ꓠꓲꓹ ꓟ ꓒꓳꓹ ꓡꓰꓼ ꓢꓲ ꓪꓴ-ꓢ ꓔꓯ ꓡ ꓠˍ ꓟ (ꓧꓳꓟꓲꓡꓬ)

ꓜꓺ ꓚꓵꓸ ꓚꓵꓸ ꓙꓵꓹ ꓠꓯꓸꓼ ꓗꓪ 4 ꓫꓵꓽ ꓠ꓾

2 ꓚꓸꓸ ꓟꓲꓽ ꓕꓳꓽ ꓶ 36: 14-16ꓹ 19-23

 ꓔꓲ ꓒ ꓪꓴ ꓓꓵ ꓣꓱ ꓢꓴ ꓐꓴ_ ꓐꓰ ꓑ ꓫꓬ ꓐꓴ_ ꓟꓲ ꓬꓲ ꓖꓳ ꓡꓱ ꓮ ꓘꓶ ꓛꓬꓻ ꓡꓰ ꓢꓲ꓾ ꓞꓳ ꓫꓵꓽ ꓐꓴ ꓠꓲ ꓒꓳꓹ_ ꓡꓳ ꓫꓵ ꓗ ꓠꓯ ꓛꓳ ꓙꓰ_ ꓡꓳ꓿ ꓬꓲ ꓪ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓬꓰ-ꓧꓳ-ꓧꓪ ꓡꓰ ꓢꓲ ꓫꓬ ꓡꓰ ꓝꓲ_ ꓟ ꓬꓲ ꓦꓲ ꓔꓯ ꓟꓽ ꓫꓬ ꓟ ꓗꓷ ꓡꓰ ꓝꓲ_ ꓡꓳ꓿ ꓬꓲ ꓪ ꓒꓵꓽ ꓒ ꓐꓴ ꓬꓰ-ꓧꓳ-ꓧꓪ ꓪꓴ-ꓢ ꓠꓬ ꓬꓲ ꓑ ꓫꓬ ꓐꓴ_ ꓐꓰ ꓬꓲ ꓔꓬ ꓖꓴ ꓦꓲ ꓔꓯ ꓙ ꓗꓳ_ ꓟ ꓑꓶ ꓓꓴ꓾ ꓟꓽ ꓠꓽ ꓠꓽ ꓬꓲ ꓝꓲ ꓓꓴ ꓐꓴ ꓔꓯ ꓝꓲ ꓩꓴ ꓡ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓲ ꓪ ꓠꓬ ꓪꓴ-ꓢ ꓬꓲ ꓝꓲ ꓓꓴ ꓐꓴ ꓔꓯ ꓤꓲꓺ ꓢꓲ꓾ ꓪꓴ-ꓢ ꓐꓯ ꓘꓶ ꓔꓯ ꓟꓳ ꓟꓽ ꓟꓵ ꓢꓲ ꓠꓬꓲ꓾ ꓬꓲ ꓟꓷ ꓠꓷꓹ ꓝ ꓒ ꓐꓴ ꓔꓯ ꓪ ꓫꓱ_ ꓡꓳ꓿ ꓖꓳ ꓡꓱ ꓢꓲ ꓬꓲ ꓑ ꓫꓬ ꓐꓴ ꓔꓯ ꓔꓳꓹ ꓠꓹ ꓟ꓾ ꓚꓬꓴ ꓚꓱꓹ ꓟꓽ ꓙꓳ ꓠ ꓛꓲ ꓬꓰ-ꓧꓳ-ꓧꓪ ꓦꓶ ꓠꓲꓹ ꓐꓬ ꓔꓴ ꓡ_ ꓡꓳ꓿ ꓬꓲ ꓪ ꓡꓰ ꓪꓴ-ꓢ ꓦꓲ ꓔꓯ ꓛꓴ ꓗꓷ ꓢꓲ꓾ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓚꓬꓹ ꓔꓯ ꓒꓬꓹ ꓗꓷ ꓢꓲ ꓠꓬꓲ꓾ ꓖꓳ ꓠꓯꓸꓼ ꓗꓪ ꓟ ꓪ ꓔꓲ ꓙ ꓮ ꓙꓵ ꓔꓯ ꓮ ꓔꓳꓸ ꓡꓰ ꓛꓴ ꓗꓷ ꓢꓲ꓾ ꓒꓵꓽ_ ꓟ ꓡꓴ ꓥ ꓕ ꓑꓳ ꓔꓯ ꓐꓬ ꓡꓰ ꓝꓲ_ ꓡꓳ꓿ ꓮ ꓕꓽ ꓪꓴ ꓒꓲ ꓗꓪ ꓐꓰ ꓡꓲꓹ ꓗꓷ ꓢꓴ ꓔꓯ ꓠꓬ ꓬꓲ ꓡꓰ ꓐ-ꓐꓲ-ꓡꓶ ꓗꓪ ꓡꓳꓽ ꓔꓯꓹ ꓙꓰ ꓢꓲ꓾ ꓬꓲ ꓪ ꓠꓬ ꓒ-ꓫ ꓗꓴꓷ ꓪꓽ ꓠꓬꓲ ꓔꓴ ꓡ_ ꓗꓪ ꓛꓲ꓾ ꓪ ꓔꓲ_ ꓐꓰ ꓬꓲ ꓤ ꓐꓴ ꓐꓱ ꓶ ꓚꓳ ꓑ ꓬꓰ_ ꓡꓳ꓿ ꓕꓱ ꓟ ꓠꓬ ꓬꓰ-ꓡꓲ-ꓟꓲ ꓟꓷ ꓠꓷ ꓗꓪ ꓐꓰ ꓐꓯ ꓗꓷ ꓟ꓾ ꓟꓵꓽ ꓠꓬ ꓬꓲ ꓠꓽ ꓦꓬ ꓠꓬꓲ ꓮ ꓙꓵ ꓟ ꓗꓪ ꓪꓴ ꓧꓶ ꓠꓽ ꓪ ꓡꓰ_ ꓗꓪ ꓛꓲ꓾ ꓬꓰ-ꓧꓳ-ꓧꓪ ꓬꓲ ꓐꓯ ꓘꓶ ꓔꓯ ꓐꓲꓺ ꓡꓰ ꓝꓲ ꓠꓹ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ-ꓢꓷ-ꓡꓰ ꓟꓵ ꓠꓽ ꓙꓬ ꓓꓷꓼ ꓓꓷ_ ꓐꓰ ꓓ ꓢꓲ꓾ ꓫꓵꓽ ꓞꓲ ꓘꓳꓼ ꓐꓲ ꓡꓰ_ ꓗꓪ ꓛꓲ ꓪꓴ ꓧꓶ ꓠꓽ ꓪ ꓡꓰꓳ꓿ ꓖꓳ ꓡꓱ ꓠꓬ ꓒ-ꓫ ꓪ ꓔꓲ ꓘꓴ-ꓣ-ꓫꓵ ꓪ ꓔꓲ ꓣꓱ_ ꓟ ꓬꓲ ꓪꓴ ꓕꓲ ꓘꓳꓼ ꓗꓪ꓾ ꓬꓰ-ꓡꓲ-ꓟꓲ ꓗꓪ ꓐꓰ ꓐꓯ ꓔ_ ꓟ ꓬꓰ-ꓧꓳ-ꓧꓪ ꓐꓯ ꓘꓶ ꓔꓯ ꓒꓬꓱꓼ ꓡ ꓝꓲ ꓠꓹ ꓟ꓾ ꓬꓰ-ꓧꓳ-ꓧꓪ ꓠꓬ ꓒ-ꓫ ꓪ ꓔꓲ ꓘꓴ-ꓣ-ꓫꓵ ꓠꓲꓹ ꓟ ꓔꓯ ꓡꓵꓹ ꓔꓴ ꓖꓶ_ ꓡꓳ꓿ ꓖꓳ ꓡꓱ ꓢꓲ ꓬꓲ ꓠꓬ ꓕꓳ ꓶ ꓗꓪ ꓐꓳ ꓢꓲ꓾ ꓬꓲ ꓕꓲ ꓗꓴꓷ ꓡꓱꓸꓼ ꓗꓪ ꓐꓯ ꓑꓶ ꓕꓲ ꓫꓵꓽ ꓚ ꓒꓬꓱ ꓙꓰ ꓢꓲ ꓕꓱ ꓡꓱ ꓐꓯ_ ꓡꓳ꓾ ꓒ-ꓫ ꓪ ꓔꓲ ꓘꓴ-ꓣ-ꓫꓵ ꓠꓬ ꓕꓱ ꓡꓱ ꓐꓯ_ ꓡꓳ꓾ ꓟꓴ ꓗꓪ ꓕꓯ ꓢꓲ ꓗꓪ ꓔꓬ_ ꓟ ꓬꓰ-ꓧꓳ-ꓧꓪ ꓪꓴ-ꓢ ꓠꓬ ꓟꓲ ꓠꓯ ꓗꓪ ꓟ ꓗꓴꓷ ꓥ ꓕ ꓑꓳ ꓥꓪ ꓔꓯ ꓖꓶ ꓡ_ ꓡꓳ꓿ ꓬꓴ-ꓔ ꓟꓵꓽ ꓗꓪ ꓟ ꓙꓱ-ꓣꓴ-ꓢ-ꓡꓱ ꓗꓪ ꓬꓲ ꓐꓱ ꓶ ꓢꓲ ꓫꓬ ꓦꓲ ꓕꓲ ꓦꓲ ꓫꓬꓹ ꓠ ꓟ꓾ ꓬꓲ ꓡꓰ ꓥꓪ ꓔꓯ ꓕꓵꓼ ꓪ ꓖꓶ ꓡꓻꓳ꓿ ꓠꓴ ꓪ ꓗꓳ ꓡꓳ ꓗꓪ ꓔꓬ ꓢꓴ ꓬꓲ ꓑ ꓫꓬ ꓮ ꓟ ꓔꓯ ꓥ_ ꓟꓲ꓾ ꓬꓰ-ꓧꓳ-ꓧꓪ ꓪꓴ-ꓢ ꓠꓬ ꓬꓲ_ ꓐꓰ ꓕꓲ ꓪꓺꓼ ꓔꓬ ꓝꓲ꓿ ꓬꓲ ꓔꓯ ꓠꓬ ꓬꓴ-ꓔ ꓟꓵꓽ ꓗꓪ ꓓꓯ ꓙꓰ ꓝꓲ꓾ ꓐꓰ ꓐꓯ ꓒꓬꓱ ꓗꓷ_ ꓡꓳ꓿

ꓬꓲ-ꓩꓴ-ꓢꓳ 2ꓽ 4-10

ꓖꓳ ꓡꓱ ꓥ ꓟꓲ ꓫꓱꓸ ꓤ ꓠꓲꓹ ꓐꓳ ꓞꓹ ꓢꓴ ꓪꓴ-ꓢ ꓠꓬ꓾ ꓬꓲ ꓠꓵ ꓠꓲꓹ ꓓꓽ ꓟ ꓡꓰ ꓣꓳꓽ ꓔꓯ ꓠꓲꓹ ꓠꓵˍ ꓠꓬꓲ꓾ 5 ꓣꓳꓽ ꓠꓬ ꓣꓳꓽ ꓛꓬꓻ ꓖꓴ ꓗꓪ ꓫꓵꓻ ꓞꓹ ꓕꓯ꓾ ꓙꓲ-ꓢꓴˍ ꓐꓰ ꓕꓲ ꓪꓺꓼ ꓣꓳꓽ ꓔꓯ ꓢꓯꓸ ꓡ ꓝꓲꓳ꓿ (ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠ ꓣꓱꓽ ꓛꓰ ꓗꓪ ꓐꓰ ꓢꓯꓼ ꓟꓬ ꓟꓶ ꓗꓷ ꓢꓴ ꓥ ꓡꓳ꓿) 6 ꓪꓴ-ꓢ ꓡꓰ ꓙꓲ-ꓢꓴˍ ꓐꓰ ꓕꓲ ꓪꓺꓼ ꓣꓳꓽ ꓔꓯ ꓢꓯꓸ ꓡ ꓝꓲ ꓢꓲ꓾ ꓬꓲˍ ꓐꓰ ꓕꓲ ꓪꓺꓼ ꓟꓴꓽ ꓗꓪ ꓕꓯ ꓢꓲ ꓗꓪ ꓣꓳꓽ ꓔꓯ ꓠꓬꓲꓸ ꓠꓸ ꓝꓲˍ ꓡꓳ꓿ 7 ꓕꓱ ꓟ ꓠꓬ ꓬꓲ ꓡꓰ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓣꓳꓽ ꓔꓯ ꓙꓽ ꓗꓳˍ ꓟ ꓐꓰ꓾ ꓣꓳꓽ ꓐꓱ ꓶ ꓬꓲ ꓣꓱꓽ ꓛꓰ ꓮ ꓓꓲꓽ ꓐꓳ ꓞꓹ ꓟ꓾ ꓡ ꓠꓹ ꓟ ꓤꓶꓻ ꓗꓪ ꓟꓳꓸ ꓖꓶ ꓓꓳ ꓡ ꓠꓹ ꓟ ꓥ ꓡꓳ꓿ 8 ꓮ ꓡꓲꓳ ꓐꓯ ꓠꓬ ꓣꓱꓽ ꓛꓰ ꓗꓪ ꓐꓰ꓾ ꓙꓵꓻ ꓠꓲꓹ ꓑꓶ ꓓꓴ ꓠꓴ ꓪꓽ ꓢꓯꓼ ꓟꓬ ꓝ ꓟꓶ ꓗꓷ ꓟ ꓥ ꓡꓳ꓿ ꓕꓱ ꓟ ꓠꓽ ꓚꓲ ꓛꓬ ꓗꓪ ꓐꓰ ꓟꓽ ꓥ꓾ ꓪꓴ-ꓢ ꓡꓯꓼ ꓫꓴ ꓥ ꓡꓳ꓿ 9 ꓢꓯꓼ ꓟꓬ ꓟꓶˍ ꓟ ꓠꓬ ꓚꓲ ꓛꓬ ꓟꓬꓱꓽ ꓬꓰ ꓢꓯꓼ ꓕꓵˍ ꓟ ꓗꓪ ꓐꓰ ꓟꓽ ꓥ ꓠꓬꓲ꓾ ꓮꓽ ꓟˍ ꓟꓲ ꓘꓶꓽ ꓘꓹ ꓓꓴ ꓟꓽ ꓙꓳ꓿ 10 ꓮ ꓡꓲꓳ ꓐꓯ ꓠꓬ ꓣꓳꓽ ꓠꓽ ꓬꓲ ꓡꓯꓼ ꓟꓬꓱꓽ ꓥ ꓢꓲ꓾ ꓙꓲˍ ꓟ ꓟꓬꓱꓽ ꓬꓰ ꓠꓹ ꓟ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓚꓰꓼ ꓔ ꓟ ꓥ ꓡꓳ꓿ ꓙꓲˍ ꓟ ꓟꓬꓱꓽ ꓬꓰ ꓠꓹ ꓟ꓾ ꓪꓴ-ꓢ ꓠꓬ ꓧꓶꓸ ꓕꓯˍ ꓡꓰ ꓣꓳꓽ ꓐꓱ ꓶ ꓙꓽ ꓖꓶ ꓔ ꓟ ꓥ ꓡꓳ꓿ 

ꓬꓳ-ꓦ 3ꓽ 14-21

ꓬꓲ ꓔꓯ ꓙꓵꓻ ꓢꓴ ꓮꓽ ꓟ ꓥ ꓟꓲ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠ ꓟ꓾ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓟꓳ-ꓫꓲ ꓡꓰ ꓩꓴ ꓔꓯ ꓔꓳꓹ ꓔꓴ ꓗꓷ ꓟ ꓡꓰ ꓐꓰ꓾ ꓡ-ꓞꓳ-ꓮ-ꓐꓲ ꓔꓯˍ ꓟꓲ ꓔꓳꓹ ꓔꓴ ꓗꓷ ꓠ ꓗꓹ ꓥꓳ꓿ 16 ꓮꓽ ꓟ ꓥ ꓟꓲ ꓬꓲ ꓔꓯ ꓙꓵꓻˍ ꓠꓬ ꓟꓽ ꓟꓶꓽ ꓡꓰ ꓢꓲ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠꓹ ꓟ꓾ ꓪꓴ-ꓢ ꓠꓬ ꓬꓲ ꓤ ꓔꓲꓸ ꓖꓶ ꓗꓷ ꓗꓪ ꓛꓲ꓾ ꓟꓲ ꓠꓯ ꓞꓳ ꓤ ꓔꓯ ꓠꓲꓹ ꓠꓵˍ ꓡꓳ꓿ 17 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓬꓲ ꓮ ꓐꓲ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓡ ꓟ ꓠꓬ꓾ ꓟꓲ ꓠꓯ ꓞꓳ ꓤ ꓔꓯ ꓐꓯ ꓟꓴ ꓘꓶꓽ ꓠꓹ ꓟ ꓟꓽ ꓥ꓿ ꓬꓲ ꓗꓪ ꓐꓰ ꓟꓲ ꓠꓯ ꓞꓳ ꓤ ꓢꓯꓼ ꓟꓬ ꓝꓸ ꓟꓶ ꓡꓰ ꓠꓹ ꓟ ꓥ ꓡꓳ꓿ 18 ꓬꓲ ꓔꓯ ꓙꓵꓻ ꓢꓴ ꓔꓯ ꓠꓬ ꓐꓯ ꓟꓴ ꓟꓽ ꓘꓶꓽ꓿ ꓟꓽ ꓙꓵꓻ ꓢꓴ ꓔꓯ ꓠꓽ꓾ ꓪꓴ-ꓢ ꓤ ꓔꓲꓸ ꓔꓯ ꓟꓽ ꓙꓵꓻ ꓠꓬꓲ꓾ ꓮ ꓟꓶˍ ꓡꓰ ꓐꓯ ꓟꓴ ꓘꓶꓽ ꓗꓷꓳ꓿ 19 ꓐꓯ ꓟꓴ ꓠꓬ ꓕꓱ ꓟ ꓥ ꓡꓳ꓾ ꓠꓬꓲ ꓟꓳ ꓓꓴ ꓠꓬ ꓟꓲ ꓠꓯ ꓗꓪ ꓡ ꓗꓷꓳ꓿ ꓖꓳ ꓡꓱ ꓥ ꓟꓲ ꓞꓳ ꓤ ꓠꓬ ꓥꓶˍ ꓟ ꓟꓬꓱꓽ ꓬꓰ ꓢꓴ ꓥ ꓠꓬꓲ꓾ ꓠꓬꓲ ꓟꓳ ꓓꓴ ꓔꓯ ꓠꓵꓻˍ ꓟ ꓢꓶꓸ ꓟꓽ ꓞꓲ ꓠꓯ ꓞꓲꓹ ꓟ ꓔꓯ ꓠꓵˍ ꓡꓳ꓿ 20 ꓮ ꓡꓲꓳ ꓐꓯ ꓠꓬ ꓥꓶˍ ꓟ ꓬꓰ ꓢꓴ ꓮꓽ ꓟ ꓥ ꓟꓲ ꓠꓬꓲ ꓟꓳ ꓓꓴ ꓔꓯ ꓠꓲꓹ ꓜꓳ ꓢꓲ꓾ ꓬꓲ ꓥꓶˍ ꓟ ꓬꓰˍ ꓟ ꓔꓯ ꓖꓴ ꓟꓳꓸ ꓖꓶ ꓡ ꓟ ꓔꓯ ꓗꓳꓺ ꓚꓱ ꓠꓬꓲ꓾ ꓠꓬꓲ ꓟꓳ ꓓꓴ ꓔꓯ ꓟꓽ ꓡ꓿ 21 ꓔꓱꓹˍ ꓟ ꓬꓰ ꓢꓴ ꓠꓽ ꓬꓲ ꓬꓰˍ ꓟ ꓟꓬꓱꓽ ꓠꓬ ꓪꓴ-ꓢ ꓔꓯ ꓒꓵꓽ ꓛꓳˍ ꓟ ꓗꓪ ꓐꓰ ꓥ ꓟ ꓫꓬꓽ ꓫꓬꓽˍ ꓡꓰ ꓟꓳꓸ ꓖꓶ ꓪ ꓠꓹ ꓟ꓾ ꓠꓬꓲ ꓟꓳ ꓓꓴ ꓔꓯ ꓡ ꓡꓳ꓾ ꓐꓯˍ ꓡꓳ꓿