ꓠꓴ ꓪ ꓠꓲꓹ ꓟ ꓫˍ ꓟ ꓠꓬ ꓗꓹ ꓛꓲꓽ ꓓꓴ ꓒꓬꓱꓼ ꓡˍ ꓥꓳ꓾

“ꓥꓪ ꓠꓴ ꓪ ꓔꓯ ꓔꓱꓹ ꓔꓱꓹˍ ꓐꓯ ꓖꓶˍ ꓠꓬꓲ꓾ ꓠꓴ ꓪ ꓠꓬ ꓮ ꓛꓬꓹ ꓙꓱ ꓢꓲ ꓥꓴˍ ꓥꓳ= ꓖꓳ ꓡꓱ ꓥˍ ꓟꓲ ꓟꓲ ꓠꓯ ꓡ ꓞꓳ ꓠꓽ ꓗꓹ ꓛꓲˍ ꓥꓳ= ꓠꓴ ꓪ ꓠꓬ ꓠꓲꓹ ꓟ ꓫꓸ ꓥꓳ= ꓖꓳ ꓡꓱ ꓥˍ ꓟꓲ ꓠꓴ ꓪ ꓠꓲꓹ ꓟ ꓫˍ ꓟ ꓠꓬ ꓗꓹ ꓛꓲ ꓓꓴ ꓑꓶꓸ ꓡꓰˍ ꓥꓳ=” ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓡꓳ=

ꓠꓲꓹ ꓟ ꓫˍ ꓟ ꓐꓰ ꓥꓴꓻˍ ꓟ ꓠꓬ ꓣꓳ ꓤꓶꓻ ꓗꓪ ꓒꓬꓱꓼ ꓔꓬ ꓟ ꓘꓴꓽ ꓗꓪ ꓟ ꓕꓲ ꓫꓵꓽ ꓥ ꓡꓳ= ꓤ ꓠꓱ ꓤ ꓐꓴ ꓠꓬ ꓫꓸ ꓓꓴ ꓬꓲ ꓤ ꓤ ꓔꓳꓹ ꓜꓳꓽ ꓡˍ ꓕꓯ ꓥꓴꓻˍ ꓡꓳ= ꓖꓳ ꓡꓱ ꓥ ꓟꓲ ꓣꓳ ꓮ ꓙꓵꓽ ꓠꓬ ꓣꓳ ꓕꓲ ꓤꓶꓻ ꓡꓱꓸꓼ ꓗꓪ ꓠꓲꓹ ꓟ ꓫꓸ ꓓꓴ ꓔꓯ ꓔꓳꓹ ꓜꓳꓽ ꓔꓬ ꓪˍ ꓡꓳ= ꓕꓯꓽ ꓢꓲ ꓗꓪ ꓟ ꓢꓲꓽ ꓫꓬ ꓕꓳꓽ ꓶ ꓝꓲꓸ ꓗꓪ꓾ ꓠꓲꓹ ꓟ ꓫꓸˍ ꓟ ꓐꓰ ꓥꓴꓻˍ ꓟ ꓠꓬ ꓬꓲ ꓪ ꓤꓶꓻ ꓗꓪ ꓔꓳꓹ ꓜꓳꓽ ꓠ ꓔ ꓟ ꓕꓲ ꓫꓵꓽ ꓥ ꓡꓳ ꓐꓯ ꓟ ꓔꓯ ꓝꓲ ꓓꓴ ꓐꓴ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓢꓷꓸ ꓙ ꓟꓳ ꓙ ꓗꓷꓳ= ꓕꓱ ꓟ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓟ ꓥ ꓡꓳ= ꓟꓲ ꓠꓯ ꓞꓳ ꓤ ꓐꓴ ꓤꓶꓻ ꓠꓬ ꓕꓲ ꓤꓶꓻ ꓡꓱꓸꓼ ꓗꓪ ꓗꓹ ꓛꓲꓽ ꓓꓴ ꓡꓰꓽ ꓐꓲ ꓓꓻˍ ꓟ ꓟꓽ ꓥ꓾ ꓐꓯ ꓟ ꓔꓯ ꓐꓯ ꓟꓸ ꓖꓶ ꓠꓲꓹ ꓫꓵˍ ꓡꓳ= ꓬꓲ ꓝꓲ ꓓꓴ ꓐꓴ ꓔꓳꓹ ꓜꓳꓽ ꓠ ꓔ ꓟ ꓫꓸ ꓙꓵ ꓓꓴ ꓐꓴ ꓔꓯ ꓐꓯ ꓟꓸ ꓖꓶˍ ꓟ ꓠꓬ ꓢꓲ ꓒ ꓬꓲ ꓠꓵꓻ ꓠꓲꓹ ꓕꓲ ꓟ ꓥ ꓡꓳ=

ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓪ ꓔꓯ “ꓬꓲ ꓪ ꓠꓲꓹ ꓟ ꓫꓸˍ ꓟ ꓠꓬ ꓗꓹ ꓛꓲꓽ ꓓꓴ ꓑꓶꓸ ꓡꓰˍ ꓥꓳ” ꓐꓰ ꓐꓯ ꓖꓶˍ ꓢꓰꓽ ꓡꓳ= ꓕꓱ ꓟ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓐꓯ ꓘꓶꓽ ꓗꓪ ꓟꓬꓽ ꓠꓬꓲ ꓬꓳꓸ ꓚꓵˍ ꓟ ꓐꓯ ꓘꓶꓽ ꓥ ꓡꓳ=

ꓣꓳ ꓤꓶꓻ ꓗꓪ ꓥ ꓟꓲ ꓖꓳ ꓟ ꓡꓰ ꓐꓰ ꓕꓲ ꓡꓰꓹ ꓥꓳ= ꓣꓳ ꓤꓶꓻ ꓠꓬ ꓠꓲꓹ ꓟ ꓫˍ ꓓꓴ꓾ ꓠꓻ ꓙꓵ ꓓꓴ ꓗꓪ ꓐꓰ ꓡꓲꓹ ꓗꓷˍ ꓥꓳ꓾ ꓣꓳ ꓤꓶꓻ ꓗꓪ ꓠꓲꓹ ꓟ ꓫˍ ꓓꓴ꓾ ꓠꓻ ꓓꓴ ꓟꓽ ꓙꓳꓻꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓙꓻ ꓟꓳ ꓘꓶꓽ ꓟꓽ ꓖꓶ ꓔ= ꓬꓲ ꓗ ꓠꓯꓸ ꓛꓳ ꓫꓱꓽˍ ꓟ ꓠꓬ ꓮ ꓙꓵꓽ ꓢꓻ ꓡꓰˍ ꓥꓳ ꓐꓰ ꓣꓳ ꓐꓴ ꓔꓯ ꓬꓲ ꓟꓽ ꓐꓯ ꓔ= ꓬꓲ ꓡꓰ ꓐꓯ ꓔ ꓟ ꓠꓬ ꓬꓲ ꓗ ꓠꓯꓸ ꓛꓳ ꓫꓱꓽˍ ꓕꓯ ꓠꓽ ꓬꓲ ꓛꓴ ꓓꓴ ꓡꓰ ꓐꓰ ꓖꓼ ꓛꓳ ꓠꓯꓹ ꓡꓳ꓾ ꓐꓯ ꓟ ꓔꓯ ꓬꓲ ꓣꓳ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ= ꓬꓲ ꓬꓰˍ ꓟ ꓡꓰ ꓬꓰ ꓠꓹ ꓟ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ= ꓬꓲ ꓠꓬ ꓫꓸ ꓙꓵ ꓗꓷ ꓢꓲ꓾ ꓘꓶꓻ ꓙꓵˍ ꓟ ꓟꓶ ꓡꓰ ꓗ ꓠꓯꓸ ꓡꓳꓹ ꓬꓰˍ ꓕꓯ ꓬꓲ ꓔꓯ ꓢꓰꓼ ꓗꓷꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓬꓲ ꓠꓬ ꓡꓳꓹ ꓬꓰˍ ꓕꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓟ ꓟꓽ ꓙꓳ ꓠꓬ꓾ ꓟꓴꓽ ꓗꓪ ꓗꓪ ꓓꓯꓻ ꓙꓰˍ ꓟ ꓟꓽ ꓙꓳ ꓠꓬ ꓕꓱ ꓟ ꓠꓬ ꓠꓲꓹ ꓟ ꓫꓸ ꓓꓴ ꓕꓲ ꓫꓵꓽ ꓒꓬꓱꓼ ꓡꓰˍ ꓥꓳ=

ꓣꓳ ꓠꓬ ꓬꓲ ꓛꓲ ꓓꓴ ꓗꓪ ꓫꓱꓽ ꓙꓰˍ ꓠꓬ꓾ ꓣꓳ ꓤꓶꓻ ꓠꓲꓹ ꓟ ꓫˍ ꓓꓴ ꓥ ꓕ ꓑꓳꓸꓼ ꓔꓯ ꓞꓳ ꓤ ꓮ ꓟꓬꓹ ꓐꓱ ꓶ ꓣꓱꓽ ꓛꓰꓽ ꓕꓲ ꓟˍ ꓡꓰ ꓐꓰ ꓟꓳꓻ ꓠꓹ ꓟ ꓬꓳꓸ ꓚꓵˍ ꓡꓳ= ꓣꓳ ꓤꓶꓻ ꓠꓯꓸꓼ ꓗꓪ ꓔꓳꓹ ꓜꓳꓽ ꓡˍ ꓟ ꓟ ꓠꓲꓹ ꓟ ꓫˍ ꓓꓴ ꓔꓯ ꓙꓵꓻ ꓠꓲꓹ ꓐꓰ ꓥꓳꓺ ꓡꓳˍ ꓟ ꓠꓲꓹ ꓟ ꓗꓪ ꓐꓰ ꓗꓳꓸ ꓘꓳ ꓐ ꓡˍ ꓕꓯ ꓠꓽ꓾ ꓮ ꓡꓲ ꓕꓲ ꓫꓵꓽ ꓥˍ ꓟꓲ ꓣꓳ ꓐꓴ ꓔꓯ ꓬꓲ ꓓꓳꓻ ꓗꓪ ꓛꓲ ꓚꓵꓹ ꓞꓰ ꓟꓽ ꓐ ꓡꓺꓳ= ꓮ ꓙꓵꓽ ꓠꓬ ꓪꓴ-ꓢ ꓬꓲ ꓟꓬꓱ ꓓꓳꓽ ꓐꓱ ꓶ ꓒꓬꓱꓼ ꓡ ꓢꓲ ꓠꓬꓲ꓾ ꓮ ꓓꓲꓽ ꓗꓹ ꓛꓲꓽ ꓡˍ ꓥꓳ= 

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲ ꓒ ꓬꓲ ꓐꓯ ꓘꓶꓽ ꓔꓯ ꓣꓳ ꓓꓵꓽ ꓙ ꓠꓬꓲ ꓡꓯ= ꓬꓲ ꓠꓬ ꓐꓯ ꓘꓶꓽ ꓕꓱ ꓟ ꓔꓯ ꓬꓲ ꓝꓲ ꓓꓴ ꓔꓯ ꓡꓰꓽ ꓐꓯ ꓔꓬ ꓟ ꓟꓽ ꓥ ꓐꓯ ꓟ ꓔꓯ ꓣꓳ ꓚꓲꓸ ꓔ ꓡꓯ= ꓕꓱ ꓟ ꓠꓬ ꓠꓴ ꓐꓰ ꓥꓪ ꓔꓯ ꓥˍ ꓟꓲ ꓐꓯ ꓔꓬ ꓟ ꓥ ꓡꓳ= ꓟꓲ ꓠꓯ ꓠꓬ ꓣꓳ ꓔꓯ ꓫꓸ ꓓꓴ ꓕꓲ ꓫꓵꓽ ꓫꓵꓽ ꓖꓶꓽ ꓡˍ ꓕꓯ ꓖꓳ ꓟ ꓐꓱ ꓶ ꓝꓴꓲꓸ ꓕꓽ ꓓꓰꓺ꓾ ꓙꓳꓺˍ ꓟꓲ ꓕꓽ ꓙꓳꓺ= ꓠꓲꓹ ꓫ ꓓꓴ ꓧꓶꓸ ꓕꓯ ꓔꓳꓹ ꓜꓳꓽ ꓡ ꓕꓯ ꓠꓲꓹ ꓟ ꓕꓽ ꓙꓬ= ꓕꓱ ꓟ ꓮ ꓙꓵꓽ ꓪꓴ-ꓢ ꓔꓯ ꓡꓯꓼ ꓙꓱꓻ ꓗꓷ ꓢꓲ ꓠꓬꓲ꓾ ꓡꓳꓹ ꓬꓰˍ ꓕꓯ ꓬꓲ ꓡꓰ ꓙꓻ ꓟꓳ ꓘꓶꓽ ꓖꓶ ꓔ ꓟ ꓣꓳ ꓠꓲꓹ ꓫꓸ ꓟ ꓠꓬ ꓗꓹ ꓛꓲꓽ ꓠꓲꓹ ꓗꓪ ꓑꓶꓸ ꓙꓰ꓾ ꓒꓳꓹ ꓡꓶꓸ ꓖꓶ ꓡ ꓝꓲ=

ꓥꓳ ꓡꓳ ꓓꓴ ꓮ ꓙꓵꓽ ꓬꓲ ꓢꓲꓺ ꓒꓽꓳ꓾ ꓥꓪ ꓤꓶꓻ ꓗꓪ ꓟ ꓫꓸ ꓙꓵ ꓓꓴ꓾ ꓠꓲꓹ ꓫ ꓓꓴ ꓮ ꓙꓵꓽ ꓠꓴ ꓔꓯ ꓡꓯꓼ ꓙꓱꓻ ꓖꓶˍ ꓥꓳ= ꓥꓪ ꓠꓲꓹ ꓫꓸ ꓓꓴ꓾ ꓠꓲꓹ ꓟ ꓙꓬ ꓓꓴ꓾ ꓫꓸ ꓙꓵ ꓓꓴ꓾ ꓠꓲꓹ ꓟ ꓘꓶꓻ ꓡꓶꓽ ꓓꓴ ꓮ ꓙꓵꓽ ꓔꓯ ꓠꓴ ꓡꓯꓽ ꓒꓯꓹ ꓗꓪ ꓗꓷ ꓖꓶˍ ꓥꓳ= ꓢꓲ ꓒ ꓠꓴ ꓠꓬ ꓮ ꓙꓵꓽ ꓟ ꓗꓪ ꓪꓽ ꓠꓬꓲ ꓓꓰ ꓡꓰ ꓢꓴ ꓥ ꓢꓲ꓾ ꓙꓳˍ ꓟ ꓮ ꓙꓵꓽ ꓔꓯ ꓢꓲ ꓒ ꓠꓴ ꓟꓬꓱ ꓓꓳꓽ ꓐꓬꓱꓼ ꓡꓱꓼ ꓡꓱꓼ ꓟˍ ꓗꓪ ꓒꓳꓹ ꓡꓶꓸ ꓗꓷ ꓠꓹ ꓟ ꓠꓲꓹ ꓡꓶꓽ ꓙꓳˍ ꓟ ꓔꓯ ꓥꓪ ꓙꓵꓻˍ ꓡꓳ= ꓥꓪ ꓠꓲꓹ ꓙꓬ ꓔꓬ ꓟ ꓙꓵꓹ ꓗꓪ ꓥꓪ ꓔꓯ ꓥꓳ ꓡꓳꓸ ꓓꓴ ꓖꓶꓽ ꓡꓯ= ꓝꓮꓲ ꓥꓪ ꓤꓶꓻ ꓗꓪ ꓫꓸ ꓓꓴ ꓔꓳꓹ ꓜꓳꓽ ꓡ ꓕꓯ ꓥꓪ ꓔꓯ ꓙꓵꓻ ꓠꓲꓹ ꓖꓶꓽ ꓡꓯ= ꓢꓲꓺ ꓒ ꓬꓰ-ꓢꓴꓺꓳ꓾ ꓠꓴꓻ ꓔꓯ ꓥꓪ ꓙꓵꓻˍ ꓡꓳ=