ꓟꓴꓽ ꓗꓪ ꓗꓴꓷꓼ ꓔꓯ ꓥꓳꓽ

ꓢꓲ ꓒ ꓬꓰ-ꓢꓴ ꓠꓬ ꓔꓯꓺ ꓥꓳꓽ ꓝꓮꓲ ꓕꓲ ꓟ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬ ꓡꓳ= ꓟ-ꓕꓲ 13ꓽ47-53 ꓗꓪ ꓐꓯ ꓔ ꓟ ꓠꓬ꓾ ꓟꓴꓽ ꓗꓪ ꓗꓴꓷꓼ ꓠꓬ ꓬꓲꓻ ꓡꓴꓽ ꓐꓱ ꓗꓪ ꓓꓳꓽ ꓔ ꓟ ꓥꓪꓸ ꓫꓵꓽ ꓥꓪꓸ ꓙꓰꓽ ꓥ ꓕ ꓑꓳꓸ ꓓꓳꓽ ꓟꓶˍ ꓟ ꓥꓪꓸ ꓑꓱꓸˍ ꓡꓰ ꓐꓰ ꓗꓹ ꓡꓳ= ꓥꓪꓸ ꓓꓳꓽ ꓔ ꓟ ꓥꓪꓸ ꓑꓱꓸ ꓖꓳ ꓟ ꓗꓪ ꓠꓬ ꓙꓲˍ ꓟˍ ꓟꓲ ꓟꓶˍ ꓡꓳ ꓟꓽ ꓙꓲꓻ ꓟˍ ꓟꓲ ꓓꓳꓽ ꓟꓶˍ ꓡꓳ= ꓖꓳ ꓡꓱ ꓠꓬꓲ ꓟꓬꓱꓽ ꓬꓰ ꓢꓴ ꓠꓬ ꓥꓪ ꓑꓱꓸ ꓘꓴꓽ ꓗꓪ ꓓꓹ ꓟ ꓟꓽ ꓙꓲꓻ ꓟ ꓥꓪꓸ ꓔꓯ ꓮ ꓙꓵꓽ ꓢꓲ ꓓꓳ ꓗꓷ ꓢꓲ ꓡꓳ ꓩꓴ ꓗꓷˍ ꓡꓳ= ꓙꓲꓻˍ ꓟ ꓥꓪꓸ ꓔꓯ ꓠꓬ ꓡꓴꓻ ꓗꓪ ꓗꓶˍ ꓡꓳ꓾ ꓐꓰ ꓐꓯ ꓟ ꓢꓲꓽ ꓫꓬ ꓕꓳꓽ ꓶ ꓥ ꓡꓳ= ꓟꓴꓽ ꓗꓪ ꓗꓴꓷꓼ ꓠꓬ ꓕꓱ ꓟˍ ꓡꓰ ꓐꓰ ꓗꓹ ꓡꓳ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓖꓶ ꓡˍ ꓟ ꓠꓬ ꓮ ꓫꓵꓽ ꓟꓸ ꓟꓲꓽ ꓥ ꓡ? ꓮ ꓡꓲ ꓫꓵꓽ ꓬꓲꓸ ꓬꓲ ꓢꓲꓺ ꓙꓳˍ ꓡ? ꓮ ꓡꓲ ꓬꓰ ꓢꓲ ꓣꓳ ꓠꓬ ꓥꓪꓸ ꓑꓱꓸ ꓘꓴꓽ ꓗꓪ ꓓꓵˍ ꓟ ꓥꓪꓸ ꓔꓯ ꓫꓱꓸˍ ꓟ ꓥ ꓡ? ꓐꓰ ꓣꓳ ꓓꓵꓽ ꓙ ꓟꓶ ꓓꓴ ꓙꓳˍ ꓡꓳ=

ꓢꓲ ꓒ ꓬꓰ-ꓢꓴ ꓡꓰ ꓐꓯ ꓟ ꓗꓪ ꓠꓬ ꓣꓳ ꓔꓯ ꓓꓵꓽ ꓙ ꓓꓴ ꓠꓬꓲꓽ ꓙꓰꓽ ꓖꓶ ꓔ ꓡꓳ= ꓬꓲ ꓪꓴꓸ ꓕꓲ ꓙꓰꓽ ꓟ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓟꓴꓽ ꓗꓪ ꓗꓴꓷꓼ ꓗꓪ ꓕꓲꓽ ꓠꓬꓲ ꓙꓳˍ ꓠꓬ ꓙꓲˍ ꓟ ꓡ ꓞꓳ ꓐꓴ ꓔꓯ ꓬꓲ ꓔꓬꓹ ꓗꓪ ꓧꓳꓽ ꓔꓯꓹ ꓙꓰˍ ꓥꓳ꓾ ꓬꓲ ꓡꓰ ꓢꓲꓺ ꓔꓯꓹ ꓙꓰˍ ꓥꓳ= ꓟꓽ ꓙꓲꓻ ꓟ ꓔꓯ ꓠꓬ ꓮ ꓙꓵꓽ ꓡꓳ ꓩꓴ ꓗꓷ ꓢꓲ ꓠꓬꓲ ꓛꓬꓽ ꓟꓵꓽ ꓗꓪ ꓙꓰ ꓝꓲˍ ꓥꓳ= ꓕꓱ ꓟ ꓠꓬ ꓟꓴꓽ ꓗꓪ ꓗꓴꓷꓼ ꓬꓲ ꓟꓸ ꓟꓲꓽ ꓥꓳ꓾ ꓬꓲꓸ ꓬꓲ ꓢꓲꓺ ꓥꓳ ꓐꓯ ꓟ ꓔꓯ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓠꓲꓹ ꓫꓵˍ ꓟ ꓥ ꓡꓳ=

ꓠꓬꓲꓽ ꓙꓰꓽ ꓕꓲꓽ ꓙꓰꓽ ꓠꓬ ꓮ ꓟꓶ ꓟꓲ ꓠꓯ ꓕꓱ ꓟ ꓗꓪ ꓥꓪꓸ ꓫꓵꓽ ꓥꓪꓸ ꓙꓰꓽ ꓮ ꓟꓬꓹ ꓫꓵꓽ ꓙꓳˍ ꓟ ꓡꓰ ꓐꓰ ꓣꓳ ꓐꓴ ꓥ ꓟꓲ ꓙꓲˍ ꓟ ꓐꓰ ꓟꓽ ꓙꓲ ꓟ ꓮ ꓙꓵꓽ ꓕꓲ ꓡꓰꓹ ꓔꓬꓹ ꓪˍ ꓡꓳ= ꓟꓴꓽ ꓗꓪ ꓗꓴꓷꓼ ꓖꓳ ꓟ ꓞꓼ ꓐꓰ ꓐꓲ ꓜꓲꓼˍ ꓟ ꓕꓲ ꓒꓳꓹ ꓗꓪ ꓐꓰ ꓟꓽ ꓓꓳ ꓡ ꓕ ꓑꓳꓸ ꓣꓳ ꓠꓬ ꓙꓲꓻ ꓢꓴ ꓐꓰ ꓟꓽ ꓙꓲꓻ ꓢꓴ ꓐꓴ ꓗꓳ ꓡꓳ ꓗꓪ ꓔꓬꓹ ꓪˍ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓤꓶꓻ ꓗꓪ ꓠꓲꓹ ꓟ ꓮ ꓘꓶꓸ ꓙꓲˍ ꓟ ꓡ ꓞꓳ ꓔꓯˍ ꓟꓲ ꓟꓳꓻ ꓪˍ ꓥꓳ꓾ ꓠꓲꓹ ꓟ ꓕꓲꓽ ꓔꓲꓸˍ ꓟꓲ ꓟꓽ ꓙꓲꓻ ꓡ ꓞꓳ ꓐꓴ ꓔꓯˍ ꓟꓲ ꓔꓳꓹ ꓜꓳꓽ ꓪˍ ꓥꓳ= ꓠꓲꓹ ꓖꓳꓼ ꓢꓴ ꓔꓯˍ ꓟꓲ ꓟꓳꓻ ꓪˍ ꓥꓳ= ꓖꓳ ꓟˍ ꓡꓰ ꓐꓰ ꓠꓲꓹ ꓔꓱꓹ ꓢꓴ ꓔꓯ ꓥ ꓟꓲ ꓟꓳꓻ ꓪˍ ꓥꓳ= ꓠꓵꓻ ꓠꓲꓹ ꓐꓲ ꓞꓹ ꓢꓴ ꓔꓯ ꓥ ꓟꓲ ꓟꓳꓻ ꓪˍ ꓥꓳ= ꓠꓲꓹ ꓟ ꓮ ꓘꓶꓸ ꓦꓶ ꓗꓴꓸ ꓢꓴ꓾ ꓢꓴ ꓔꓯ ꓮ ꓘꓶꓸ ꓠꓲꓹ ꓜꓳ ꓗꓴꓸ ꓢꓴ ꓔꓯ ꓥ ꓟꓲ ꓟꓳꓻ ꓪˍ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓙꓲˍ ꓟ ꓐꓰ ꓟꓽ ꓙꓲꓻ ꓟ ꓕꓲ ꓡꓰꓹ ꓔꓬ ꓟ ꓟꓲ ꓠꓯ ꓕꓱ ꓟ ꓗꓪ ꓠꓬ ꓟꓲ ꓠꓯ ꓟꓽ ꓡꓳꓹ ꓬꓰ ꓕ ꓑꓳꓸ ꓕꓱ ꓟꓬ ꓫꓵꓽ ꓔꓯ ꓟꓳꓻ ꓪ꓾ ꓔꓳꓹ ꓜꓳꓽ ꓪˍ ꓟ ꓪꓴꓸ ꓠꓬꓲ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓬ ꓟꓽ ꓙꓲꓻ ꓟ ꓐꓰ ꓔꓳꓹ ꓜꓳꓽ ꓡˍ ꓕꓯ ꓟꓲ ꓠꓲꓹ ꓟ ꓕꓽ ꓙꓽ ꓫꓸ= ꓟꓲ ꓠꓯ ꓕꓱ ꓟ ꓠꓬ ꓟꓴꓽ ꓗꓪ ꓗꓴꓷꓼ ꓟꓽ ꓥ ꓢꓰꓽ= ꓟꓴꓽ ꓗꓪ ꓗꓴꓷꓼ ꓛꓲꓺ ꓡ ꓕꓯ ꓢꓲꓸ ꓡꓰꓽ ꓐꓲ ꓜꓲꓼˍ ꓟ ꓥ ꓡꓳ꓾ ꓐꓯ ꓟ ꓔꓯ ꓣꓳ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ=

ꓕꓱ ꓟˍ ꓡꓰ ꓐꓰ ꓟꓲ ꓠꓯ ꓕꓱ ꓟ ꓗꓪ ꓙꓲˍ ꓟ ꓐꓰ ꓟꓽ ꓙꓲꓻ ꓟ ꓕꓲ ꓡꓰꓹ ꓔꓬ ꓕꓯ ꓣꓳ ꓥˍ ꓟꓲ ꓙꓲꓻˍ ꓟ ꓥꓪꓸ ꓒꓬꓱꓼ ꓡ ꓠꓹ ꓟ ꓐꓱ ꓶ ꓙꓲˍ ꓟ ꓥꓪꓸ ꓔꓯ ꓢꓲꓺ ꓠꓹ ꓟ ꓬꓳꓸ ꓚꓵˍ ꓡꓳ= ꓛꓳꓽ ꓒꓯꓹ ꓛꓳꓽ ꓤ ꓢꓲˍ ꓕꓯ ꓥ ꓟꓲ ꓝꓮꓲ ꓣꓳ ꓬꓰˍ ꓟ꓾ ꓓꓵꓽ ꓙˍ ꓟ꓾ ꓛꓳ ꓫꓱꓽˍ ꓟ ꓮ ꓙꓵꓽ ꓠꓬ ꓙꓲꓻˍ ꓟ ꓥꓪꓸ ꓕꓲꓽ ꓟˍ ꓡꓰ ꓐꓰ ꓞꓳ ꓙꓳ ꓠꓹ ꓟ ꓠꓬ ꓮ ꓘꓶꓸ ꓬꓳꓸ ꓚꓵˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓙꓲˍ ꓟ ꓥꓪꓸ ꓕꓲꓽ ꓟˍ ꓡꓰ ꓐꓰ ꓮ ꓡꓲ ꓞꓳ ꓙꓳ ꓠꓯꓹ ꓡ? ꓣꓳ ꓠꓯꓼ ꓠꓯꓼ ꓗꓪ ꓔꓴ ꓡˍ ꓕꓯ ꓓꓵꓽ ꓙˍ ꓟ ꓓꓵꓽ ꓙꓽ ꓚꓱꓹ ꓮ ꓙꓵꓽ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓬꓲ ꓚꓰ ꓣꓴ ꓔ ꓢꓲ ꓮ ꓫꓵꓽ ꓗꓪˍ ꓟꓲ ꓪꓴ-ꓢ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓢꓲ ꓞꓳ ꓙꓳˍ ꓕꓯ ꓣꓳ ꓠꓬ ꓙꓲꓻˍ ꓟ ꓥꓪꓸ ꓒꓬꓱꓼ ꓡˍ ꓥꓳ= ꓟꓲ ꓠꓯ ꓕꓱ ꓟ ꓗꓪ ꓔꓬꓹ ꓕꓯ ꓡꓰ ꓣꓳꓽ ꓠꓬ ꓙꓲꓻˍ ꓟ ꓔꓯ ꓢꓲꓺ ꓣꓴ ꓐ ꓡˍ ꓡꓳ= ꓙꓲꓻˍ ꓟ ꓫꓸ ꓕꓱ ꓘꓶꓽ ꓔꓯ ꓣꓳ ꓢꓲꓺ ꓐ ꓡˍ ꓡꓳ= ꓙꓲꓻˍ ꓟ ꓓꓵꓽ ꓙ ꓚꓱꓹ ꓔꓯ ꓣꓳ ꓢꓲ ꓣꓴ ꓐ ꓡˍ ꓡꓳ=

ꓢꓲ ꓒ ꓬꓰ-ꓢꓴ ꓡꓰ ꓙꓲꓻˍ ꓟ ꓐꓰ ꓟꓽ ꓙꓲꓻ ꓟ ꓥꓪꓸ ꓐꓴ ꓔꓯ ꓟꓽ ꓘꓶꓽ ꓧꓶꓸ ꓕꓯ ꓡꓰ ꓣꓳ ꓚꓲꓸ ꓛꓬ ꓠꓬ ꓟꓽ ꓙꓲꓻ ꓟ ꓥꓪꓸ ꓟꓽ ꓬꓰ ꓬꓰ꓾ ꓙꓲꓻˍ ꓟ ꓥꓪꓸ ꓕꓲꓽ ꓟ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼ ꓔꓬꓹ ꓥꓳ ꓐꓯ ꓠꓬ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓮ ꓫꓵꓽ ꓙꓳꓺ ꓟꓽ ꓛꓵ= ꓣꓳ ꓐꓱ ꓶ ꓠꓬ ꓟꓴꓽ ꓗꓪ ꓗꓴꓷꓼ ꓥ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬꓹ ꓡꓳ=