ꓟꓲ ꓠꓮ ꓒꓴ ꓫꓵ ꓕꓯ ꓢꓲ ꓪꓴ-ꓢ ꓔꓯ ꓙꓵ ꓠꓹ ꓟ ꓬꓳꓸ ꓚꓵˍ ꓟ (Homily)

ꓘꓴ ꓜꓲꓼ ꓞꓳ ꓟꓵꓽ ꓘꓳꓼ 18 ꓫꓵꓽ ꓠꓽ

ꓟꓸ ꓟꓲ ꓚ ꓒ ꓕꓳꓽ ꓶ 1 : 2 , 2ꓽ 21- 23

ꓟꓸ ꓟꓲ ꓚ ꓒ ꓡꓰ꓾ ꓮꓽ ꓔꓳ ꓔꓳ ꓬꓲ ꓖꓳꓽ꓾ ꓮꓽ ꓔꓳ ꓔꓳ ꓬꓲ ꓖꓳꓽ ꓥ ꓡꓳ꓿ ꓙꓳˍ ꓟ ꓥ ꓕ ꓑꓳ ꓠꓬ ꓬꓲ ꓖꓳꓽ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓙ ꓗꓴ ꓠꓲꓹˍ ꓐꓰ ꓢꓷ ꓠꓲˍ ꓐꓰ ꓡꓯꓼ ꓗꓴ ꓟꓬꓱꓽ ꓡꓰ ꓢꓯꓼ ꓕꓵ ꓢꓴ ꓖꓳ ꓟ ꓠꓬ꓾ ꓟꓽ ꓢꓯꓼ ꓕꓵꓼ ꓢꓴ ꓕꓲ ꓣꓳ ꓟ ꓡꓯꓼ ꓪ ꓬꓰ ꓠꓹ ꓟ ꓬꓲ ꓔꓯ ꓗꓶ ꓔ ꓖꓶ ꓬꓰ ꓠ ꓗˍ ꓡꓳ꓿ ꓕꓱ ꓟˍ ꓟꓲ ꓬꓲ ꓖꓳꓽ ꓥ ꓢꓲ꓾ ꓥꓶˍ ꓟ ꓬꓲ ꓓꓽ ꓟ ꓥ ꓡꓳ꓿ ꓞꓳ ꓤ ꓡꓰ ꓟꓲꓽ ꓟꓲ ꓠꓯ ꓘꓪ ꓗꓪ ꓢꓯꓼ ꓕꓵ ꓢꓲ ꓠꓲꓹ ꓟ ꓪꓴ ꓧꓶˍ ꓟ ꓥ ꓕ ꓑꓳ ꓗꓪ ꓐꓰ ꓮ ꓫꓵ ꓟꓶˍ ꓡꓳꓺꓽ꓿ꓬꓲ ꓦꓬꓼ ꓠꓬꓲ ꓥ ꓕ ꓑꓳ ꓗꓪ ꓠꓬ ꓫꓸ ꓙꓵ ꓓꓴˍ ꓡꓰꓽ ꓐꓲ ꓞˍ ꓡꓳ꓿ ꓬꓲ ꓬꓰˍ ꓟ ꓟꓬꓱꓽˍ ꓟꓲ ꓠꓲꓹ ꓫ ꓟꓬ ꓫ ꓓꓴ ꓥ ꓡꓳ꓿ ꓢ ꓘꓪ ꓕꓯ ꓥˍ ꓟꓲ ꓬꓲ ꓠꓲꓹ ꓟ ꓪꓴ ꓧꓶ ꓠꓽ ꓟꓽ ꓪ꓿ ꓕꓱ ꓟˍ ꓟꓲ ꓬꓲ ꓖꓳꓽ ꓥ ꓡꓳ꓿

ꓗꓳ-ꓡꓳ-ꓫꓲ 31-5ꓹ 9-11

ꓠꓴ ꓪꓽ ꓔꓯ ꓠꓬ ꓙꓲ-ꓢꓴˍ ꓐꓰ ꓕꓲ ꓪꓺꓼ ꓢꓯꓸ ꓡ ꓝꓲ ꓗꓷ ꓠꓬꓲ꓾ ꓟꓴꓽ ꓗꓪ ꓕꓯ ꓢꓲ ꓪꓴ-ꓢ ꓡꓯꓼ ꓙ ꓗꓪ ꓠꓬꓲꓸ ꓠꓸ ꓔꓬ ꓟ꓾ ꓙꓲ-ꓢꓴ ꓔꓬ ꓗꓪ ꓙꓳˍ ꓡꓳ ꓫꓵꓽ ꓔꓯ ꓠꓲꓹ ꓥꓳꓺ꓿ 2 ꓠꓴ ꓪꓽ ꓠꓲꓹ ꓟ ꓠꓬ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓙꓳˍ ꓟ ꓔꓯ ꓠꓲꓹ ꓥꓳꓺ꓿ ꓟꓲ ꓠꓯ ꓗꓪ ꓙꓳˍ ꓟ ꓔꓯ ꓕꓽ ꓠꓲꓹ ꓥꓳ꓿ 3 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ ꓫꓵꓻ ꓗꓷ ꓢꓲ꓾ ꓠꓴ ꓪꓽ ꓢꓯꓼ ꓟꓬ ꓠꓬ ꓙꓲ-ꓢꓴˍ ꓐꓰ ꓕꓲ ꓪꓺꓼ ꓪꓴ-ꓢ ꓠꓯꓸꓼ ꓗꓪ ꓚꓵꓺ ꓔ ꓡꓳ꓿ 4 ꓙꓲ-ꓢꓴ ꓠꓬ ꓣꓳꓽ ꓢꓯꓼ ꓟꓬ ꓥ ꓡꓳ꓿ ꓬꓲ ꓟꓳꓸ ꓖꓶ ꓡ ꓕꓯ꓾ ꓠꓴ ꓪꓽˍ ꓟꓲ ꓬꓲˍ ꓐꓰ ꓕꓲ ꓪꓺꓼ ꓬꓲ ꓐꓬꓱꓼ ꓡꓱꓼ ꓡꓱ ꓟ ꓑꓯꓹ ꓟꓶˍ ꓥꓳ꓿ 5 ꓖꓳ ꓡꓱ ꓠꓬꓲ ꓟꓲ ꓠꓯ ꓔꓯ ꓠꓲꓹ ꓥꓳꓺˍ ꓟ ꓠꓴ ꓪꓽ ꓡꓯꓼ ꓗꓸ ꓔꓯ ꓫꓵꓻ ꓝꓲ꓿ ꓕꓱ ꓟ ꓠꓬ꓾ ꓟꓽ ꓢꓲ ꓟꓽ ꓫꓬꓻ ꓟ꓾ ꓟꓽ ꓫꓬꓻ ꓟꓽ ꓖꓼ ꓟ꓾ ꓦꓯꓸ ꓠꓲꓹ ꓙꓵꓽ ꓟ꓾ ꓟꓽ ꓙꓲ ꓟ ꓔꓯ ꓠꓲꓹ ꓫꓵˍ ꓟ ꓐꓰ ꓠꓲ ꓦꓯꓸ ꓟ ꓥ ꓡꓳ꓿ ꓠꓲ ꓦꓯꓸˍ ꓟ ꓠꓬ ꓠꓲꓽ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼˍ ꓟ ꓐꓰ ꓕꓲ ꓡꓰꓹꓼ ꓥ ꓡꓳ꓿ ꓠꓴ ꓪꓽ ꓠꓬ ꓡꓽ ꓞꓳ ꓡꓵꓺˍ ꓐꓰ ꓬꓲ ꓬꓰˍ ꓟ ꓟꓬꓱꓽ ꓔꓯ ꓡꓵꓸ ꓩꓴ ꓗꓷ ꓢꓲ ꓡꓽ ꓞꓳ ꓫꓵꓼ ꓖꓪꓽ ꓔ ꓢꓴ ꓥ ꓠꓬꓲ ꓕꓽ ꓗꓶꓸ ꓡꓯꓽ ꓘꓳ꓿ 10 ꓡꓽ ꓞꓳ ꓫꓵꓼ ꓠꓬ ꓬꓲ ꓔꓯ ꓚꓰꓼ ꓢꓴ ꓒꓬꓱꓽ ꓶꓻ ꓡꓰ ꓢꓲ꓾ ꓬꓲ ꓔꓯ ꓢꓷꓸˍ ꓟ ꓗꓪ ꓬꓲ ꓫꓵꓼ ꓑꓶꓸ ꓡꓰ ꓔꓬ ꓟ ꓥ ꓡꓳ꓿ 11 ꓖꓳ ꓡꓱ ꓠꓬꓲ ꓡꓽ ꓞꓳ ꓫꓵꓼ ꓠꓯꓸꓼ ꓗꓪ ꓠꓬ꓾ ꓦꓲ-ꓡꓲ ꓡ ꓞꓳˍ ꓐꓰ ꓬꓴ-ꓔ ꓡ ꓞꓳ꓾ ꓶꓺ ꓔ ꓢꓴˍ ꓐꓰ ꓟꓽ ꓶꓺ ꓔ ꓢꓴ꓾ ꓐꓶꓽ ꓒˍ ꓐꓰ ꓞꓳ ꓗꓳꓸˍ ꓐꓰ꓾ ꓚꓳ ꓑꓸˍ ꓐꓰ ꓚꓳ ꓪꓴꓸ꓾ ꓒꓯꓽ ꓓꓴ ꓟꓽ ꓙꓳ꓿ ꓙꓲ-ꓢꓴ ꓠꓽ ꓮꓽ ꓙꓵ ꓡꓱꓸꓼ ꓥ ꓢꓲ꓾ ꓮꓽ ꓙꓵ ꓢꓴ ꓠꓯꓸꓼ ꓗꓪ ꓔꓬ ꓡꓳ꓿

ꓡꓴ-ꓘ 12ꓽ 13- 21

ꓞꓳ ꓜꓴꓻ ꓗꓪ ꓟ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ꓾ ꓟꓸ ꓒꓽꓳ꓾ ꓥꓪ ꓔꓯ ꓡꓯꓼ ꓪ ꓐꓱꓻ ꓖꓶ ꓡ ꓠꓹ ꓟ ꓥꓪ ꓮ ꓬꓲꓼ ꓔꓯ ꓐꓯ ꓖꓶ ꓙ꓾ ꓐꓯˍ ꓡꓳ꓿ 14 ꓬꓰ-ꓢꓴ ꓠꓬ ꓬꓲ ꓔꓯ꓾ ꓞꓳ ꓤꓽꓳ꓾ ꓮꓽ ꓟ ꓡꓰ ꓥꓪ ꓔꓯ ꓠꓴ ꓪꓽ ꓐꓯ ꓟꓴ ꓞꓷꓹ ꓢꓴ ꓢꓲꓽ ꓒˍ ꓐꓰ ꓡꓯꓼ ꓪ ꓐꓱ ꓖꓶꓽ ꓢꓴ ꓣꓱꓽ ꓝꓲˍ ꓡ?꓾ ꓐꓯ ꓖꓶˍ ꓡꓳ꓿ 15 ꓬꓰ-ꓢꓴ ꓠꓬ ꓬꓲ ꓪꓽ ꓔꓯ꓾ ꓠꓲꓹ ꓦꓯꓸˍ ꓟ ꓮꓽ ꓙꓵ ꓔꓯ ꓧꓪꓸ ꓛꓲꓽ ꓐꓰ ꓤ ꓟꓳ꓿ ꓮ ꓡꓲꓳ ꓐꓯ ꓠꓬ ꓞꓳ ꓤ ꓠꓽ ꓬꓲ ꓖꓴꓽ ꓙꓴ ꓮꓽ ꓟꓬꓹ ꓙꓳˍ ꓟ ꓗꓪ ꓐꓰ ꓢꓯꓸ ꓔꓬ ꓟꓶˍ ꓟ ꓟꓽ ꓥ꓾ ꓐꓯˍ ꓡꓳ꓿ 16 ꓬꓲ ꓠꓬ ꓔꓯ ꓥꓳꓽ ꓕꓲ ꓟ ꓣꓱꓽ ꓢꓲ ꓬꓲ ꓪꓽ ꓔꓯ꓾ ꓞꓳ ꓐꓳ ꓕꓲ ꓣꓳ ꓠꓬ ꓬꓲ ꓦꓻ ꓟꓲ ꓗꓪ ꓜ ꓪꓳꓽ ꓡꓳ ꓪꓳꓽ ꓮꓽ ꓟꓬꓹ ꓫ ꓟꓶˍ ꓡꓳ꓿ 17 ꓖꓳ ꓡꓱ ꓠꓬ ꓬꓲ ꓠꓽ꓾ ꓥꓪ ꓜꓽ ꓫꓵꓽ ꓜꓽ ꓙꓰꓽ ꓗꓶ ꓖꓴ ꓟꓽ ꓡꓳꓼ ꓠꓬꓲ ꓮ ꓡꓲ ꓬꓰ ꓢꓰ꓾ ꓐꓰ ꓓꓵꓽ ꓙˍ ꓡꓳ꓿ 18 ꓝꓮꓲ ꓬꓲ ꓡꓰ꓾ ꓥꓪ ꓠꓽ ꓕꓱ ꓡꓱ ꓬꓰˍ ꓥꓳ꓾ ꓥꓪ ꓜ ꓗꓹ ꓕꓱ ꓟꓬ ꓟ ꓒꓬꓹ ꓗꓷ ꓢꓲ ꓪ ꓜꓲ ꓪꓴꓽˍ ꓟ ꓜ ꓗꓹ ꓫꓬꓹ ꓢꓲ ꓠꓬꓲ꓾ ꓖꓳ ꓗꓪ ꓥꓪ ꓜꓽ ꓫꓵ ꓜ ꓙꓰˍ ꓐꓰ ꓖꓴꓽ ꓙꓴ ꓫ ꓗꓶ ꓔꓸ ꓥꓳ꓿ 19 ꓖꓳ ꓗꓸ ꓠꓯꓸ ꓥꓪ ꓠꓬ ꓥꓪ ꓶꓻ ꓟꓬ ꓔꓯ꓾ ꓶꓻ ꓟꓬꓺꓳ꓾ ꓠꓴ ꓐꓱ ꓶ ꓮꓽ ꓟꓬꓹ ꓘꓳꓼ ꓣꓱꓽ ꓓꓴ ꓮꓽ ꓟꓬꓹ ꓫ ꓗꓶ ꓔꓸꓳ꓿ ꓖꓳ ꓡꓱ ꓠꓬꓲ ꓠꓴ ꓠꓬ ꓜꓽ ꓠꓬꓲ ꓓꓳꓻ ꓠꓬꓲ ꓠꓲꓹ ꓒꓴ ꓒꓴ ꓐꓰ ꓙꓳꓻ ꓢꓻ ꓔꓬ꓾ ꓐꓯ ꓖꓶˍ ꓥꓳ꓾ ꓐꓯˍ ꓡꓳ꓿ 20 ꓖꓳ ꓡꓱ ꓥ ꓟꓲ ꓪꓴ-ꓢ ꓠꓽ ꓬꓲ ꓔꓯ꓾ ꓞꓳ ꓙꓲꓽꓳ꓾ ꓠꓬꓲꓸ ꓟꓶꓼ ꓘꓶꓼ ꓠꓴ ꓶꓻ ꓟꓬ ꓔꓯ ꓥꓪ ꓧꓪ ꓡ ꓥꓳ꓿ ꓖꓳ ꓡꓱ ꓠꓬ ꓠꓴ ꓡꓰ ꓙꓽ ꓖꓶ ꓔ ꓟ꓾ ꓮꓽ ꓟ ꓔꓯ ꓟ ꓗꓷ ꓡꓰˍ ꓥꓳ ꓪ?꓾ ꓐꓰ ꓐꓯ ꓖꓶˍ ꓡꓳ꓿ 21 ꓚꓲꓸ ꓛꓬ ꓐꓱ ꓶˍ ꓡꓰꓽ ꓒꓵꓽ ꓶꓽ ꓫ ꓗꓶ ꓔꓸ ꓢꓲ꓾ ꓪꓴ-ꓢ ꓔꓯ ꓟꓳꓸ ꓟꓽ ꓐꓳ ꓟ ꓡꓽ ꓞꓳ ꓠꓬ ꓬꓲ ꓕꓱ ꓡꓱ ꓗꓹ ꓡꓳ꓾ ꓐꓯˍ ꓡꓳ꓿