ꓟꓽ ꓙꓲ ꓟ ꓔꓯ ꓙꓲ_ꓟ ꓗꓪ ꓐꓰ ꓧꓪꓸ ꓡꓰ ꓠꓹ ꓟ꓾

ꓟꓽ ꓙꓲ ꓟ ꓔꓯ ꓙꓲ_ꓟ ꓗꓪ ꓐꓰ ꓧꓪꓸ ꓡꓰ ꓠꓹ ꓟ꓾

ꓠꓲꓹ ꓠꓵ_ ꓟ ꓬꓲ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓗꓸ ꓡꓯꓼ ꓘꓳ_ ꓟ ꓗꓪ ꓠꓻ ꓓꓰ ꓡꓰ_ ꓟ ꓠꓬ ꓣꓳ ꓐꓰ ꓢꓷꓸ ꓡꓯ ꓘꓳ_ ꓟ꓾ ꓣꓳ ꓠꓲꓹ ꓠꓵ ꓟ꓾ ꓣꓳ ꓮ ꓘꓶꓸ ꓠꓲꓹ ꓟ ꓠꓯꓼ ꓗꓪ ꓢꓷꓸ ꓔ ꓟ꓾ ꓕꓲ ꓣꓳ ꓣꓳ ꓠꓬ ꓣꓳ ꓔꓯ ꓗꓸ ꓠꓯꓸ ꓢꓲ ꓗꓪ ꓐꓰ ꓮꓸ ꓕꓽ ꓗꓸ ꓡ_ ꓟ ꓠꓬ ꓠꓻ ꓓꓰ ꓡꓰ_ ꓟ ꓥ ꓡꓳ= ꓮ ꓫꓵ ꓑꓶ ꓓꓴ ꓐꓯ ꓠꓬ ꓣꓳ ꓮ ꓘꓶꓸ ꓢꓷꓸ_ ꓟ꓾ ꓣꓳ ꓠꓲꓹ ꓠꓵ ꓡꓯ ꓘꓳ_ ꓟ꓾ ꓖꓳ ꓕꓲ ꓣꓳ ꓠꓬ ꓣꓳ ꓟꓽ ꓓꓵꓽ ꓙ ꓔꓸ ꓕꓲ ꓑ ꓗꓪ ꓣꓳ ꓔꓯ ꓪꓴꓽ ꓜ ꓗꓷ ꓕꓯ ꓟꓽ ꓥ ꓠꓬ ꓣꓳ ꓔꓯ ꓫꓸ ꓙꓵ ꓠꓹ ꓟ ꓬꓰ ꓗꓷ ꓕꓯ ꓣꓳ ꓠꓬ ꓣꓳ ꓫꓸ ꓙꓵ ꓡꓰ_ ꓟ ꓢꓷꓸ ꓟꓽ ꓞꓲ ꓣꓳ ꓠꓬ ꓠꓲꓹ ꓟ ꓮ ꓘꓶꓸ ꓫꓸ ꓡꓳ= ꓮ ꓫꓵ ꓑꓶ ꓓꓴ ꓥ ꓐꓯ ꓠꓬ ꓣꓳ ꓮ ꓘꓶ ꓠꓲꓹ ꓠꓵ ꓟ ꓕꓲ ꓣꓳ ꓣꓳ ꓐꓰ ꓣꓳ ꓔꓯ ꓕꓱ ꓡꓱ ꓬꓰ ꓡ_ ꓟ ꓑꓶ ꓓꓴ ꓣꓳ ꓠꓬ ꓠꓲꓹ ꓟ ꓫꓸ ꓓꓴ ꓥ ꓡꓳ=

ꓕꓱ ꓟ ꓡꓰ ꓐꓰ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ (ꓟ-ꓕꓲ 26ꓽ 14-25) ꓗꓪ ꓢꓲ ꓒ ꓬꓰ-ꓢꓴ ꓠꓬ ꓬꓲꓸ ꓕꓲ ꓦꓬꓼ ꓡꓱꓼ ꓪꓽ ꓘꓴ ꓢꓲ꓾ ꓢꓲ ꓔ ꓟ ꓬꓲ ꓝꓲ ꓓꓴ ꓐꓴ ꓞꓲ ꓠꓬꓲ ꓣꓳ ꓘꓴꓽ ꓗꓪ ꓕꓲ ꓣꓳ ꓥ ꓟ ꓘ-ꓡꓲꓳ ꓒꓽ ꓬꓴ-ꓓ ꓡꓰ ꓢꓲ ꓒꓽ ꓬꓰ-ꓢꓴ ꓔꓯ ꓪꓴꓽ ꓜ ꓗꓷ ꓟ ꓬꓰ_ ꓟ ꓟꓸ ꓟꓲꓽ ꓣꓳ ꓑ ꓙ_ ꓡꓳ= ꓬꓲ ꓐꓰ ꓢ ꓘꓳꓼ ꓕꓱ ꓡꓱ ꓔꓬ ꓗꓷ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓟꓸ ꓖꓶ_ ꓟ ꓔꓯ ꓬꓲ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓘꓳꓹ ꓣꓴ ꓔꓬ ꓥ ꓟꓲ ꓢꓲ ꓒ ꓬꓰ-ꓢꓴ ꓐꓯ ꓘꓶꓽ ꓔꓯ ꓚꓵ ꓚꓵ ꓘꓳꓹ ꓣꓴ ꓟꓽ ꓐ ꓡ= ꓖꓳ ꓟ ꓑꓶ ꓓꓴ ꓬꓲꓸ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓪꓴꓽ ꓜ ꓟ ꓬꓰ_ ꓟ ꓥꓳ=

ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓔꓯ ꓮ ꓡꓰ ꓐꓯ_ ꓐꓯ ꓠꓬ ꓥꓪ ꓔꓯ ꓪꓴꓽ ꓜ ꓢꓴ ꓟꓽ ꓦꓵꓻ ꓡ ꓗꓷ ꓐꓭ ꓠꓬ ꓬꓲ ꓐꓱ ꓶ ꓮ ꓘꓶ ꓙꓲ_ ꓡꓳ ꓫꓵꓽ ꓥꓳ꓾ ꓐꓰ ꓐꓯ_ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓪꓴꓽ ꓜꓽ_ ꓟ ꓟꓶꓸ ꓥ ꓟꓲ ꓡꓯ ꓐꓳ ꓔꓶꓸ ꓓꓴ ꓕꓯ ꓢꓲ ꓗꓪ ꓫꓵꓻ_ ꓟ ꓗꓪ ꓟꓲ ꓠꓯ ꓞꓳ ꓤ ꓮ ꓙꓵ ꓝꓴꓲ ꓔꓯ ꓬꓰ ꓖꓶ ꓗꓷ_ ꓡꓳ= ꓬꓲ ꓔꓯ ꓪꓴꓽ ꓜ ꓢꓴ ꓝꓮꓲ ꓬꓲ ꓔꓯ ꓡꓯ ꓐꓳ ꓔꓶꓸ ꓓꓴ ꓕꓯ ꓢꓲ ꓕꓯꓼ ꓢꓰꓼ ꓢꓴ ꓮ ꓙꓵ ꓔꓯ ꓥ ꓟꓲ ꓬꓲ ꓝꓴꓲ ꓖꓽ ꓖꓶ_ ꓡꓳ= ꓬꓲ ꓠꓬ ꓐꓹ ꓐ꓾ꓳ ꓬꓲ ꓪ ꓬꓰ_ ꓟ ꓝꓴꓲ ꓔꓯ ꓬꓲ ꓪ ꓟꓽ ꓢꓷꓸ ꓠꓬꓲ ꓬꓲ ꓪ ꓝꓴꓲ ꓔꓯ ꓖꓽ ꓖꓶ ꓡꓯ ꓐꓰ ꓪꓽ ꓘꓴ ꓖꓶ ꓢꓴ ꓢꓲ ꓒꓽ ꓥ ꓡꓳ= ꓬꓲ ꓠꓵ ꓠꓲꓹ ꓠꓬ ꓪꓴꓽ ꓓꓰ ꓡꓰ_ ꓟ ꓥ ꓡꓳ=

ꓢꓲ ꓫꓬ ꓕꓳ ꓶ ꓗꓪ ꓟꓽ ꓙꓲ ꓟ ꓔꓯ ꓙꓲ_ ꓟ ꓡꓰ ꓧꓪꓸ ꓡꓰ ꓝꓲ ꓐꓯ_ ꓟ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓟꓽ ꓙꓲ ꓟ ꓝꓴꓲ ꓟꓽ ꓙꓲ ꓟ ꓟꓲ ꓠꓯ ꓞꓳ ꓤ ꓔꓯ ꓙꓲ_ ꓟ ꓬꓲ ꓠꓵ ꓠꓲꓹ ꓗꓪ ꓐꓰ ꓧꓪꓸ ꓡꓰ ꓝꓲꓳ꓾ ꓖꓳ ꓡꓱ ꓠꓬꓲ ꓣꓳ ꓔꓯ ꓢꓳ ꓓꓴ ꓠꓬ ꓣꓳ ꓟꓲ ꓠꓯ ꓕꓱ ꓟ ꓗꓪ ꓛꓳ ꓙꓳ ꓔꓬ ꓕꓯ ꓣꓳ ꓔꓯ ꓢꓴ ꓡꓰ ꓪꓴꓽ ꓜꓽ ꓗꓷ_ ꓣꓳ ꓟꓽ ꓬꓰ ꓗꓷ ꓫꓵ ꓟꓬꓱꓺ ꓓꓳ ꓪꓴꓽ ꓜꓽ ꓗꓷ ꓕꓯ ꓣꓳ ꓔꓯ ꓜꓲꓻ ꓡ ꓕꓯ ꓣꓳ ꓔꓯ ꓗꓸ ꓧꓪ ꓡ ꓕꓯ ꓣꓳ ꓠꓬ ꓮ ꓡꓰ ꓬꓰ ꓠꓯ_ ꓡ? ꓣꓳ ꓠꓬ ꓢꓲ ꓒ ꓬꓰ-ꓢꓴ ꓗꓸ ꓠꓯꓸ ꓢꓲ ꓗꓸ ꓢꓴ ꓥ ꓟ ꓑꓶ ꓓꓴ ꓠꓲꓹ ꓟ ꓫꓵꓺ ꓢꓲ ꓠꓬꓲ ꓠꓵ ꓠꓲꓹ ꓟꓳꓸ ꓖꓶ ꓠꓹ ꓟ ꓥ ꓡꓳ=

ꓟꓽ ꓙꓲ ꓟ ꓔꓯ ꓙꓲ_ ꓟ ꓡꓰ ꓐꓰ ꓧꓪꓸ ꓡꓰ ꓠꓹ ꓟ ꓢꓯꓼ ꓕꓵꓼ ꓠꓹ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓣꓳ ꓔꓯ ꓗꓸ ꓧꓪ ꓡ ꓢꓴ ꓔꓯ ꓣꓳ ꓝꓮꓲ ꓕꓲ ꓧꓪꓹ ꓬꓰ ꓥꓳ ꓐꓯ ꓠꓬ ꓕꓱ ꓟ ꓠꓬ ꓮ ꓕꓯ ꓟꓲ ꓟꓽ ꓡꓳꓹ ꓬꓰꓳ= ꓕꓲ ꓣꓳ ꓛꓳ ꓕꓲ ꓣꓳ ꓢꓰꓼ ꓡꓯ ꓘꓳ꓾ ꓕꓲ ꓣꓳ ꓛꓳ ꓕꓲ ꓣꓳ ꓗꓸ ꓧꓪ ꓡꓯ ꓘꓳ ꓠꓬ ꓮ ꓕꓯ ꓟꓲ ꓟꓽ ꓡꓳꓹ ꓬꓰꓳ= ꓖꓳ ꓡꓱ ꓠꓬꓲ ꓣꓳ ꓔꓯ ꓟꓳꓸ ꓡꓳꓹ ꓬꓰ ꓠꓹ ꓟ ꓐꓱ ꓶ ꓣꓳ ꓠꓬ ꓜꓲꓽ ꓢꓲ ꓠꓬꓲ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓣꓳ ꓢꓯꓼ ꓕꓵꓼ ꓠꓹ ꓟ ꓥ ꓡꓳ=

ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓟꓽ ꓟꓶ ꓫꓵ ꓕꓯ ꓬꓲ ꓫꓵꓻ ꓟ ꓦꓬꓼ ꓠꓬꓲ ꓛꓲ ꓡ_ ꓟ ꓑꓶ ꓓꓴ ꓬꓲ ꓠꓬ ꓠꓲꓹ ꓟ ꓫꓸ_ ꓟ꓾ ꓣꓳ ꓑ ꓙ_ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓮ ꓙꓵ ꓠꓬ ꓠꓵ ꓠꓲꓹ ꓗꓪ ꓐꓰ ꓬꓰ_ ꓟ ꓑꓶ ꓓꓴ ꓬꓲ ꓠꓬ ꓠꓲꓹ ꓒꓴ ꓗꓹ ꓛꓲ_ ꓟ ꓟꓲ ꓣꓳ ꓟꓳ ꓪ ꓡꓳ= ꓬꓴ-ꓓ ꓒ ꓔꓯ ꓠꓴ ꓬꓰ ꓙꓵ ꓙꓳ_ ꓟ ꓟꓬꓱꓽ ꓬꓰ ꓐꓰ ꓬꓲ ꓡꓰ ꓐꓯ ꓖꓶ_ ꓡꓳ=

ꓖꓳ ꓡꓱ ꓠꓬꓲ ꓬꓲ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓣꓳ ꓟꓲ ꓠꓯ ꓕꓱ ꓟ ꓗꓪ ꓛꓳ ꓙꓳ ꓔꓬ ꓕꓯ ꓣꓳ ꓔꓳꓹ ꓜꓳ ꓪ ꓟ ꓮ ꓙꓵ ꓔꓯ ꓜꓲꓽ ꓘꓴ ꓠꓲꓹ ꓡꓰ ꓙꓻ ꓝꓲ_ ꓟ ꓡꓰ ꓐꓰ ꓣꓳ ꓔꓯ ꓪꓴꓽ ꓜ ꓢꓴ꓾ ꓣꓳ ꓔꓯ ꓗꓸ ꓧꓪ ꓡ ꓢꓴ ꓣꓳ ꓟꓬꓱꓺ ꓓꓳꓽ ꓔꓯ ꓪꓴꓽ ꓜ ꓢꓴ ꓔꓯ ꓟꓳ_ ꓕꓯ ꓔꓳꓹ ꓜꓳ ꓪ ꓕꓯ ꓣꓳ ꓠꓬ ꓟꓽ ꓙꓲ ꓟ ꓔꓯ ꓙꓲ_ ꓟ ꓗꓪ ꓐꓰ ꓧꓪꓸ ꓡꓰ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ꓾ ꓮ ꓟꓶ ꓠꓬ ꓙꓲ ꓫꓬ ꓟ ꓠꓽ ꓢ ꓠꓬꓲ ꓐꓰ ꓛꓲ ꓡꓳ꓾ ꓣꓳ ꓮ ꓙꓵ ꓠꓲꓹ ꓟ ꓔꓯ ꓠꓵ ꓠꓲꓹ ꓡꓰ ꓐꓲ ꓞꓹ ꓢꓲ ꓠꓬꓲ ꓢꓲ ꓒ ꓬꓰ ꓢꓴ ꓢꓯꓸ ꓬꓲꓼ ꓡ ꓑꓮꓲ ꓔꓯ ꓐꓯ ꓒꓵꓽ ꓡꓯ ꓘꓳ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓓꓴ ꓬꓰ ꓡꓯ꓾ ꓮ ꓙꓵ ꓔꓯ ꓫꓸ ꓟꓳ=