ꓟꓬ ꓡꓴꓻ ꓔꓯ ꓠꓬ ꓘꓹ ꓛꓽ ꓠꓯꓸꓼ ꓗꓪ ꓗꓷ ꓔ ꓢꓲ ꓠꓬꓲ ꓚꓵꓺ ꓔ ꓟꓽ ꓠ

ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓣꓳꓽ ꓔꓯ ꓔꓯꓺ ꓥꓳꓽ ꓠꓬꓲꓽ ꓫꓵꓽ ꓣꓱꓽ ꓢꓲ ꓐꓯ ꓟꓳꓸ ꓖꓶ ꓡ ꓔꓬ ꓡꓳ= ꓬꓲꓸ ꓪꓴꓸ ꓕꓲ ꓫꓵꓽ ꓟ ꓠꓬ ꓟꓬ ꓡꓴꓻ ꓐꓯ ꓟ ꓡꓬꓸ ꓪ ꓔꓯ ꓠꓬ ꓘꓹ ꓛꓽ(ꓙꓳꓽ ꓟ) ꓠꓯꓸꓼ ꓗꓪ ꓗꓷ ꓔ ꓢꓲ ꓠꓬꓲ ꓚꓵꓺ ꓔ ꓟꓽ ꓠ꓾ ꓐꓰ ꓐꓯ ꓟ ꓐꓰ꓾ ꓝꓮꓲ ꓔꓯꓺ ꓥꓳꓽ ꓕꓲ ꓫꓵꓽ ꓠꓬ ꓣꓳ ꓡꓰ ꓢꓴ ꓔꓯ ꓮ ꓡꓰ ꓐꓰ ꓙꓳꓻ꓾ꓬꓰ ꓖꓶˍ ꓠꓬ ꓢꓴˍ ꓟꓲ ꓣꓳ ꓔꓯ ꓖꓳ ꓡꓱ ꓙꓳꓻ ꓖꓶ꓾ ꓬꓰ ꓖꓶ ꓡˍ ꓥꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓫꓬ ꓕꓳ ꓶ ꓗꓪ ꓐꓰ ꓐꓯ ꓟꓳꓸ ꓖꓶ ꓡ ꓔꓬ ꓟ ꓥ ꓡꓳ=

ꓔꓯ ꓥꓳꓽ ꓬꓲ ꓪꓴꓸ ꓕꓲ ꓫꓵꓽ ꓟ ꓠꓬ ꓟꓬ ꓡꓴꓻ ꓔꓯ ꓠꓬ ꓘꓹ ꓛꓽ ꓠꓯꓸꓼ ꓗꓪ ꓚꓵꓺ ꓔ ꓟꓽ ꓠ ꓟ ꓕꓲ ꓡꓰꓹꓼ ꓟꓴˍ ꓟ ꓗꓪ ꓗꓷ ꓔ ꓢꓲ ꓠꓬꓲ ꓡꓬꓸ ꓓꓴ ꓥ ꓡꓳ= ꓕꓱ ꓟ ꓠꓬ ꓣꓳ ꓔꓯ ꓮ ꓫꓵꓽ ꓐꓯ ꓟꓳꓸ ꓖꓶ ꓡ ꓔꓬ ꓡ ꓐꓯ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓟꓬ ꓡꓴꓻ ꓡꓰ ꓐꓰ ꓡꓬꓸ ꓟ ꓣꓱꓽ ꓛꓰꓽ ꓡꓯ ꓫꓴ ꓮ ꓟꓬꓹ ꓖꓶ ꓔ ꓡꓳ= ꓪꓴ-ꓢ ꓡꓰ ꓖꓶ ꓔ ꓟ ꓣꓱꓽ ꓛꓰꓽ ꓡꓯ ꓫꓴ ꓠꓬ ꓕꓲ ꓣꓳ ꓡꓰ ꓕꓲ ꓣꓳ ꓟꓽ ꓫꓱꓸ ꓡꓯ ꓘꓳ= ꓕꓲ ꓣꓳ ꓠꓬ ꓣꓱꓽ ꓫꓵꓽ ꓣꓱꓽ ꓙꓰꓽ ꓫꓬꓹ ꓗꓴˍ ꓡꓳ= ꓕꓲ ꓣꓳ ꓠꓬ ꓠꓯ ꓞꓲꓼ ꓚꓱꓹ ꓔꓯ ꓟꓳꓸ ꓣꓱꓽ ꓬꓰ ꓗꓴˍ ꓡꓳ= ꓕꓲ ꓣꓳ ꓠꓬ ꓢꓷꓸ ꓠꓲꓹ ꓔꓯ ꓟꓳꓸ ꓓꓹ ꓡꓳ= ꓡꓯ ꓫꓴ ꓠꓬ ꓟꓽ ꓫꓱꓸ ꓡꓯ ꓘꓳ=

ꓖꓳ ꓡꓱ ꓥˍ ꓟꓲ ꓪꓴ-ꓢ ꓡꓰ ꓖꓶ ꓡˍ ꓟ ꓡꓯꓼ ꓫꓴ ꓣꓳꓽ ꓔꓯ ꓙꓳˍ ꓠꓬ ꓖꓳ ꓟ ꓣꓱꓽ ꓢꓲ ꓠꓱꓸ ꓐꓯꓼ ꓢꓴ ꓔꓯ ꓬꓰ ꓙ꓾ ꓔꓳꓹ ꓙ ꓖꓶ ꓠꓹ ꓟ ꓥ ꓡꓳ= ꓚꓲꓸ ꓛꓬ ꓐꓱ ꓶˍ ꓡꓰꓽ ꓬꓰ ꓔꓬ ꓕꓯ ꓠꓽ ꓟꓬ ꓡꓴꓻ ꓔꓯ ꓘꓹ ꓛꓽ ꓠꓯꓸꓼ ꓗꓪ ꓗꓷ ꓔ ꓟ ꓔꓯ ꓫꓱꓸˍ ꓡꓳ= ꓖꓳ ꓡꓱ ꓬꓰˍ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓖꓶ ꓔ ꓟ ꓟꓬ ꓡꓴꓻ ꓔꓯ ꓬꓲ ꓡꓰ ꓮ ꓔꓳꓸ ꓢꓰꓼ ꓗꓷ ꓢꓲ꓾ ꓣꓳ ꓔꓯ ꓖꓶ ꓔ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓔꓯ ꓬꓲ ꓡꓰ ꓣꓴ ꓔꓯꓹ ꓙꓰˍ ꓥꓳ꓾ ꓐꓰ ꓣꓳ ꓔꓯ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓐꓯ ꓟꓳꓸ ꓖꓶ ꓡ ꓔꓬ ꓡꓳ=

ꓝꓮꓲ ꓔꓯꓺ ꓥꓳꓽ ꓠꓬꓲꓽ ꓙꓰꓽ ꓕꓲ ꓙꓰꓽ ꓟ ꓠꓬ ꓣꓳ ꓡꓰ ꓢꓴ ꓔꓯ ꓙꓳꓻ ꓖꓶˍ ꓟ ꓕꓲ ꓡꓰꓹ ꓢꓴˍ ꓟꓲ ꓣꓳ ꓔꓯ ꓙꓳꓻ ꓖꓶ ꓡ ꓥꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ= ꓕꓱ ꓟ ꓠꓬ ꓣꓳꓽ ꓬꓰ ꓗꓷ ꓟ ꓮ ꓙꓵꓽ ꓠꓬ ꓕꓲ ꓠꓬꓲ ꓙꓳˍ ꓠꓬ ꓣꓳ ꓔꓯ ꓚꓱꓹ ꓬꓲꓼ ꓡˍ ꓥꓳ= ꓣꓳ ꓫꓵꓻˍ ꓕꓯ ꓢꓴ ꓡꓰ ꓣꓳꓽ ꓐꓱ ꓶ ꓫꓵꓻ ꓙ ꓟꓽ ꓠ= ꓣꓳ ꓐꓱ ꓶ ꓠꓬ ꓣꓳꓽˍ ꓡꓰꓽ ꓫꓵꓻ ꓠꓯˍ ꓟ ꓥ ꓡꓳ= ꓣꓳ ꓔꓯ ꓫ ꓙꓵ ꓠ ꓗꓹ ꓟ ꓠꓬ ꓣꓳ ꓕꓲ ꓣꓳ ꓔꓵꓸꓼ ꓡꓰꓽ ꓫ ꓙꓵ ꓪˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓢꓴ ꓔꓯ ꓮ ꓡꓰ ꓐꓰ ꓬꓰ ꓖꓶˍ ꓠꓬ ꓖꓳ ꓟˍ ꓡꓰ ꓐꓰ ꓣꓳꓽ ꓟꓶˍ ꓥꓳ= ꓣꓳ ꓙꓳꓻ ꓖꓶ ꓔ ꓟ ꓡꓰ ꓐꓰ ꓟꓶˍ ꓥꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓣꓳꓽ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓡꓰ ꓖꓶ ꓡˍ ꓟ ꓣꓱꓽ ꓛꓰꓽ ꓡꓯ ꓫꓴ ꓮ ꓙꓵꓽ ꓔꓯ ꓣꓳꓽ ꓣꓱꓽ ꓢꓲ ꓠꓬꓲ ꓕꓲ ꓣꓳ ꓛꓳ ꓕꓲ ꓣꓳ ꓬꓰ ꓙ ꓔꓳꓹ ꓙ ꓡꓯ ꓘꓳ ꓠꓹ ꓟ ꓥ ꓡꓳ= ꓚꓲꓸ ꓛꓬ ꓓˍ ꓟ ꓪꓽ ꓠꓬꓲˍ ꓟ ꓔꓯ ꓡꓰꓽ ꓓꓳ ꓟꓴ ꓓꓴ ꓟꓽ ꓥ= ꓕꓲ ꓣꓳ ꓡꓰ ꓕꓲ ꓣꓳ ꓠꓲꓹ ꓧꓳꓹ ꓫꓵꓽ ꓧꓳꓹ ꓢꓲ ꓠꓬꓲ꓾ ꓕꓲ ꓣꓳ ꓡꓰ ꓕꓲ ꓣꓳ ꓬꓰ ꓙ ꓡꓯ ꓘꓳ ꓢꓲ ꓠꓬꓲ꓾ ꓟꓬꓽ ꓠꓬꓲ ꓠꓬ ꓣꓳ ꓟꓲ ꓠꓯ ꓞꓳ ꓤ ꓮ ꓙꓵꓽ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰ ꓒꓵꓽ ꓠꓹ ꓟ ꓢꓯꓼ ꓕꓵꓼ ꓔꓬ ꓢꓴˍ ꓡꓰꓽ ꓥ ꓡꓳ=

ꓖꓳ ꓡꓱ ꓠꓬꓲ ꓕꓲ ꓣꓳ ꓡꓰ ꓕꓲ ꓣꓳ ꓬꓰ ꓙ ꓔꓳꓹ ꓙ ꓡꓯ ꓘꓳ ꓢꓲ ꓠꓬꓲ ꓟꓴꓽ ꓗꓪ ꓗꓴꓷꓼ ꓗꓪ ꓕꓲ ꓡꓰꓹ ꓓꓵꓽ ꓙꓰ ꓪ ꓠꓹ ꓟ ꓪꓴ-ꓢ ꓡꓰ ꓠꓲꓹ ꓡꓶꓽ ꓙꓳˍ ꓟ ꓥ ꓡꓳ꓾ ꓐꓰ ꓣꓳ ꓢꓷꓸ ꓠ ꓗˍ ꓡꓳ= ꓪꓴ-ꓢ ꓡꓰ ꓖꓶ ꓡˍ ꓟ ꓠꓬꓲ ꓟꓳ ꓓꓴ ꓟꓬ ꓡꓴ꓾ ꓣꓱꓽ ꓛꓰꓽ ꓡꓯꓼ ꓫꓴ ꓣꓱꓽ ꓢꓲ꓾ ꓠꓱꓸ ꓐꓯꓼ ꓢꓴ ꓔꓯ ꓣꓳ ꓮ ꓡꓰ ꓙꓳꓻ ꓖꓶˍ ꓠꓬ ꓖꓳ ꓟˍ ꓡꓰ ꓟꓶˍ ꓟ ꓕꓲ ꓡꓰꓹ ꓢꓴ ꓔꓯ ꓙꓲˍ ꓟ ꓮ ꓟꓬꓹ ꓙꓳꓻ ꓖꓶ ꓐ ꓡ ꓠꓹ ꓟ꓾ ꓬꓰ ꓖꓶ ꓐ ꓡ ꓠꓹ ꓟ ꓣꓳ ꓢꓯꓼ ꓕꓵꓼ ꓡꓯ=

Add new comment

3 + 2 =