ꓠꓲ, ꓟ ꓟꓽ ꓙꓬꓺ ꓙꓬꓺ ꓥꓳ ꓡꓳ. ꓠꓯˍ ꓟ

ꓠꓲ, ꓟ ꓟꓽ ꓙꓬꓺ ꓙꓬꓺ ꓥꓳ ꓡꓳ. ꓠꓯˍ ꓟ

ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴ‐ꓳ ꓠꓬꓲ. ꓠꓬꓲ ꓣꓳꓽ ꓵ ꓠ ꓔ ꓟ ꓢꓲ: ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 5ꓽ 1‐3꓾ 5‐16 ꓗꓪ ꓛꓲ ꓥꓳ꓿ ꓟ. ꓟꓲꓽ ꓘꓴꓽ ꓗꓪ ꓣꓳꓽ ꓑ ꓙ ꓪ ꓟ ꓠꓬ ꓤ ꓑ ꓤ ꓕꓲꓽ ꓣꓳ ꓠꓬ ꓠꓻ ꓓꓳꓽ ꓔꓬ, ꓟ (38) ꓘꓳꓼ ꓙꓳ ꓢꓲ꓾ ꓠꓻ ꓫꓵꓽ ꓖꓳ ꓟ ꓓꓻ ꓡꓰ ꓠ, ꓟ ꓐꓱ ꓶ ꓟꓴ ꓗꓪ ꓝꓲ ꓓꓴ ꓡꓰ ꓷ, ꓡꓵ ꓡˍ ꓟ ꓬꓲꓻ ꓡꓴꓽ ꓐꓱ ꓗꓪ ꓟ ꓬꓲꓻ ꓙꓬ ꓔꓯ ꓔꓷ, ꓫꓱ, ꓟꓶ ꓠ, ꓟ ꓦꓴꓻ ꓠꓬ ꓔꓬ, ꓟ ꓟ. ꓟꓲꓽ ꓥꓳ꓿

ꓟꓴ ꓗꓪ ꓝꓲ ꓓꓴ ꓠꓬ ꓬꓲꓻ ꓡꓴꓽ ꓐꓱ ꓖꓳ ꓟ ꓔꓯ ꓷ, ꓡꓵ ꓖꓶꓽ ꓡˍ  ꓕꓯ ꓧꓶ. ꓕꓯ ꓔꓷ, ꓕꓲ ꓙꓰ ꓢꓴ ꓠꓬ ꓠꓻ ꓓꓴ ꓓꓻ ꓡꓰˍ ꓡꓳ꓿ ꓖꓳ ꓡꓱ ꓥˍ ꓟꓲ ꓤ ꓑ ꓤ ꓖꓳ ꓕꓲ ꓣꓳ ꓔꓯ ꓬꓰ ꓙ ꓢꓴ ꓮ ꓟꓽˍ ꓟꓲ ꓟꓽ ꓙꓳ꓿ ꓬꓲ. ꓠꓬ ꓠꓻ ꓓꓴ ꓖꓳ ꓟ ꓔꓯ 38 ꓘꓳꓼ ꓟꓯꓻ ꓔ ꓢꓲ ꓕꓲꓽ ꓣꓳ ꓣꓳ ꓬꓲ. ꓔꓯ ꓬꓰ ꓙ ꓡ ꓥꓳ ꓐꓰ ꓥꓳ ꓡꓳ. ꓔꓬ, ꓡꓳ꓿ ꓖꓳ ꓡꓱ ꓥˍ ꓟꓲ ꓮ ꓟꓽˍ ꓟꓲ ꓬꓲ. ꓔꓯ ꓟꓽ ꓬꓰ ꓙ꓿ ꓖꓳ ꓡꓱ ꓥˍ ꓟꓲ ꓬꓲ. ꓠꓲ, ꓟ ꓟꓽ ꓙꓬꓺ ꓡꓰ꓿ ꓖꓳ ꓡꓱ ꓠꓬꓲ ꓕꓲꓽ ꓠꓬꓲ ꓙꓳˍ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓬꓲ. ꓔꓯ ꓟꓳˍ ꓕꓯ ꓬꓲ. ꓡꓰ ꓠꓻ ꓫꓬ, ꓖꓶꓽˍ ꓡꓳ꓿ ꓬꓲ. ꓥꓳ ꓡꓳ.ˍ ꓟ ꓠꓬ ꓕꓲꓽ ꓠꓬꓲ ꓙꓳˍ ꓠꓬ ꓐꓲꓺ ꓜꓲꓼ ꓡˍ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴ‐ꓳ ꓣꓳ ꓤꓶꓻ ꓗꓪ ꓮ ꓡꓰ ꓘꓶ. ꓛꓲ ꓫ ꓙꓵˍ ꓐꓯ ꓥˍ ꓟꓲ ꓢꓲ ꓫꓬ ꓕꓳ ꓶ ꓗꓪ (38) ꓘꓳꓼ ꓠꓻ ꓓꓴ ꓖꓳ ꓟ ꓟꓯꓻ ꓔ ꓢꓲ ꓥꓳ ꓡꓳ. ꓠ, ꓟ ꓗꓪ ꓛꓲ ꓠꓬ ꓟꓽ ꓛꓲ ꓬꓰ ꓢꓰꓽ ꓐꓰ ꓐꓯ ꓠ ꓡꓳ꓿ ꓖꓳ ꓕꓲ ꓣꓳ ꓠꓬ ꓠꓲ, ꓟ ꓟꓽ ꓙꓬꓺ  ꓡꓰ ꓟ ꓡꓰ ꓐꓰ ꓣꓳꓽ ꓥˍ ꓟꓲ ꓪꓴ‐ꓢ ꓔꓯ ꓥꓳ ꓡꓳ.ˍ ꓟ ꓗꓪ ꓠꓲ, ꓟ ꓟꓽ ꓙꓬꓺ ꓡꓰ ꓠ, ꓟ ꓮ ꓘꓶ. ꓬꓮꓳ. ꓚꓲˍ ꓡꓳ꓿

ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓾ ꓡꓳ, ꓬꓰ ꓗꓪ ꓛꓲ ꓕꓶ ꓞꓹ ꓢꓴ ꓠꓬ ꓶꓼ ꓙꓳ ꓫꓱ, ꓙꓳ ꓡꓳ ꓐꓰ ꓐꓯ ꓔ ꓡꓳ꓿ ꓬꓲ ꓤ ꓠꓬꓲ ꓤ ꓐꓴꓳ ꓢꓲ ꓫꓬ ꓕꓳ ꓶ ꓗꓪ ꓟ ꓞꓳ ꓠꓻ ꓖꓳ ꓕꓲꓽ ꓣꓳ ꓠꓬ ꓬꓲ. ꓔꓯ ꓢꓴ ꓡꓰ ꓪꓽ ꓫꓱ, ꓟ ꓟꓲ ꓔꓳ, ꓜꓳꓽ ꓗꓳ. ꓡ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓲ. ꓠꓬ ꓬꓲ. ꓔꓯ ꓬꓰ ꓙ ꓢꓴ ꓕꓲꓽ ꓣꓳˍ ꓟꓲ ꓟꓽ ꓙꓳ ꓥˍ ꓟꓲ ꓬꓲ. ꓠꓬ ꓕꓲꓽ ꓠꓬꓲ ꓕꓲ ꓠꓬꓲ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓙꓰ ꓢꓲ ꓡꓳ. ꓠꓬ ꓔꓬ, ꓡꓳ꓿ ꓕꓱ ꓟ ꓔꓯ ꓢꓴ ꓠꓬ ꓮ ꓡꓰ ꓥˍ ꓟꓲ ꓧꓶꓼ ꓡꓰˍ ꓥꓳ꓿ ꓪ ꓫꓱ, ꓥꓳ꓿ ꓖꓳ ꓡꓱ ꓥˍ ꓟꓲ ꓬꓲ. ꓠꓲ, ꓟ ꓟꓽ ꓙꓬꓺ꓿

ꓙꓵꓻ ꓠꓲ, ꓙꓳ ꓢꓴ꓾ ꓠꓲ, ꓟ ꓫꓵꓺ ꓢꓴ ꓠꓬ ꓬꓲ. ꓟꓶꓽ ꓗꓪ ꓡꓳꓹ ꓬꓰˍ ꓗꓪ ꓶ ꓤ ꓫꓱ, ꓤ ꓮ ꓟꓬꓹ ꓑꓯ, ꓟꓶˍ ꓥꓳ꓿

ꓮ ꓫꓵꓽ ꓔꓯ ꓥˍ ꓟꓲ ꓠꓲ, ꓟ ꓫꓵꓺ ꓫꓵꓺ ꓡꓰꓽ ꓬꓰ ꓢꓲ ꓢꓯꓼ ꓕꓵꓼ꓿ ꓪꓴ‐ꓢ ꓐꓯ ꓘꓶꓽ ꓠꓬ ꓬꓲ. ꓖꓳꓽ ꓟꓽ ꓥ꓿ ꓢꓯꓼ ꓪ ꓙꓳˍ ꓡꓳ꓿ ꓕꓱ ꓟ ꓔꓯ ꓙꓵꓻ ꓢꓲ ꓮ ꓫꓵꓽ ꓔꓯ ꓥˍ ꓟꓲ ꓠꓲ, ꓟ ꓟꓽ ꓙꓬꓺ ꓡꓰ ꓡꓰ ꓢꓯꓼ ꓕꓵꓼ꓿

ꓬꓲ. ꓙꓵ ꓛꓲ ꓡ ꓠꓬ ꓢꓲ ꓒ ꓣꓳꓽ ꓔꓯ ꓬꓰ ꓙ ꓡˍ ꓥꓳ꓿ ꓬꓲ. ꓡꓯ ꓒꓯ ꓡꓰ ꓖꓳ ꓖꓶꓽ ꓡˍ ꓥꓳ꓿