ꓠꓻ ꓫꓵꓽ ꓠꓻ ꓙꓰꓽ ꓫꓬ, ꓓꓻ ꓡꓰ_ ꓟ

ꓡꓴ‐ꓘ 4ꓽ38‐44

ꓪꓴ‐ꓢ ꓡꓰ ꓖꓶ ꓡˍ ꓟ ꓢꓯꓼ ꓪ꓾ ꓪꓴ‐ꓢ ꓢꓲ‐ꓫꓬ‐ꓟ‐ꓦ ꓗꓪ ꓐꓰ ꓖꓶ ꓡ ꓟ ꓢꓯꓼ ꓪ ꓠꓬ ꓕꓲ ꓣꓳ ꓐꓰ ꓕꓲ ꓣꓳ ꓟꓽ ꓫꓱ. ꓡꓯ ꓘꓳ꓾ ꓕꓲ ꓐꓱ ꓠꓬ ꓠꓻ ꓓꓴ ꓔꓯ ꓫꓬ, ꓐ ꓡ ꓫꓵ꓾ ꓕꓲ ꓐꓱ ꓠꓬ ꓫ. ꓪ ꓮ ꓘꓶ. ꓕꓱ ꓗꓴ. ꓢꓲ ꓠꓬꓲ ꓪꓴ‐ꓢ ꓟ. ꓟꓲꓽ ꓚˍ ꓟ ꓗꓪ ꓮ ꓘꓶ. ꓓ ꓫꓵ ꓕꓱ ꓡꓱ ꓣꓱꓽ ꓛꓰꓽ ꓟꓶˍ ꓫꓵ ꓟꓲ ꓙꓳˍ ꓡꓳ꓿ ꓕꓲ ꓐꓱ ꓠꓬ ꓕꓳ ꓶ ꓮ ꓘꓶ. ꓐꓳ ꓗꓴ. ꓫꓵ ꓣꓱꓽ ꓛꓰꓽ ꓟꓶˍ ꓫꓵ ꓟꓲ ꓙꓳˍ ꓡꓳ꓾ ꓕꓲ ꓐꓱ ꓠꓬ ꓟꓬꓱꓽ ꓬꓰˍ ꓟ ꓗꓪ ꓮ ꓘꓶ. ꓓ ꓫꓵ ꓟꓲ ꓙꓳˍ ꓡꓳ꓾ ꓖꓳ ꓡꓱ ꓠꓬꓲ ꓕꓲ ꓣꓳ ꓛꓳ ꓕꓲ ꓣꓳ ꓣꓱꓽ ꓛꓰꓽ ꓟꓶˍ ꓟ ꓟꓽ ꓫꓱ. ꓡꓯ ꓘꓳ꓿

ꓠꓬꓲ. ꓠꓬꓲ ꓣꓳ ꓵꓻ ꓠ ꓔ ꓟ ꓢꓲ ꓫꓬ ꓕꓳ ꓶ ꓠꓬ ꓡꓴ‐ꓘ 4ꓽ38‐44 ꓗꓪ ꓛꓲ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓠꓬ ꓪꓴ‐ꓢ ꓥ ꓟ ꓑꓶ ꓓꓴ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓥꓳ꓿ ꓖꓳ ꓡꓱ ꓠꓬꓲ ꓠꓲꓽ ꓢ‐ꓓꓯ ꓔꓯ ꓖꓼ ꓓꓳ ꓖꓶˍ ꓟ ꓐꓰ ꓝꓮꓲ ꓞꓳ ꓠꓻ ꓔꓯ ꓫꓬ, ꓖꓶˍ ꓟ ꓟ. ꓟꓲꓽ ꓑ ꓙˍ ꓡꓳ꓿ ꓬꓲ ꓠꓬ ꓠꓻ ꓫꓵ ꓒꓬ ꓫꓵ ꓕꓱ ꓡꓱ ꓐꓰ ꓫꓬ, ꓖꓶ ꓢꓲ ꓠꓬꓲ ꓚꓳ ꓬꓰˍ ꓡꓳ꓿ ꓒꓲ‐ꓕꓱ ꓬꓲ ꓟ, ꓟ ꓔꓬ ꓗꓪ ꓛꓲ ꓬꓰ ꓢꓲ ꓠꓬꓲ ꓬꓲ ꓔꓯ ꓥ ꓟꓲ ꓠꓻ ꓫꓬ, ꓖꓶˍ ꓡꓳ꓿ ꓒꓲ‐ꓕꓱ ꓬꓲ ꓮ ꓟ ꓠꓬ ꓞꓼ ꓐꓰ ꓔꓴ ꓢꓲ ꓠꓬꓲ ꓬꓲ ꓪ ꓔꓯ ꓣꓱꓽ ꓙ ꓖꓶˍ ꓡꓳ꓾ ꓔꓳ, ꓙ ꓖꓶˍ ꓡꓳ꓿ ꓜ ꓫꓬ, ꓖꓶ ꓜꓽˍ ꓡꓳ꓿ ꓕꓱ ꓟ ꓡꓰ ꓐꓰ ꓟꓶ ꓘꓶꓼ ꓙꓵ, ꓛꓲ ꓡ ꓕꓯ ꓠꓻ ꓫꓵꓽ ꓠꓻ ꓙꓰꓽ ꓠꓻ ꓢꓴ ꓮ ꓟꓬ, ꓢꓲ ꓒ ꓬꓰ‐ꓢꓴ ꓠꓯ.ꓼ ꓗꓪ ꓛꓲ ꓡ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓮ ꓙꓵ ꓔꓯ ꓠꓻ ꓫꓬ, ꓖꓶ꓾ ꓠꓲꓽ ꓖꓼ ꓖꓶ꓾ ꓕꓱ ꓡꓱ ꓬꓰ ꓖꓶˍ ꓡꓳ꓾ ꓡ ꓞꓳ ꓮ ꓟꓬ, ꓠꓬ ꓪꓴ‐ꓢ ꓔꓯ ꓙꓵꓻ ꓡꓰ ꓢꓲ ꓠꓬꓲ ꓪꓴ‐ꓢ ꓔꓯ ꓪꓴ. ꓓꓵ ꓕꓱꓼˍ ꓡꓳ꓾ ꓪꓴ‐ꓢ ꓔꓯ ꓓꓳ ꓟꓳ_ ꓡꓳ꓿

ꓖꓳ ꓡꓱ ꓠꓬꓲ ꓟ. ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓢꓷ. ꓓꓴ ꓠꓬ ꓬꓲ ꓪꓴ. ꓕꓲ ꓫꓵ ꓟ ꓠꓬ ꓣꓳ ꓪ ꓠꓬꓲˍ ꓟ ꓗꓪ ꓐꓰ ꓟꓽ ꓥ ꓥ꓾ ꓟ. ꓒꓽ ꓟ. ꓟ ꓕꓲ ꓐꓱ ꓟ ꓠꓬ ꓬꓲ ꓪ ꓙꓳˍ ꓟ ꓪꓴ‐ꓢ ꓡꓰ ꓖꓶ ꓡ ꓟ ꓢꓷ. ꓠꓲ, ꓪꓴ‐ꓢ ꓖꓶ ꓡ ꓟ ꓢꓯꓼ ꓪ ꓗꓪ ꓐꓰ ꓡ ꓞꓳ ꓔꓯ ꓡꓯꓽ ꓒꓯ, ꓚꓰ, ꓢꓲ ꓠꓬꓲ ꓓ ꓡꓰ ꓝꓲ ꓘꓴˍ ꓫꓵ ꓣꓱ ꓛꓰ ꓙꓳˍ ꓡꓳ꓿ ꓔꓲꓺ ꓒ ꓕꓲ ꓐꓱ ꓟ. ꓒꓽ ꓕꓲ ꓐꓱ ꓠꓬ ꓕꓱ ꓡꓱ ꓫꓵ ꓪꓴ‐ꓢ ꓖꓶ ꓡ ꓟ ꓡꓯꓼ ꓫꓴꓻ ꓙꓳˍ ꓡꓳ꓿ ꓕꓱ ꓡꓱ ꓐꓰ ꓙꓳ ꓕꓯ ꓖꓳ ꓟ ꓠꓬ ꓬꓲ ꓪ ꓫꓬ, ꓓ ꓡꓰˍ ꓟ ꓞꓳ ꓠꓻ ꓖꓳ ꓟ ꓠꓬ ꓪꓴ‐ꓢ ꓔꓯ ꓪꓴ. ꓓꓵ ꓕꓱꓼˍ ꓡ? ꓪꓴ‐ꓢ ꓔꓯ ꓫ ꓟꓳ ꓡ? ꓐꓯ ꓟ ꓣꓳ ꓡꓳ. ꓠꓬꓲ ꓠ ꓗ, ꓡꓳ꓿

ꓔꓯ ꓥꓳꓽ ꓟ. ꓒꓽ ꓟ. ꓟ ꓕꓲ ꓐꓱ ꓟ ꓠꓬ ꓬꓲ ꓚꓲ. ꓛꓬ ꓢꓯꓼ ꓪ ꓗꓪ ꓐꓰ ꓬꓲ ꓢꓯꓼ ꓕꓵꓼ ꓡ ꓟ ꓡꓰ ꓐꓰ ꓬꓲ ꓪꓽ ꓛꓴꓽ ꓪꓽ ꓪꓴ ꓘꓳ, ꓔꓬ ꓥꓳ ꓐꓯ ꓠꓬ ꓕꓱ ꓟ ꓠꓬ ꓟꓽ ꓜꓳꓽ꓿ ꓚꓲ. ꓛꓬ ꓠꓻ ꓫꓬ, ꓖꓶ ꓗꓷ ꓟ꓾ ꓚꓲ. ꓛꓬ ꓶꓼ ꓓꓰꓽˍ ꓟ ꓗꓪ ꓐꓰ ꓓꓻ ꓡꓰ ꓟ ꓞꓳ ꓠꓻ ꓖꓳ ꓟ ꓠꓬ ꓪꓴ‐ꓢ ꓔꓯ ꓪꓜꓲ ꓠꓲ, ꓠꓵ ꓡꓰ ꓢꓲ꓾ ꓪꓴ‐ꓢ ꓔꓯ ꓪ ꓜꓲ ꓫꓱ. ꓖꓶˍ ꓥꓳ꓾ꓐꓯ ꓠꓬ ꓕꓱ ꓟ ꓪꓴ‐ꓢ ꓬꓲ ꓚꓳ ꓑ. ꓬꓰ ꓡꓳ꓿ ꓟꓽ ꓥ ꓥ ꓐꓰ ꓞꓳ ꓤ ꓮ ꓙꓵ ꓪꓴ‐ꓢ ꓔꓯ ꓙꓵꓻ ꓠ, ꓟ ꓟꓽ ꓢꓯꓼ ꓕꓵꓼ ꓕꓵꓼ ꓐꓰ ꓞꓳ ꓤ ꓮ ꓙꓵ ꓔꓯ ꓚꓲ ꓛꓬ ꓕꓱ ꓗꓪ ꓡ ꓠ, ꓟ꓾ ꓠꓱ. ꓐꓯꓼ ꓟ. ꓒꓽ ꓢꓶ. ꓟꓽ ꓞꓲ꓾ ꓠꓱ. ꓐꓯꓼ ꓟ. ꓟ ꓢꓷ. ꓟꓽ ꓞꓲ ꓚꓲ. ꓛꓬ ꓔꓬ ꓗꓪ ꓡ ꓝꓲ ꓐꓯ ꓢꓲ ꓢꓯꓼ ꓕꓵꓼˍ ꓟ ꓕꓱ ꓡꓱ ꓫꓵ ꓠꓲ, ꓟ ꓙꓳˍ ꓠꓬ ꓣꓳ ꓠꓬ ꓟ. ꓒꓽ ꓟ. ꓟ ꓬꓰ ꓢꓴ ꓥ ꓟꓲ ꓕꓱ ꓟ ꓠꓬ ꓕꓲ ꓠꓬꓲ ꓙꓳˍ ꓠꓬ ꓫ ꓙꓵ ꓡ ꓥꓳ꓿

ꓠꓬꓲ. ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓢꓲ ꓒ ꓬꓰ‐ꓢꓴ ꓫꓬ, ꓖꓶ ꓗꓷ ꓟ ꓡ ꓞꓳ ꓮ ꓙꓵꓽ ꓠꓬ ꓪꓴ‐ꓢ ꓔꓯ ꓫꓱ. ꓖꓶˍ ꓟ ꓐꓰ ꓠꓶꓽ ꓛꓳꓽ ꓕꓲ ꓛꓳꓽ ꓔꓯ ꓬꓰ ꓙ ꓖꓶˍ ꓟ ꓣꓳ ꓟꓳ ꓡꓳ꓿

ꓝꓮꓲ ꓕꓲ ꓫꓵ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓢꓲ ꓡꓲ ꓡꓲ ꓗꓪ ꓙꓰ ꓢꓲ ꓠꓬꓲ ꓪꓽ ꓘꓴˍ ꓡꓳ ꓐꓰ ꓡꓳ. ꓟꓳ ꓪ ꓡꓳ꓿ ꓣꓳ ꓟꓬꓽ ꓠꓬꓲ ꓔꓲꓺ ꓒ ꓣꓱꓽ ꓢꓴ꓾ ꓟ. ꓒꓽ ꓟ. ꓟ ꓣꓱꓽ ꓢꓴ ꓮ ꓙꓵꓽ ꓠꓬ ꓞꓳ ꓤ ꓐꓰ ꓪꓴ‐ꓢ ꓠꓬꓲꓽ ꓗꓴ. ꓚꓸꓼ ꓗꓪ ꓜꓶ ꓟꓳꓽ ꓬꓰ ꓢꓴ ꓥ ꓟ ꓑꓶ. ꓓꓴ ꓕꓱ ꓡꓱ ꓪꓴ‐ꓢ ꓐꓰ ꓬꓲ ꓙꓵ, ꓖꓶ ꓠ, ꓟˍ ꓟꓲ ꓣꓳ. ꓚꓵ ꓡꓳ꓿

ꓕꓱ ꓡꓱ ꓟꓽ ꓥ ꓥ ꓐꓰ ꓪꓴ‐ꓢ ꓐꓰ ꓞꓳ ꓤ ꓠꓬꓲ ꓗꓴ. ꓚꓸꓼ ꓗꓪ ꓓꓽ ꓖꓴ ꓖꓳꓽ ꓙꓱꓻ ꓫꓬ, ꓖꓶ ꓢꓴ ꓟ ꓠꓬ ꓪꓴ‐ꓢ ꓔꓯ ꓟꓽ ꓫꓬ, ꓫꓬ, ꓐꓰ ꓚꓲ ꓛꓬ ꓐꓰ ꓞꓳ ꓤ ꓠꓬꓲ ꓗꓴ. ꓚꓸꓼ ꓗꓪ ꓫꓬ, ꓔ ꓢꓲ ꓠꓬꓲ ꓞꓳ ꓤ ꓮ ꓙꓵꓽ ꓔꓯ ꓚꓲ. ꓛꓬ ꓔꓬ ꓗꓪ ꓡ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓙꓰˍ ꓥꓳ ꓐꓯ ꓠꓬ ꓕꓱ ꓟ ꓠꓬ ꓟꓽ ꓜꓳꓽ꓿

ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓮ ꓙꓵꓽ ꓠꓬ ꓪꓴ‐ꓢ ꓔꓯ ꓫꓱ. ꓖꓶ ꓠ, ꓟ ꓢꓯꓼ ꓕꓵꓼˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓪꓴ‐ꓢ ꓐꓰ ꓕꓲ ꓡꓰ, ꓔꓬ ꓢꓲ꓾ ꓞꓳ ꓤ ꓔꓯ ꓪꓴ‐ꓢ ꓓꓳꓽ ꓪꓴ‐ꓢ ꓙꓲˍ ꓟ ꓖꓶ ꓐ ꓡ ꓠ, ꓟ ꓢꓯꓼ ꓕꓵꓼ ꓙꓰ ꓡꓯ ꓐꓰ ꓮ ꓙꓵ ꓔꓯ ꓬꓲꓼ ꓠꓬꓲ. ꓖꓶ ꓠꓲ, ꓫꓵˍ ꓡꓳ꓿