ꓠꓴ ꓪ ꓙꓽ ꓫꓸ ꓟ ꓮ ꓙꓵꓽ ꓪꓴ-ꓢ ꓔꓯ ꓡꓯꓼ ꓙꓱ ꓖꓶ

1 ꓒꓲ-ꓕꓱ 5ꓽ7 ꓗꓪ ꓐꓰ ꓦꓻ ꓢꓯꓼ ꓪ ꓣꓴ ꓓꓴ ꓬꓰ ꓡꓯ= ꓠꓴ ꓪ ꓙꓽ ꓫꓸ ꓟ ꓮ ꓙꓵꓽ ꓪꓴ-ꓢ ꓔꓯ ꓡꓯꓼ ꓙꓱ ꓖꓶ= ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓠꓴ ꓪ ꓔꓯ ꓙꓽ ꓗꓳˍ ꓡꓳ꓾ ꓐꓰ ꓐꓯ ꓔ ꓡꓳ= ꓣꓳ ꓮ ꓙꓵꓽ ꓔꓯ ꓠꓲꓹ ꓫꓸ ꓟꓬ ꓫꓸ ꓓꓴ ꓙꓳˍ ꓡꓳ= ꓖꓳ ꓡꓱ ꓥ ꓟꓲ ꓕꓲ ꓣꓳ ꓡꓰ ꓕꓲ ꓣꓳ ꓠꓬ ꓟꓽ ꓫꓱꓸ ꓡꓯ ꓘꓳ= ꓠꓲꓹ ꓟ ꓘꓶꓻ ꓡꓶꓽ ꓓꓴ꓾ ꓠꓲꓹ ꓟ ꓓꓵꓽ ꓙ ꓪꓴꓽ ꓧꓶ ꓓꓴ ꓮ ꓟꓬꓹ ꓙꓳˍ ꓡꓳ= ꓢꓷꓸ ꓠꓲꓹ ꓢꓳ ꓔꓬ ꓢꓴ ꓐꓴ ꓥ ꓟꓲ ꓬꓲ ꓪ ꓓ ꓬꓲ ꓪ ꓕꓲ ꓚꓱꓹ꓾ ꓶꓻ ꓡꓯꓼ ꓬꓰ ꓔꓬ ꓢꓴ ꓟꓬꓱꓽ ꓬꓰ ꓢꓯꓼ ꓕꓵꓼ ꓔꓬ ꓢꓴ ꓐꓴ ꓥ ꓟꓲ ꓬꓲ ꓪ ꓕꓲ ꓚꓱꓹ꓾ ꓮ ꓡꓲ ꓕꓲ ꓣꓳ ꓔꓯ ꓥ ꓟꓲ ꓠꓲꓹ ꓟ ꓓꓵꓽ ꓙꓽ ꓪꓴꓽ ꓧꓶ ꓓꓴ ꓖꓳ ꓟꓬ ꓙꓳˍ ꓟ ꓥ ꓡꓳ= ꓖꓳ ꓡꓱ ꓙꓳˍ ꓟ ꓔꓯ ꓪꓴ-ꓢ ꓢꓷꓸˍ ꓡꓳ= ꓖꓳ ꓟ ꓑꓶꓸ ꓓꓴ ꓣꓳ ꓙꓽ ꓫꓸ ꓟ ꓮ ꓙꓵꓽ ꓪꓴ-ꓢ ꓔꓯ ꓖꓶꓽ꓾ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓡꓳ=

ꓠꓬꓲꓸ ꓠꓬꓲ ꓠꓴ ꓐꓰ ꓥꓪ ꓠꓬ ꓣꓳ ꓔꓯ ꓙꓳˍ ꓟ ꓠꓲꓹ ꓫ ꓓꓴ ꓪꓴ-ꓢ ꓔꓯ ꓟꓽ ꓖꓶ ꓖꓶ ꓮ ꓫꓵꓽ ꓪꓴꓸ ꓠꓬꓲ ꓔꓯꓹ ꓔ ꓡ? ꓕꓲ ꓐꓱ ꓠꓬ ꓙꓵꓻ ꓠꓲꓹ ꓙꓳˍ ꓡꓳ꓾ ꓪꓴ-ꓢ ꓔꓯ ꓙꓵꓻˍ ꓡꓳ꓾ ꓪꓴ-ꓢ ꓔꓯ ꓠꓲꓹ ꓠꓵꓻˍ ꓡꓳ ꓐꓯ ꓔꓬ ꓥ ꓟꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓽ ꓘꓴ ꓔꓬ ꓥ ꓟꓲ ꓠꓲꓹ ꓪꓴꓽ ꓪꓴꓽ ꓡꓰꓽ ꓔꓬꓹ ꓟꓽ ꓐ ꓡ ꓢꓴ ꓮ ꓟꓬꓹ ꓙꓳˍ ꓡꓳ= ꓟꓲꓽ ꓕꓯꓽ ꓢꓲ ꓟ ꓦꓬꓼ ꓠꓬꓲ ꓐꓱ ꓶ ꓙꓽ ꓫꓸ ꓟ꓾ ꓚꓲꓸ ꓛꓬ ꓔꓯ ꓟꓽ ꓙꓲꓻ ꓟ ꓔꓳꓹ ꓜꓳꓽ ꓡ ꓟ ꓔꓯ ꓙꓳꓺ ꓢꓲ ꓠꓲꓹ ꓟ ꓟꓽ ꓢꓲꓺ ꓡꓲꓺ ꓟ꓾ ꓕꓱ ꓡꓱ ꓫꓵꓽ ꓤꓹ ꓠꓬꓲ ꓓꓴ ꓘꓶꓻ ꓡꓶꓽ ꓓꓴ ꓠꓬ ꓚꓲꓸ ꓛꓬ ꓠꓲꓹ ꓟ ꓗꓪ ꓐꓲꓺ ꓓꓹˍ ꓟ ꓑꓶꓸ ꓓꓴ ꓠꓲꓹ ꓟ ꓟꓽ ꓢꓲ ꓡꓲ ꓐꓰ ꓗꓹ ꓡꓳ= ꓟꓶꓼ ꓘꓶꓽ ꓕꓯˍ ꓟꓲ ꓬꓲꓼ ꓟꓶ ꓟꓽ ꓓꓻ꓾ ꓕꓱ ꓡꓱ ꓬꓲ ꓦꓬꓼ ꓠꓬꓲ ꓗꓳꓸ ꓔꓬ ꓢꓴˍ ꓟꓲ ꓮ ꓟꓬꓹ ꓙꓳˍ ꓡꓳ=

ꓖꓳ ꓡꓱ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓝꓲꓸ ꓕꓱ ꓟ ꓠꓬ “ꓠꓴ ꓔꓯ ꓙꓳˍ ꓟ ꓙꓽ ꓫꓸ ꓓꓴ ꓮ ꓙꓵꓽ ꓪꓴ-ꓢ ꓔꓯ ꓡꓯꓼ ꓙꓱ ꓖꓶ= ꓬꓲ ꓡꓰ ꓠꓴ ꓪ ꓔꓯ ꓙꓽ ꓗꓳˍ ꓡꓳ꓾ ꓠꓬꓲ ꓙ ꓡꓳꓸ ꓙ ꓖꓶˍ ꓡꓳ=” ꓐꓰ ꓐꓯ ꓔ ꓡꓳ= ꓕꓱ ꓟ ꓗꓪ ꓐꓰ ꓣꓳ ꓢꓯꓼ ꓪ ꓣꓴ ꓓꓴ ꓬꓰ ꓡꓯ=

ꓣꓳ ꓠꓲꓹ ꓟ ꓠꓯꓸꓼ ꓗꓪ ꓙꓳˍ ꓟ ꓓꓹˍ ꓟ ꓮ ꓙꓵꓽ ꓪꓴ-ꓢ ꓔꓯ ꓖꓶ ꓗꓷ ꓢꓲ ꓠꓬꓲ ꓠꓬꓲꓸ ꓠꓬꓲ ꓗꓪ ꓛꓳ ꓫꓱꓽ ꓠꓹ ꓟ ꓮ ꓙꓵꓽ ꓪꓴ-ꓢ ꓔꓯ ꓧꓶꓸ ꓕꓯ ꓡꓯꓼ ꓙꓱ ꓗꓷ ꓢꓲ ꓗꓹ ꓛꓲꓽ ꓛꓲꓽ ꓡꓰ ꓞꓳ ꓙꓳˍ ꓕꓯ ꓠꓬ ꓣꓳ ꓠꓲꓹ ꓟ ꓗꓹ ꓛꓲꓽˍ ꓟ ꓡꓰꓽ ꓟꓽ ꓞꓲꓺ ꓣꓳ ꓬꓰˍ ꓟ ꓮ ꓙꓵꓽ ꓣꓳ ꓞꓳ ꓙꓳˍ ꓟ ꓮ ꓙꓵꓽ ꓥˍ ꓟꓲ ꓢꓲ ꓒ ꓐꓱ ꓶ ꓡꓯꓼ ꓫꓴꓻ ꓒꓬꓱꓼ ꓡˍ ꓥꓳ=

ꓢꓲꓽ ꓫꓬ ꓢꓴ ꓕꓲ ꓣꓳ ꓡꓰ ꓕꓱ ꓡꓱ ꓐꓯ ꓔ ꓡꓳ=”ꓪꓴ-ꓢ ꓡꓰ ꓣꓳ ꓔꓯ ꓚꓰꓼ ꓗꓷˍ ꓟ ꓗꓪ ꓐꓰ ꓬꓲ ꓠꓬ ꓒꓵꓽˍ ꓟ ꓡꓯꓼ ꓫꓴꓻ ꓖꓶ ꓗꓷꓳ= ꓣꓳ ꓠꓬ ꓜꓳꓽ ꓜꓳꓽ ꓢꓯꓸ ꓔꓬ ꓟ ꓗꓪ ꓐꓰ ꓪꓴ-ꓢ ꓔꓯ ꓡꓯꓼ ꓫꓴꓻ ꓖꓶ ꓔꓬ ꓡꓳ” ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓣꓳ ꓞꓳ ꓙꓳ ꓔꓬ ꓟ ꓗꓪ ꓣꓳ ꓠꓲꓹ ꓟ ꓔꓯ ꓘꓶꓻ ꓡꓶꓽ ꓡꓰ ꓝꓲˍ ꓟ꓾ ꓙꓽ ꓫꓸ ꓡꓰ ꓝꓲˍ ꓟ ꓮ ꓙꓵꓽ ꓪꓴ-ꓢ ꓔꓯ ꓡꓯꓼ ꓙꓱ ꓗꓷ ꓢꓲ ꓗꓹ ꓛꓲꓽ ꓛꓲꓽ ꓡꓰꓽ ꓞꓳ ꓙꓳ ꓔꓬ ꓠꓬ ꓙꓲꓻˍ ꓟ ꓡꓯꓼ ꓫꓴ ꓪꓴ-ꓢ ꓔꓯ ꓣꓳ ꓖꓶ ꓐ ꓡˍ ꓥꓳ=