ꓠꓬꓲ ꓟꓽ ꓟꓵ ꓕꓯ ꓬꓰ (Homily)

ꓘꓴ ꓜꓲꓼ ꓞꓳ ꓟꓶꓽ ꓘꓳꓼ 4 ꓫꓵꓽ ꓠꓽ

ꓬꓰ-ꓡꓲ-ꓟꓲ ꓕꓳꓽ ꓶ 1: 4-5, 17-19

ꓬꓰ-ꓧꓳ-ꓧꓪ ꓐꓯ ꓘꓶ ꓠꓬ ꓥꓪ ꓔꓯ ꓛꓲ ꓡ ꓢꓲ ꓕꓱ ꓡꓱ ꓐꓯ_ ꓡꓳ꓾ꓦꓰꓼ ꓛꓲ ꓗꓪ ꓥꓪ ꓠꓴ ꓔꓯ ꓟꓽ ꓜꓯꓻ ꓢꓰ ꓕꓯ ꓡꓰ ꓥꓪ ꓠꓴ ꓔꓯ ꓢꓷꓸ_ ꓡꓳ꓿ ꓤ ꓘꓶꓻ ꓗꓪ ꓐꓰ ꓠꓴ ꓔꓯ ꓟꓽ ꓦꓵ ꓓꓳ ꓡ ꓢꓰꓽ ꓕꓯ ꓡꓰ ꓥꓪ ꓠꓴꓻ ꓔꓯ ꓢꓲ ꓫꓬ ꓡꓰ ꓝꓲꓳ꓿ ꓞꓳ ꓫꓵꓽ ꓞꓳ ꓙꓰ ꓐꓱ ꓶ ꓟꓷ ꓠꓷ ꓝ ꓒ ꓬꓰ ꓠꓹ ꓟ ꓥꓪ ꓠꓴ ꓔꓯ ꓢꓲꓺ ꓚꓰꓸ ꓔꓸꓳ꓾ ꓐꓯ_ ꓡꓳ꓿ꓮ ꓟꓶ ꓠꓴ ꓔꓴ ꓢꓲ꓾ ꓙꓽ ꓧꓷꓹ ꓧꓷ ꓢꓲ ꓠꓬꓲ꓾ ꓥꓪ ꓡꓰ ꓠꓴ ꓔꓯ ꓕꓵꓼ ꓪ ꓖꓶ_ ꓟ ꓮ ꓙꓵ ꓬꓲ ꓪ ꓔꓯ ꓐꓯ ꓖꓶ ꓬꓰ꓿ ꓬꓲ ꓪ ꓑꓶ ꓓꓴ ꓠꓴ ꓕꓽ ꓙ ꓫꓸ꓿ ꓟꓽ ꓥ ꓠꓬ ꓮ ꓧꓪꓹ ꓥꓪ_ ꓟꓲ ꓬꓲ ꓪ ꓟꓲ ꓙꓬ ꓗꓪ ꓠꓴ ꓔꓯ ꓙ ꓫꓸ ꓡꓰ ꓝꓲ_ ꓟꓽ ꓢꓷ꓿ꓠꓬꓲ ꓠꓹ꓾ ꓕꓲ ꓟꓵꓽ ꓡꓱꓸꓼ_ ꓐꓰ꓾ ꓬꓴ-ꓔ ꓪ ꓔꓲ ꓐꓴ_ ꓐꓰ꓾ ꓖꓳ ꓗꓪ ꓟ ꓪꓴ ꓓꓵ ꓣꓱ ꓒ ꓐꓴ_ ꓐꓰ꓾ ꓔꓲ ꓒ ꓐꓴ_ ꓐꓰ꓾ ꓟꓵꓽ ꓗꓪ ꓟ ꓑ ꓫꓬ ꓐꓴ ꓔꓯ ꓔꓳꓹ ꓠꓹ ꓟ꓾ ꓠꓬꓲꓸ ꓠꓬꓲ ꓥꓪ ꓡꓰ ꓠꓴ ꓔꓯ ꓚꓬꓹ ꓚꓳ ꓔ_ ꓟ ꓡꓳ ꓒꓱ_ ꓐꓰ꓾ ꓧꓳꓻ ꓬꓲꓻ ꓘꓴꓻ_ ꓐꓰ꓾ ꓙꓲꓽ ꓚꓬꓹ ꓒꓬꓱꓼ ꓡ ꓝꓲꓳ꓿ꓬꓲ ꓪ ꓠꓬ ꓠꓴ ꓔꓯ ꓔꓳꓹ_ ꓥꓳ꓿ ꓖꓳ ꓡꓱ ꓥ_ ꓟꓲ ꓬꓲ ꓪ ꓠꓴ ꓔꓯ ꓧꓪꓸ ꓡꓰ ꓟꓽ ꓐ ꓡ꓿ ꓮ ꓡꓲꓳ ꓐꓯ ꓠꓬ ꓠꓴ ꓔꓯ ꓚꓬꓴ ꓠꓹ ꓟ ꓥꓪ ꓠꓴ_ ꓐꓰ ꓔꓬ_ ꓡꓳ꓾ ꓐꓰ ꓬꓰ-ꓧꓳ-ꓧꓪ ꓡꓰ ꓐꓯ_ ꓡꓳ꓿

1 ꓘꓳ-ꓡꓴ-ꓕꓵ 12ꓽ 31-13ꓽ13

ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓬ ꓪ ꓜꓲꓻ ꓪꓴꓽˍ ꓟ ꓡꓯꓼ ꓫꓴ ꓟꓶ ꓠꓹ ꓟ ꓠꓲꓹ ꓡꓱꓻ ꓠꓯꓹ ꓡꓳ꓿ ꓥꓪ ꓠꓬ ꓠꓴ ꓪꓽ ꓔꓯ ꓮꓸ ꓓꓲꓽ ꓙꓲꓻˍ ꓟ ꓚꓱꓹ ꓖꓴ ꓟꓳꓸ ꓖꓶˍ ꓠꓬꓲ꓾ꓥꓪ ꓠꓬ ꓞꓳ ꓤ ꓥꓳꓽ ꓫꓵ ꓥꓳ ꓙꓰꓽˍ ꓐꓰ ꓟꓴꓽ ꓗꓪ ꓝꓲ ꓓꓴ ꓥꓳꓽ ꓫꓸ ꓕꓱ ꓗꓴˍ ꓟꓲ꓾ ꓠꓵꓻ ꓠꓲꓹ ꓟꓽ ꓙꓳ ꓕꓯ ꓠꓽ꓾ ꓥꓪ ꓠꓬ ꓟꓶꓻ ꓓꓴ ꓙꓲꓽ ꓑꓬꓹ꓾ ꓥ ꓠꓬ ꓑꓬꓹ ꓑꓬ ꓞꓪꓽˍ ꓐꓰ ꓕꓲꓽ ꓡꓰꓹꓼ ꓥꓳ꓿ꓥꓪ ꓠꓬ ꓟꓷꓽ ꓠꓷꓹ ꓝꓸ ꓗꓴˍ ꓟ ꓡꓯ ꓫꓴ ꓙꓳ ꓢꓲ꓾ ꓚꓵ ꓘꓶ ꓮꓽ ꓙꓵˍ ꓐꓰ ꓢꓷꓸ ꓠꓲꓹ ꓮꓽ ꓙꓵ ꓙꓽ ꓜꓲꓼˍ ꓟꓲ꓾ ꓝꓮꓲ ꓪꓽ ꓚꓲ ꓔꓯ ꓙꓵꓺ ꓙꓰ ꓝꓲ ꓠ ꓛꓲ ꓙꓵꓻ ꓠꓲꓹ ꓙꓳ ꓥ ꓟꓲ ꓠꓵꓻ ꓠꓲꓹ ꓟꓽ ꓙꓳ ꓕꓯ ꓠꓽ꓾ ꓥꓪ ꓠꓬ ꓮꓸ ꓫꓵˍ ꓟꓲ ꓟꓽ ꓥ꓿ꓝꓮꓲ ꓠꓬ ꓥꓪ ꓙꓳˍ ꓟ ꓮꓽ ꓙꓵ ꓞꓳ ꓫ ꓔꓯ ꓖꓶ ꓜꓽ ꓢꓲ꓾ ꓥꓪ ꓖꓳ ꓓꓱ ꓔꓯ ꓮꓸ ꓔꓳꓸ ꓗꓪ ꓛꓴꓻ ꓠꓹ ꓟ ꓡꓯꓼ ꓙꓱ ꓗꓷ ꓥ ꓟꓲ꓾ ꓠꓵꓻ ꓠꓲꓹ ꓟꓽ ꓙꓳ ꓕꓯ ꓠꓽ꓾ ꓥꓪ ꓐꓱ ꓶ ꓮꓸ ꓫꓵ ꓙꓲ ꓖꓴ ꓟꓽ ꓙꓳ꓿ꓠꓵꓻ ꓠꓲꓹ ꓠꓬ ꓠꓲꓹ ꓟ ꓫꓵ ꓢꓲ ꓠꓲꓹ ꓟ ꓙꓲꓻˍ ꓡꓳ꓿ ꓠꓵꓻ ꓠꓲꓹ ꓠꓬ ꓟꓽ ꓟꓬ ꓦꓯꓸ꓿ ꓟꓽ ꓘꓶꓽ ꓘꓹ꓿ ꓟꓬꓱ ꓓꓳꓽˍ ꓟꓲ ꓟꓽ ꓧꓪ꓿ꓡꓳꓸ ꓟꓽ ꓐꓲꓻˍ ꓟ ꓟꓽ ꓬꓰ꓿ ꓚꓲ ꓛꓬ ꓐꓱ ꓶ ꓙꓲꓻ ꓖꓴ ꓟꓽ ꓧꓪ꓿ ꓟꓽ ꓠꓲꓹ ꓛꓱꓹ꓿ ꓢꓴ ꓡꓰ ꓛꓬ ꓡ ꓟ ꓔꓯ ꓠꓲꓹ ꓟ ꓟꓽ ꓗꓶ꓿ꓥꓶˍ ꓟ ꓔꓯ ꓟꓽ ꓗꓹ ꓛꓲ꓿ ꓔꓱꓹˍ ꓟ ꓔꓯˍ ꓡꓰ ꓗꓹ ꓛꓲꓽˍ ꓡꓳ꓿ꓮ ꓕꓯˍ ꓟꓲ ꓠꓲꓹ ꓟ ꓫꓵˍ ꓡꓳ꓿ ꓮ ꓡꓲ ꓗꓷ ꓡꓰˍ ꓟꓲ ꓙꓵˍ ꓡꓳ꓿ ꓮ ꓕꓯꓽˍ ꓟꓲ ꓥꓳ ꓡꓳꓸˍ ꓡꓳ꓿ ꓮꓸ ꓫꓵ ꓗꓪˍ ꓟꓲ ꓜꓲꓽˍ ꓡꓳ꓿ꓠꓵꓻ ꓠꓲꓹ ꓠꓬ ꓮ ꓕꓯˍ ꓟꓲ ꓟꓽ ꓡꓳꓹ ꓬꓰ꓿ ꓟꓷꓽ ꓠꓷꓹ ꓝꓸˍ ꓟ ꓠꓽ꓾ ꓣꓱ ꓟꓽ ꓬꓯꓼ ꓗꓷ ꓡꓰˍ ꓥꓳ꓿ ꓥꓳꓽ ꓫꓵ ꓥꓳꓽ ꓙꓰꓽˍ ꓟꓲ꓾ ꓠꓽ ꓡꓰˍ ꓥꓳ꓿ ꓢꓷꓸ ꓠꓲꓹˍ ꓟꓲ ꓣꓱꓽ ꓟꓽ ꓬꓯꓼ ꓗꓷ ꓡꓰˍ ꓥꓳ꓿ꓮ ꓡꓲꓳ ꓐꓯ ꓠꓬ ꓣꓳꓽ ꓢꓷꓸˍ ꓟ ꓠꓬ ꓕꓲ ꓐꓱꓻ ꓤꓽˍ ꓡꓰ ꓥ ꓢꓲ꓾ ꓣꓳꓽ ꓟꓷꓽ ꓠꓷꓹ ꓝꓸ ꓟˍ ꓟꓲ ꓕꓲ ꓐꓱ ꓤˍ ꓡꓰꓽ ꓥ ꓡꓳ꓿ꓖꓳ ꓡꓱ ꓥ ꓟꓲ ꓜꓲꓼ ꓓꓰ ꓡꓰˍ ꓟ ꓖꓳ ꓟ ꓛꓲ ꓡ ꓕꓯ꓾ ꓟꓽ ꓪꓴꓽ ꓓꓰˍ ꓟ ꓠꓬ ꓣꓱꓽ ꓟꓽ ꓬꓯꓼ꓾ ꓐꓰ ꓗꓷ ꓡꓰˍ ꓥꓳ꓿ꓥꓪ ꓤ ꓠꓱ ꓤ ꓕꓯ꓾ ꓥꓪ ꓠꓬ ꓤ ꓠꓱ ꓤˍ ꓡꓰ ꓐꓰ ꓓꓵꓽ ꓙꓽ ꓢꓲ꓾ ꓤ ꓠꓱ ꓤˍ ꓡꓰ ꓐꓰ ꓫꓸ ꓕꓱˍ ꓡꓳ꓿ ꓮ ꓟꓶ ꓥꓪ ꓪꓴꓽ ꓡ ꓠꓬ ꓤ ꓠꓱ ꓤ ꓚꓱꓹ ꓔꓯ ꓡꓳ ꓗꓷꓳ꓿ꓮ ꓟꓶ ꓣꓳꓽ ꓠꓬ ꓒꓬꓱꓽ ꓠꓬꓲ ꓓꓴ ꓗꓪ ꓶꓻ ꓶˍ ꓐꓰ ꓟꓳˍ ꓡꓳ꓿ ꓢ ꓖꓪ ꓠꓽ ꓒꓬꓱꓽ ꓔꓳꓹ ꓟꓬ ꓔꓳꓹ ꓟꓳˍ ꓥꓳ꓿ ꓮ ꓟꓶ ꓥꓪ ꓠꓬ ꓕꓲ ꓐꓱꓻ ꓤˍ ꓡꓰ ꓢꓷˍ ꓡꓳ꓿ ꓢ ꓖꓪ ꓠꓽ ꓢꓲ ꓒꓽ ꓥꓪ ꓔꓯ ꓢꓷꓸ ꓖꓴˍ ꓟ ꓡꓰ ꓐꓰ ꓥꓪˍ ꓟꓲ ꓢꓷꓸ ꓖꓴ ꓡꓰˍ ꓥꓳ꓿

ꓡꓴ-ꓘ 4ꓽ 21- 30

ꓬꓰ-ꓢꓴ ꓠꓬ ꓬꓲ ꓪꓽ ꓔꓯ꓾ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓐꓯ ꓘꓶꓽ ꓕꓱ ꓟ ꓠꓬ ꓠꓬꓲꓸ ꓠꓬꓲ ꓠꓴ ꓪꓽ ꓑ ꓙꓽˍ ꓟ ꓗꓪ ꓐꓲ ꓡꓰꓳ꓾ ꓐꓯ ꓖꓶˍ ꓡꓳ꓿ꓖꓳ ꓕꓯ ꓮꓽ ꓙꓵ ꓢꓴ ꓠꓬ ꓬꓲ ꓔꓯ ꓓꓳꓹ ꓟꓴ ꓢꓲ꓾ ꓬꓲ ꓡꓰ ꓐꓯ ꓓꓳ ꓡ ꓟ ꓣꓱꓽ ꓛꓰ ꓙꓳˍ ꓟ ꓐꓯ ꓘꓶꓽ ꓔꓯ ꓓꓵꓽ ꓙ ꓟꓶ ꓢꓲ ꓠꓬꓲ꓾ ꓕꓱ ꓕꓲ ꓣꓳ ꓠꓬ ꓬꓳ-ꓢꓷ ꓬꓲ ꓤ ꓟꓽ ꓥ ꓡ?꓾ ꓐꓯˍ ꓡꓳ꓿ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ꓾ ꓠꓻ ꓫꓬꓹ ꓒꓽꓳ꓾ ꓠꓴ ꓚꓲꓸ ꓛꓬ ꓠꓻ ꓠꓴ ꓫꓬꓹ꓾ ꓐꓯˍ ꓟ ꓥꓳꓽ ꓜꓱ ꓕꓱ ꓟ ꓐꓰ꓾ ꓥꓪ ꓠꓴꓽ ꓑ ꓙꓽ ꓗꓷ ꓟ꓾ ꓘ-ꓒꓱ-ꓠꓴ ꓗꓪ ꓠꓴ ꓬꓰ ꓗꓷ ꓟ ꓟꓬꓱꓽ ꓮꓽ ꓙꓵ ꓕꓻ ꓠꓴ ꓟꓵꓽ ꓠꓴ ꓡꓳꓻ ꓗꓪˍ ꓟꓲ ꓬꓰ꓾ ꓐꓰ ꓮ ꓡꓲ ꓥ ꓟꓲ ꓥꓪ ꓔꓯ ꓐꓯ ꓡ ꓥꓳ꓾ ꓐꓯˍ ꓡꓳ꓿ꓝꓮꓲ ꓬꓲ ꓡꓰ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓟꓷꓽ ꓠꓷꓹ ꓝꓸ ꓢꓴ ꓮꓽ ꓟ ꓔꓯˍ ꓟꓲ ꓬꓲ ꓚꓲꓸ ꓛꓬ ꓟꓵꓽ ꓗꓪ ꓘꓳꓻ ꓣꓴˍ ꓟ ꓟꓽ ꓙꓳ꓿ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ-ꓡꓲ-ꓬ ꓔꓬ ꓟ ꓦꓬꓼ ꓠꓬꓲ ꓗꓪ꓾ ꓢ ꓘꓳꓼ ꓐꓶꓽ ꓟꓶꓽ ꓦ ꓟꓽ ꓦ ꓗꓷ ꓡꓰ ꓢꓲ꓾ ꓕꓲ ꓟꓵꓽ ꓡꓱꓸꓼ ꓗꓪ ꓦꓰꓼ ꓟꓷꓼ ꓘꓳꓼ ꓓꓽ ꓟ ꓓꓳˍ ꓕꓯ꓾ ꓬꓲ-ꓢꓷ-ꓡꓰ ꓟꓵꓽ ꓗꓪ ꓟꓶꓽ ꓛꓵꓽ ꓟ ꓮꓽ ꓟꓬꓹ ꓙꓳˍ ꓡꓳ꓿ꓖꓳ ꓡꓱ ꓥ ꓟꓲ ꓢꓲ-ꓓꓳ ꓟꓵꓽ ꓢ-ꓡꓷ-ꓩ ꓡꓳ ꓒꓱ ꓗꓪ ꓟ ꓟꓶꓽ ꓛꓵꓽ ꓟ ꓕꓲ ꓣꓳ ꓔꓯˍ ꓡꓰꓽ ꓟ ꓥ ꓠꓬ꓾ ꓬꓲ ꓪꓽ ꓖꓳ ꓟꓬ ꓟ ꓮꓽ ꓟ ꓔꓬ ꓗꓪˍ ꓟꓲ ꓬꓲ-ꓡꓲ-ꓬ ꓔꓯ ꓟꓽ ꓝꓲ ꓩꓴ ꓗꓷ꓿ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓡꓲ-ꓫ ꓔꓬ ꓕꓯ꓾ ꓬꓲ-ꓢꓷ-ꓡꓰ ꓟꓵꓽ ꓗꓪ ꓔꓸ ꓟꓼ ꓩꓴ ꓓꓲ ꓢꓴ ꓮꓽ ꓟꓬꓹ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓫꓲ-ꓡꓲ-ꓬꓼ ꓢꓴ ꓠꓰ-ꓬ-ꓟꓷꓽ ꓟꓽ ꓥ ꓠꓬ꓾ ꓠꓱꓸ ꓐꓯ ꓕꓲ ꓣꓳˍ ꓟꓲ ꓟꓽ ꓫꓬꓻ ꓡꓰ꓾ ꓐꓯˍ ꓡꓳ꓿ꓜꓲꓼ ꓦꓲ ꓗꓪ ꓟ ꓡꓽ ꓞꓳ ꓮꓽ ꓙꓵ ꓐꓯ ꓘꓶꓽ ꓕꓱ ꓟ ꓑ ꓙꓽ ꓗꓷ ꓠꓬ꓾ ꓠꓲꓹ ꓟ ꓮꓽ ꓘꓶꓸ ꓦꓶꓻ ꓠꓬꓲ꓾ꓔꓴ ꓡ ꓢꓲ꓾ ꓬꓲ ꓔꓯ ꓡꓳ ꓒꓱ ꓗꓪ ꓐꓰ ꓖꓼ ꓓꓳ ꓩꓴ ꓗꓷ ꓢꓲ ꓠꓬꓲ꓾ ꓬꓲ ꓪꓽ ꓡꓳ ꓒꓱ ꓜꓶꓻ ꓔ ꓖꓴ ꓪꓽ ꓡꓵꓸ ꓘꓶꓽ ꓗꓪ ꓧꓳꓽ ꓙꓰ ꓢꓲ꓾ ꓬꓲ ꓔꓯ ꓓꓱꓽ ꓞꓰꓻ ꓩꓴ ꓗꓷˍ ꓐꓰ ꓬꓰˍ ꓡꓳ꓿ꓖꓳ ꓡꓱ ꓥ ꓟꓲ ꓬꓲ ꓠꓽ ꓬꓲ ꓪꓽ ꓗꓳ ꓡꓳ ꓗꓪ ꓐꓰ ꓗꓳꓸ ꓙꓰ ꓢꓲ ꓙꓰ ꓗꓷꓳ꓿ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓟꓵꓽ ꓘꓹ-ꓒꓱ-ꓠꓴ ꓟꓬꓱꓺ ꓔ ꓟ ꓡꓳ ꓒꓱ ꓗꓪ ꓬꓯꓼ ꓡ ꓡꓳ꓿ ꓠꓽ ꓦꓬꓼ ꓠꓬꓲ ꓗꓪ ꓬꓲ ꓠꓬ ꓬꓲ ꓪꓽ ꓔꓯ ꓟꓸ ꓟꓲꓽ ꓟꓸ ꓖꓶˍ ꓡꓳ꓿