ꓠ ꓓꓴ ꓒꓬꓽ ꓓꓴ ꓫꓬꓹ ꓓ ꓡꓰˍ ꓟ

ꓘꓴ ꓜꓲꓼ ꓞꓳ ꓟꓶꓽ ꓘꓳꓼ 13 ꓫꓵꓽ ꓠꓽ

ꓙꓽ ꓗꓴꓸ ꓠꓲꓹ 1ꓽ 13-15ꓹ2ꓽ 23-24

ꓢꓲ ꓒ ꓪꓴ-ꓢ ꓠꓬ ꓫꓵꓸꓹ ꓟ ꓔꓯ ꓚꓰꓼ ꓔ ꓡꓳ ꓟꓽ ꓥ= ꓢꓯꓸ ꓔꓬ ꓢꓴ ꓔꓯ ꓐꓬ ꓡꓰ ꓝꓲ ꓟ ꓔꓯ ꓬꓲ ꓠꓲꓹ ꓒꓴ_ ꓡꓳ ꓟꓽ ꓥ= ꓙꓳ_ ꓟ ꓮ ꓙꓵ ꓢꓯꓸ ꓔꓬ ꓠ ꓟ ꓬꓲ ꓚꓰꓼ ꓔ ꓟ ꓥ ꓠꓬꓲ-ꓸ ꓫꓵꓸꓹ ꓡ ꓟ ꓓꓳꓼ ꓬꓲ ꓠꓯꓸꓼ ꓗꓪ ꓟꓽ ꓙꓳ=

ꓪꓳꓽ ꓟꓵ ꓗꓪ ꓟ ꓡ ꓞꓳ_ ꓟꓲ-ꓸ ꓟꓲ ꓠꓯ ꓕꓯ ꓢꓲ ꓗꓪ ꓬꓲ ꓪ ꓮ ꓫꓵ ꓙꓵꓽ ꓪꓽ ꓟꓽ ꓙꓳ= ꓮ ꓡꓲꓳ ꓐꓯ ꓠꓬ-ꓸ ꓙꓲ ꓫꓬ ꓟ ꓠꓽ ꓕꓲ ꓞꓲ ꓕꓲ ꓑ ꓕꓶꓸꓹ ꓞꓹ ꓡꓳ= ꓢꓲ ꓒ ꓪꓴ-ꓢ ꓠꓬ ꓬꓲ ꓒꓬꓱꓽ ꓔꓯ ꓔꓯꓸꓸ ꓢꓲ ꓟꓲ ꓠꓯ ꓡ ꓞꓳ ꓔꓯ ꓚꓰꓼ ꓔ ꓟ ꓥ_ ꓠꓬꓲ-ꓸ ꓡ ꓞꓳ ꓖꓳ ꓟ ꓫꓵꓸꓹ ꓟꓽ ꓗꓴ ꓟ ꓠꓯꓸꓼ ꓗꓪ ꓚꓰꓼ ꓔ ꓟ ꓥ_ ꓡꓳ=

ꓖꓳ ꓡꓱ ꓥ_ ꓟꓲ ꓠꓲꓽ ꓢ-ꓓꓯꓼ ꓖꓳꓼ ꓠꓲꓹ ꓗꓪ ꓐꓰ ꓫꓵꓸꓹ ꓟ ꓠꓬ ꓟꓲ ꓠꓯ ꓗꓪ ꓓꓵ ꓡ ꓠꓬꓲ-ꓸ ꓠꓲꓽ ꓢ-ꓓꓯ ꓡꓯ ꓒꓯꓹ ꓗꓪ ꓞꓰ ꓓꓵꓽ ꓡꓰ ꓟ ꓕꓲ ꓧꓳꓽ ꓠꓬ-ꓸ ꓝꓮꓲ ꓧꓪꓸ ꓛꓲ ꓢꓲ ꓢꓷꓸ ꓡ_ ꓥꓳ=

2 ꓘꓳ-ꓡꓴ-ꓕꓵ 8ꓽ 7ꓹ 9ꓹ 13

ꓠꓴ ꓪꓽ ꓠꓬ ꓙꓵꓻ ꓠꓲꓹˍ ꓐꓰ ꓐꓯ ꓙꓻˍ ꓐꓰ ꓢꓷ ꓠꓲꓹˍ ꓐꓰ ꓠꓲꓹ ꓟ ꓡꓱˍ ꓟ ꓮꓽ ꓙꓵˍ ꓐꓰ꓾ ꓠꓴ ꓪꓽ ꓠꓯS ꓗꓪ ꓠꓵ ꓠꓲꓹ ꓐꓲ ꓞꓹ ꓟ ꓡꓰ ꓐꓰ꓾ ꓣꓱꓽ ꓙˍ ꓟ ꓟꓬꓱꓽ ꓕꓱ ꓕꓲ ꓫꓵ ꓗꓪˍ ꓟꓲ ꓐꓲ ꓡꓶꓽ ꓡꓰ ꓝꓲ꓿ ꓮ ꓡꓲꓳ ꓐꓯ ꓠꓬ ꓣꓳ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓬꓲ ꓣꓱꓽ ꓛꓰ ꓔꓯ ꓠꓴ ꓪꓽ ꓢꓷˍ ꓡꓳ꓿ ꓬꓲ ꓠꓬ ꓞꓳ ꓐꓳ ꓞꓳ ꓬꓲꓼ ꓥꓻ ꓥ ꓟꓲ꓾ ꓬꓲ ꓠꓬ ꓠꓴ ꓪꓽ ꓐꓱ ꓶ ꓞꓳ ꓫꓸ ꓒꓬꓱꓼ ꓡ ꓢꓲ꓾ ꓬꓲ ꓫꓸˍ ꓟ ꓗꓪ ꓐꓰ ꓠꓴ ꓪꓽ ꓔꓯ ꓞꓳ ꓐꓳ ꓒꓬꓱꓼ ꓡ ꓝꓲꓳ꓿ ꓕꓱ ꓟ ꓠꓬ ꓢꓴ ꓔꓯ ꓢꓻ ꓡꓰ ꓝꓲ ꓢꓲ ꓠꓴ ꓪꓽ ꓔꓯ ꓫꓸ ꓡꓰ ꓝꓲ ꓠꓹ ꓟ ꓟꓽ ꓥ꓿ ꓬꓲˍ ꓡꓰ꓾ ꓮꓽ ꓙꓵ ꓗꓪ ꓕꓲꓽ ꓡꓰꓹꓼ ꓐꓰ ꓣꓱꓽ ꓓꓴ ꓟꓴꓺ ꓓꓴ ꓙꓳ ꓡꓰ ꓠꓹ ꓟ ꓥ ꓡꓳ꓿ 14 ꓮ ꓟꓶ ꓕꓱ ꓕꓲ ꓝꓲꓸ ꓗꓪ ꓠꓴ ꓪꓽ ꓣꓱꓽ ꓓꓴ ꓙꓳˍ ꓟ ꓡꓰ ꓬꓲ ꓪꓽ ꓟꓽ ꓡꓳꓼ ꓟ ꓗꓪ ꓔ ꓙ ꓢꓲ꓾ ꓢ ꓖꓪ ꓬꓲ ꓪꓽ ꓙꓳꓻ ꓡ ꓠꓬ ꓠꓴ ꓪꓽ ꓟꓽ ꓡꓳꓼ ꓟ ꓗꓪ ꓔ ꓙ ꓡꓯꓽ ꓘꓳ ꓐ ꓡ ꓠꓹ ꓟ ꓥ ꓡꓳ꓿ ꓕꓱ ꓟ ꓗꓪ ꓐꓰ ꓮꓽ ꓙꓵ ꓢꓴ ꓔꓱ ꓟꓬꓸꓼ ꓙꓳ ꓠꓹ ꓟ ꓥ ꓡꓳ꓿ 15 ꓕꓱ ꓟ ꓠꓬ ꓕꓳ ꓶ ꓗꓪ꓾ ꓮꓽ ꓟꓬꓹ ꓫ ꓟꓶ ꓢꓴˍ ꓠꓬ ꓜꓰꓻ ꓡꓰ ꓟ ꓟꓽ ꓙꓳ꓾ ꓮꓽ ꓔꓲ ꓤ ꓫ ꓟꓶ ꓢꓴˍ ꓟꓲ ꓟꓽ ꓡꓳꓼ ꓟꓽ ꓗꓷ ꓡꓰ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥꓳ꓿

ꓟ-ꓘꓳ 5ꓽ 21- 43

ꓬꓰ-ꓢꓴ ꓠꓬ ꓝꓮꓲ ꓕꓲ ꓧꓪꓹ ꓡꓲ ꓗꓪ ꓐꓰ ꓖꓳ ꓐꓽ ꓢꓲ ꓗꓳꓸ ꓙꓰ ꓢꓲ꓾ ꓬꓲꓻ ꓡꓴ ꓐꓱ ꓘꓶꓽ ꓗꓪ ꓔꓬ ꓕꓯ꓾ ꓞꓳ ꓜꓴ ꓞꓳ ꓟꓯꓼ ꓬꓲ ꓔꓬ ꓗꓪ ꓜꓲꓼ ꓡ ꓡꓳ꓿ 22 ꓙꓰ-ꓣꓴ ꓟꓬꓱ ꓔ ꓟ ꓜꓲꓼ ꓦꓲ ꓙꓵꓽ ꓢꓴ ꓗꓪ ꓟ ꓕꓲ ꓣꓳˍ ꓟꓲ ꓬꓲ ꓔꓯ ꓡ ꓢꓲ꓾ ꓬꓲ ꓟꓲꓽ ꓕꓯꓽ ꓢꓲ ꓗꓪ ꓟꓳꓼ ꓔ ꓢꓲ ꓠꓬꓲ꓾ 23 ꓥꓪ ꓮꓸ ꓟꓲꓽ ꓤ ꓠꓬ ꓫꓵꓻˍ ꓐꓰ ꓗꓹ ꓡꓳ꓿ ꓬꓲ ꓓꓻ ꓡꓰ ꓢꓲ ꓢꓯꓸ ꓔꓬ ꓟꓶ ꓠꓹ ꓟ꓾ ꓠꓴ ꓬꓲ ꓔꓯ ꓡꓯꓼ ꓒꓯꓹ ꓚꓰꓹ ꓖꓶ ꓡꓯ꓾ ꓐꓰ ꓮꓽ ꓘꓶꓸ ꓓꓰꓽˍ ꓡꓳ꓿ 24 ꓖꓳ ꓕꓯ ꓬꓰ-ꓢꓴ ꓠꓬ ꓬꓲ ꓔꓯ ꓛꓳ ꓙꓰˍ ꓡꓳ꓿ ꓞꓳ ꓜꓴ ꓞꓳ ꓟꓯꓼˍ ꓟꓲ ꓬꓰ-ꓢꓴ ꓔꓯ ꓛꓳ ꓙꓰ ꓢꓲ ꓬꓲ ꓔꓯ ꓕꓳꓽ ꓡ ꓡꓳ꓿ 25 ꓫꓵꓽ ꓜꓲꓺ ꓓꓳ ꓠꓬꓲ ꓞꓲ ꓠꓬꓲꓽ ꓘꓳꓼ ꓠꓻ ꓔꓬ ꓢꓴ ꓤ ꓟꓶ ꓤ ꓕꓲ ꓣꓳ ꓙꓳˍ ꓡꓳ꓿ 26 ꓠꓻ ꓫꓬꓹ ꓢꓴ ꓮꓽ ꓟꓬꓹ ꓣꓳ ꓡꓯꓼ ꓒꓯꓹ ꓗꓪ ꓫꓸ ꓙꓵˍ ꓟ ꓮꓽ ꓟꓬꓹ ꓜꓲꓽ ꓢꓲ꓾ ꓬꓲ ꓙꓳˍ ꓟ ꓮꓽ ꓙꓵ ꓣꓱꓽ ꓖꓴ ꓡꓰ ꓗꓪ ꓛꓲ ꓠꓻ ꓫꓬꓹ ꓗꓷˍ ꓟꓲ꓾ ꓮꓸ ꓔꓲˍ ꓟꓲ ꓟꓽ ꓓ ꓡꓰ꓾ ꓟꓬꓽ ꓠꓬꓲ ꓠꓻ ꓡ ꓡꓳ꓿ 27 ꓬꓰ-ꓢꓴ ꓓꓳꓽ ꓬꓲ ꓑ ꓙꓽ ꓗꓷ ꓠꓬ꓾ ꓡꓽ ꓞꓳ ꓬꓲ ꓜꓴꓻ ꓗꓳ ꓡꓳ ꓗꓪ ꓬꓰ-ꓢꓴ ꓗꓸ ꓠꓯꓸ ꓢꓲ ꓡ ꓢꓲ ꓬꓲ ꓐꓵ ꓞꓶꓽ ꓔꓯ ꓫꓱꓹ ꓡ ꓡꓳ꓿ 28 ꓮ ꓡꓲꓳ ꓐꓯ ꓠꓬ ꓬꓲ ꓠꓽ꓾ ꓬꓰ-ꓢꓴ ꓬꓲ ꓐꓵ ꓞꓶꓽ ꓟꓶꓽ ꓗꓪˍ ꓡꓰ ꓫꓱꓹ ꓟꓶˍ ꓟꓲ ꓥꓪ ꓠꓽ ꓓꓻ ꓡꓰˍ ꓥꓳ꓾ ꓐꓰ ꓓꓵꓽ ꓙˍ ꓡꓳ꓿ 29 ꓖꓳ ꓕꓯ ꓬꓲ ꓫꓵꓽ ꓓꓳˍ ꓟ ꓞꓼ ꓐꓰ ꓠꓽ ꓡꓰ ꓢꓲ꓾ ꓬꓲ ꓖꓳ ꓓꓱ ꓗꓪ ꓬꓲ ꓠꓻ ꓓꓻ ꓡꓰˍ ꓟ ꓔꓯ ꓬꓲ ꓚꓲꓸ ꓛꓬ ꓚꓬꓹ ꓪ ꓡꓰꓳ꓿ 30 ꓬꓰ-ꓢꓴ ꓠꓬ ꓬꓲ ꓖꓳ ꓓꓱꓽ ꓗꓪ ꓐꓰ ꓪꓽ ꓠꓬꓲˍ ꓟ ꓢꓯꓼ ꓓꓳ ꓙꓰ ꓟ ꓔꓯ ꓞꓼ ꓐꓰ ꓚꓬꓹ ꓪ ꓡꓰ ꓠꓬꓲ꓾ ꓞꓳ ꓜꓴ ꓗꓳ ꓡꓳ ꓗꓪ ꓔꓲꓸ ꓒꓳꓹ ꓢꓲ꓾ ꓮꓽ ꓟ ꓡꓰ ꓥꓪ ꓐꓵ ꓞꓶꓽ ꓗꓪ ꓫꓱꓹ ꓗꓷ ꓡ? ꓾ ꓐꓰ ꓠ ꓠꓬꓲˍ ꓡꓳ꓿ 31 ꓖꓳ ꓕꓯ ꓬꓲ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓞꓳ ꓜꓴꓻ ꓞꓳ ꓟꓯꓼ ꓠꓴ ꓔꓯ ꓕꓳꓽ ꓞꓹ ꓟ ꓠꓴ ꓢꓷꓸˍ ꓡꓳ꓿ ꓕꓱ ꓘꓶ ꓟꓬꓽˍ ꓟ ꓞꓳ ꓜꓴꓻ ꓗꓳ ꓡꓳ ꓗꓪ ꓠꓴ ꓔꓯ ꓫꓱꓹ ꓗꓷ ꓢꓴ ꓮꓽ ꓟ ꓥ ꓟ ꓮ ꓡꓲ ꓢꓷꓸ ꓓ ꓢꓰꓽ꓾ ꓐꓯˍ ꓡꓳ꓿ 32 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓽ ꓬꓲ ꓔꓯ ꓫꓱꓹ ꓢꓴ ꓔꓯ ꓢꓷꓸ ꓡꓰ ꓠꓹ ꓟ ꓚꓳ ꓡꓳ ꓡꓳ ꓡꓳꓸ ꓠꓬꓲˍ ꓡꓳ꓿ 33 ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ ꓬꓲ ꓓ ꓡꓰ ꓟ ꓢꓷꓸˍ ꓠꓬꓲ꓾ ꓙꓳꓺ ꓠꓬꓲ ꓛꓱꓽ ꓠꓬꓲ ꓐꓰ ꓬꓲ ꓟꓲꓽ ꓙꓬꓽ ꓗꓪ ꓟꓳꓼ ꓡ ꓢꓲ꓾ ꓮꓽ ꓙꓵ ꓡꓱꓸꓼ ꓔꓱꓹ ꓔꓱꓹꓼ ꓐꓯ ꓖꓶˍ ꓡꓳ꓿ 34 ꓬꓰ-ꓢꓴ ꓡꓰ ꓬꓲ ꓔꓯ꓾ ꓮꓸ ꓟꓲꓽꓳ꓾ ꓠꓴ ꓙꓵꓻ ꓠꓲꓹ ꓡꓰ ꓠꓴ ꓔꓯ ꓓꓻ ꓡꓰ ꓝꓲꓳ꓿ ꓧꓪꓸ ꓧꓪS ꓙꓰ꓿ ꓠꓴ ꓠꓻˍ ꓟ ꓓꓻ ꓡꓰ ꓟꓶ ꓝꓲ꓾ ꓐꓯ ꓖꓶˍ ꓡꓳ꓿ 35 ꓬꓲ ꓖꓳ ꓡꓱ ꓫꓸ ꓕꓱ ꓔꓬ ꓕꓯ꓾ ꓜꓲꓼ ꓦꓲ ꓙꓵꓽ ꓢꓴ ꓙꓰ-ꓣꓴ ꓦꓲ ꓗꓪ ꓐꓰ ꓡꓽ ꓞꓳ ꓕꓲ ꓧꓳꓽ ꓛꓲ ꓡ ꓢꓲ꓾ ꓠꓴ ꓮꓸ ꓟꓲꓽ ꓠꓽ ꓫꓵꓳ꓾ ꓟꓸ ꓒ ꓔꓯ ꓝꓮꓲ ꓕꓽ ꓘꓶꓻ ꓡꓶꓽ꓾ ꓐꓯˍ ꓡꓳ꓿ 36 ꓬꓲ ꓪꓽ ꓐꓯ ꓘꓶꓽ ꓔꓯ ꓬꓰ-ꓢꓴ ꓑ ꓙꓽ ꓗꓷ ꓠꓬ꓾ ꓜꓲꓼ ꓦꓲ ꓙꓵꓽ ꓢꓴ ꓖꓳ ꓕꓲ ꓣꓳ ꓔꓯ꓾ ꓕꓽ ꓙꓳꓺ꓾ ꓙꓵꓻˍ ꓡꓰꓽ ꓙꓵꓻ꓾ ꓐꓯ ꓖꓶˍ ꓡꓳ꓿ 37 ꓬꓲ ꓠꓬ ꓒꓲ-ꓕꓱˍ ꓐꓰ ꓬ-ꓗꓴˍ ꓐꓰ ꓬ-ꓗꓴ ꓬꓲ ꓠꓬꓲ ꓤ ꓬꓳ-ꓦ ꓔꓯˍ ꓡꓰꓽ ꓧꓳꓽ ꓙꓰ ꓢꓲ꓾ 38 ꓜꓲꓼ ꓦꓲ ꓙꓵꓽ ꓢꓴ ꓦꓲ ꓗꓪ ꓬꓲ ꓪꓽ ꓛꓲ ꓡ ꓠꓬ꓾ ꓡꓽ ꓞꓳ ꓢꓴ ꓔꓬ ꓟq ꓐꓰ꓾ ꓥꓴꓻ ꓠꓬꓲ ꓮꓸ ꓛꓬꓺ ꓙꓱꓺ ꓠꓬꓲ ꓬꓰ ꓔꓬ ꓟ ꓔꓯ ꓬꓲ ꓟꓳꓻˍ ꓡꓳ꓿ 39 ꓬꓲ ꓓꓵꓽ ꓡꓰ ꓕꓯ ꓬꓲ ꓡꓰ ꓬꓲ ꓪꓽ ꓔꓯ꓾ ꓮꓸ ꓫꓵ ꓪꓴꓸ ꓠꓬꓲ ꓥꓴꓻ ꓠꓬꓲ ꓢꓴꓺ ꓠꓬꓲ ꓬꓰ ꓔꓬ ꓡ? ꓮꓸ ꓟꓲꓽ ꓤ ꓠꓽ ꓟꓽ ꓫꓵꓻ꓿ ꓬꓲꓼˍ ꓡꓰꓽ ꓬꓲꓼ ꓟꓶ ꓔꓬ ꓡꓳ꓾ ꓐꓯ ꓖꓶˍ ꓡꓳ꓿ 40 ꓖꓳ ꓡꓱ ꓠꓬ ꓬꓲ ꓪꓽ ꓬꓲ ꓔꓯ ꓪꓽ ꓫꓱꓻˍ ꓡꓳ꓿ ꓖꓳ ꓕꓯ ꓬꓲ ꓡꓰ ꓮꓽ ꓙꓵ ꓢꓴ ꓔꓯ ꓓꓳ ꓙꓰ ꓝꓲ ꓢꓲ꓾ ꓮꓸ ꓟꓲꓽ ꓤ ꓬꓲ ꓐꓹ ꓐ ꓟꓹ ꓟˍ ꓐꓰ ꓬꓲˍ ꓐꓰ ꓕꓲ ꓛꓳꓺꓼ ꓡꓻ ꓢꓴ ꓢ ꓣꓳ ꓔꓯ ꓧꓳꓽ ꓔ ꓢꓲ ꓠꓬꓲ꓾ ꓮꓸ ꓟꓲ ꓤ ꓓꓹ ꓖꓴ ꓗꓪ ꓓꓵꓽ ꓡꓰˍ ꓡꓳ꓿ 41 ꓬꓲ ꓡꓰ ꓮꓸ ꓟꓲꓽ ꓤ ꓡꓯꓼ ꓒꓯꓹ ꓗꓪ ꓣꓴ ꓔ ꓢꓲ꓾ Zꓕ ꓡꓲ ꓕ ꓗꓴ ꓟꓲ꓾X ꓐꓯ ꓖꓶˍ ꓡꓳ꓿ (ꓕꓱ ꓟ ꓠꓬ ꓾ ꓮꓸ ꓟꓲꓽ ꓤꓽꓳ꓾ ꓠꓴ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓔꓴꓺ꓾ ꓐꓯˍ ꓟ ꓥ ꓡꓳ꓿) 42 ꓮꓸ ꓟꓲꓽ ꓤ ꓠꓬ ꓞꓼ ꓐꓰ ꓔꓴ ꓡ ꓢꓲ ꓙ ꓖꓴ ꓫꓱꓽˍ ꓡꓳ꓿ ꓮꓸ ꓟꓲ ꓤ ꓠꓬ ꓞꓲ ꓠꓬꓲꓽ ꓘꓳꓼ ꓙꓳˍ ꓡꓳ꓿ ꓕꓱ ꓟ ꓔꓯ ꓟꓳ ꓢꓴ ꓬꓲ ꓪꓽ ꓮꓽ ꓘꓶꓸ ꓓꓵꓽ ꓙ ꓟꓶ ꓡꓰꓳ꓿ 43 ꓬꓰ-ꓢꓴ ꓡꓰ꓾ ꓮꓽ ꓟ ꓔꓯˍ ꓟꓲ ꓕꓽ ꓢꓷꓸ ꓡꓰ ꓝꓲ꓾ ꓐꓰ ꓬꓲ ꓪꓽ ꓔꓯ ꓙꓳꓺ ꓗꓽ ꓖꓶ ꓗꓷ ꓠꓬ꓾ ꓮꓸ ꓟꓲꓽ ꓤ ꓔꓯ ꓜꓽ ꓓꓴ ꓕꓲꓽ ꓫꓵꓽ ꓖꓶ ꓜꓽ꓾ ꓐꓯ ꓖꓶˍ ꓡꓳ꓿