ꓠꓴ ꓪ ꓢꓲ ꓡꓲ ꓟ ꓟꓶ ꓝꓲ

ꓢꓯꓸ ꓬꓲꓼ ꓡ ꓑꓮꓲꓽ ꓠꓽ ꓡꓲꓸ ꓠꓬꓲ꓾ ꓠꓬꓲꓸ ꓠꓬꓲ ꓗꓪ ꓦ ꓢꓯꓼ ꓣꓴ ꓠꓹ ꓟ ꓢꓲꓽ ꓫꓬ ꓕꓳ ꓶ ꓝꓲ ꓠꓬ ꓡꓴ-ꓘ=24ꓽ35-48 ꓥ ꓡꓳ=

ꓝꓲ ꓓꓴ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓫꓸ ꓙꓵ ꓗꓷ ꓟ ꓐꓰ ꓫꓵꓻ ꓗꓷ ꓟ ꓫꓵꓽ ꓪꓴ ꓔꓯ ꓙꓳꓺ ꓔꓬ ꓟ ꓥ ꓢꓲ꓾ ꓬꓴ-ꓔ ꓡ ꓞꓳ ꓐꓴ ꓡꓰ ꓬꓲ ꓪ ꓐꓴ ꓔꓯ ꓧꓪ ꓡˍ ꓟ ꓔꓯ ꓙꓳꓺ ꓔꓬ ꓟ ꓑꓶꓸ ꓓꓴ ꓬꓲ ꓪ ꓠꓬ ꓗꓹ ꓘꓶꓽ ꓚꓵꓸ ꓢꓲ ꓑꓬ ꓔꓬ ꓡꓳ= ꓬꓰ-ꓢꓴ ꓡꓰ ꓬꓲ ꓪ ꓔꓯ ꓟꓳꓸ ꓖꓶ ꓡˍ ꓕꓯ꓾ ꓬꓲ ꓪ ꓡꓰ ꓖꓼ ꓛꓳ ꓗꓷ ꓟ ꓢꓲꓺ ꓒ ꓠꓬ ꓗꓳꓸ ꓗꓷ ꓟ ꓢꓽ ꓠꓬꓲ ꓕꓯ ꓡꓰ ꓫꓵꓻ ꓢꓲ ꓬꓲ ꓔꓯ ꓔꓵꓸ ꓗꓷ ꓟ ꓑꓶꓸ ꓓꓴ ꓮ ꓘꓶꓸ ꓙꓳꓺ ꓔꓬ ꓟ ꓥ ꓡꓳ=

ꓬꓲ ꓪ ꓠꓬ ꓫꓵꓻ ꓗꓴꓸ ꓫꓵꓻ ꓦ ꓔꓯ ꓟꓳꓻ ꓗꓷ ꓟ ꓥ ꓡ? ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓪ ꓔꓯ ꓮ ꓘꓶꓸ ꓣꓱꓽ ꓞꓹ ꓕꓲ ꓙꓵꓹ ꓗꓪ ꓬꓲ ꓪ ꓠꓬ ꓛꓰꓹ ꓙꓰ ꓗꓷ ꓟ ꓑꓶꓸ ꓓꓴ ꓫꓵꓻ ꓦ ꓠꓬ ꓬꓲ ꓪ ꓔꓯ ꓟꓳꓸ ꓖꓶ ꓡ ꓢꓲ ꓝꓴꓲꓸ ꓓꓰꓺ ꓡˍ ꓟ ꓥ ꓡ?

ꓠꓴ ꓪ ꓮ ꓫꓵꓽ ꓪꓴꓸ ꓠꓬꓲ ꓓꓵꓽ ꓙ ꓫꓸˍ ꓡ? ꓐꓰ ꓬꓰ-ꓢꓴ ꓡꓰ ꓬꓲ ꓪ ꓔꓯ ꓠꓺ ꓠꓬꓲ ꓗꓷꓳ= ꓝꓲ ꓓꓴ ꓐꓴ ꓮ ꓫꓵꓽ ꓔꓯ ꓓꓵꓽ ꓙ ꓫꓸ ꓔꓬ ꓟ ꓔꓯ ꓬꓰ-ꓢꓴ ꓢꓷꓸ ꓔ ꓥˍ ꓟꓲ꓾ ꓬꓲ ꓪ ꓚꓲꓸ ꓛꓬ ꓓꓵꓽ ꓙ ꓚꓬꓹ ꓠꓬꓲ ꓝꓲ ꓠꓲꓹ ꓫꓵˍ ꓟ ꓑꓶꓸ ꓓꓴ ꓬꓰ-ꓢꓴ ꓡꓰ ꓠꓺ ꓠꓬꓲ ꓗꓷ ꓟ ꓥ ꓡꓳ= ꓢꓲꓺ ꓒ ꓠꓬ ꓬꓲ ꓪ ꓐꓴ ꓐꓰ ꓕꓲ ꓪ 3 ꓘꓳꓼ ꓗꓪ ꓛꓲ ꓔꓬ ꓗꓷ ꓢꓲ꓾ ꓓꓵꓽ ꓙ ꓮ’ ꓡꓰ ꓓꓴ ꓟꓬꓱꓽ ꓮ ꓟꓬꓹ ꓔꓯ ꓬꓰ ꓟꓳꓸ ꓖꓶ ꓗꓷꓳ= ꓬꓲ ꓠꓬ ꓙꓲ-ꓢꓴ꓾ ꓪꓴ-ꓢ ꓬꓲ ꓤ ꓔꓲꓸ ꓥ ꓟ ꓔꓯˍ ꓟꓲ ꓬꓲ ꓪ ꓐꓴ ꓔꓯ ꓚꓺ ꓟꓸ ꓖꓶ ꓗꓷꓳ= ꓬꓲ ꓫꓸ ꓙꓵꓻ ꓢꓲ ꓫꓵꓻ ꓠꓯꓹ ꓟ ꓐꓰ ꓢꓽ ꓠꓬꓲ ꓗ ꓠꓯꓸ ꓢꓯꓸ ꓬꓲꓼ ꓡˍ ꓥꓳ꓾ ꓐꓯˍ ꓟ ꓔꓯˍ ꓟꓲ ꓐꓯ ꓟꓸ ꓖꓶ ꓗꓷꓳ= ꓖꓳ ꓡꓱ ꓠꓬ ꓝꓲ ꓓꓴ ꓐꓴ ꓠꓬ ꓮ ꓫꓵꓽ ꓑꓶꓸ ꓓꓴ ꓙꓽ ꓫꓸ ꓛꓵˍ ꓡ? ꓬꓲ ꓠꓬ ꓢꓯꓼ ꓟꓬ ꓐꓰ ꓫꓵꓻˍ ꓟ ꓬꓲ ꓢꓲꓺ ꓒ ꓥ ꓟ ꓔꓯ ꓬꓲ ꓪ ꓐꓴ ꓟꓲꓺ ꓡꓰˍ ꓗꓷ ꓡ?

ꓠꓴ ꓪ ꓮ ꓫꓵꓽ ꓪꓴꓸ ꓠꓬꓲ ꓓꓵꓽ ꓙ ꓫꓸˍ ꓡ? ꓠꓺ ꓠꓬꓲ ꓘꓶꓽ ꓕꓱ ꓟ ꓠꓬ ꓮ ꓟꓶ ꓟ ꓦꓬꓼ ꓠꓬꓲ ꓬꓲ ꓙꓵꓹ ꓗꓪˍ ꓟꓲ ꓣꓳ ꓐꓴ ꓔꓯ ꓠꓺ ꓠꓬꓲ ꓔꓬ ꓟ ꓥ ꓡꓳ= ꓣꓳ ꓐꓴ ꓠꓬ ꓞꓲꓼ ꓣꓳˍ ꓕꓯ ꓡꓰ ꓪꓴ-ꓢ ꓐꓯ ꓘꓶꓽ ꓑ ꓙꓽ ꓪ ꓡꓰ ꓢꓲ꓾ ꓢꓲꓺ ꓒ ꓬꓰ-ꓢꓴ ꓔꓯ ꓢꓷꓸ ꓗꓷ ꓥˍ ꓟꓲ꓾ ꓟꓬꓽ ꓠꓬꓲ ꓠꓬ ꓮ ꓟꓶ ꓒꓬꓱꓼ ꓔꓬ ꓟ ꓠꓻ ꓫꓵꓽ ꓠꓻ ꓙꓰꓽ꓾ ꓗꓴꓷꓼ ꓫꓵꓽ ꓪꓴ ꓑꓶꓸ ꓓꓴ ꓠꓲꓹ ꓫꓸ ꓓꓴ ꓕꓱ ꓟ ꓑꓶꓸ ꓓꓴ ꓣꓳ ꓐꓴ ꓠꓬ ꓮ ꓟꓬꓹ ꓙꓽ ꓫꓸ ꓔꓬ ꓖꓴˍ ꓟ ꓥ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓤꓹ ꓠꓬꓲ ꓫꓵꓽ ꓠꓬꓲ ꓓꓴ ꓣꓳ ꓔꓯ ꓛꓲꓺ ꓡ ꓕꓯ꓾ ꓣꓳ ꓐꓴ ꓠꓬ ꓬꓰ-ꓢꓴ ꓔꓯ ꓐꓰ ꓒꓳꓹ ꓙꓰ ꓔꓬ ꓡꓳ=

ꓬꓲ ꓠꓬ ꓕꓱ ꓟ ꓔꓯ ꓢꓷꓸˍ ꓡꓳ= ꓣꓳ ꓟꓽ ꓐ ꓡ ꓟ ꓔꓯ ꓬꓲ ꓢꓷꓸˍ ꓟ ꓥ ꓡꓳ= ꓣꓳ ꓔꓯ ꓙꓳˍ ꓟ ꓮ ꓘꓶꓸ ꓣꓳˍ ꓟ ꓙꓵꓻ ꓠꓲꓹ ꓠꓬ ꓢꓲꓺ ꓒ ꓐꓱ ꓶ ꓚꓵꓺ ꓔ ꓟꓽ ꓐ ꓡ= ꓙꓵꓻ ꓠꓲꓹ ꓮ ꓔꓲꓸ ꓤ ꓣꓳ ꓔꓯ ꓙꓳˍ ꓟꓲ ꓢꓲꓺ ꓒ ꓠꓬ ꓢꓷꓸˍ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓬꓲ ꓠꓬ ꓟꓲ ꓠꓯ ꓡꓳꓹ ꓬꓰˍ ꓗꓪ ꓛꓲꓺ ꓣꓳ ꓐꓴ ꓐꓰ ꓔꓬ ꓥꓳ꓾ ꓐꓰ ꓬꓲ ꓡꓰ ꓙꓻ ꓟꓳ ꓘꓶꓽ ꓖꓶ ꓔꓲꓸ ꓟ ꓥ ꓡꓳ=

ꓣꓳ ꓐꓴ ꓠꓬ ꓙꓳꓺ ꓛꓱꓽ ꓡˍ ꓕ ꓑꓳꓸ꓾ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓠꓵꓻ ꓠꓲꓹ ꓙꓳ ꓔꓬ ꓟ ꓑꓶꓸ ꓓꓴ ꓣꓳ ꓐꓴ ꓔꓯ ꓙꓻ ꓟꓳ ꓘꓶꓽ ꓖꓶ ꓠꓹ ꓟ ꓬꓯꓼ ꓡˍ ꓡꓳ= “ꓠꓴ ꓪ ꓢꓲ ꓡꓲ ꓟ ꓟꓶ ꓝꓲ” ꓕꓱ ꓟ ꓠꓬ ꓙꓳꓺ ꓛꓱꓽ ꓔꓬ ꓟ ꓬꓲ ꓝꓲ ꓓꓴ ꓐꓴ ꓗꓳ ꓡꓳ ꓗꓪ ꓢꓲꓺ ꓒ ꓬꓰ-ꓢꓴ ꓬꓲ ꓙꓻ ꓟꓳ ꓘꓶꓽ ꓥ ꓡꓳ= ꓙꓻ ꓟꓳ ꓘꓶꓽ ꓕꓱ ꓟ ꓠꓬ ꓣꓳ ꓐꓴ ꓐꓱ ꓶˍ ꓟꓲ ꓥ ꓡꓳ= ꓝꓲ ꓓꓴ ꓐꓴ ꓐꓰ ꓧꓹ ꓡꓯ ꓘꓳꓹ ꓕꓯ ꓐꓯ ꓗꓷ ꓟ ꓐꓯ ꓘꓶꓽ ꓗꓪ꓾ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓟꓲ ꓠꓯ ꓡꓰ ꓖꓶꓽ ꓟꓽ ꓐ ꓡ ꓟ ꓢꓲꓺ ꓡꓲ ꓟ ꓠꓴ ꓪ ꓔꓯ ꓖꓶˍ ꓥꓳ(ꓬꓳ-ꓦ 14ꓽ27) ꓐꓰ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓖꓶ ꓗꓷꓳ= ꓕꓱ ꓟ ꓥˍꓟꓲ ꓣꓳ ꓐꓴ ꓔꓯ ꓙꓻ ꓟꓳ ꓘꓶꓽ ꓖꓶ ꓔ ꓟ ꓥ ꓡꓳ=

ꓙꓻ ꓟꓳ ꓘꓶꓽ ꓕꓱ ꓟ ꓔꓯ ꓣꓳ ꓐꓴ ꓠꓬ ꓔꓵꓹ ꓔ ꓐ ꓡ ꓝꓲ= ꓟꓷꓽ ꓠꓷꓹ ꓝ ꓘꓶꓽ ꓐꓴ ꓔꓯ ꓙꓽ ꓜꓲꓼ ꓠꓹ ꓟ ꓐꓱ ꓶ ꓝꓲ ꓓꓴ ꓐꓴ ꓠꓲꓹ ꓟ ꓔꓯ ꓒꓴ ꓖꓶˍ ꓟ ꓡꓰ ꓐꓰ ꓣꓳ ꓐꓴ ꓠꓲꓹ ꓟ ꓔꓯ ꓥˍ ꓟꓲ ꓬꓲ ꓡꓰ ꓒꓴ ꓖꓶ ꓡ ꓢꓲ꓾ ꓢꓲꓺ ꓒ ꓬꓲ ꓢꓲꓺ ꓡꓲ ꓟ ꓣꓱꓽ ꓛꓰꓽ ꓐꓰ ꓐꓲ ꓡꓰ ꓝꓲ ꓢꓲ ꓠꓬꓲ ꓣꓳ ꓐꓴ ꓮ ꓡꓰ ꓟꓬ ꓛꓲꓺ ꓫꓸ ꓙꓵ ꓓꓴ ꓔꓳꓹ ꓜꓳꓽ ꓔꓬ ꓥˍ ꓟꓲ ꓙꓳꓺ ꓛꓱꓽ ꓓꓴ ꓟꓽ ꓙꓳ ꓟ ꓥ ꓡꓳ=