ꓟꓽ ꓔꓱꓹ ꓟ ꓔꓯ ꓤ ꓟꓳ ꓠꓹ ꓟ ꓐꓰ ꓢꓯꓼ ꓕꓵꓼ ꓠˍ ꓟ (Homily)

ꓘꓴ ꓜꓲꓼ ꓞꓳ ꓟꓵꓽ ꓘꓳꓼ 25 ꓫꓵꓽ ꓠꓽ 

ꓮ-ꓟꓳ-ꓢꓲ ꓕꓳꓽ ꓶ 8ꓽ 4-7

ꓣꓱ ꓟꓽ ꓡꓳꓼ ꓢꓴ ꓔꓯ ꓠꓬꓲꓸ ꓓꓳꓽ ꓡꓰ ꓢꓲ꓾ ꓟꓵꓽ ꓗꓪ ꓟ ꓞꓳ ꓫꓸ ꓐꓴ ꓔꓯ ꓟꓶꓽ ꓡꓰ ꓝꓲ ꓠꓲꓹ ꓫꓵ ꓢꓴ ꓠꓴ ꓪꓽꓳ꓾ ꓕꓱ ꓟ ꓔꓯ ꓠ ꓠꓹ꓾ ꓠꓴ ꓪ ꓠꓬ ꓕꓱ ꓡꓱ ꓐꓯˍ ꓡꓳ꓾ ꓣꓳꓽ ꓜꓻ ꓪꓴꓽ ꓠꓹ ꓟ꓾ ꓦ ꓒꓴ ꓫꓵꓼ ꓮ ꓕꓯ ꓢꓲ ꓗꓳꓸ ꓙꓰˍ ꓡꓳꓺꓽ꓿ ꓣꓳ ꓫꓪ ꓔꓲꓺ ꓔ ꓢꓲ꓾ ꓙꓳꓻ ꓓꓴ ꓱ-ꓩ ꓔꓯ ꓣꓳꓺ ꓡꓰ ꓝꓲ ꓢꓲ ꓠꓬꓲ꓾ ꓫꓱ-ꓘꓷ-ꓡꓷ ꓞꓰꓻ ꓡꓳ ꓔꓯ ꓠꓽ ꓪꓴꓽ ꓡ ꓝꓲ ꓢꓲ꓾ ꓟꓽ ꓔꓱꓹ ꓟ ꓞꓰ ꓓꓴ ꓣꓱꓽ ꓢꓲ ꓗꓶˍ ꓟ ꓬꓰ ꓪ ꓠꓹ ꓟ꓾ ꓠꓽ ꓦꓬ ꓠꓬꓲ ꓮ ꓕꓯ ꓢꓲ ꓗꓳꓸ ꓙꓰˍ ꓡꓳꓺꓽ꓾ ꓐꓰ ꓐꓯˍ ꓡꓳ꓿ ꓒꓴꓻ ꓡꓰ ꓞꓳ ꓫꓸ ꓔꓯ ꓪꓴꓻ ꓟꓶ ꓢꓲ꓾ ꓛꓲꓺ ꓠꓲ ꓕꓲ ꓜꓰꓼ ꓡꓰ ꓣꓱ ꓟꓽ ꓡꓳ ꓢꓴ ꓔꓯ ꓑꓺ ꓟꓶ ꓢꓲ ꓠꓬꓲ꓾ ꓢꓴꓻ ꓔꓯ ꓫꓪ ꓒꓲꓻ ꓪꓴꓽ ꓖꓶ ꓪ ꓠꓹ ꓟ ꓮ ꓕꓯ ꓢꓲ ꓗꓳꓸ ꓙꓰˍ ꓡꓳꓺꓽ꓾ ꓐꓰ ꓐꓯˍ ꓢꓰꓽ ꓡꓳ꓿ ꓬꓰ-ꓧꓳ-ꓧꓪ ꓡꓰ ꓬ-ꓗꓴ ꓟꓬꓱ ꓓꓳꓽ ꓔꓯ ꓖꓴ ꓔ ꓢꓲ꓾ ꓙꓱꓽ ꓢꓲ ꓠꓬꓲ ꓕꓱ ꓡꓱ ꓐꓯˍ ꓡꓳ꓾ ꓬꓲ ꓪ ꓬꓰ ꓗꓷˍ ꓟ ꓟꓬꓱꓽ ꓥ ꓕ ꓑꓳ ꓔꓯ ꓥꓪ ꓮ ꓡꓲ ꓥˍ ꓟꓲ ꓕꓲ ꓞꓲ ꓕꓲ ꓑ ꓟꓽ ꓟꓲ ꓡꓰ꓿

1 ꓕꓲ-ꓟꓳ-ꓕꓲ-ꓪꓴ 2ꓽ 1- 8 

ꓖꓳ ꓡꓱ ꓠꓬꓲ ꓠꓴ ꓔꓯ ꓥꓪ ꓢꓯꓼ ꓖꓶ ꓠꓲꓹ ꓫꓵˍ ꓟ ꓬꓲ ꓪꓴꓸ ꓕꓲ ꓫꓵ ꓠꓬ꓾ ꓞꓳ ꓤ ꓥ ꓕ ꓑꓳ ꓐꓱ ꓶ ꓶꓼ ꓓꓰˍ ꓟ ꓐꓰ꓾ ꓪꓽ ꓘꓴˍ ꓟ ꓐꓰ꓾ ꓓꓰꓽ ꓙˍ ꓟ ꓐꓰ ꓫꓸ ꓟꓳˍ ꓟ ꓬꓰ ꓠ ꓟ꓾ ꓕꓰ ꓟꓬ ꓫꓵ ꓥ ꓡꓳ꓿ 2 ꓣꓳ ꓠꓬ ꓠꓲꓹ ꓒꓵ ꓠꓲꓹ ꓡꓱˍ ꓟ ꓐꓰ꓾ ꓠꓲꓹ ꓔꓱꓹ ꓠꓲ ꓓꓰˍ ꓟ ꓮꓽ ꓙꓵ ꓗꓪ꓾ ꓧꓪ ꓧꓪˍ ꓐꓰ ꓢꓲ ꓡꓲ ꓟ ꓦꓬꓼ ꓠꓬꓲ ꓗꓳꓸ ꓪ ꓠꓹ ꓟ꓾ ꓪ ꓔꓲ ꓐꓴˍ ꓐꓰ ꓙꓵꓽ ꓪꓽ ꓙꓳ ꓢꓴ ꓐꓴ ꓐꓱ ꓶˍ ꓟꓲ ꓪꓽ ꓘꓴ ꓙ꓿ 3 ꓕꓱ ꓟ ꓠꓬ ꓪꓴ-ꓢ ꓣꓳ ꓚꓬꓴ ꓢꓲ ꓒꓽ ꓒꓬꓱꓽ ꓕꓯ ꓗꓪ ꓙꓲˍ ꓟ ꓐꓰ ꓬꓲ ꓠꓲꓹ ꓒꓴˍ ꓟ ꓥ ꓡꓳ꓿ 4 ꓪꓴ-ꓢ ꓠꓬ ꓞꓳ ꓤ ꓥ ꓕ ꓑꓳ ꓔꓯ ꓢꓯꓼ ꓟꓬ ꓝꓸ ꓟꓶ ꓝꓲ ꓢꓲ ꓔꓱꓹˍ ꓟ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓕꓲ ꓣꓳˍ ꓡꓰꓽ ꓙꓳ ꓢꓲ꓾ ꓪꓴ-ꓢˍ ꓐꓰ ꓞꓳ ꓤ ꓠꓬꓲꓽ ꓗꓴꓸ ꓚꓸꓼ ꓗꓪˍ ꓟꓲ ꓜꓲꓽ ꓟꓴꓽ ꓕꓲ ꓣꓳˍ ꓡꓰꓽ ꓙꓳˍ ꓡꓳ꓿ ꓬꓲ ꓠꓬ ꓞꓳ ꓤ ꓒꓬꓱꓼ ꓡ ꓗꓷ ꓢꓴ ꓙꓲ-ꓢꓴ ꓬꓰ-ꓢꓴ ꓥ ꓡꓳ꓿ 6 ꓬꓲ ꓝꓲꓸ ꓐꓲ ꓡ ꓕꓯ ꓮꓽ ꓙꓵ ꓢꓴ ꓐꓱ ꓶ ꓫꓴꓹ ꓣꓴ ꓒꓵꓽ ꓬꓰ ꓠꓹ ꓟ ꓚꓲ ꓛꓬ ꓖꓳ ꓓꓱ ꓖꓶ ꓗꓷ ꓟ ꓕꓱ ꓟ ꓠꓬ꓾ ꓪꓴ-ꓢ ꓡꓰ ꓮꓽ ꓙꓵ ꓢꓴ ꓔꓯ ꓚꓬꓴ ꓠꓲꓹ ꓫꓵˍ ꓟ ꓬꓲ ꓗꓸ ꓚꓵ ꓥ ꓡꓳ꓿ 7 ꓕꓱ ꓟ ꓑꓶꓸ ꓓꓴ ꓥꓪ ꓔꓯˍ ꓟꓲ꓾ ꓟꓸ ꓖꓶ ꓢꓴˍ ꓐꓰ ꓝꓲ ꓓꓴˍ ꓐꓰ꓾ ꓔꓱꓹˍ ꓟ ꓙꓵꓻ ꓠꓲꓹ ꓚꓱꓹ ꓗꓪ ꓐꓶꓽ ꓞꓳ ꓐꓴ ꓟꓸ ꓒ ꓬꓰ ꓠꓹ ꓟ ꓝꓲ ꓔ ꓟ ꓥ ꓡꓳ꓿ (ꓥꓪ ꓠꓬ ꓟꓽ ꓗꓶꓸ ꓗꓶꓸ ꓔꓱꓹ ꓘꓶꓽ ꓫꓸ ꓕꓱˍ ꓟ ꓥ ꓡꓳ꓿) 8 ꓖꓳ ꓡꓱ ꓠꓬꓲ ꓮ ꓡꓲ ꓗꓪˍ ꓟꓲ꓾ ꓞꓳ ꓑꓸ ꓤ ꓐꓴ ꓠꓬ ꓛꓬ ꓖꓴ ꓟꓽ ꓙꓳˍ ꓟ ꓡꓯꓼ ꓒꓯꓹ ꓛꓱ ꓔ ꓢꓲ꓾ ꓠꓲꓹ ꓟ ꓦꓶˍ ꓟ ꓐꓰ ꓧꓳꓺ ꓡꓯꓽ ꓘꓳˍ ꓟ ꓟꓽ ꓙꓳꓻ ꓙꓳ ꓪꓽ ꓘꓴ ꓠꓹ ꓟ ꓥꓪ ꓠꓲꓹ ꓫꓵˍ ꓡꓳ꓿

ꓡꓴ-ꓘ 16ꓽ 1- 13

ꓬꓰ-ꓢꓴ ꓠꓬ ꓛꓳꓽ ꓒꓯꓹ ꓐꓴ ꓔꓯ ꓕꓱ ꓡꓱ ꓐꓯˍ ꓢꓰ ꓡꓳ꓿ ꓞꓳ ꓐꓳ ꓕꓲ ꓣꓳ ꓠꓬ ꓦꓲ ꓙꓵꓽ ꓢꓴ ꓕꓲ ꓣꓳ ꓙꓳˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓠꓬ ꓬꓲ ꓢꓲ ꓒꓽ ꓖꓴꓽ ꓙꓴꓽ ꓮꓽ ꓔꓳ ꓒꓬꓹ ꓔꓬ ꓡꓳ꓾ ꓐꓰ ꓬꓲ ꓔꓯ ꓓꓰꓺ ꓢꓴ ꓙꓳˍ ꓡꓳ꓿ 2 ꓖꓳ ꓡꓱ ꓠꓬꓲ ꓬꓲ ꓢꓲ ꓒꓽ ꓡꓰ ꓬꓲ ꓔꓯ ꓘꓴ ꓔꓯꓹ ꓡ ꓢꓲ꓾ ꓠꓴ ꓔꓯ ꓟꓳꓸ ꓥꓪ ꓑ ꓙꓽˍ ꓟ ꓕꓱ ꓟ ꓠꓬ ꓮ ꓡꓲ ꓥꓳ ꓪ? ꓠꓴ ꓡꓰ ꓙꓵꓽ ꓔꓬ ꓟ ꓶꓻ ꓡꓯꓼ ꓢꓪ' ꓟꓸ ꓖꓶ ꓡꓯ꓿ ꓕꓱ ꓡꓱ ꓖꓳ ꓑꓳ ꓠꓴ ꓠꓽ ꓥꓪ ꓦꓲ ꓙꓵꓽ ꓢꓴ ꓬꓰ ꓟꓽ ꓓ꓾ ꓐꓯ ꓖꓶˍ ꓡꓳ꓿ 3 ꓦꓲ ꓙꓵꓽ ꓢꓴ ꓠꓬ ꓬꓲ ꓠꓲꓹ ꓟ ꓗꓪ꓾ ꓥꓪ ꓢꓲ ꓒꓽ ꓡꓰ ꓥꓪ ꓔꓯ ꓦꓲ ꓙꓵꓽ ꓢꓴ ꓟꓽ ꓬꓰ ꓝꓲ ꓡ ꓠꓬ ꓥꓪ ꓮ ꓡꓲ ꓬꓰ ꓓꓳꓺꓽ? ꓦ ꓟꓲ ꓘꓪˍ ꓐꓯꓺꓽ꓾ ꓢꓯꓼ ꓟꓽ ꓙꓳ꓿ ꓜꓻ ꓓꓰꓽˍ ꓐꓯꓺꓽ꓾ ꓫꓸ ꓔꓳ꓿ 4 ꓥꓪ ꓔꓯ ꓦꓲ ꓙꓵꓽˍ ꓟ ꓟꓬꓱꓽ ꓕꓱ ꓟ ꓠꓽ ꓡꓰ ꓝꓲˍ ꓕꓯ꓾ ꓢꓴꓻ ꓡꓰ ꓬꓲ ꓪꓽ ꓦꓲ ꓗꓪ ꓥꓪ ꓔꓯ ꓘꓳꓻ ꓣꓴ ꓡ ꓠꓹ ꓟ ꓥꓪ ꓮ ꓡꓲ ꓬꓰ ꓠꓯꓹ ꓟ ꓥꓪ ꓢꓷꓸ ꓡꓰꓳ꓾ ꓐꓰ ꓓꓵꓽ ꓙˍ ꓡꓳ꓿ 5 ꓖꓳ ꓡꓱ ꓠꓬ ꓬꓲ ꓢꓲ ꓒꓽ ꓔꓯ ꓶꓻ ꓡꓯꓼ ꓐꓵ ꓞꓹ ꓢꓴ ꓐꓴ ꓕꓲ ꓣꓳ ꓗꓸ ꓠꓯꓸ ꓕꓲ ꓣꓳ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓬꓲ ꓪꓴꓸ ꓕꓲ ꓣꓳ ꓔꓯ꓾ ꓠꓴ ꓠꓬ ꓥꓪ ꓢꓲ ꓒꓽ ꓔꓯ ꓮ ꓟꓬ ꓐꓵ ꓞꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 6 ꓬꓲ ꓡꓰ꓾ ꓮꓽ ꓛꓬꓽ ꓞꓶ ꓕꓲ ꓦꓬ ꓬꓲꓻ ꓪꓴ ꓐꓵꓻˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ ꓦꓲ ꓙꓵꓽ ꓢꓴ ꓡꓰ ꓬꓲ ꓔꓯ꓾ ꓠꓴ ꓶꓻ ꓡꓯꓼ ꓕꓳ ꓶ ꓮꓸ ꓟꓲꓸ ꓣꓴ ꓢꓲ꓾ ꓥꓪꓽ ꓞꓲꓻ ꓬꓲꓻ ꓪꓴ꓾ ꓐꓰ ꓐꓳ꓾ ꓐꓯ ꓖꓶˍ ꓡꓳ꓿ 7 ꓝꓮꓲ ꓕꓲ ꓣꓳ ꓔꓯ꓾ ꓠꓴ ꓮ ꓟꓬ ꓛꓲ ꓐꓵˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓬꓲ ꓠꓽ ꓫꓪ ꓕꓲ ꓦꓬ ꓙꓳꓻ ꓐꓵˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ ꓦꓲ ꓙꓵꓽ ꓢꓴ ꓡꓰ꓾ ꓠꓴ ꓶꓻ ꓡꓯꓼ ꓕꓳ ꓶ ꓣꓴ ꓢꓲ꓾ ꓦꓰꓼ ꓞꓲ ꓙꓳꓻ꓾ ꓐꓰ ꓐꓳ꓾ ꓐꓯ ꓖꓶˍ ꓡꓳ꓿ 8 ꓟꓽ ꓔꓱꓹ ꓟ ꓦꓲ ꓙꓵꓽ ꓢꓴ ꓔꓯ ꓬꓲ ꓢꓲ ꓒꓽ ꓡꓰ꓾ ꓠꓴ ꓠꓬ ꓚꓴꓽ ꓬꓲꓹ ꓙꓳ ꓙꓳˍ ꓡꓰꓽ ꓬꓰ ꓗꓴꓸ ꓐꓷ꓾ ꓐꓯ ꓖꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓤ ꓠꓱ ꓐꓴ ꓠꓽ꓾ ꓠꓬꓲꓺ ꓟꓳꓻ ꓓꓴ ꓤ ꓠꓱ ꓐꓴ ꓢꓶꓸ ꓟꓽ ꓞꓲ ꓚꓴꓽ ꓬꓲꓹ ꓣꓱꓽ ꓗꓴˍ ꓡꓳ꓿ 9 ꓥꓪ ꓝꓮꓲ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓒꓴ ꓤꓽ ꓫꓵ ꓤ ꓔꓯ ꓦ ꓡꓱ ꓟꓽ ꓓ ꓟ ꓦꓬꓼ ꓠꓬꓲ ꓛꓲ ꓡ ꓕꓯ꓾ ꓕꓲ ꓞꓲꓼ ꓕꓲ ꓑ ꓟ ꓦꓲ ꓗꓪ ꓠꓴ ꓪꓽ ꓔꓯ ꓘꓳꓻ ꓣꓴ ꓖꓶ ꓡ ꓝꓲ ꓠꓹ ꓟ꓾ ꓟꓽ ꓙꓲ ꓟꓽ ꓜꓳꓽˍ ꓟ ꓒꓴ ꓤ ꓫꓵ ꓤ ꓡꓰ ꓗꓪ ꓛꓳꓽ ꓑꓺ꓿ 10 ꓡꓽ ꓞꓳ ꓕꓲ ꓣꓳ ꓠꓽ ꓬꓲ ꓧꓶꓸ ꓤ ꓗꓪ ꓦ ꓡꓱ ꓐꓳˍ ꓠꓬ꓾ ꓬꓲ ꓓꓽ ꓟ ꓗꓪˍ ꓟꓲ ꓦ ꓡꓱ ꓐꓳˍ ꓥꓳ꓿ ꓬꓲ ꓧꓶꓸ ꓤ ꓗꓪ ꓟꓽ ꓔꓱꓹ ꓠꓬ ꓬꓲ ꓓꓽ ꓟ ꓗꓪˍ ꓟꓲ ꓟꓽ ꓔꓱꓹ꓿ 11 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓟꓲ ꓠꓯ ꓒꓴ ꓤ ꓫꓵ ꓤ ꓣꓱꓽˍ ꓟ ꓗꓪ ꓦ ꓡꓱ ꓟꓽ ꓐꓳ ꓕꓯ ꓠꓽ꓾ ꓔꓱꓹˍ ꓟ ꓒꓵꓽ ꓶ ꓠꓬ ꓮꓽ ꓟ ꓡꓰ ꓠꓴ ꓪꓽ ꓔꓯ ꓡꓯꓼ ꓙꓱ ꓖꓶ ꓡ ꓢꓰꓽ꓿ 12 ꓠꓴ ꓪꓽ ꓠꓬ ꓢꓴ ꓖꓴꓽ ꓙꓴꓽ ꓗꓪ ꓦ ꓡꓱ ꓟꓽ ꓐꓳ ꓕꓯ ꓠꓽ꓾ ꓠꓴ ꓪꓽ ꓚꓲꓸ ꓛꓬ ꓶꓽ ꓬꓰ ꓠꓹ ꓟ ꓮꓽ ꓟ ꓡꓰ ꓠꓴ ꓪꓽ ꓔꓯ ꓖꓶ ꓡ ꓥꓳ ꓪ? 13 ꓚꓳ ꓑꓸ ꓕꓲ ꓣꓳ ꓠꓬ ꓢꓲ ꓒꓽ ꓠꓬꓲꓽ ꓣꓳ ꓔꓯ ꓣꓱꓽ ꓙ ꓟꓽ ꓐ ꓡ꓿ ꓬꓲ ꓠꓬ ꓕꓱ ꓕꓲ ꓣꓳ ꓔꓯ ꓠꓲꓹ ꓜꓳ ꓢꓲ꓾ ꓖꓳ ꓕꓲ ꓣꓳ ꓔꓯ ꓠꓲꓹ ꓠꓵˍ ꓥꓳ꓿ ꓥ ꓠꓬ꓾ ꓕꓱ ꓕꓲ ꓣꓳ ꓔꓯ ꓒꓵꓽ ꓢꓲ꓾ ꓖꓳ ꓕꓲ ꓣꓳ ꓔꓯ ꓟꓽ ꓒꓵ ꓐꓰ ꓗꓹ ꓥꓳ꓿ ꓠꓴ ꓪꓽ ꓠꓬ ꓪꓴ-ꓢ ꓔꓯˍ ꓟꓲ ꓣꓱꓽ ꓙ꓾ ꓒꓴ ꓤ ꓫꓵ ꓤ ꓔꓯˍ ꓟꓲ ꓣꓱꓽ ꓙ꓾ ꓐꓰ ꓬꓰ ꓟꓽ ꓒꓬꓱꓼ ꓡ꓾ ꓐꓯˍ ꓡꓳ꓿