ꓠꓴ ꓪ ꓠꓬ ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓙꓲ ꓫꓬˍ ꓟ ꓕꓯꓽ ꓢꓲꓺ ꓟꓽ ꓙꓲ ꓫꓬ ꓕꓯ ꓠꓽ ꓮ ꓡꓲ ꓥˍ ꓟꓲ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓟꓽ ꓓ

“ꓠꓴ ꓪ ꓠꓬ ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓙꓲ ꓫꓬˍ ꓟ ꓕꓯꓽ ꓢꓲꓺ ꓟꓽ ꓙꓲ ꓫꓬ ꓕꓯ ꓠꓽ ꓮ ꓡꓲ ꓥˍ ꓟꓲ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓟꓽ ꓓ=”

ꓢꓲꓽ ꓫꓬ ꓕꓳ ꓶ ꓗꓪ ꓡꓳꓸ ꓠꓬꓲ ꓗꓷ ꓠꓬ꓾ ꓬꓴ-ꓔ ꓡ ꓞꓳ ꓐꓴ ꓗꓳ ꓡꓳ ꓗꓪ ꓪꓴ-ꓢ ꓙꓵꓽ ꓗ ꓐꓰ ꓞꓳ ꓤ ꓙꓵꓽ ꓗ ꓔꓯ ꓟꓽ ꓓ ꓛꓳ ꓫꓱꓽ ꓢꓴ ꓠꓬ ꓒ-ꓡꓲ-ꓢꓷ ꓐꓴ ꓐꓰ ꓙꓵꓽ ꓗ ꓒ ꓐꓴ ꓥ ꓟ ꓔꓯ ꓣꓳ ꓟꓳꓻ ꓪ ꓓˍ ꓡꓳ= ꓖꓳ ꓡꓱ ꓥˍ ꓟꓲ ꓙꓵꓽ ꓗ ꓔꓯ ꓬꓲ ꓪ ꓛꓳ ꓫꓱꓽˍ ꓐꓯ ꓟ ꓠꓬ ꓬꓲ ꓕꓯꓽ ꓢꓲ ꓗꓪ ꓡꓰꓽ ꓛꓳ ꓫꓱꓽˍ ꓟ ꓟꓬꓽ ꓠꓬꓲ ꓥ ꓡꓳ= ꓬꓲ ꓪ ꓠꓲꓹ ꓟ ꓘꓴꓽ ꓗꓪ ꓠꓬ ꓮ ꓡꓲ ꓕꓲ ꓫꓵꓽ ꓔꓯˍ ꓟꓲ ꓙꓽ ꓜꓲꓼˍ ꓟ ꓟꓽ ꓙꓳ= ꓪꓴ-ꓢ ꓙꓵꓽ ꓗ ꓐꓰ ꓞꓳ ꓤ ꓙꓵꓽ ꓗ ꓔꓯ ꓒꓵꓽ ꓛꓳ ꓠꓹ ꓟ ꓬꓲ ꓪ ꓠꓲꓹ ꓡꓶꓽ ꓙꓳˍ ꓥ ꓟꓲ꓾ ꓟꓽ ꓙꓳ ꓥ ꓟꓲ꓾ ꓧꓪꓽ ꓖꓳ ꓓꓱꓽ ꓗꓪ ꓐꓰ ꓛꓳ ꓔꓬ ꓠꓬ ꓟꓬꓽ ꓙꓲ ꓡꓰꓳ꓾ ꓙꓵꓽ ꓗ ꓮ ꓙꓵꓽ ꓔꓯ ꓖꓽ ꓛꓳ ꓔꓬꓹ ꓕꓲ ꓖꓼ ꓓꓹꓳ꓾ ꓐꓰ ꓓꓵꓽ ꓙ ꓔꓬ ꓖꓴˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓟ-ꓕꓲ ꓕꓳ ꓶꓽ 23 ꓕꓱ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓪ ꓔꓯ ꓮ ꓟꓬꓹ ꓐꓯ ꓔ ꓟ ꓔꓯ ꓟꓳ ꓪ ꓓꓹ ꓡꓳ=

ꓕꓱ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓒ-ꓡꓰ-ꓢꓷ ꓐꓴ ꓔꓯ ꓐꓯ ꓟ ꓠꓬ ꓜꓳꓽˍ ꓡꓳ꓾ ꓬꓲ ꓪ ꓔꓯ ꓐꓯ ꓟ ꓠꓬ ꓟꓽ ꓛꓳꓸ ꓡꓰ ꓐꓰ ꓣꓳ ꓓꓵꓽ ꓙ ꓔꓬꓹ ꓥꓳ= ꓖꓳ ꓡꓱ ꓓꓵꓽ ꓙˍ ꓟˍ ꓟꓲ ꓔꓱꓹ ꓟ ꓥ ꓡꓳ= ꓬꓲ ꓪ ꓠꓽ ꓟꓷꓽ ꓠꓷꓹ ꓘꓶꓽ ꓗꓪ ꓐꓰˍ ꓡꓰꓽ ꓪꓴ-ꓢ ꓙꓵꓽ ꓗ ꓔꓯ ꓛꓳ ꓫꓱꓽ ꓢꓲ ꓙꓲˍ ꓟ ꓟꓬꓱꓽ ꓔꓯ ꓠꓬ ꓮ ꓔꓲꓸ ꓤ ꓟꓲ ꓟꓽ ꓬꓰ ꓓꓳꓻ ꓡ꓾ ꓐꓰ ꓬꓲ ꓪ ꓔꓯ ꓝꓴꓲꓸ ꓓꓰꓻ ꓓꓴ ꓓꓳ ꓡˍ ꓡꓳ= ꓕꓱ ꓡꓱ ꓓꓵꓽ ꓙˍ ꓟ ꓝꓴꓲꓸ ꓓꓰˍ ꓟ ꓣꓳ ꓠꓯꓸꓼ ꓗꓪ ꓔꓳꓹ ꓜꓳꓽ ꓡˍ ꓕꓯ ꓕꓱ ꓟ ꓔꓯ ꓣꓳ ꓮ ꓡꓲ ꓐꓰ ꓐꓰ ꓬꓰ ꓠꓯꓹ ꓡ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲˍ ꓡ=

ꓣꓳ ꓤꓶꓻ ꓗꓪ ꓥˍ ꓟꓲ ꓪꓴ-ꓢ ꓐꓯ ꓘꓶꓽ꓾ ꓪꓴ-ꓢ ꓙꓵꓽ ꓗ꓾ ꓪꓴ-ꓢ ꓡꓰ ꓟꓸ ꓖꓶꓽ ꓔ ꓟ ꓔꓯ ꓧꓪꓽ ꓖꓳ ꓓꓱꓽ ꓕꓲ ꓒꓳꓹ ꓗꓪ ꓡꓰꓽ꓾ ꓬꓲ ꓕꓯꓽ ꓢꓲ ꓗꓪ ꓡꓰꓽ ꓖꓽ ꓛꓳ ꓛꓳ ꓫꓱꓽ ꓔꓬ ꓢꓲ ꓠꓬꓲ ꓚꓵꓺ ꓚꓵꓺ ꓠꓲꓹ ꓟ ꓙꓳꓻ ꓙꓳꓻ ꓡꓰꓽ ꓖꓽ ꓛꓳ ꓟꓽ ꓐ ꓡ ꓟ ꓔꓯˍ ꓟꓲ ꓔꓳꓹ ꓜꓳꓽ ꓡˍ ꓟ ꓙꓳˍ ꓥꓳ= ꓕꓲ ꓣꓳ ꓛꓳꓽ ꓕꓲ ꓣꓳ ꓖꓼ ꓖꓶꓽ ꓡꓯ ꓘꓳ ꓠ ꓗꓹ ꓡꓳ ꓐꓰ ꓠꓱꓸ ꓐꓯ ꓢꓴ ꓔꓯ ꓐꓯ ꓟꓳꓸ ꓖꓶ ꓔꓬ ꓥ ꓟꓲ ꓣꓳ ꓔꓯ ꓛꓬꓻ ꓡ ꓕꓯ ꓠꓽ ꓚꓵꓺ ꓚꓵꓺ ꓖꓼ ꓖꓶ ꓐ ꓡˍ ꓡ= ꓠꓵꓻ ꓠꓲꓹ ꓗꓪ ꓐꓰ ꓬꓰ ꓙ ꓔꓳꓹ ꓙ ꓐꓰ ꓢꓴ ꓔꓯ ꓐꓯ ꓟꓳꓸ ꓖꓶ ꓔꓬ ꓥ ꓟꓲ ꓚꓲꓸ ꓛꓬ ꓠꓬ ꓕꓲ ꓖꓳ ꓓꓱꓽ ꓕꓲ ꓠꓲꓹ ꓟ ꓡꓱꓸꓼ ꓞꓳ ꓫꓵꓽ ꓮ ꓙꓵꓽ ꓾ ꓘꓴ ꓜꓲ ꓞꓳ ꓟꓽ ꓘꓶꓽ ꓘꓶꓽ ꓠꓵꓻ ꓠꓲꓹ ꓗꓪ ꓐꓰ ꓬꓰ ꓙ ꓐ ꓡˍ ꓡ= ꓠꓲꓹ ꓟ ꓠꓬꓱꓸˍ ꓟ ꓠꓲꓹ ꓢꓲꓼˍ ꓟ ꓕꓽ ꓬꓰ ꓐꓰ ꓢꓴ ꓔꓯ ꓐꓯ ꓗꓷˍ ꓥ ꓟꓲ ꓣꓳ ꓚꓲ ꓛꓬ ꓠꓬ ꓠꓲꓹ ꓟ ꓦꓶˍ ꓟ ꓠꓲꓹ ꓢꓲꓼˍ ꓟ ꓔꓯ ꓠꓽ ꓗꓷ ꓐ ꓡˍ ꓡ= ꓣꓳ ꓚꓬꓴꓸ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓔꓯ ꓛꓳꓻ ꓢꓴ ꓐꓴ ꓠꓬ ꓪꓴ-ꓢ ꓙꓵꓽ ꓗ ꓔꓯ ꓬꓲ ꓕꓯꓽ ꓢꓲꓺ ꓗꓪ ꓡꓰꓽ ꓬꓰ ꓔꓬ ꓕꓲ ꓖꓼ ꓣꓳ ꓬꓰˍ ꓟ ꓠꓬ ꓔꓱꓹ ꓚꓵˍ ꓡꓳ꓾ ꓣꓳ ꓬꓰ ꓔꓬ ꓟ ꓠꓬ ꓮ ꓘꓶꓸ ꓜꓳꓽˍ ꓡꓳ ꓐꓰ ꓘꓳꓹ ꓣꓴ ꓔ ꓟꓽ ꓓ=

ꓣꓳ ꓠꓲꓹ ꓟ ꓔꓯ ꓡꓶꓸ ꓢꓲ ꓕꓲ ꓠꓲꓹ ꓟ ꓡꓱꓸꓼ ꓪꓴ-ꓢ ꓙꓵꓽ ꓗ ꓔꓯ ꓛꓳꓻ ꓫꓱꓽˍ ꓕꓯ ꓢꓲ ꓡꓰꓽ ꓣꓳ ꓚꓲꓸ ꓛꓬ ꓣꓱꓽ ꓬꓰ ꓔꓬ ꓟ꓾ ꓖꓼ ꓛꓳ ꓔꓬ ꓟ ꓠꓬ ꓥ꓾ ꓟꓽ ꓥ꓾ ꓐꓯ ꓟ ꓔꓯ ꓚꓵꓺ ꓚꓵꓺ ꓢꓷꓸ ꓡˍ ꓥꓳ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ “ꓠꓴ ꓪ ꓙꓲ ꓫꓬꓹ ꓟ ꓠꓬ ꓒ-ꓡꓲ-ꓢꓷ ꓐꓴ ꓐꓰ ꓙꓵꓽ ꓗ ꓟꓸ ꓒ ꓐꓴ ꓕꓯꓽ ꓢꓲ ꓟꓽ ꓙꓲ ꓫꓬ ꓠꓬ ꓠꓴ ꓪ ꓠꓽ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓟꓶ ꓟꓽ ꓓ” ꓐꓰ ꓣꓳ ꓐꓴ ꓔꓯ ꓬꓲꓼ ꓠꓬꓲꓸ ꓖꓶ ꓔꓬ ꓟ ꓥ ꓡꓳ=