ꓠꓴ ꓪ ꓔꓯ ꓢꓲ ꓡꓲ ꓟ ꓙꓳ ꓝꓲ (Homily)

ꓮ ꓙꓵꓽ ꓢꓴ ꓔꓯ ꓧꓪꓸ ꓧꓪꓸꓼ꓾ ꓕꓱ ꓕꓲ ꓠꓽ ꓟ ꓠꓬ ꓢꓲ ꓒ ꓬꓰ-ꓢꓴ ꓢꓯꓸ ꓬꓲꓼ ꓡ ꓗ ꓠꓯꓸ 3 ꓠꓽ ꓕꓲꓽ ꓠꓽ ꓟ ꓢꓲ ꓒ ꓦꓬꓼ ꓠꓬꓲ ꓥ ꓡꓳ= ꓢꓲ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓫꓵꓻ ꓘꓷ ꓡꓰ ꓗ ꓠꓯꓸ ꓬꓲ ꓪ ꓐꓴ ꓠꓬ꓾ ꓬꓴ-ꓔ ꓡ ꓞꓳ ꓐꓰ ꓣꓳ-ꓟ ꓡ ꓞꓳ ꓐꓴ ꓔꓯ ꓙꓳꓺˍ ꓟ ꓑꓶꓸ ꓓꓴ ꓗ ꓘꓶꓽ ꓚꓵꓸ ꓢꓲ ꓔꓬ ꓡꓳ= ꓬꓲ ꓪ ꓠꓬ ꓙꓳꓺ ꓛꓱꓽ ꓢꓲ ꓔꓬ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓟꓲꓽ ꓙꓬ ꓗꓪ ꓓꓳ ꓡ ꓢꓲ ꓠꓬꓲ꓾ ꓠꓴ ꓪ ꓢꓲ ꓡꓲ ꓟ ꓟꓶ ꓝꓲ꓾ ꓐꓰ ꓐꓯ ꓢꓲ ꓠꓬꓲ ꓬꓲ ꓚꓲꓸ ꓛꓬ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓟꓳꓸ ꓖꓶˍ ꓡꓳ= ꓖꓳ ꓕꓯ ꓝꓲ ꓓꓴ ꓐꓴ ꓠꓬ ꓬꓲ ꓪ ꓡꓰ ꓬꓲ ꓔꓯ ꓫꓵꓻ ꓗꓴꓸ ꓫꓵꓻ ꓦ ꓥ ꓡꓳ ꓓꓵꓽ ꓙꓽ ꓢꓲ ꓙꓳꓺˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓠꓲꓹ ꓟ ꓫꓵ ꓫꓵ ꓡꓰꓽ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓟꓸ ꓖꓶˍ ꓡꓳ= ꓥꓪ ꓠꓬ ꓫꓵꓻ ꓗꓴꓸ ꓫꓵꓻ ꓦꓻ ꓟꓽ ꓥ= ꓫꓵꓻ ꓗꓴꓸ ꓫꓵꓻ ꓦ ꓠꓽ ꓪꓳꓽ ꓔꓳ ꓟꓽ ꓙꓳ꓾ ꓥꓪ ꓔꓯ ꓠꓽ ꓙꓳˍ ꓡꓳ꓾ ꓐꓯ ꓢꓲ ꓠꓬꓲ ꓬꓲ ꓪ ꓔꓯ ꓮ ꓤ ꓤ ꓠꓲꓹ ꓟ ꓫꓵ ꓫꓵ ꓡꓰꓽ ꓟꓸ ꓖꓶˍ ꓡꓳ= 

ꓟꓸ ꓟꓲꓽ ꓕꓱ ꓟ ꓔꓯ ꓡꓳꓸ ꓠꓬꓲˍ ꓕꓯ ꓬꓲ ꓝꓲ ꓓꓴ ꓐꓴ ꓠꓬ ꓬꓴ-ꓔ ꓡ ꓞꓳ ꓐꓴ ꓔꓯ ꓙꓳꓺˍ ꓟ ꓑꓶꓸ ꓓꓴ ꓗ ꓘꓶꓽ ꓚꓵꓸ ꓢꓲ ꓔꓬ ꓡꓳ꓾ ꓐꓯ ꓟ ꓓꓵꓽ ꓙꓽ ꓠꓬꓲ ꓓꓴ ꓥ ꓡꓳ= ꓮ ꓫꓵꓽ ꓑꓶꓸ ꓓꓴ ꓥ ꓡ= ꓗꓳꓸ ꓡ ꓟ ꓦꓬꓼ ꓠꓬꓲ ꓗꓪ ꓬꓲ ꓪ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓢꓴ ꓡꓰ ꓢꓰꓼ ꓡˍ ꓟ ꓔꓯ ꓬꓲ ꓪ ꓟꓬ ꓢꓶꓽ ꓡꓰ ꓟꓳꓻ ꓡꓰꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓬꓲ ꓪ ꓚꓲꓸ ꓛꓬ ꓥ ꓟꓲ ꓢꓲ ꓒ ꓬꓰ-ꓢꓴ ꓔꓯ ꓡꓳ ꓒꓰꓹ ꓗꓷ ꓟ ꓑꓶꓸ ꓓꓴ꓾ ꓢꓲ ꓒ ꓬꓰ-ꓢꓴ ꓬꓲ ꓪ ꓔꓯ ꓣꓱꓽ ꓞꓹ ꓕꓯ꓾ ꓢꓲ ꓒ ꓬꓰ-ꓢꓴ ꓫꓸ ꓙꓵˍ ꓟ ꓦꓬꓼ ꓠꓬꓲ ꓗꓪ ꓬꓲ ꓪ ꓠꓬ ꓢꓲ ꓒ ꓬꓰ-ꓢꓴ ꓒ ꓕꓲ ꓗꓪ ꓔꓬ ꓠꓹ ꓟ ꓟꓽ ꓬꓰ ꓬꓰ ꓔꓷꓹ ꓙꓰˍ ꓟ ꓑꓶꓸ ꓓꓴ ꓬꓲ ꓪ ꓠꓲꓹ ꓟ ꓠꓯꓸꓼ ꓗꓪ ꓝꓴꓲꓸ ꓙꓳˍ ꓟ ꓠꓲꓹ ꓟ ꓟꓯꓻ ꓓꓹ ꓡꓳ= ꓖꓳ ꓡꓱ ꓠꓬꓲ ꓙꓳꓺˍ ꓟ ꓑꓶꓸ ꓓꓴ ꓥˍ ꓟꓲ꓾ ꓬꓲ ꓪ ꓚꓲꓸ ꓛꓬ ꓬꓲ ꓪ ꓝꓴꓲꓸ ꓙꓳˍ ꓟ ꓔꓯ ꓢꓷꓸˍ ꓟ ꓪꓴꓸ ꓠꓬꓲ ꓥ ꓟꓲ ꓗ ꓘꓶꓽ ꓚꓵꓸ ꓔ ꓢꓲ ꓔꓬ ꓡꓳ ꓐꓰ ꓐꓯˍ ꓡꓳ=

ꓬꓲꓼ ꓠꓬꓲ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓴ꓾ ꓥꓪ ꓗꓳꓸ ꓡ ꓟ ꓦꓬꓼ ꓠꓬꓲ ꓑꓶꓸ ꓓꓴ ꓗ ꓘꓶꓽ ꓚꓵꓸ ꓢꓲ ꓔꓬ ꓡ ꓐꓯ ꓟ ꓓꓵꓽ ꓙꓽ ꓠꓬꓲ ꓡꓯ= ꓣꓳ ꓔꓯ ꓙꓳꓺ ꓛꓱꓽ ꓡꓰ ꓝꓲˍ ꓟ꓾ ꓣꓳ ꓔꓯ ꓫꓸ ꓡꓰ ꓝꓲˍ ꓟ꓾ ꓣꓳ ꓔꓯ ꓓꓳꓽ ꓡꓰ ꓝꓲˍ ꓟ꓾ ꓣꓳ ꓔꓯ ꓠꓻ ꓡꓰ ꓝꓲˍ ꓟ ꓕꓰ ꓡꓰ ꓫꓵꓽ ꓗꓪ ꓐꓰ ꓣꓳ ꓠꓬ ꓓꓳꓽ ꓡꓰ꓾ ꓡꓱꓸ ꓡꓰˍ ꓟ ꓦꓬꓼ ꓠꓬꓲ ꓗꓪ ꓡꓰꓽ ꓔꓬ ꓡ ꓐꓯ ꓟ ꓓꓵꓽ ꓙꓽ ꓠꓬꓲ ꓡꓯ= ꓬꓲ ꓝꓲ ꓓꓴ ꓐꓴ ꓠꓬ ꓗ ꓘꓶꓽ ꓚꓵꓸ ꓔ ꓢꓲ ꓔꓬ ꓟ ꓡꓰ ꓐꓰ ꓣꓳ ꓥ ꓟꓲ ꓗ ꓘꓶꓽ ꓚꓵꓸ ꓔ ꓢꓲ ꓔꓬ ꓡ꓾ ꓐꓯ ꓟ ꓓꓵꓽ ꓙꓽ ꓠꓬꓲ ꓡꓯ=

ꓗꓳꓸ ꓡ ꓟ ꓦꓬꓼ ꓠꓬꓲ ꓗꓪ ꓣꓳ ꓬꓰ ꓛꓬꓻ ꓗꓷ ꓟ꓾ ꓬꓰ ꓥꓳꓽ ꓗꓷ ꓟ ꓝꓴꓲꓸ ꓥ ꓟꓲ ꓣꓳ ꓬꓰ ꓙꓲꓽ ꓙꓳˍ ꓟ ꓔꓯ ꓠꓬ ꓟꓽ ꓬꓰ꓾ ꓟꓽ ꓬꓰ ꓠ ꓔ ꓟ ꓔꓯ ꓠꓬ ꓬꓰ ꓗꓷ ꓟ ꓝꓴꓲꓸ ꓗꓪ ꓥˍ ꓟꓲ꓾ ꓕꓱ ꓡꓱ ꓫꓵꓽ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓣꓳ ꓔꓯ ꓚꓵꓸ ꓔ ꓝꓲˍ ꓟ꓾ ꓕꓼ ꓔ ꓝꓲˍ ꓟ꓾ ꓕꓱ ꓡꓱ ꓫꓵꓽ ꓗ ꓘꓶꓽ ꓚꓵꓸ ꓢꓲ ꓔꓬ ꓡ꓾ ꓐꓯ ꓟ ꓓꓵꓽ ꓙꓽ ꓠꓬꓲ ꓡꓯ= ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓟꓲꓽ ꓙꓬ ꓗꓪ ꓛꓲꓺ ꓡꓻꓳ= ꓠꓴ ꓪ ꓔꓯ ꓢꓲ ꓡꓲ ꓟ ꓙꓳ ꓝꓲ꓾ ꓐꓯ ꓟ ꓐꓯ ꓘꓶꓽ ꓠꓬ ꓠꓬꓲꓸ ꓠꓬꓲ ꓠꓴ ꓐꓰ ꓥꓪ ꓐꓱ ꓶ ꓒꓬꓱꓼ ꓡꓺꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓗꓳꓸ ꓡ ꓟ ꓦꓬꓼ ꓠꓬꓲ ꓗꓪ ꓣꓳ ꓬꓰ ꓛꓬ ꓡꓰ ꓟ ꓝꓴꓲꓸ ꓔꓯ ꓠꓬꓲꓸ ꓠꓬꓲ ꓪꓴ-ꓢ ꓡꓰ ꓖꓼ ꓖꓶˍ ꓟ ꓡꓰ ꓐꓰ꓾ ꓕꓱ ꓟ ꓡꓰꓽ ꓟꓽ ꓞꓲꓺ ꓢꓲ ꓒ ꓬꓰ-ꓢꓴ ꓔꓯ ꓡꓳꓸ ꓠꓬꓲˍ ꓕꓯ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓟꓲꓽ ꓙꓬ ꓗꓪ ꓦꓰꓼ ꓔꓬ ꓕꓯ꓾ ꓥꓪ ꓚꓰꓽ ꓡ ꓧꓪꓸ ꓡ ꓕꓯ ꓠꓴ ꓪ ꓥꓪ ꓔꓯ ꓟꓽ ꓡꓳꓸ ꓙ꓾ ꓐꓰ ꓝꓴꓲꓸ ꓟꓽ ꓓꓰꓺ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓔꓯ "ꓠꓴ ꓪ ꓔꓯ ꓢꓲ ꓡꓲ ꓟ ꓙꓳ ꓝꓲ" ꓐꓯ ꓢꓲ ꓪꓴꓸ ꓔꓴˍ ꓡꓳ= ꓕꓱ ꓟ ꓠꓬ ꓪꓴ-ꓢ ꓠꓵꓻ ꓠꓲꓹ ꓥ ꓡꓳ= ꓧ-ꓡꓰ-ꓡꓴ-ꓬ ꓐꓯ ꓢꓲ ꓪꓴ-ꓢ ꓔꓯ ꓫꓱꓸ ꓖꓶˍ ꓡꓯ=  ꓬꓲ ꓔꓯ ꓓꓳ ꓟꓴꓹ ꓡꓯ= ꓠꓴꓻ ꓐꓰ ꓥꓪ ꓐꓱ ꓶ ꓢꓲ ꓒ ꓬꓰ-ꓢꓴ ꓢꓯꓸ ꓬꓲꓼ ꓡ ꓢꓲ ꓠꓬꓲ ꓠꓬꓲꓸ ꓠꓬꓲ ꓣꓳ ꓒ ꓕꓲ ꓗꓪ ꓔꓬ ꓡꓳ= ꓕꓱ ꓟ ꓠꓬ ꓣꓳ ꓢꓯꓼ ꓪ ꓟꓶ ꓓꓴ ꓥ ꓡꓳ= 

ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓡꓳꓸ ꓠꓬꓲˍ ꓕꓯ ꓢꓲꓺ ꓒ ꓬꓰ-ꓢꓴ ꓠꓬ ꓮ ꓠꓱ ꓕꓯ ꓡꓰ ꓟꓷꓽ ꓠꓷꓹ ꓝꓸ ꓢꓴ ꓡꓰ ꓐꓯ ꓔ ꓟ ꓐꓹ ꓐ ꓪꓴ-ꓢ ꓬꓲ ꓤ ꓔꓲꓸ ꓖꓳ ꓕꓲ ꓣꓳ ꓟ ꓥꓳ꓾ ꓐꓰ ꓬꓲ ꓡꓰ ꓐꓯ ꓔ ꓡꓳ=  ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓠꓱ ꓕꓯ ꓟ ꓦꓬꓼ ꓠꓬꓲ ꓗꓪ ꓚꓳꓸ ꓮ ꓟꓶ ꓗꓪ ꓛꓲ ꓫꓵꓻ ꓟ ꓗꓪ ꓐꓰ ꓢꓯꓸ ꓬꓲꓼ ꓡ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ= ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓪꓴ-ꓢ ꓥ ꓡꓳ= ꓬꓲ ꓠꓬ ꓢꓯꓼ ꓬꓲꓼ ꓙꓰꓳ= ꓬꓲ ꓢꓯꓸ ꓬꓲꓼ ꓙꓰ ꓟ ꓑꓶꓸ ꓓꓴ ꓠꓴ ꓐꓰ ꓥꓪ ꓠꓲꓹ ꓟ ꓠꓯꓸꓼ ꓗꓪ ꓬꓲ ꓔꓬꓹ ꓡ ꓢꓲ ꓠꓬꓲ ꓣꓳ ꓔꓯ ꓢꓯꓼ ꓪ ꓖꓶ ꓔꓬ ꓡꓳ=  ꓙꓲꓻ ꓫꓬ ꓢꓴ ꓒꓳ-ꓡꓳ ꓐꓯ ꓔ ꓟ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓢꓯꓸ ꓬꓲꓼ ꓡ ꓟ ꓟꓽ ꓙꓳ ꓠꓬ꓾ ꓣꓳ ꓙꓵꓻ ꓠꓲꓹ ꓠꓬ ꓬꓲ ꓖꓳꓽ ꓥꓳ꓾ ꓐꓯ ꓔ ꓟ ꓡꓰ ꓐꓰ ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ꓾ ꓛꓳ ꓫꓱꓽˍ ꓟ ꓦꓬꓼ ꓠꓬꓲ ꓗꓪ ꓬꓲ ꓖꓳꓽ ꓟꓽ ꓥ ꓟ ꓢꓲ ꓒ ꓬꓰ-ꓢꓴ ꓢꓯꓸ ꓬꓲꓼ ꓡ ꓟ ꓔꓯ ꓓꓵꓽ ꓙꓽ ꓠꓬꓲ ꓢꓲ ꓠꓬꓲ ꓞꓳ ꓙꓳ ꓙꓰˍ ꓕꓯ ꓣꓳ ꓐꓱ ꓶ ꓣꓳ ꓙꓵꓻ ꓠꓲꓹ ꓪꓴꓽ ꓡ ꓟꓴ ꓡ ꓢꓲ ꓠꓬꓲ ꓮ ꓫꓵꓽ ꓔꓯ ꓥ ꓟꓲ ꓪꓴ-ꓢ ꓣꓳ ꓐꓰ ꓔꓬ ꓡꓳ꓾ ꓐꓯ ꓟ ꓔꓯ ꓙꓵꓻ ꓢꓲ ꓢꓯꓼ ꓪ ꓙꓳˍ ꓡꓳ=