ꓠꓲꓹ ꓗꓴ ꓟꓬ ꓗꓴ ꓢꓴ ꓖꓶ ꓙ ꓟꓳˍ ꓟ (ꓶꓼ ꓓꓳ ꓫꓱꓹ ꓓꓳ)

 ꓠꓬꓲꓸ ꓠꓬꓲ 5 ꓦ 11 ꓠꓬꓲ ꓗꓪ ꓟ ꓢꓲꓽ ꓫꓬ ꓕꓳꓽ ꓶ ꓝꓲ ꓠꓬ꓾ ꓬꓳ-ꓦ 16ꓽ5-11 ꓥ ꓡꓳ= ꓟꓸ ꓟꓲꓽ ꓗꓪ ꓢꓲꓺ  ꓒ ꓬꓰ-ꓢꓴ ꓠꓬ꓾ ꓥꓪ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓯ ꓙꓰˍ ꓥꓳ= ꓠꓴ ꓪ ꓮꓽ ꓟˍ ꓟꓲ ꓥꓪ ꓔꓯ ꓠꓴ ꓮ ꓡꓰ ꓗꓪ ꓙꓰˍ? ꓐꓰ ꓟꓽ ꓠ ꓠꓬꓲ ꓡ= ꓖꓳ ꓡꓱ ꓥˍ ꓟꓲ ꓥꓪ ꓐꓯ ꓙꓲ ꓙꓳˍ ꓟ ꓥꓪ ꓐꓯꓟꓳꓸ ꓖꓶˍ ꓥꓳ= ꓥꓪ ꓠꓬ ꓐꓹ ꓐ ꓔꓬ ꓗꓪ ꓙꓰˍ ꓥꓳ= ꓥꓪ ꓬꓯꓼ ꓡ ꓟ ꓔꓬ ꓖꓴ ꓗꓪ ꓥꓪ ꓝꓮꓲ ꓕꓲ ꓧꓪꓹ ꓙꓰˍ ꓥꓳ꓾ ꓐꓰ ꓐꓯ ꓟ ꓟꓸ ꓟꓲꓽ ꓥ ꓡꓳ=

ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳꓽ ꓔꓯ ꓟꓸ ꓖꓶ ꓡ ꓔꓬ ꓟ ꓠꓬ꓾ ꓣꓳ ꓠꓬ ꓬꓰ-ꓢꓴ ꓔꓯ ꓔꓯꓺ ꓢꓳ ꓓꓴ ꓬꓰ ꓡꓯ= ꓬꓰ-ꓢꓴ ꓠꓬ ꓬꓲꓸ ꓮ ꓡꓰ ꓗꓪ ꓐꓰ ꓡ ꓢꓲ꓾ ꓮ ꓡꓰ ꓗꓪ ꓙꓰˍ ꓟ ꓬꓲꓸ ꓢꓷˍ ꓟ ꓡꓰ ꓐꓰ ꓣꓳ ꓥˍ ꓟꓲ꓾ ꓮ ꓡꓰ ꓗꓪ ꓐꓰ ꓡ ꓢꓲ ꓮ ꓡꓰ ꓗꓪ ꓙꓰˍ ꓟ ꓔꓯ ꓢꓷꓸ ꓔ ꓠꓹ ꓟ ꓬꓳꓸ ꓚꓵˍ ꓡꓳ=

ꓟꓲ ꓠꓯ ꓕꓱ ꓟ ꓗꓪ ꓣꓳꓽ ꓮ ꓡꓰ ꓗꓪ ꓐꓰ ꓡ ꓢꓲ ꓮ ꓡꓰ ꓗꓪ ꓙꓰˍ ꓟ ꓔꓯ ꓟꓽ ꓢꓷꓸ ꓢꓷꓸ꓾ꓕꓲ ꓠꓬꓲ ꓡꓰ ꓕꓲ ꓠꓬꓲ ꓔꓬ ꓠꓬ ꓣꓳ ꓢꓯꓸ ꓔꓬ ꓟ ꓠꓬ ꓮꓽ ꓔꓳ ꓡꓰꓽ ꓥꓳ꓾ ꓬꓲꓸ ꓬꓲ ꓢꓲꓺ ꓟꓽ ꓙꓳ= ꓬꓰ-ꓢꓴ ꓡꓰ ꓥꓪ ꓠꓬ ꓥꓪ ꓡ ꓗꓷ ꓖꓴ ꓗꓪ ꓝꓮꓲ ꓕꓲ ꓧꓪꓹ ꓬꓲꓼ ꓙꓰˍ ꓥꓳ= ꓥꓪ ꓙꓰˍ ꓟ ꓗꓪ ꓮ ꓟꓶ ꓠꓴ ꓪ ꓡ ꓟꓽ ꓐ ꓡ ꓢꓰꓽ= ꓖꓳ ꓡꓱ ꓥˍ ꓟꓲ ꓕꓲ ꓠꓬꓲ ꓙꓳˍ ꓠꓬ ꓠꓴ ꓪˍ ꓟꓲ ꓖꓳ ꓗꓪ ꓛꓲꓺ ꓡˍ ꓥꓳ꓾ ꓐꓰ ꓐꓯ ꓡꓳ=

ꓖꓳ ꓡꓱ ꓠꓬꓲ ꓣꓳꓽ ꓟꓲ ꓠꓯ ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓔꓬ ꓕꓯ ꓟꓲ ꓠꓯ ꓗꓪ ꓢꓯꓸ ꓔꓬ ꓕꓯ ꓓꓵꓽ ꓙ ꓠꓬꓲ ꓓꓴ ꓠꓬ꓾ ꓣꓳ ꓠꓬ ꓮ ꓡꓰ ꓗꓪ ꓐꓰ ꓡˍ ꓡ? ꓝꓮꓲ ꓠꓬ ꓮ ꓡꓰ ꓗꓪ ꓙꓰ ꓔꓬ ꓡ? ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓓꓴ ꓥꓳ= ꓖꓳ ꓡꓱ ꓠꓬꓲ ꓣꓳꓽ ꓢꓷꓸ ꓠꓹ ꓟ ꓠꓬ꓾ ꓣꓳꓽ ꓠꓬ ꓪꓴ-ꓢ ꓗꓪ ꓐꓰ ꓡ ꓢꓲ ꓪꓴ-ꓢ ꓔꓯ ꓬꓲꓼ ꓙꓰˍ ꓥꓳ ꓐꓯ ꓟ ꓔꓯ ꓮ ꓕꓯ ꓟꓲ ꓓꓵꓽ ꓙ ꓠ ꓔ ꓡꓳ=

ꓣꓳ ꓠꓬ ꓟꓲ ꓠꓯ ꓗꓪ ꓪꓰꓻ ꓤ ꓟꓳ ꓔꓬ ꓟ ꓥ ꓡꓳ= ꓮ ꓟꓶ ꓣꓳꓽ ꓔꓬ ꓟ ꓠꓽ ꓕꓲꓽ ꓞꓲꓼ ꓕꓲꓽ ꓑ ꓟ ꓦꓲꓻ ꓟꓽ ꓥ= ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓔꓳꓹ ꓜꓳꓽ ꓔꓬ ꓟ ꓫꓸ ꓙꓵ ꓟꓷ ꓙꓵ ꓓꓴ ꓠꓬ ꓕꓲ ꓑꓹ ꓤ ꓥ ꓢꓲ꓾ ꓕꓲ ꓠꓬꓲ ꓗꓪ ꓠꓬ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲꓺˍ ꓟ꓾ ꓕꓲ ꓞꓲꓼ ꓕꓲ ꓑ ꓗꓹ ꓛꓲꓽ ꓓꓰ ꓡꓰˍ ꓟ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰ ꓠꓹ ꓟ ꓣꓳ ꓢꓯꓼ ꓕꓵꓼ ꓠ ꓗˍ ꓟ ꓥ ꓡꓳ=

ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ꓾ ꓥꓪ ꓠꓬ ꓥꓪ ꓡ ꓖꓴ ꓗꓪ ꓝꓮꓲ ꓕꓲ ꓧꓪꓹ ꓬꓲꓼ ꓙꓰˍ ꓥꓳ꓾ ꓐꓯ ꓟ ꓡꓰ ꓐꓰ ꓣꓳꓽ ꓥ ꓟꓲ ꓕꓲ ꓠꓬꓲ ꓙꓳˍ ꓠꓬ ꓖꓳ ꓗꓪ ꓙꓰ ꓪ ꓠꓹ ꓟ ꓥ ꓡꓳ= ꓟꓸ ꓟꓲꓽ ꓕꓲ ꓟ ꓙꓳˍ ꓡꓳ= ꓮ ꓠꓱ ꓕꓯ ꓡ ꓞꓳ ꓕꓲ ꓣꓳ ꓠꓬ ꓟꓸ ꓒ ꓕꓲ ꓣꓳ ꓔꓯ ꓙꓰ ꓢꓲ꓾ ꓟꓸ ꓒꓽꓳ꓾ ꓥꓪ ꓠꓬ ꓟꓲ ꓠꓯ ꓗꓪ ꓮ ꓘꓶꓸ ꓗꓹ ꓛꓲꓽ ꓠꓲꓹ ꓫꓵˍ ꓡꓳ= ꓥꓪ ꓮꓸ ꓫꓵꓽ ꓬꓰ ꓠꓯꓹ ꓡ? ꓐꓰ ꓠ ꓠꓬꓲˍ ꓡꓳ=

ꓖꓳ ꓕꓯ ꓟꓸ ꓒ ꓖꓳ ꓕꓲ ꓣꓳ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓠꓴ ꓔꓯ ꓕꓲ ꓙꓰꓽ ꓐꓯ ꓖꓶ ꓠꓬꓲ꓾ ꓠꓴ ꓗꓹ ꓘꓶꓽ ꓓꓳ ꓙꓰˍ ꓕꓯ ꓠꓴ ꓚꓬꓹ ꓢꓲꓸ ꓮ ꓟꓬꓹ ꓔꓯꓹ ꓙꓰˍ ꓡ? ꓥ ꓠꓬ ꓮ ꓔꓲꓸ ꓤ ꓡꓰꓽ ꓔꓯꓹ ꓙꓰˍ ꓡ? ꓐꓰ ꓐꓯ ꓡꓳ= ꓖꓳ ꓕꓯ ꓡ ꓞꓳ ꓒ ꓡꓰ ꓙꓰ ꓖꓴ ꓶꓽˍ ꓠꓬ ꓚꓬꓹ ꓢꓲꓸ ꓮꓸ ꓔꓲꓸ ꓤ ꓡꓰꓽ ꓣꓴˍ ꓠꓬ ꓪ ꓙꓲ ꓡꓳꓺ ꓢꓲ꓾ ꓪ ꓙꓲ ꓗꓹ ꓛꓲꓽˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ=

 ꓖꓳ ꓡꓱ ꓢꓲ ꓟꓸ ꓒ ꓡꓰ꓾ ꓥ ꓡꓳ ꓥꓪ ꓤꓽꓳ꓾ ꓠꓴ ꓐꓯ ꓟ ꓜꓳꓽˍ ꓡꓳ= ꓣꓳ ꓠꓬ ꓟꓲ ꓠꓯ ꓗꓪ ꓪꓰ ꓤ ꓟꓳ ꓔꓬ ꓟ ꓥ ꓡꓳ= ꓠꓲꓹ ꓫ ꓟꓬ ꓫ ꓓꓴ꓾ ꓠꓲꓹ ꓟ ꓟꓽ ꓢ ꓓꓴ꓾ ꓝꓮꓲꓸ ꓣꓱꓽ ꓟꓽ ꓬꓯꓼ ꓟ ꓚꓬꓹ ꓢꓲꓸ ꓮ ꓟꓬꓹ ꓟꓯ ꓔ ꓢꓲ ꓗꓹ ꓘꓶꓽ ꓓꓳ ꓙꓰˍ ꓠꓬ ꓮ ꓡꓰ ꓐꓯ ꓢꓲ ꓗꓹ ꓛꓲꓽ ꓐ ꓡˍ ꓢꓰꓽ= ꓠꓴ ꓗꓹ ꓛꓲꓽ ꓠꓲꓹ ꓫꓵˍ ꓠꓬꓲ ꓕꓱ ꓟ ꓔꓯ ꓡꓰꓽ ꓓꓵꓽ ꓙ ꓔ=

ꓣꓳ ꓠꓬ ꓪꓰ ꓤ ꓥ ꓡꓳ= ꓖꓳ ꓡꓱ ꓠꓬꓲ ꓠꓲꓹ ꓫ ꓟꓬ ꓫ ꓓꓴ ꓔꓯ ꓟꓽ ꓟꓯ ꓟꓯ꓾ ꓪꓴ-ꓢ ꓔꓯ ꓖꓶ ꓗꓷ ꓢꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓡꓳ ꓡꓳ ꓡꓰꓽ ꓢꓯꓼ ꓕꓵꓼ ꓙꓰˍ ꓠꓬ ꓠꓴ ꓤꓶꓻ ꓗꓪ ꓮ ꓘꓶꓸ ꓗꓹ ꓛꓲꓽ ꓢꓲ꓾ ꓪꓴ-ꓢ ꓡꓰ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓖꓶ ꓡˍ ꓟ ꓶꓼ ꓕ ꓫꓱꓸ ꓤ ꓗꓪ ꓐꓰ ꓗꓹ ꓛꓲꓽ ꓡˍ ꓥꓳ꓾ ꓐꓰ ꓬꓲ ꓔꓯ ꓐꓯ ꓖꓶˍ ꓡꓳ=

ꓕꓱ ꓟ ꓡꓰ ꓐꓰ ꓣꓳ ꓤꓶꓻ ꓗꓪ ꓥˍ ꓟꓲ ꓣꓳ ꓠꓬ ꓪꓰ ꓤ ꓥ ꓟ ꓑꓶꓸ ꓓꓴ꓾ ꓢꓲꓺ ꓒ ꓬꓰ-ꓢꓴ ꓡꓰ ꓐꓰ ꓮ ꓡꓰ ꓗꓪ ꓚꓳꓸ ꓡ ꓢꓲ꓾ ꓮ ꓡꓰ ꓗꓪ ꓬꓲꓼ ꓙꓰ ꓠ ꓗꓹ ꓟ ꓢꓷꓸ ꓔ ꓠꓬ ꓣꓳ ꓟꓲ ꓠꓯ ꓗꓪ ꓢꓯꓸ ꓔꓬ ꓟ ꓬꓲꓸ ꓬꓲ ꓢꓲꓺ ꓠꓬ ꓐꓲꓺ ꓙꓲꓼ ꓡꓰˍ ꓥꓳ ꓐꓰ꓾ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳꓽ ꓔꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ=