ꓟꓴꓽ ꓗꓪ ꓗꓴꓷ ꓐꓰ ꓤꓽ ꓟꓶꓼ ꓚꓱˍ ꓟ ꓑꓮꓲꓽ ꓔꓯ ꓥꓳ:

ꓘꓴ ꓜꓲꓼ ꓞꓳ ꓟꓶꓽ ꓘꓳꓼ 28 ꓫꓵꓽ ꓠꓽ꓾ ꓠꓽ ꓦꓬ ꓠꓬꓲ ꓕꓯꓽ ꓵ ꓠꓹ ꓟ ꓢꓲ ꓫꓬ ꓕꓳ ꓶꓽ ꓝꓲꓸ

ꓬꓲ-ꓢ-ꓬ ꓕꓳꓽ ꓶ 25: 6- 10

ꓪꓼ ꓚꓲ ꓕꓱ ꓕꓲ ꓚꓲ ꓗꓪ ꓟꓯꓼ ꓜꓴ ꓐꓴ ꓬꓰ-ꓧꓳ-ꓧꓪ ꓡꓰ ꓑ ꓫꓬ ꓐꓴ ꓥ ꓕ ꓑꓳ ꓐꓱ ꓶ ꓙꓲ_ ꓟ ꓜ ꓓꓴ ꓕꓲ ꓜ ꓫꓳꓺ_ ꓥꓳ꓿ ꓛꓱ ꓡꓱ ꓙꓵꓻ ꓡꓵꓺ_ ꓐꓰ꓾ ꓬꓲ ꓪꓴꓽ ꓑꓲ ꓡꓰ ꓐꓲꓺ ꓞ_ ꓟ ꓮ ꓠꓬꓲꓽ ꓧꓪ_ ꓐꓰ ꓓꓰ ꓫꓬ ꓡꓰ_ ꓟ ꓛꓱ ꓡꓱ ꓙꓵꓻ ꓡꓵ ꓡꓰ ꓜ ꓕꓲ ꓜ ꓫꓳꓺ_ ꓥꓳ꓿ ꓪ ꓚꓲ ꓕꓱ ꓕꓲ ꓚꓲ ꓗꓪ ꓬꓰ-ꓧꓳ-ꓧꓪ ꓡꓰ ꓑ ꓫꓬ ꓐꓴ ꓥ ꓕ ꓑꓳ ꓒꓬꓱ ꓟꓬ ꓗꓪ ꓑꓲꓸ ꓞ_ ꓟ ꓑꓲꓸ ꓓꓴ ꓔꓯ ꓐꓬ ꓡꓰ ꓖꓴ ꓝꓲ_ ꓥꓳ꓿ ꓞꓳ ꓫꓵ ꓞꓳ ꓙꓰꓽ ꓐꓴ ꓕꓯ ꓢꓲ ꓗꓪ ꓘꓳꓹ ꓔ_ ꓟ ꓑꓲ ꓛꓺ ꓔꓯ_ ꓟꓲ ꓐꓬꓺ ꓡꓰ ꓖꓴ ꓝꓲ_ ꓥꓳ꓿ ꓬꓲ ꓡꓰ ꓕꓲ ꓞꓲ ꓕꓲ ꓑ ꓫꓵꓻ_ ꓟ ꓔꓯ ꓖꓴ ꓓꓵ ꓡꓰ_ ꓥꓳ꓿ ꓖꓳ ꓡꓱ ꓢꓲ ꓢꓲꓺ ꓒ ꓬꓰ-ꓧꓳ-ꓧꓪ ꓡꓰ ꓒꓬꓱꓽ ꓟꓬ ꓥ ꓕ ꓑꓳ ꓗꓪ ꓐꓰ ꓟꓬ ꓐꓰ ꓫꓵꓹ ꓖꓶ ꓗꓷ_ ꓥꓳ꓿ ꓬꓲ ꓑ ꓫꓬ ꓫ ꓔꓳ ꓫ ꓒꓯꓼ ꓟ ꓔꓯ ꓠꓬ ꓬꓲ ꓡꓰ ꓟꓵ ꓗꓳꓹ ꓓꓵ ꓓꓵ ꓗꓪ ꓐꓰ ꓣꓴ ꓦ ꓗꓷ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓰ-ꓧꓳ-ꓧꓪ ꓡꓰ ꓐꓯ ꓞꓷꓹ ꓗꓷꓳ꓿ ꓦꓬꓼ ꓠꓬꓲ ꓖꓳ ꓟ ꓗꓪ ꓕꓱ ꓡꓱ ꓐꓯ_ ꓥꓳ꓾ ꓠꓬꓲ ꓠꓹ꓾ ꓕꓱ ꓟ ꓠꓬ ꓣꓳ ꓪꓴ-ꓢ ꓥ ꓡꓳ꓿ ꓬꓲ ꓡꓰ ꓣꓳ ꓔꓯ ꓢꓯꓼ ꓟꓬ ꓝꓸ ꓖꓶ ꓠꓹ ꓟ꓾ ꓬꓲ ꓔꓯ ꓣꓳ ꓡꓳ ꓠꓬꓹ ꓗꓷꓳ꓿ ꓕꓱ ꓟ ꓠꓬ ꓬꓰ-ꓧꓳ-ꓧꓪ ꓥ ꓡꓳ꓿ ꓬꓲ ꓔꓯ ꓣꓳ ꓡꓳ ꓠꓬꓹ ꓗꓷꓳ꓿ ꓬꓲ ꓢꓯꓼ ꓟꓬ ꓝ_ ꓟ ꓣꓱ ꓛꓰ ꓠꓯꓸꓼ ꓗꓪ ꓣꓳ ꓠꓲꓹ ꓒꓴ ꓢꓲ ꓗ ꓛꓲ ꓡꓯ꓾ ꓐꓰ ꓐꓯ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓪ ꓚꓲ ꓕꓱ ꓕꓲ ꓚꓲ ꓗꓪ ꓬꓰ-ꓧꓳ-ꓧꓪ ꓬꓲ ꓡꓯ ꓒꓯ ꓚꓰꓹ ꓡ_ ꓥꓳ꓿ ꓛꓲꓸ ꓒ ꓑꓱꓺ ꓗꓪ ꓛꓱꓺ ꓑꓱꓸ ꓕꓳꓼ ꓔꓵ ꓗꓷ_ ꓟ_ ꓡꓰ ꓐꓰ ꓟꓳ-ꓮ-ꓐꓷ ꓔꓯ ꓠꓬ ꓬꓲ ꓔꓬ ꓖꓴ ꓗꓪ ꓕꓳꓼ ꓔꓵꓸ ꓗꓷ ꓪ ꓡꓰ_ ꓥꓳ꓿

ꓒꓲ-ꓡꓲ-ꓒꓲ 4ꓽ 12-14ꓹ 19-20

ꓣꓱꓽ ꓟꓽ ꓡꓳꓼ ꓟ ꓗꓪ ꓮ ꓡꓲ ꓞꓳ ꓙꓳ ꓠꓹ ꓟ ꓐꓰ꓾ ꓣꓱꓽ ꓖꓴ ꓟꓽ ꓓ ꓟ ꓗꓪ ꓮ ꓡꓲ ꓐꓰ ꓞꓳ ꓙꓳ ꓠꓹ ꓟ ꓥꓪ ꓢꓷꓸ ꓡꓰꓳ꓿ ꓐꓳ ꓡ ꓥ ꓟꓲ꓾ ꓟꓷꓼ ꓡ ꓥ ꓟꓲ꓾ ꓮꓽ ꓟꓬꓹ ꓙꓳˍ ꓟꓲ꓾ ꓣꓱꓽ ꓟꓽ ꓡꓳꓼˍ ꓟꓲ꓾ ꓮ ꓡꓲ ꓗꓷ ꓡꓰˍ ꓟꓲ꓾ ꓮꓸ ꓫꓵ ꓗꓪˍ ꓟꓲ꓾ ꓮ ꓡꓲ ꓐꓰ ꓞꓳ ꓙꓳ ꓠꓹ ꓟ ꓚꓵ ꓘꓶꓽ ꓕꓱ ꓟ ꓥꓪ ꓢꓳ ꓟꓶ ꓡꓰꓳ꓿ꓥꓪ ꓔꓯ ꓢꓯꓼ ꓧꓳꓽ ꓖꓶ ꓡ ꓢꓴ ꓬꓲ ꓗꓪ ꓐꓰ ꓮꓸ ꓫꓵˍ ꓟꓲ ꓥꓪ ꓬꓰ ꓐ ꓡ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓫꓸ ꓙꓵꓻˍ ꓟ ꓗꓪ ꓠꓴ ꓪꓽ ꓑꓯꓹ ꓡꓯꓽ ꓘꓳˍ ꓟ ꓕꓱ ꓟ ꓠꓬ꓾ ꓠꓴ ꓪꓽ ꓙꓲꓻˍ ꓟ ꓬꓰˍ ꓟ ꓥ ꓡꓳ꓿ ꓥꓪ ꓪꓴ-ꓢ ꓠꓽ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ꓾ ꓬꓲ ꓐꓬꓱꓼ ꓡꓱꓼ ꓡꓱˍ ꓟ ꓒꓵꓽ ꓶ ꓐꓳ ꓞꓹ ꓟ ꓔꓯ ꓛꓳ ꓢꓲ꓾ ꓠꓴ ꓪꓽ ꓣꓱꓽ ꓬꓯꓼ ꓟ ꓥ ꓕ ꓑꓳꓸ ꓖꓶ ꓐꓲ ꓡ ꓝꓲˍ ꓥꓳ꓿ ꓣꓳꓽ ꓐꓹ ꓐ ꓪꓴ-ꓢ ꓔꓯ ꓕꓲ ꓞꓲꓼ ꓕꓲ ꓑ ꓟꓬꓱ ꓓꓳꓽ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿

ꓟ-ꓕꓲ 22ꓽ 1- 14

ꓬꓰ-ꓢꓴ ꓠꓬ ꓝꓮꓲ ꓔꓯ ꓥꓳꓽ ꓣꓱꓽ ꓢꓲ ꓬꓲ ꓪꓽ ꓔꓯ ꓕꓱ ꓡꓱ ꓐꓯˍ ꓡꓳ꓿ꓟꓴꓽ ꓗꓪ ꓗꓴꓷꓼ ꓠꓬ꓾ ꓪ ꓔꓲ ꓕꓲ ꓣꓳ ꓡꓰ ꓬꓲ ꓤ ꓐꓱ ꓶ ꓤꓽ ꓟꓶ ꓚꓱꓺˍ ꓟ ꓑꓮꓲ ꓕꓲ ꓟ ꓬꓰˍ ꓟ ꓡꓰ ꓐꓰ ꓗꓹ ꓡꓳ꓿ꓤꓽ ꓟꓶ ꓚꓱꓺˍ ꓟ ꓑꓮꓲ ꓗꓪ ꓘꓴ ꓔ ꓢꓴ ꓔꓯ ꓘꓴꓻ ꓬꓰ ꓠꓹ ꓟ꓾ ꓬꓲ ꓚꓳ ꓑꓸ ꓐꓴ ꓔꓯ ꓝꓲ ꓩꓴ ꓗꓷ ꓠꓬ꓾ ꓘꓴ ꓔ ꓢꓴ ꓠꓽ ꓡꓻ ꓠꓲꓹ ꓟꓽ ꓫꓵ꓿ꓖꓳ ꓕꓯ ꓪ ꓔꓲ ꓠꓬ ꓚꓳ ꓑꓸ ꓬꓲ ꓔꓱꓹ ꓬꓲ ꓕꓲ ꓧꓳꓽ ꓔꓯ ꓝꓲ ꓩꓴ ꓗꓷ ꓢꓲ꓾ ꓠꓴ ꓪꓽ ꓠꓬ ꓘꓴꓻ ꓔ ꓢꓴ ꓐꓴ ꓔꓯ꓾ ꓥꓪ ꓑꓮꓲ ꓙꓽ ꓖꓶ ꓓꓳ ꓡꓰꓳ꓿ ꓥꓪ ꓮꓸ ꓠꓬꓲꓽˍ ꓐꓰ ꓞꓶˍ ꓟ ꓙꓱꓽ ꓤˍ ꓟꓲ ꓢꓰꓼ ꓗꓷꓳ꓿ ꓮꓸ ꓫꓵˍ ꓟꓲ ꓙꓽ ꓖꓶ ꓖꓴ ꓡꓰꓳ꓿ ꓠꓴ ꓪꓽ ꓠꓬ ꓤꓽ ꓟꓶ ꓚꓱꓺˍ ꓟ ꓑꓮꓲ ꓗꓪ ꓡꓯ꓾ ꓐꓰ ꓐꓯ ꓖꓶ ꓬꓰ꓾ ꓐꓯˍ ꓡꓳ꓿ꓖꓳ ꓡꓱ ꓥ ꓟꓲ ꓘꓴꓻ ꓔ ꓢꓴ ꓐꓴ ꓠꓽ ꓟꓽ ꓒꓵꓽ ꓢꓲ꓾ ꓟꓲ ꓚꓱꓹ ꓗꓪ ꓟꓲ ꓙꓰˍ ꓡꓳ꓿ ꓕꓲ ꓣꓳ ꓠꓬ ꓚꓲꓸ ꓛꓬ ꓦ ꓟꓲ ꓗꓪ ꓙꓰˍ ꓡꓳ꓿ ꓕꓲ ꓣꓳ ꓠꓬ ꓶꓻ ꓡꓯꓼ ꓟꓴ ꓙꓰˍ ꓡꓳ꓿ꓜꓰꓻ ꓡꓰ ꓢꓴ ꓐꓴ ꓠꓬ ꓚꓳ ꓑꓸ ꓐꓴ ꓔꓯ ꓣꓴ ꓢꓲ꓾ ꓫꓸ ꓔꓳ ꓫ ꓒꓯꓼ ꓬꓰ ꓖꓶ ꓢꓲ ꓠꓬꓲ ꓬꓲ ꓪꓽ ꓔꓯ ꓢꓰꓼ ꓗꓷˍ ꓡꓳ꓿ꓖꓳ ꓕꓯ ꓪ ꓔꓲ ꓠꓽ ꓠꓲꓹ ꓟ ꓦꓶꓻ ꓠꓬꓲ꓾ ꓟꓯꓼ ꓜꓴ ꓝꓲ ꓩꓴ ꓗꓷ ꓢꓲ꓾ ꓖꓳ ꓕꓲ ꓧꓳꓽ ꓟ ꓔꓯ ꓛꓴ ꓛꓰꓹ ꓡꓰ ꓝꓲ ꓢꓲ ꓠꓬꓲ꓾ ꓬꓲ ꓪꓽ ꓡꓳ ꓒꓱ ꓔꓯˍ ꓟꓲ ꓛꓴꓻ ꓗꓷꓳ꓿ꓖꓳ ꓕꓯ ꓪ ꓔꓲ ꓡꓰ ꓬꓲ ꓚꓳ ꓑꓸ ꓐꓴ ꓔꓯ꓾ ꓤꓽ ꓟꓶ ꓚꓱꓺˍ ꓟ ꓑꓮꓲ ꓠꓬ ꓙꓽ ꓖꓶ ꓓꓳ ꓡꓰꓳ꓾ ꓖꓳ ꓡꓱ ꓥ ꓟꓲ ꓥꓪ ꓡꓰ ꓘꓴ ꓔ ꓢꓴ ꓐꓴ ꓠꓽ ꓜꓽ ꓡ ꓟꓽ ꓒꓵꓽ꓿ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓙꓰ ꓢꓲ꓾ ꓙ ꓖꓴ ꓙ ꓐꓽ ꓗꓪ ꓔꓳꓹ ꓜꓳꓽˍ ꓟ ꓡ ꓞꓳ ꓥ ꓕ ꓑꓳꓸ ꓔꓯ ꓤꓽ ꓟꓶ ꓚꓱꓺˍ ꓟ ꓑꓮꓲꓽ ꓗꓪ ꓘꓴꓻ ꓔꓯꓹ ꓡꓯ꓾ ꓐꓯˍ ꓡꓳ꓿ꓚꓳ ꓑꓸ ꓖꓳ ꓕꓲ ꓧꓳꓽ ꓠꓬ ꓓꓳ ꓙꓰ ꓢꓲ꓾ ꓔꓳꓹ ꓜꓳꓽˍ ꓟ ꓡ ꓞꓳ ꓥ ꓕ ꓑꓳ꓾ ꓞꓳ ꓥꓶꓺˍ ꓐꓰ ꓞꓳ ꓙꓲꓻ ꓮꓽ ꓙꓵ ꓔꓯ ꓘꓴ ꓜꓲꓼ ꓡ ꓠꓬ꓾ ꓑꓮꓲ ꓬꓰ ꓖꓴ ꓗꓪ ꓪꓰ ꓤ ꓐꓲꓺ ꓡꓰꓳ꓿ꓪ ꓔꓲ ꓓꓵꓽ ꓡ ꓢꓲ ꓪꓰ ꓤ ꓔꓯ ꓡꓳꓸ ꓠꓬꓲ ꓠꓬ꓾ ꓖꓳ ꓗꓪ ꓑꓮꓲ ꓐꓵ ꓞꓶꓽ ꓟꓽ ꓖꓪꓽ ꓔ ꓟ ꓡ ꓞꓳ ꓕꓲ ꓣꓳ ꓔꓯ ꓟꓳꓻˍ ꓡꓳ꓿ꓪ ꓔꓲ ꓡꓰ ꓬꓲ ꓔꓯ꓾ ꓗꓪ ꓛꓳꓽꓳ꓾ ꓠꓴ ꓠꓬ ꓑꓮꓲ ꓐꓵ ꓞꓶꓽ ꓟꓽ ꓖꓪꓽ ꓖꓪ ꓕꓱ ꓗꓪ ꓮ ꓡꓲ ꓓꓵꓽ ꓡ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓬꓲ ꓠꓬ ꓫꓸ ꓕꓱ ꓟꓽ ꓐꓰꓼ ꓡ ꓡ ꓒꓳꓹ ꓖꓶ ꓓꓴ ꓟꓽ ꓙꓳ ꓗꓷ ꓡꓰꓳ꓿ꓖꓳ ꓕꓯ ꓪ ꓔꓲ ꓠꓬ ꓬꓲ ꓔꓯ ꓣꓱꓽ ꓙ ꓢꓴ ꓐꓴ ꓔꓯ ꓝꓲ ꓢꓲ꓾ ꓬꓲ ꓔꓯ ꓛꓲ ꓛꓵꓼ ꓡꓯꓼ ꓛꓵꓼ ꓢꓲ ꓠꓬꓲ꓾ ꓠꓱ ꓫꓱꓸ ꓟꓸꓼ ꓠꓯ ꓞꓲꓹ ꓟ ꓗꓪ ꓡꓳ ꓩꓴ ꓗꓷ꓿ ꓖꓳ ꓗꓪ ꓥꓴꓻ ꓠꓬꓲ ꓢꓶꓽ ꓛꓲꓽ ꓠꓬꓲ ꓗꓷ ꓡꓰˍ ꓥꓳ꓿ꓮ ꓡꓲꓳ ꓐꓯ ꓠꓬ ꓘꓴꓻ ꓔ ꓢꓴ ꓠꓬ ꓟꓬꓽˍ ꓟꓲ꓾ ꓢꓲꓺ ꓔ ꓢꓴ ꓠꓽ ꓠꓲꓸˍ ꓡꓳ꓾ ꓐꓯˍ ꓡꓳ꓿