ꓟꓴ ꓗꓪ ꓝꓲ ꓓꓴ 3 ꓣꓳ ꓑꓮꓲ

ꓮ ꓙꓵꓽ ꓢꓴ ꓧꓪꓸ ꓧꓪ꓾ꓠꓬꓲꓸ ꓠꓬꓲ ꓠꓬ ꓟꓴ ꓗꓪ ꓝꓲ ꓓꓴ ꓐꓴ ꓘꓴꓽ ꓗꓪ ꓟꓴ  ꓗꓪ ꓝꓲ ꓓꓴ ꓓ ꓟ ꓥˍꓟ  Michael Raphael ꓐꓰ Gabriel ꓐꓯ ꓟ ꓬꓲꓸ ꓪ 3 ꓣꓳ ꓑꓮꓲ ꓔꓯ ꓣꓳ ꓬꓰ ꓔꓬ ꓡꓳ= ꓟꓴ ꓗꓪ ꓝꓲ ꓓꓴ ꓠꓬ ꓪꓴ-ꓢ ꓝꓲ ꓓꓴ ꓥ ꓡꓳ꓾ ꓪꓴ-ꓢ ꓬꓲꓸ ꓠꓲꓹ ꓡꓲ ꓙꓳ ꓟ ꓡꓰ ꓐꓰ ꓝꓲ ꓟ ꓬꓲꓸ ꓝꓲ ꓓꓴ ꓥˍ ꓡꓳ= ꓟꓴ ꓗꓪ ꓝꓲ ꓓꓴ ꓮ ꓟꓬꓹ ꓙꓳ ꓟ ꓘꓴꓽ ꓗꓪ ꓕꓱ 3 ꓣꓳ ꓟ ꓠꓬ ꓟꓽ ꓓ ꓪꓴ ꓓꓰ ꓡꓰˍ ꓟ ꓥ ꓡꓳ= ꓟꓴ ꓗꓪ ꓝꓲ ꓓꓴ Michael ꓐꓯ ꓟ ꓠꓬ ꓬꓲꓸ ꓠꓬ ꓠꓲꓽ ꓢ-ꓓꓯꓼ ꓔꓯ ꓢꓰꓼ ꓢꓴ ꓠꓲꓽ ꓢ- ꓓꓯꓼ ꓔꓯ ꓧꓪ ꓡꓰ ꓢꓴ ꓥˍ ꓡꓳ= ꓪꓴ-ꓢ ꓔꓯ ꓮ ꓟ ꓕꓯ ꓑ ꓡ ꓢꓶ ꓐꓰ ꓐꓯ ꓢꓲ꓾ ꓠꓬꓲ ꓠꓲꓽ ꓢ-ꓓꓯꓼ ꓔꓯ ꓓꓰꓸꓸ ꓧꓪꓼ ꓡꓰ ꓟ ꓠꓬ ꓟꓴꓽ ꓗꓪ ꓝꓲ ꓓꓴ ꓓ ꓟ ꓕꓲ ꓣꓳ ꓥ ꓟ Michael ꓥ ꓡꓳ= ꓝꓮꓲ ꓟꓴꓽ ꓗꓪ ꓝꓲ ꓓꓴ Gabriel ꓐꓯ ꓟ ꓠꓬ ꓬꓲꓸ ꓠꓬ ꓶꓽ ꓓꓳꓽ ꓫꓱꓹ ꓓꓳꓽ ꓙꓲˍ ꓟ ꓓꓳꓽ ꓔꓯ ꓖꓶ ꓢꓴ ꓥ ꓡꓳ= ꓪꓴ-ꓢ ꓬꓲꓸ ꓐꓯ ꓠꓲꓹ ꓫꓵꓼˍꓟ ꓮ ꓙꓵꓽ ꓔꓯ ꓟꓴ ꓗꓪ ꓝꓲ ꓓꓴ ꓕꓱ ꓕꓲ ꓣꓳ Gabriel ꓔꓯ ꓪꓴ-ꓢ ꓠꓬ ꓣꓱꓽ ꓡꓳ= ꓕꓱ ꓟ ꓡꓰ ꓐꓰ ꓢꓲ ꓫꓬ ꓟ-ꓡꓲ-ꓬ ꓔꓯ ꓟꓴ ꓗꓪ ꓝꓲ ꓓꓴ ꓶꓼ ꓓꓳꓽ ꓫꓱꓹ ꓓꓳꓽ ꓐꓯ ꓟꓳꓸ ꓖꓶ ꓡ ꓕꓯ ꓬꓲꓸ ꓚꓲꓽ ꓛꓬ ꓡꓰ ꓡ ꓟ ꓥ ꓡꓳ= 
ꓝꓮꓲ ꓕꓲ ꓣꓳ ꓟ ꓠꓬ Raphael ꓥ ꓡꓳ= Raphael ꓠꓬ ꓣꓳ ꓔꓯ ꓙ ꓖꓴ ꓟꓸ ꓖꓶ ꓢꓴ ꓠꓯꓸꓸ ꓞꓲꓼ ꓫꓬ ꓖꓶ ꓢꓴ ꓥ ꓡꓳ= ꓖꓳ ꓡꓰ ꓠꓬꓲ ꓟꓴ ꓗꓪ ꓝꓲ ꓓꓴ ꓐꓰ ꓞꓳ ꓤ ꓠꓬ ꓕꓱ ꓡꓱ ꓐꓰ ꓕꓲ ꓡꓲ ꓟꓬꓱꓽ ꓬꓰ ꓢꓲ꓾ ꓠꓬꓲ ꓞꓳ ꓤ ꓐꓴ ꓚꓵꓸꓸ ꓟꓶ ꓠꓹ ꓟ ꓐꓱ ꓶ ꓟꓴ ꓗꓪ ꓝꓲ ꓓꓴ ꓐꓴ ꓠꓬ ꓬꓰ ꓙ ꓟ ꓥ ꓡꓳ= ꓠꓬꓲꓸ ꓠꓬꓲ ꓣꓳ ꓑꓮꓲ ꓕꓱ ꓡꓱ ꓬꓰ ꓟ ꓗꓪ ꓐꓰ ꓣꓳ ꓔꓯ ꓠꓲꓹ ꓙ ꓡꓳꓸ ꓙ ꓔꓬ ꓟ ꓟꓴ ꓗꓪ ꓝꓲ ꓓꓴ ꓐꓴ ꓔꓯ ꓫꓸ ꓟꓳ ꓟ ꓐꓰ ꓙ ꓣꓳꓸꓹ ꓟ ꓡꓰ ꓬꓲꓸ ꓪ ꓙ ꓖꓴ ꓟꓳꓸ ꓖꓶ ꓟ ꓔꓯ ꓘꓴꓽ ꓣꓴ ꓠꓹ ꓟ ꓬꓰ ꓔꓬ ꓟ ꓥ ꓡꓳ= ꓪꓴ-ꓢ ꓠꓬ ꓙꓲˍ ꓡꓳ= ꓪꓴ-ꓢ ꓠꓬ ꓮ ꓫꓵꓽ ꓟꓲ ꓬꓰ ꓑ ꓡ ꓢꓴ ꓥ ꓡꓳ= ꓖꓳ ꓡꓰ ꓐꓯ ꓥ ꓟꓲ ꓬꓲꓸ ꓠꓬ ꓣꓳ ꓔꓯ ꓡꓳꓸ ꓠꓹ ꓟ ꓐꓱ ꓶ ꓣꓳ ꓔꓯ ꓠꓬꓲ ꓙ ꓠꓹ ꓟ ꓐꓱ ꓶ ꓟꓴ ꓗꓪ ꓝꓲ ꓓꓴ ꓔꓯ ꓕꓱ ꓡꓱ ꓐꓰ ꓣꓳ ꓐꓱ ꓶ ꓬꓲꓸ ꓚꓱꓼꓔ ꓖꓶ ꓟ ꓥ ꓡꓳ= ꓬꓲ ꓤ ꓠꓬꓲ ꓤ ꓐꓴ ꓣꓳ ꓠꓲꓽ ꓢ- ꓓꓯꓼ ꓤ ꓠꓬꓲ ꓫꓵ ꓠꓬꓲ ꓟ ꓔꓳꓼ ꓜꓳꓼ ꓕꓯ ꓟꓴ ꓗꓪ ꓝꓲ ꓓꓴ Michael ꓔꓯ ꓮ ꓕꓯ ꓟꓲ ꓓꓵ ꓙ ꓔꓽ ꓬꓲꓸ ꓠꓬ ꓠꓲꓽ ꓢ- ꓓꓯꓼ ꓔꓯ ꓧꓪ ꓡꓰ ꓢꓴ ꓥ ꓟ ꓑꓶꓸ ꓓꓴ ꓬꓲ ꓟꓬꓱꓽ ꓔꓯ ꓘꓴꓼ ꓓꓰ ꓖ ꓡꓰ ꓠꓲꓽ ꓠꓬ ꓙꓴ ꓡꓰ ꓟ ꓥ ꓡꓳ= 
ꓝꓮꓲ ꓟꓲ ꓠꓯ ꓕꓱ ꓟ ꓗꓪ ꓓꓳꓽ ꓫꓵ ꓓꓳꓽ ꓙꓰ ꓮ ꓙꓵ ꓠꓬ ꓣꓳ ꓔꓯ ꓠꓲꓹ ꓟ ꓫꓸ ꓝꓲ ꓟ ꓠꓲꓹ ꓟ ꓟ ꓗꓸ ꓛꓲ ꓝꓲ ꓟ ꓡꓰ ꓟꓳ ꓡꓳ= ꓖꓳ ꓡꓰ ꓠꓬꓲ ꓶꓼ ꓓꓳꓽ ꓫꓱꓼ ꓓꓳꓽ ꓕꓯ ꓖꓶ ꓡ ꓟ Gabriel ꓔꓯ ꓥ ꓟꓲ ꓣꓳ ꓪꓽ ꓘꓴ ꓠꓹ ꓗꓹ ꓡꓳ= ꓬꓲꓸ ꓠꓯꓹꓼ ꓗꓪ ꓠꓬ ꓙꓲˍ ꓟ ꓶꓼ ꓓꓳꓽ ꓫꓱꓹ ꓓꓳꓽ ꓙꓳ ꓡꓳ= ꓝꓮꓲ ꓣꓳ ꓙ ꓖꓴ ꓟꓽ ꓥꓳ ꓡꓰ ꓠꓹ ꓟ ꓟꓴ ꓗꓪ ꓝꓲ ꓓꓴ Raphael ꓔꓯ ꓪꓽ ꓘꓴ ꓠꓹ ꓗꓹ ꓡꓳ= ꓣꓳ ꓠꓹ ꓡ ꓑꓬ ꓡ ꓕꓯ ꓣꓳ ꓙꓰ ꓟ ꓖꓴꓸ ꓕꓯ ꓬꓲꓸ ꓔꓯ ꓪꓽ ꓘꓴ ꓢꓲ꓾ ꓠꓬꓲ ꓢꓯꓼ ꓕꓵꓼ ꓠꓹ ꓗꓹ ꓡꓳ= ꓣꓳ ꓕꓱ ꓡꓱ ꓟꓴ ꓗꓪ ꓝꓲ ꓓꓴ ꓔꓯ ꓪꓽ ꓘꓴ ꓐꓯ ꓟ ꓠꓬ ꓪꓴ-ꓢ ꓡꓰ ꓠꓲꓹ ꓫꓵꓽ ꓟ ꓥ ꓡꓳ= ꓮ ꓫꓵꓽ ꓑꓶꓸ ꓓꓴ ꓥ ꓐꓯ ꓠꓬ ꓪꓴ-ꓢ ꓠꓬ ꓬꓲ ꓟꓬꓱꓽ ꓓꓳꓽ ꓓꓳꓸ ꓠꓹ ꓟ ꓐꓱ ꓶ ꓮ ꓫꓵꓽ ꓔꓯ ꓥˍ ꓟꓲ ꓬꓲ ꓣꓱꓽ ꓑ ꓡ ꓡꓳ= ꓖꓳ ꓡꓰ ꓠꓬꓲ ꓬꓲ ꓤ ꓠꓬꓲ ꓤ ꓐꓴ ꓠꓬꓲꓸ ꓠꓬꓲ ꓟꓴ ꓗꓪ ꓝꓲ ꓓꓴ ꓓ ꓟ 3 ꓣꓳ ꓑꓮꓲ ꓔꓯ ꓣꓳ ꓬꓰ ꓔꓬ ꓟ ꓗꓪ ꓐꓰ ꓣꓳ ꓤꓶꓸꓹ ꓗꓪ ꓠꓲꓽ ꓢ- ꓓꓯꓼ ꓤ ꓠꓬꓲ ꓫꓵꓽ ꓠꓬꓲ ꓟ ꓗꓪ ꓐꓰ ꓖꓳꓸꓸ ꓙꓰ ꓢꓲ꓾ ꓠꓬꓲ ꓙꓲˍ ꓟ ꓬꓰ ꓑ ꓡ ꓠꓹ ꓟ ꓐꓱ ꓶ ꓟꓴ ꓝꓲ ꓓꓴ ꓔꓯ ꓪꓽ ꓘꓴ ꓶ ꓓꓰ ꓙꓰ ꓡꓯ ꓐꓰ ꓮ ꓙꓵꓽ ꓢꓴ ꓔꓯ ꓢꓯꓼ ꓖꓶ ꓩꓴ ꓡ ꓥꓳ ꓫꓸ ꓟꓳ=