ꓟꓬꓱˍ ꓡꓰꓽ ꓟꓯ ꓢꓴ ꓔꓯ ꓙꓳ ꓗꓽ ꓖꓶˍ ꓟ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓟ ꓠꓬ꓾ ꓥꓪ ꓔꓯ ꓢꓲꓺ ꓒꓽꓳ ꓢꓲꓺ ꓒꓽꓳ ꓐꓰ ꓘꓴ ꓢꓴ ꓥ ꓕ ꓑꓳꓸꓼ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰˍ ꓥꓳ ꓐꓰ ꓠꓴ ꓪ ꓕꓽ ꓓꓵꓽ ꓙ= ꓟꓴ ꓗꓪ ꓗꓪ ꓔꓬ ꓟ ꓥꓪ ꓐꓹ ꓐ ꓠꓲꓹ ꓡꓶꓽ ꓛꓳ ꓢꓴ ꓡꓰꓽ ꓓꓵꓽ ꓙꓰ ꓪˍ ꓥꓳ꓾ ꓐꓰ ꓐꓯ ꓔ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓟꓶ ꓣꓳ ꓟꓲ ꓠꓯ ꓣꓳ ꓤꓶꓻ ꓠꓯꓸꓼ ꓗꓪ ꓠꓬ ꓪꓴ-ꓢ ꓦ ꓡꓱ ꓢꓴ ꓐꓰ ꓐꓯ ꓢꓲ꓾ ꓢꓲꓺ ꓒ ꓬꓰ-ꓢꓴ ꓔꓯ ꓢꓲꓺ ꓒꓽꓳ꓾ ꓢꓲꓺ ꓒꓽꓳ ꓐꓰ ꓘꓴ ꓔꓬ ꓢꓴ ꓠꓬ ꓟꓲ ꓠꓯ ꓗꓪ ꓬꓲ ꓔꓴꓺ ꓬꓲ ꓟꓶꓽ ꓬꓲ ꓫꓬꓹ ꓙꓳˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓠꓹ ꓟ ꓢꓲꓺ ꓒ ꓬꓰ-ꓢꓴ ꓡꓰ ꓠꓬꓲꓸ ꓠꓬꓲ ꓣꓳ ꓪꓴ-ꓢ ꓦ ꓡꓱ ꓢꓴ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓢꓲꓺ ꓒꓽꓳ ꓐꓰ ꓘꓴ ꓢꓲ ꓪꓴ-ꓢ ꓔꓯ ꓦ ꓡꓱ ꓔꓬ ꓕꓲ ꓖꓼ꓾ ꓣꓳ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓪˍ ꓥ꓾ ꓢ ꓢꓹ ꓐꓰ ꓓꓵꓽ ꓙꓰ ꓓꓹ ꓥꓳ ꓐꓰ ꓠꓴ ꓪ ꓕꓽ ꓓꓵꓽ ꓙ ꓐꓰ ꓐꓯ ꓖꓶ ꓡ ꓔꓬ ꓡꓳ=

ꓖꓳ ꓡꓱ ꓠꓬꓲ ꓣꓳ ꓢꓷꓸ ꓔ ꓠ ꓗꓹ ꓡꓳ=ꓣꓳ ꓠꓬ ꓪꓴ-ꓢ ꓔꓯ ꓡꓰꓽ ꓦ ꓡꓱ ꓔ ꓢꓲ ꓠꓬꓲ ꓪꓴ-ꓢ ꓐꓯ ꓘꓶꓽ ꓛꓳ ꓔꓬ? ꓟꓬꓽ ꓠꓬꓲ ꓠꓬ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓔꓬ ꓡ꓾ ꓟꓽ ꓛꓳ ꓔꓬ ꓡ ꓐꓯ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓠ ꓗˍ ꓡꓳ= ꓟꓴꓽ ꓗꓪ ꓗꓪ ꓔꓬ ꓟ ꓐꓹ ꓐ ꓟꓲꓹ ꓡꓶꓽ ꓔꓯ ꓟꓽ ꓛꓳ ꓥꓳ ꓐꓯ ꓠꓬ ꓣꓳ ꓢꓲꓺ ꓒꓽ ꓪꓴ-ꓢ ꓔꓯ ꓦ ꓡꓱ ꓔꓬ ꓡꓳ꓾ ꓥꓪ ꓪꓴ-ꓢ ꓔꓯ ꓦ ꓡꓱ ꓔꓬ ꓡꓳ ꓐꓰ ꓐꓯ ꓔꓬ ꓥ ꓟꓲ ꓬꓲꓸ ꓖꓳꓽ ꓡꓰꓽ ꓥꓳ=

ꓖꓳ ꓟ ꓪꓴꓸ ꓠꓬꓲ ꓠꓬꓲꓸ ꓠꓬꓲ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓟ ꓠꓬ ꓟꓴꓽ ꓗꓪ ꓗꓪ ꓟ ꓐꓹ ꓐ ꓬꓲ ꓠꓲꓹ ꓡꓶꓽ ꓐꓯ ꓟ ꓮ ꓫꓵꓽ ꓥ ꓡ= ꓐꓹ ꓐꓽ ꓠꓲꓹ ꓡꓶꓽ ꓠꓬ꓾ ꓣꓳ ꓠꓬ ꓪꓴ-ꓢ ꓤ ꓠꓱ ꓥ ꓟ ꓑꓶꓸ ꓓꓴ ꓐꓹ ꓐꓽ ꓮ ꓡꓰ ꓥ ꓠꓬ ꓣꓳ ꓥˍ ꓟꓲ ꓐꓹ ꓐ ꓔꓯ ꓫꓱꓸ ꓠ ꓗˍ ꓡꓳ= ꓐꓹ ꓐ ꓠꓬ ꓢꓲꓽ ꓫꓬꓹ ꓡꓳ= ꓐꓹ ꓐ ꓠꓬ ꓠꓲꓹ ꓠꓵ ꓗꓴˍ ꓡꓳ= ꓢꓴ ꓔꓯ ꓬꓰ ꓙ ꓗꓴˍ ꓡꓳ= ꓠꓲꓹ ꓟ ꓢꓲꓽ ꓫꓬˍ ꓡꓳ= ꓕꓱ ꓟ ꓠꓬ ꓟꓴꓽ ꓗꓪ ꓗꓪ ꓔꓬ ꓟ ꓣꓳ ꓪꓴ-ꓢ ꓥ ꓡꓳ=

ꓛꓬ ꓗꓷ ꓥꓳꓽ ꓗꓷ ꓓꓴ ꓙꓳˍ ꓕꓯ ꓬꓲ ꓣꓳꓽ ꓕꓯ ꓫꓱꓸ ꓤˍ ꓡꓳ= ꓖꓽ ꓖꓶˍ ꓡꓳ= ꓕꓱ ꓟ ꓕꓲ ꓡꓰꓹ ꓣꓳ ꓥˍ ꓟꓲ ꓟꓴꓽ ꓗꓪ ꓗꓪ ꓔꓬ ꓟ ꓐꓹ ꓐ ꓤ ꓠꓱ ꓣꓱꓽ ꓢꓴ ꓥˍ ꓟꓲ꓾ ꓠꓲꓹ ꓟ ꓒꓴˍ ꓟ꓾ ꓠꓲꓹ ꓟ ꓢꓲꓽ ꓫꓬꓹ ꓟ꓾ ꓢꓴ ꓔꓯ ꓬꓲ ꓧ ꓟꓳˍ ꓟ꓾ ꓢꓴ ꓔꓯ ꓖꓼ ꓖꓶˍ ꓟ꓾ ꓠꓲꓹ ꓟ ꓐꓲˍ ꓟ꓾ ꓢꓲꓺ ꓒ ꓬꓰ-ꓢꓴ꓾ ꓥ ꓠꓬ꓾ ꓐꓹ ꓐ ꓪꓴ-ꓢ ꓡꓰ ꓠꓲꓹ ꓟ ꓢꓲꓽ ꓫꓬꓹ ꓟ ꓤ ꓠꓱ ꓐꓴ ꓔꓯ ꓐꓯ ꓟ ꓥ ꓡꓳ=

ꓮ ꓟꓶ ꓣꓳ ꓤꓶꓻ ꓠꓯꓸꓼ ꓗꓪ ꓪꓴ-ꓢ ꓔꓯ ꓥꓪ ꓦ ꓡꓱ ꓔꓬ ꓡꓳ ꓐꓯ ꓢꓲ ꓠꓵꓻ ꓠꓲꓹ ꓮ ꓔꓲꓸ ꓤˍ ꓟꓲ ꓟꓽ ꓙꓳ ꓟˍ ꓟꓲ ꓮ ꓟꓬꓹ ꓙꓳˍ ꓡꓳ= ꓪꓴ-ꓢ ꓦ ꓡꓱ ꓢꓴ ꓐꓯ ꓢꓲ ꓠꓱꓸ ꓐꓯ ꓔꓯ ꓬꓰ ꓙ ꓠꓲꓹ ꓟꓽ ꓫꓵ= ꓕꓱꓹ ꓟ ꓔꓯ ꓬꓰ ꓠꓲꓹ ꓟꓽ ꓫꓵ= ꓚꓵ ꓚꓵ ꓐꓯ ꓠꓬ ꓪꓴ-ꓢ ꓔꓯ ꓦ ꓡꓱ ꓔꓬ ꓟ ꓠꓬ ꓬꓲ ꓗꓴꓹ ꓙꓲꓻ ꓗꓪ ꓡꓰꓽ ꓥꓳ= ꓮ ꓔꓳ ꓡꓰꓽ ꓥꓳ= ꓙꓵꓻ ꓠꓲꓹ ꓠꓯꓸꓼ ꓗꓪˍ ꓟꓲ꓾ ꓪꓴ-ꓢ ꓔꓯ ꓦ ꓡꓱ ꓚꓱꓹ ꓗꓪˍ ꓟꓲ ꓕꓶ ꓕꓶ ꓡꓰꓽ ꓟꓽ ꓓꓹ= ꓕꓱ ꓟ ꓮ ꓙꓵꓽ ꓠꓬ ꓢꓲꓺ ꓒꓽꓳ ꓢꓲꓺ ꓒꓽꓳ ꓐꓰ ꓐꓯ ꓢꓲ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓠꓹ ꓟ ꓠꓴ ꓪ ꓕꓽ ꓓꓵꓽ ꓙ꓾ ꓐꓯ ꓟ ꓐꓯ ꓘꓶꓽ ꓔꓯ ꓣꓳ ꓢꓷꓸ ꓠ ꓗꓹ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓥˍ ꓟꓲ ꓪꓴ-ꓢ ꓔꓯ ꓦ ꓡꓱ ꓔ ꓡꓳ ꓐꓯ ꓢꓲ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓢꓴ ꓔꓯ ꓠꓲꓹ ꓠꓵ ꓐ ꓡˍ ꓡ꓾ ꓖꓽ ꓖꓶ ꓐ ꓡˍ ꓡ꓾ ꓝꓴꓲꓸ ꓟꓽ ꓬꓰ ꓬꓰ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓔꓬ ꓐ ꓡˍ ꓡ= ꓕꓱ ꓡꓰ ꓟꓽ ꓥ ꓠꓬ ꓣꓳ ꓥˍ ꓟꓲ ꓐꓹ ꓐ ꓠꓲꓹ ꓡꓶꓽ ꓔꓯ ꓟꓽ ꓛꓳ ꓥꓳ ꓐꓯ ꓠꓬ꓾ ꓢꓲꓺ ꓒꓽꓳ ꓢꓲꓺ ꓒꓽꓳ ꓐꓰ ꓡꓰꓽ ꓘꓴ ꓔꓬ ꓢꓴ ꓔꓯ ꓫꓱꓸ ꓡꓰˍ ꓥꓳ=

ꓖꓳ ꓕꓯ ꓬꓲ ꓙꓵꓹ ꓛꓲꓺ ꓡˍ ꓕꓯ ꓣꓳ ꓗꓽ ꓟꓽ ꓟꓶꓳ= ꓖꓳ ꓟ ꓪꓴꓸ ꓠꓬꓲ ꓣꓳ ꓗꓽ ꓟꓶˍ ꓕꓯ ꓡꓰ꓾ ꓬꓲ ꓙꓵꓹ ꓙꓳˍ ꓕꓯ ꓡꓰ ꓐꓹ ꓐꓽ ꓠꓲꓹ ꓡꓶꓽ ꓔꓯ ꓮ ꓕꓯˍ ꓟꓲ ꓣꓳ ꓛꓳ ꓫꓱꓽ ꓡꓯ= ꓐꓹ ꓐ ꓐꓲˍ ꓟ ꓡꓰ ꓣꓳ ꓐꓲꓻ ꓡ ꓝꓲ= ꓐꓹ ꓐ ꓢꓲꓽ ꓫꓬ ꓟ ꓡꓰ ꓣꓳ ꓢꓲꓽ ꓫꓬ ꓡꓰ ꓝꓲ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓦ ꓢꓯꓼ ꓪ ꓖꓶ ꓡ ꓔꓬ ꓡꓳ=