ꓟꓲꓺ ꓠꓯ ꓗꓪ ꓮ ꓫꓵꓽ ꓥˍ ꓟꓲ ꓬꓲꓸ ꓝꓲꓸ ꓬꓲꓸ ꓙꓳˍ ꓡꓳ

ꓟꓲꓺ ꓠꓯ ꓗꓪ ꓮ ꓫꓵꓽ ꓥˍ ꓟꓲ ꓬꓲꓸ ꓝꓲꓸ ꓬꓲꓸ ꓙꓳˍ ꓡꓳ= ꓟꓽ ꓦ ꓡꓲꓺ ꓝꓲꓸ ꓙꓳˍ ꓡꓳ= ꓛ ꓝꓲꓸ ꓙꓳˍ ꓡꓳ= ꓙꓬꓺ ꓝꓲꓸ ꓙꓳˍ ꓡꓳ= ꓦꓵꓻ ꓡ ꓝꓲꓸ ꓙꓳˍ ꓡꓳ= ꓫꓵꓻ ꓝꓲꓸ ꓙꓳˍ ꓡꓳ= ꓕꓱ ꓟ ꓔꓯ ꓢꓷꓸ ꓔ ꓠ ꓗˍ ꓡꓳ=

            ꓮ ꓟꓶ ꓦꓬꓼ ꓠꓬꓲ ꓠꓬ ꓣꓱꓽ ꓛꓱꓽ ꓦꓬꓼ ꓠꓬꓲ  ꓥ ꓡꓳ= ꓟꓽ ꓦ ꓡꓲꓺ ꓝꓲꓸ ꓕꓯ ꓟꓽ ꓦ ꓓꓽˍ ꓠꓬ ꓬꓲꓻ ꓙꓬ ꓓꓽ ꓟꓶ ꓟ ꓡꓰ ꓐꓰ ꓮ ꓟꓶ ꓦꓬꓼ ꓠꓬꓲ ꓗꓪ ꓣꓱꓽ ꓛꓰꓽ ꓧꓪ ꓠꓬ ꓮ ꓘꓶꓸ ꓙꓲˍ ꓡꓳ= ꓣꓱꓽ ꓛꓰꓽ ꓕꓱ ꓟ ꓮ ꓡꓰ ꓧꓪˍ ꓡ ꓐꓰ ꓐꓯ ꓠꓬ꓾ ꓠꓬꓲꓸ ꓠꓬꓲꓸ ꓟꓸ ꓟꓲ ꓬ-ꓢ-ꓬ ꓕꓳꓽ ꓶ 1ꓽ16 ꓗꓪ ꓐꓯ ꓔ ꓟ ꓡꓰ꓾ ꓧꓸ ꓟ ꓟꓬꓱꓽ ꓬꓰ= ꓙꓲꓻ ꓟ ꓟꓬꓱꓽ ꓬꓰ= ꓝꓴꓲꓸ ꓔꓯ ꓤꓸ ꓐ ꓡ ꓠꓹ ꓛꓲ ꓤꓸ ꓢꓲ ꓔꓱꓹ ꓙꓳꓽ ꓟ ꓟꓬꓱꓽ ꓬꓰˍ ꓠꓬ ꓣꓱꓽ ꓛꓰꓽ ꓟꓷꓸ ꓥꓳ=

            ꓜ ꓚꓲꓸ ꓚꓲꓸ ꓧꓪꓽ ꓚꓲꓸ ꓚꓲꓸ ꓦꓬꓼ ꓠꓬꓲ ꓗꓪ ꓪꓴ-ꓢ ꓡꓰ ꓮ ꓫꓵꓽ ꓬꓰ ꓠꓹ ꓟ ꓐꓯ ꓟꓳꓸ ꓖꓶꓽ ꓡ ꓔꓬ ꓡ ꓐꓰ ꓠꓬ ꓫꓱꓸ ꓤꓽ ꓓꓴ ꓟꓬꓱꓽ ꓬꓰ ꓠꓹ ꓟ ꓐꓯ ꓟꓳꓸ ꓖꓶꓽ ꓡ ꓔꓬˍ ꓡꓳ= ꓣꓳꓽ ꓠꓬ ꓜ ꓚꓲꓸ ꓧꓪꓽ ꓚꓲꓸ ꓔꓬ ꓥˍ ꓟꓲ꓾ ꓫꓱꓸ ꓤ ꓟꓽ ꓗꓴꓸ꓾ ꓠꓲꓹ ꓠꓵ ꓟꓽ ꓗꓴꓸ ꓐꓯ ꓠꓬ ꓣꓳꓽ ꓜ ꓚꓲꓸ  ꓧꓪꓽ ꓚꓲꓸ ꓟ ꓠꓬ ꓬꓲꓸ ꓖꓳꓽ ꓥꓳ= ꓪꓴ-ꓢ ꓠꓬ ꓕꓱ ꓟ ꓣꓳꓽ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ= ꓕꓳ ꓟ ꓣꓳꓽ ꓔꓯ ꓔꓬꓹ ꓪ ꓝꓲ ꓠꓲꓹ ꓫꓵˍ ꓡꓳ=

            ꓕꓲꓽ ꓐꓱ ꓙꓳ ꓟ ꓠꓬ ꓜ ꓚꓲꓸ ꓧꓪꓽ ꓚꓲꓸ ꓬꓰ ꓔꓬˍ ꓟꓲ꓾ ꓢꓴ ꓐꓰ ꓟꓽ ꓧꓳꓹ ꓡꓯ ꓘꓳ꓾ ꓢꓴ ꓐꓰ ꓟꓽ ꓕꓽ ꓡꓯꓼ ꓘꓳ ꓫꓵꓽ ꓮ ꓟꓬ ꓙꓳ ꓡꓳ= ꓪꓴ-ꓢ ꓐꓯ ꓘꓶꓽ ꓕꓱ ꓡꓱ ꓙꓳˍ ꓡꓳ= “ꓟꓴ ꓗꓪ ꓟꓲꓹ ꓠꓯ ꓠꓬ ꓥꓪ ꓡꓰ ꓚꓰꓼ ꓔ ꓟ ꓥ ꓡꓳ= ꓠꓴ ꓥꓪ ꓔꓯ ꓮ ꓡꓰ ꓫꓵꓽ ꓦꓲꓻ ꓫꓬꓹ ꓖꓶꓽ ꓠꓲꓹ ꓫꓵˍ ꓡ? ꓖꓳ ꓡꓱ ꓥˍ ꓟꓲ꓾ ꓥꓪ ꓠꓲꓹ ꓟ ꓠꓬ ꓠꓲꓹ ꓟ ꓙ ꓣꓳꓽ ꓟ ꓔꓯ ꓠꓲꓹ ꓥꓳ ꓡꓳ” ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓣꓳꓽ ꓠꓲꓹ ꓟ ꓔꓯ ꓪꓴ-ꓢ ꓔꓬ ꓖꓴ ꓧꓶꓸ ꓕꓯꓽ ꓫꓬꓹ ꓙꓰ ꓡꓯ= ꓙ ꓣꓳꓽ ꓟ ꓠꓲꓹ ꓟ ꓬꓰ ꓡꓯ=

            ꓠꓬꓲ ꓠꓬꓲ ꓶꓼ ꓓꓳꓽ ꓫꓱꓹ ꓓꓳꓽ ꓗꓪ꓾ ꓢꓲ ꓒ ꓬꓰ-ꓢꓴ ꓡꓰ  ꓙꓲꓻ ꓟ ꓬꓰ ꓠꓹ ꓟ ꓔꓱ ꓟ ꓬꓰ ꓠ ꓟ ꓢꓴ ꓔꓯ ꓕꓽ ꓡꓳꓸ ꓠꓬꓲ ꓐꓰ ꓐꓯ ꓔ ꓖꓶꓽ ꓡꓳ= ꓕꓲꓽ ꓐꓱ ꓠꓬ ꓢꓴ ꓪꓽ ꓘꓴ ꓙꓰˍ ꓠꓬ ꓬꓲꓸˍ ꓟꓲ ꓪꓽ ꓘꓴ ꓡꓳ= ꓢꓴ ꓮ ꓡꓰ ꓬꓰˍ ꓠꓬ꓾ ꓬꓲꓸ ꓟꓲ ꓕꓱ ꓡꓱ ꓬꓰˍ ꓡꓳ= ꓢꓴ ꓟꓽ ꓙꓲꓻ ꓟ ꓬꓰˍ ꓠꓬ ꓬꓲꓸ ꓖꓼ ꓬꓰ ꓡꓳ= ꓕꓱ ꓡꓱ ꓕꓽ ꓬꓰ= ꓠꓬꓲꓸ ꓢꓲ ꓒ ꓬꓰ-ꓢꓴ ꓐꓯ ꓟ ꓠꓬ꓾ ꓣꓳꓽ ꓧꓸ ꓟ ꓬꓰ ꓠꓹ ꓟ ꓙꓲꓻ ꓟ ꓬꓰ ꓠꓹ ꓟ꓾ ꓔꓲꓺ ꓒ ꓔꓯ ꓕꓽ ꓡꓳ= ꓟꓸ ꓒꓽ ꓔꓯ ꓕꓽ ꓡꓳ= ꓪꓴ-ꓢ ꓒꓬꓱꓽ ꓟ ꓔꓯ ꓡꓳꓸ ꓢꓲ ꓡꓰ ꓬꓰ= ꓖꓳ ꓡꓱ ꓬꓰ ꓠꓬ ꓣꓳ ꓣꓱꓽ ꓛꓱꓽ ꓟꓶ ꓥꓳ= ꓢꓯꓼ ꓟꓬꓺ ꓟꓶꓸ ꓥꓳ= ꓣꓳꓽ ꓠꓬ ꓔꓲꓺ ꓒ ꓔꓯ ꓦ ꓡꓱ ꓔꓬ ꓫꓵꓽ ꓟꓽ ꓥ= ꓟꓸ ꓒꓽ ꓔꓯ ꓪꓴꓸ ꓓꓵ ꓕꓱꓽ ꓔꓬ ꓫꓵꓽ ꓟ ꓥ= ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓽ ꓔꓬ ꓠꓬꓲ ꓮ ꓟꓽ ꓒꓬꓱꓽ ꓟꓬꓺ ꓔꓯˍ ꓟꓲ ꓡꓳꓸ ꓟꓽ ꓛꓵ ꓐꓯ ꓟ꓾ ꓠꓬꓲ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓟꓸ ꓖꓶꓽ ꓡ ꓔꓬˍ ꓡꓳ=

Add new comment

4 + 12 =