ꓟꓶꓽ ꓛꓵꓽ ꓟ ꓤ ꓔꓲꓸ ꓔꓯ ꓢꓯꓸ ꓬꓲꓼ ꓡ ꓝꓲˍ ꓟ

ꓮ ꓠꓱ ꓟꓵꓽ ꓚꓰꓼ ꓟꓲ ꓚꓰꓼ ꓕꓯ ꓡꓰ꓾ ꓡ ꓞꓳ ꓕꓲ ꓣꓳ ꓢꓴ ꓔꓯ ꓫꓵꓻˍ ꓟ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ= ꓬꓲ ꓚꓲꓸ ꓛꓬ ꓥˍ ꓟꓲ ꓫꓵꓻ ꓗꓪ ꓐꓰ ꓢꓯꓸ ꓡ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ= ꓖꓳ ꓡꓱ ꓐꓯ ꓥ ꓟꓲ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓡꓴ-ꓘ 7ꓽ11-17 ꓗꓪ ꓕꓲ ꓣꓳˍ ꓡꓰꓽ ꓙꓳˍ ꓟ ꓟꓶꓽ ꓛꓵꓽ ꓟ ꓤ ꓔꓲꓸ ꓔꓯ ꓢꓯꓸ ꓬꓲꓼ ꓡ ꓝꓲˍ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓣꓳ ꓑ ꓙꓽ ꓪˍ ꓡꓳ=

ꓢꓲ ꓒ ꓬꓰ-ꓢꓴ ꓠꓬ ꓡ ꓞꓳ ꓮ ꓡꓲ ꓕꓲ ꓣꓳˍ ꓟꓲ ꓟꓽ ꓓꓵꓽ ꓙꓽ ꓠꓬꓲ ꓗꓳꓸ ꓟ꓾ ꓕꓲ ꓧꓪꓹˍ ꓟꓲ ꓟꓽ ꓙꓳ ꓗꓳꓸ ꓗꓷ ꓟ ꓔꓯ ꓬꓲ ꓡꓰ ꓬꓰ ꓗꓷꓳ= ꓢꓲ ꓒ ꓬꓰ-ꓢꓴ ꓠꓬ ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲ ꓐ ꓡˍ ꓟ ꓙꓵꓽ ꓪ ꓬꓲ ꓔꓯ ꓙꓳˍ ꓡꓳ꓾ ꓐꓯ ꓟ ꓣꓳ ꓔꓯ ꓟꓳꓸ ꓖꓶ ꓡˍ ꓡꓳ=

ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓟꓶꓽ ꓛꓵꓽ ꓟ ꓤ ꓔꓲꓸ ꓔꓯ ꓢꓯꓸ ꓬꓲꓼ ꓡ ꓝꓲˍ ꓟ ꓠꓬ꓾ ꓬꓲ ꓠꓬ ꓫꓵꓻ ꓢꓴ ꓪꓴ-ꓢˍ ꓟꓲ ꓥꓳ꓾ ꓢꓯꓸ ꓔꓬ ꓢꓴ ꓪꓴ-ꓢˍ ꓟꓲ ꓥꓳ= ꓪꓴ-ꓢ ꓠꓬ ꓬꓲ ꓔꓯ ꓙꓵꓽ ꓪ ꓖꓶ ꓔ ꓡꓳ ꓐꓯ ꓟ ꓣꓳ ꓔꓯ ꓢꓷꓸ ꓡꓰ ꓝꓲˍ ꓟ ꓥ ꓡꓳ= ꓬꓲ ꓠꓬ ꓪꓴ-ꓢ ꓚꓵ ꓥ ꓡꓳ=

Divine Revelation ꓐꓯ ꓟ꓾ ꓢꓲ ꓒ ꓬꓰ-ꓢꓴ ꓠꓬ ꓪꓴ-ꓢ ꓥ ꓡꓳ ꓐꓯ ꓟ ꓔꓯ ꓟꓳꓸ ꓖꓶ ꓠꓹ ꓟ ꓠꓬꓲꓸ ꓠꓬꓲ ꓬꓲ ꓠꓬ ꓣꓳ ꓔꓯ ꓢꓷꓸ ꓡꓰ ꓓꓴ ꓕꓲ ꓫꓵꓽ ꓕꓲ ꓟ ꓣꓳ ꓔꓯ ꓬꓰ ꓖꓶ ꓡˍ ꓡꓳ= ꓮ ꓫꓵꓽ ꓑꓶꓸ ꓓꓴ ꓥ ꓡ ꓐꓯ ꓠꓬ꓾ ꓫꓵꓻˍ ꓟ ꓐꓰ ꓢꓯꓸ ꓔꓬ ꓟ ꓠꓬ ꓪꓴ-ꓢ ꓡꓯꓽ ꓒꓯꓹ ꓗꓪ ꓡꓰꓽ ꓓꓹˍ ꓡꓳ= ꓡ ꓞꓳ ꓕꓲ ꓣꓳ ꓢꓯꓸ ꓔꓬ ꓟ꓾ ꓫꓵꓻˍ ꓟ ꓮ ꓙꓵꓽ ꓠꓬ ꓢꓲ ꓒ ꓡꓯꓽ ꓒꓯꓹ ꓗꓪ ꓡꓰꓽ ꓓꓹˍ ꓡꓳ꓾ ꓐꓯ ꓟ ꓣꓳ ꓔꓯ ꓟꓳꓸ ꓖꓶ ꓡˍ ꓡꓳ=

ꓠꓬꓲꓸ ꓠꓬꓲ ꓠꓴꓻ ꓥꓪ ꓮ ꓙꓵꓽ ꓠꓬ ꓕꓲ ꓠꓬꓲ ꓙꓳˍ ꓕꓯ ꓫꓵꓻ ꓪˍ ꓥꓳ= ꓖꓳ ꓡꓱ ꓐꓯ ꓥ ꓟꓲ ꓣꓳ ꓫꓵꓻˍ ꓥˍ ꓟꓲ꓾ ꓢꓯꓸ ꓔꓬ ꓥ ꓟꓲ ꓣꓳ ꓠꓬ ꓪꓴ-ꓢ ꓤ ꓠꓱ ꓥ ꓡꓳ= ꓝꓮꓲ ꓕꓲ ꓚꓱꓹ ꓐꓯ ꓠꓬ꓾ ꓪꓴ-ꓢ ꓠꓬ ꓫꓵꓻ ꓢꓴ꓾ ꓢꓯꓸ ꓔꓬ ꓢꓴ ꓮ ꓙꓵꓽ ꓟ ꓪꓴ-ꓢ ꓥ ꓟ ꓑꓶꓸ ꓓꓴ ꓣꓳ ꓠꓬ ꓮ ꓫꓵꓽ ꓙꓳꓺ ꓛꓱꓽ ꓓꓴ ꓟꓽ ꓙꓳ= ꓣꓳ ꓫꓵꓻ ꓥ ꓟꓲ ꓬꓲ ꓐꓰ ꓕꓲ ꓡꓰꓹ ꓔꓬ ꓪˍ ꓥꓳ= ꓢꓯꓸ ꓔꓬ ꓥˍ ꓟꓲ ꓬꓲ ꓐꓰ ꓕꓲ ꓡꓰꓹꓼ ꓔꓬ ꓪˍ ꓥꓳ=

ꓖꓳ ꓡꓱ ꓠꓬꓲꓼ ꓤ ꓠꓬ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓚꓲꓸ ꓛꓬ ꓥˍ ꓟꓲ ꓫꓵꓻ ꓟ ꓔꓯ ꓧꓪꓸ ꓡꓰ ꓟ ꓡꓰ ꓐꓰ꓾ ꓠꓱꓸ ꓐꓯ ꓢꓴ ꓔꓯ ꓥˍ ꓟꓲ ꓢꓯꓸ ꓬꓲꓼ ꓡ ꓝꓲ ꓐ ꓡˍ ꓡꓳ= ꓕꓱ ꓟ ꓠꓬ ꓪꓴ-ꓢ ꓠꓬ ꓮ ꓫꓵꓽˍ ꓟꓲ ꓬꓰ ꓐ ꓡˍ ꓟ ꓪꓽ ꓠꓬꓲˍ ꓟ ꓣꓳ ꓔꓯ ꓟꓳꓸ ꓖꓶ ꓡ ꓔꓬ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓣꓳ ꓶꓼ ꓓꓰꓽ ꓡꓯ= ꓣꓳ ꓠꓲꓹ ꓟ ꓠꓯꓸꓼ ꓗꓪ ꓣꓳ ꓔꓯ ꓫꓵꓻ ꓡꓰ ꓝꓲˍ ꓟ ꓝꓴꓲꓸ ꓪꓽ ꓒꓵꓽ ꓚꓵ ꓠꓬ ꓫꓵꓻ ꓓꓴꓽ ꓥꓳ ꓐꓯ ꓟ꓾ ꓙꓲꓻ ꓫꓬ ꓢꓴ ꓒꓳ-ꓡꓳ ꓡꓰ ꓐꓳ ꓔ ꓟ ꓡꓰ ꓐꓰ ꓣꓳ ꓝꓴꓲꓸ ꓬꓰˍ ꓕꓯ ꓕꓲ ꓠꓬꓲ ꓕꓲ ꓠꓬꓲ ꓫꓵꓻ ꓡꓰ ꓔꓬ ꓡꓳ= ꓦꓻ ꓠꓬ ꓫꓵꓻ ꓡꓰ ꓔꓬ ꓡꓳ ꓐꓯ ꓟ ꓔꓯ ꓙꓽ ꓜꓲꓼ ꓠ ꓗꓹ ꓡꓳ= ꓮ ꓡꓲꓳ ꓐꓯ ꓠꓬ꓾ ꓣꓳ ꓝꓴꓲꓸ ꓬꓰˍ ꓕꓯ ꓟꓽ ꓥ ꓟ ꓚꓱꓹ ꓗꓪ ꓙꓰˍ ꓕꓯ꓾ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓠꓬ ꓫꓵꓻ ꓓꓴꓽ ꓔꓯ ꓟꓳꓸ ꓙ ꓫꓱꓽ ꓔꓬ ꓡꓳ ꓐꓯ ꓟ ꓙꓵꓻ ꓢꓲ ꓠꓬꓲ꓾ ꓕꓱ ꓟ ꓔꓯ ꓢꓷꓸ ꓔ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓠꓬꓲꓸ ꓠꓬꓲ ꓣꓳ ꓶꓼ ꓓꓰꓽ ꓙꓰ ꓡꓯ=

ꓢꓲ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓫꓵꓻˍ ꓟ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓐ ꓡ ꓢꓴ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓔꓯ ꓫꓵꓻ ꓡꓰ ꓝꓲˍ ꓟ ꓬꓲ ꓚꓱꓹ꓾ ꓣꓳ ꓔꓯ ꓫꓸ ꓙꓵ ꓡꓰ ꓝꓲˍ ꓟ ꓓꓵꓽ ꓙ ꓚꓱꓹ꓾ ꓣꓳ ꓔꓯ ꓫꓸ ꓔꓳ ꓫꓸ ꓒꓯꓼ ꓗꓷ ꓡꓰ ꓝꓲˍ ꓟ ꓣꓳ ꓬꓲ ꓫꓱꓹ꓾ ꓮ ꓙꓵꓽ ꓔꓯ ꓠꓬ ꓪꓴ-ꓢ ꓔꓯ ꓡꓯ ꓙꓱ ꓗꓷ ꓢꓲ ꓠꓬꓲ꓾ ꓕꓱ ꓡꓱ ꓫꓵꓽ ꓫꓵꓻ ꓓꓴꓽ ꓗꓪ ꓐꓰ ꓡꓲꓹ ꓗꓷ ꓟꓶ ꓠꓹ ꓟ ꓐꓱ ꓶ ꓣꓳ ꓢꓲ ꓒ ꓔꓯ ꓶꓼ ꓓꓰꓽ ꓙꓰ ꓡꓯ=

ꓮ ꓡꓲꓳ ꓐꓯ ꓠꓬꓲ ꓪꓴ-ꓢ ꓣꓱꓽ ꓛꓰꓽ ꓟꓽ ꓚꓬꓼ ꓠꓬ꓾ ꓪꓴ-ꓢ ꓬꓰ ꓙ ꓖꓶˍ ꓟ꓾ ꓪꓴ-ꓢ ꓠꓲꓹ ꓗꓴ ꓖꓶˍ ꓟ꓾ ꓪꓴ-ꓢ ꓡꓰ ꓙ ꓖꓴ ꓟꓸ ꓖꓶˍ ꓟ꓾ ꓪꓴ-ꓢ ꓠꓬꓲ ꓟꓳꓻ ꓓꓴ ꓖꓶˍ ꓟ ꓟꓽ ꓚꓬꓼ ꓠꓬ ꓣꓳ ꓠꓽ ꓮ ꓫꓵꓽ ꓟꓲ ꓬꓰ ꓟꓽ ꓐ ꓡ=ꓬꓲꓻ ꓙꓬ ꓗꓪ ꓔꓲꓹ ꓢꓴ ꓠꓬ ꓬꓲ ꓚꓲꓸ ꓛꓬ ꓬꓲꓸ ꓚꓬꓴꓸ ꓟꓽ ꓐ ꓡ ꓟˍ ꓡꓰ ꓐꓰ꓾ ꓣꓳ ꓥˍ ꓟꓲ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓕꓯ ꓫꓵꓽ ꓪꓴ ꓔꓳꓹ ꓜꓳꓽˍ ꓟ꓾ ꓫꓸ ꓙꓵ ꓟꓶ ꓙꓵ ꓓꓴ ꓔꓳꓹ ꓜꓳꓽˍ ꓟ ꓔꓯ ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓚꓬꓴꓸ ꓟꓽ ꓐ ꓡ=

ꓣꓳ ꓠꓬ ꓚꓬꓴꓸ ꓢꓲ ꓒ ꓔꓯ ꓣꓱꓽ ꓞꓹ ꓡꓳ= ꓚꓬꓴꓸ ꓢꓲ ꓒ ꓠꓬ ꓣꓳ ꓤꓶꓻ ꓠꓯꓸꓼ ꓗꓪ ꓔꓬ ꓠꓹ ꓟ꓾ ꓚꓬꓴꓸ ꓢꓲ ꓒ ꓠꓬ ꓣꓳ ꓐꓰ ꓕꓲ ꓛꓳꓺˍ ꓙꓰ ꓠꓹ ꓟ꓾ ꓣꓳ ꓠꓬ ꓬꓲ ꓔꓯ ꓓꓰꓽ ꓠ ꓗꓹ ꓡꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲ ꓢꓴ ꓪꓴ-ꓢ ꓥ ꓟ ꓢꓲ ꓒ ꓬꓰ-ꓢꓴ ꓠꓬ꓾ ꓠꓬꓲꓸ ꓠꓬꓲ ꓟꓶꓽ ꓛꓵꓽ ꓟ ꓔꓯ ꓫꓱꓸ ꓤˍ ꓟ ꓡꓰ ꓐꓰ꓾ ꓣꓳ ꓔꓯˍ ꓟꓲ ꓫꓱꓸ ꓤ ꓢꓲ ꓠꓬꓲ ꓣꓳ ꓔꓯ ꓥˍ ꓟꓲ ꓬꓲ ꓒ ꓕꓲ ꓗꓪ ꓙ ꓫꓱꓽ ꓙꓰ ꓐ ꓡ ꓝꓲ ꓢꓲ꓾ ꓫꓵꓻ ꓡꓰ ꓝꓲˍ ꓟ ꓝꓴꓲꓸ ꓔꓯ ꓤ ꓟꓳ ꓐ ꓡ ꓝꓲ ꓢꓲ ꓠꓬꓲ꓾ ꓕꓲ ꓠꓬꓲ ꓙꓳˍ ꓠꓬ ꓪꓴ-ꓢ ꓗꓴꓷꓼ ꓗꓪ ꓛꓲ ꓬꓰ ꓒꓵꓽ ꓠꓹ ꓟ ꓣꓳ ꓠꓬ ꓪꓴ-ꓢ ꓔꓯ ꓶꓼ ꓓꓰꓽ ꓙꓰ ꓡꓯ= ꓮ ꓙꓵꓽ ꓔꓯ ꓫꓸ ꓟꓳ=

Add new comment

9 + 5 =