ꓕꓲ ꓣꓳ ꓒꓬꓱꓼ ꓡ ꓢꓲ ꓬꓲ ꓔꓯ “ꓝꓲ ꓓꓴ ꓐꓴ ꓬꓲ ꓪ ꓝꓲ ꓓꓴ” ꓐꓯ ꓢꓲ ꓢꓷꓸ ꓙ ꓟꓳ ꓙ ꓔ ꓟ ꓟꓶ ꓗꓷꓳ=

ꓚꓵ ꓚꓵ ꓞꓳ ꓤ ꓐꓴ ꓣꓳ ꓔꓯ ꓮ ꓡꓰ ꓐꓰ ꓟꓳˍ ꓡ? ꓐꓯ ꓟ ꓠꓬ ꓟꓬꓽ ꓠꓬꓲ ꓬꓳꓸ ꓚꓵˍ ꓟ ꓟꓽ ꓥ= ꓣꓳ ꓐꓴ ꓠꓬ ꓝꓴꓲꓸ ꓙꓳ ꓢꓲ ꓢꓯꓼ ꓐꓽˍ ꓥ ꓟꓲ ꓕꓲ ꓖꓳ ꓓꓱꓽ ꓕꓲ ꓠꓲꓹ ꓟ ꓡꓱꓸꓼ ꓪꓴ-ꓢ ꓔꓯ ꓠꓲꓹ ꓠꓵ ꓡꓯ= ꓕꓱ ꓟ ꓠꓬ ꓟꓬꓱ ꓓꓳꓽ ꓕꓯꓽ ꓢꓲꓽ ꓟꓬꓽ ꓠꓬꓲ ꓬꓳꓸ ꓚꓵˍ ꓟ ꓥ ꓡꓳ=

ꓟ-ꓖ-ꓓ-ꓡꓲ ꓢꓴ ꓟ-ꓡꓲ ꓬꓲ ꓟꓬꓱꓽ ꓠꓬ ꓣꓳ ꓐꓴ ꓬꓰ ꓠꓯꓹ ꓟ ꓟꓬꓱꓽˍ ꓟꓲ ꓥ ꓡꓳ= ꓬꓰ-ꓢꓴ ꓠꓬ ꓣꓳ ꓤꓶꓻ ꓗꓪ ꓢꓯꓸ ꓔꓬ ꓟ ꓔꓯ ꓠꓱꓸ ꓐꓯ ꓢꓴ ꓔꓯ ꓐꓯ ꓖꓶ ꓢꓲ ꓟꓳꓸ ꓖꓶ ꓢꓴ ꓬꓰ ꓡꓯ=