ꓠ-ꓕ-ꓠꓰ(ꓐ-ꓕꓳ-ꓡꓳ-ꓟꓰ) ꓔꓯ ꓘꓴˍ ꓟ

ꓠꓬꓲ ꓠꓬꓲ ꓠꓬ ꓙꓲꓻ ꓫꓬ ꓢꓴ ꓐ-ꓕꓳ-ꓡꓳ-ꓟꓰ ꓐꓯ ꓟ ꓠ-ꓕ-ꓠꓰ ꓑꓮꓲꓽ ꓥ ꓡꓳ= ꓬꓲ ꓠꓬ ꓝꓲ ꓓꓴ 12 ꓣꓳ ꓘꓴꓽ ꓗꓪ ꓟ ꓔꓲ ꓣꓳ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓬꓲ ꓔꓯ ꓮ ꓡꓲ ꓘꓴˍ ꓟ ꓠꓬꓲ ꓠꓬꓲ ꓟ ꓬꓳ-ꓦ 1ꓽ45-51 ꓗꓪ ꓣꓳ ꓑ ꓙ ꓪˍ ꓡꓳ= ꓒꓲ-ꓡꓲ ꓡꓰ ꓠ-ꓕ-ꓠꓰ ꓔꓯ ꓬꓰ-ꓢꓴ ꓔꓬ ꓗꓪ ꓧꓳꓽ ꓔꓯꓹ ꓙꓰ ꓖꓶˍ ꓟ꓾ ꓝꓮꓲ ꓬꓰ-ꓢꓴ ꓮ ꓡꓰ ꓐꓰ ꓘꓴˍ ꓟ ꓟꓸ ꓟꓲꓽ ꓗꓪ ꓑ ꓙˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳ ꓓꓵꓽ ꓙ ꓠꓬꓲˍ ꓕꓯ ꓝꓲ ꓓꓴ ꓐꓴ ꓮ ꓙꓵꓽ ꓠꓬ ꓬꓰ-ꓢꓴ ꓐꓱ ꓶ ꓫꓵꓽ ꓧꓳꓸ ꓗꓷ ꓢꓴ ꓡꓰꓽ ꓥꓳ= ꓙꓲꓻ ꓫꓬ ꓢꓴ ꓬꓳ-ꓦ ꓗꓪ ꓐꓰ ꓗꓳꓸ ꓙꓰ ꓗꓷ ꓠꓬ ꓠꓱꓸ ꓐꓯꓼ ꓮ ꓙꓵꓽ ꓠꓬ ꓬꓰ-ꓢꓴ ꓐꓱ ꓶ ꓫꓵꓻ ꓗꓷ ꓢꓴ꓾ ꓙꓵꓻ ꓠꓲꓹ ꓐꓱ ꓶ ꓢꓰꓼ ꓗꓷ ꓟ ꓟꓶ ꓢꓴ ꓐꓴ ꓡꓰꓽ ꓥ ꓡꓳ=

ꓟꓲ ꓠꓯ ꓗꓪ ꓔꓬ ꓕꓯ ꓝꓲ ꓓꓴ ꓐꓴ ꓠꓬ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓟꓽ ꓥ= ꓬꓲ ꓪ ꓒ ꓕꓲ ꓗꓪ ꓔꓬ ꓟ ꓢꓷꓸ ꓠꓲꓹ ꓙꓳ ꓒ꓾ ꓒꓴ ꓫꓵꓺ ꓙꓳ ꓢꓴ ꓡꓰˍ ꓐꓰ ꓟꓲ ꓟꓽ ꓥ= ꓬꓲ ꓪ ꓠꓬ ꓮ ꓫꓵꓽˍ ꓟꓲ ꓬꓰ ꓜꓽ ꓟꓽ ꓗꓴꓸ ꓟ ꓥꓪꓸ ꓠꓸ ꓢꓴˍ ꓡꓰꓽ ꓥ ꓡꓳ= ꓖꓳ ꓡꓱ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓬꓲ ꓪ ꓔꓯ ꓣꓱꓽˍ ꓕꓯ ꓬꓲ ꓪ ꓠꓬ ꓙꓲˍ ꓟ ꓟꓬꓱꓽ꓾ ꓓꓵꓽ ꓙ ꓮ’ ꓓꓴ ꓟꓬꓱꓽ ꓮ ꓟꓬꓹ ꓬꓰ ꓐ ꓡˍ ꓟ ꓣꓳ ꓟꓳ ꓪ ꓓꓹ ꓡꓳ=

ꓣꓳ ꓟꓲ ꓠꓯ ꓕꓱ ꓟ ꓗꓪ ꓮ ꓫꓵꓽ ꓑꓶ ꓓꓴ ꓢꓯꓸ ꓔꓬ ꓡ? ꓮ ꓫꓵꓽ ꓐꓱ ꓶ ꓢꓯꓸ ꓔꓬ ꓡ? ꓮ ꓫꓵ ꓑꓶ ꓓꓴ ꓞꓳ ꓙꓳ ꓔꓬ ꓡ? ꓐꓰ ꓓꓵꓽ ꓙ ꓠꓬꓲˍ ꓕꓯ ꓝꓲ ꓓꓴ ꓐꓴ ꓬꓲ ꓪ ꓤꓶꓻ ꓔꓯ ꓡꓳꓸ ꓗꓷ ꓠꓬ ꓫꓬꓽ ꓫꓬꓽ ꓡꓰ ꓟꓳ ꓓꓹ ꓡꓳ=

ꓮ ꓠꓱ ꓕꓯ ꓪ ꓔꓲ ꓕꓲ ꓣꓳ ꓙꓳˍ ꓡꓳ=  ꓬꓲ ꓠꓬ ꓟꓲ ꓠꓯ ꓗꓪ ꓙꓳˍ ꓕ ꓑꓳꓸꓼ ꓟ ꓚꓺ ꓟꓲꓽ ꓐꓴ ꓔꓯ ꓢꓷꓸ ꓠꓲꓹ ꓫꓵˍ ꓟ ꓪꓴꓸ ꓠꓬꓲ ꓬꓲ ꓢꓷꓸ ꓠꓲꓹ ꓙꓳ ꓒ ꓐꓴ ꓔꓯ ꓕꓳꓽ ꓶ ꓐꓳ ꓝꓲˍ ꓡꓳ= ꓢꓷꓸ ꓠꓲꓹ ꓙꓳ ꓒ ꓐꓴ ꓠꓬ ꓟꓲ ꓠꓯ ꓗꓪ ꓮ ꓠꓱ ꓕꓯ ꓡꓰ ꓙꓳ ꓗꓳꓸ ꓡˍ ꓟ ꓚꓺ ꓟꓲꓽ ꓮ ꓙꓵꓽ ꓔꓯ ꓐꓳˍ ꓕꓯ ꓕꓳꓽ ꓶ ꓗꓶ ꓖꓴ ꓟꓽ ꓙꓳ ꓠ ꓛꓲꓺ ꓟꓬꓽˍ ꓟ ꓑꓶ ꓓꓴ ꓪ ꓔꓲ ꓠꓬ ꓠꓲꓹ ꓟ ꓫ ꓡꓰ ꓢꓲ꓾ ꓮ ꓡꓰ ꓥ ꓡ? ꓟꓲ ꓠꓯ ꓗꓪ ꓙꓳˍ ꓟ ꓢꓷꓸ ꓠꓲꓹ ꓠꓬ ꓢꓳ ꓖꓴ ꓟꓽ ꓓ ꓡ? ꓐꓰ ꓓꓵꓽ ꓙ ꓔꓬ ꓡꓳ=

ꓖꓳ ꓕꓯ ꓬꓲ ꓪ ꓗꓪ ꓟ ꓕꓲ ꓣꓳ ꓡꓰ ꓾ ꓪ ꓔꓲꓳ꓾ ꓠꓴ ꓢꓷꓸ ꓠꓲꓹ ꓫꓵˍ ꓟ ꓢꓷꓸ ꓠꓲꓹ ꓠꓴ ꓔꓯ ꓖꓶˍ ꓥꓳ= ꓥꓪ ꓐꓳ ꓔ ꓟ ꓠꓴ ꓔꓯ ꓟꓸ ꓖꓶˍ ꓥꓳ꓾ ꓐꓯ ꓢꓲ ꓟꓸ ꓖꓶˍ ꓕꓯ ꓪ ꓔꓲ ꓠꓬ ꓕꓳ ꓶ ꓔꓯ ꓡꓳꓸ ꓠꓬꓲˍ ꓡꓳ= ꓕꓳ ꓶ ꓘꓴꓽ ꓗꓪ ꓠꓬ ꓞꓳ ꓤ ꓠꓬ ꓒꓬꓱꓽ ꓟꓳ ꓡˍ ꓡꓳ= ꓞꓳ ꓤ ꓠꓬ ꓢꓯꓸ ꓔꓬ ꓡꓳ= ꓞꓳ ꓤ ꓠꓬ ꓫꓵꓻˍ ꓡꓳ꓾ ꓐꓰ ꓐꓳ ꓔ ꓟ ꓔꓯ ꓡꓳꓸ ꓟꓳˍ ꓡꓳ=

ꓕꓳꓽ ꓶ ꓕꓱ ꓢꓺ ꓚꓬꓸ ꓟ ꓠꓬ ꓚꓺ ꓟꓲꓽ ꓥ ꓕ ꓑꓳꓸꓼ ꓗꓪ ꓐꓲ ꓜꓲꓼ ꓓꓰ ꓡꓰˍ ꓟ ꓥ ꓡꓳ= ꓮ ꓡꓲ ꓕꓲ ꓣꓳˍ ꓟꓲ ꓒꓬꓱꓽ ꓟꓳ ꓡ ꓪˍ ꓡꓳ= ꓢꓯꓸ ꓔꓬ ꓪ ꓡꓳ= ꓝꓮꓲ ꓠꓬ ꓫꓵꓻˍ ꓥꓳ= ꓕꓱ ꓟ ꓗꓪ ꓐꓰ ꓮ ꓟˍ ꓟꓲ ꓔꓷꓹ ꓡꓲꓹ ꓗꓷ ꓟꓽ ꓓ= ꓖꓳ ꓡꓱ ꓠꓬꓲ ꓪ ꓔꓲ ꓠꓬ ꓮ ꓘꓶꓸ ꓠꓲꓹ ꓧꓳꓹ ꓡꓰ ꓢꓲ ꓥ ꓐꓷ꓾ ꓟꓲ ꓠꓯ ꓕꓱ ꓟ ꓗꓪ ꓠꓬ ꓢꓯꓸ ꓔꓬ ꓝꓲꓸ ꓙꓳˍ ꓥꓳ꓾ ꓫꓵꓻ ꓝꓲ ꓙꓳˍ ꓟ ꓢꓷꓸ ꓡꓰ ꓢꓲ ꓢꓷꓸ ꓠꓲꓹ ꓙꓳ ꓒ ꓖꓳ ꓕꓲ ꓣꓳ ꓔꓯ ꓡꓯꓼ ꓪ ꓮ ꓟꓬꓹ ꓖꓶꓽ ꓗꓷꓳ=

ꓣꓳ ꓤꓶꓻ ꓗꓪˍ ꓟꓲ ꓠꓴ ꓠꓬ ꓢꓷꓸ ꓠꓲꓹ ꓮ ꓡꓰ ꓟꓬ ꓢꓷˍ ꓡ? ꓠꓴ ꓔꓯ ꓒꓴ ꓫꓵꓺ ꓮ ꓡꓰ ꓟꓬ ꓙꓳˍ ꓡ? ꓠꓴ ꓠꓬ ꓮ ꓫꓵꓽ ꓮ ꓡꓰ ꓟꓬ ꓞꓲꓺ ꓬꓰ ꓗꓳꓸ ꓡ ꓟ ꓔꓯ ꓪꓴ-ꓢ ꓡꓰ ꓟꓽ ꓠ ꓠꓬꓲ ꓡ= ꓖꓳ ꓡꓱ ꓥˍ ꓟꓲ ꓠꓴ ꓠꓬ ꓠꓴ ꓢꓷꓸˍ ꓟ ꓔꓯ ꓟꓳꓸ ꓮ ꓡꓰ ꓟꓬ ꓞꓳ ꓫꓵꓽ ꓗꓷ ꓟ ꓔꓯ ꓠꓺ ꓠꓬꓲˍ ꓟ ꓠꓬ ꓪꓴ-ꓢ ꓡꓰꓽ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓛꓳ ꓫꓱꓽ ꓔꓬ ꓕꓯ ꓮ ꓕꓯˍ ꓟꓲ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓠꓹ ꓟ ꓠꓬ ꓣꓳ ꓢꓷꓸ ꓔ ꓟ ꓕꓲ ꓒꓳꓸ ꓔꓯ ꓟꓳꓸ ꓛꓳ ꓫꓱꓽ ꓠꓹ ꓟ ꓬꓳꓸ ꓚꓵˍ ꓡꓳ= ꓣꓳ ꓕꓳꓽ ꓶꓽ ꓥꓪꓽ ꓔꓸ ꓢꓷˍ ꓠꓬ ꓥꓪꓽ ꓔ ꓢꓷꓸ ꓠꓲꓹ ꓗꓪ ꓛꓲꓺ ꓞꓳ ꓙꓳ ꓠꓯꓹ ꓡꓳ=

ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓣꓳ ꓑ ꓙˍ ꓟ ꓠꓬ ꓠ-ꓕ-ꓠꓰ ꓔꓯ ꓬꓰ-ꓢꓴ ꓘꓴˍ ꓕꓯ ꓬꓲ ꓠꓬ ꓙꓳˍ ꓟ ꓮ ꓙꓵꓽ ꓬꓰ-ꓢꓴ ꓔꓯ ꓖꓶ ꓗꓷ ꓢꓲ꓾ ꓬꓰ-ꓢꓴ ꓗ ꓠꓯꓹ ꓛꓳˍ ꓟ ꓣꓳ ꓢꓷꓸ ꓪˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓟꓲ ꓠꓯ ꓕꓱ ꓟ ꓗꓪ ꓛꓳ ꓫꓱꓽ ꓔꓬ ꓕꓯ ꓕꓳꓽ ꓶ ꓠꓬꓲꓽ ꓚꓬꓸ ꓘꓴꓽ ꓗꓪ ꓔꓬ ꓡꓳ= ꓣꓳ ꓠꓬ ꓦꓵꓻ ꓡꓺꓳ= ꓣꓳ ꓠꓬ ꓢꓯꓸ ꓔꓬ ꓡꓳ= ꓕꓳꓽ ꓶ ꓝꓮꓲꓕꓲ ꓚꓬꓸ ꓡꓰꓽ ꓞꓹ ꓡꓳ= ꓟꓽ ꓟꓶ ꓫꓵꓺ ꓠꓬ ꓣꓳ ꓥˍ ꓟꓲ ꓫꓵꓻˍ ꓥꓳ=

ꓖꓳ ꓡꓱ ꓠꓬ ꓔꓳꓽ ꓶ ꓢꓺ ꓚꓬꓸ ꓕꓲ ꓚꓬꓸ ꓗꓪ ꓟꓽ ꓛꓲꓺ ꓬꓰ ꓢꓰꓽ ꓕꓯ ꓣꓳ ꓠꓬ ꓟꓲ ꓠꓯ ꓕꓱ ꓟ ꓐꓱ ꓶ꓾ ꓝꓮꓲ ꓣꓳ ꓠꓶꓽ ꓛꓳ ꓕꓲ ꓛꓳ ꓐꓱ ꓶ ꓮ ꓫꓵꓽ ꓬꓰ ꓖꓶ ꓠꓹ ꓟ ꓓꓵꓽ ꓙ ꓔ ꓡ= ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓣꓳ ꓔꓯ ꓕꓲ ꓙꓰꓽˍ ꓡꓰꓽ ꓓꓰꓽˍ ꓡꓳ= ‘ꓥꓪ ꓔꓯ ꓠꓲꓹ ꓠꓵ꓾ ꓠꓶꓽ ꓛꓳ ꓕꓲ ꓛꓳ ꓔꓯˍ ꓟꓲ ꓠꓲꓹ ꓠꓵ’ ꓐꓯ ꓟ ꓐꓯ ꓘꓶꓽ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓛꓳ ꓫꓱꓽ ꓠꓹ ꓟ ꓥ ꓡꓳ=

ꓮ ꓟꓶ ꓫꓸ ꓓꓴ ꓮ ꓟꓬꓹ ꓔꓳꓹ ꓜꓳꓽ ꓡˍ ꓟ ꓦꓬꓼ ꓠꓬꓲ ꓗꓪ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓣꓳ ꓮ ꓡꓰ ꓛꓳ ꓫꓱꓽ ꓐ ꓡ ꓡˍ ꓡ= ꓚꓳꓺ ꓡꓳ ꓚꓳꓺ ꓫꓵ ꓗꓪ ꓫꓸ ꓢꓴ ꓐꓴ ꓔꓯ ꓢꓻ ꓡꓰ ꓠ ꓬꓰ ꓖꓶ ꓗꓷ ꓡ= ꓝꓮꓲ ꓪꓴ-ꓢ ꓐꓰ ꓠꓶꓽ ꓛꓳ ꓕꓲ ꓛꓳ ꓔꓯ ꓮ ꓡꓰ ꓟꓬ ꓛꓲꓺ ꓠꓲꓹ ꓠꓵ ꓗꓷˍ ꓡ= ꓣꓳ ꓟꓶ ꓔ ꓟ ꓤꓶꓻ ꓔꓯ ꓒꓵꓽ ꓗ ꓟꓽ ꓗꓷ ꓗꓷ ꓮ ꓡꓰ ꓐꓰ ꓛꓳ ꓫꓱꓽ ꓗꓷ ꓡ꓾ ꓐꓯ ꓟ ꓔꓯ ꓠꓬꓲꓸ ꓠꓬꓲ ꓗꓪ ꓣꓳ ꓔꓯ ꓝꓮꓲ ꓕꓲ ꓧꓪꓹ ꓓꓵꓽ ꓙ ꓠꓬꓲ ꓝꓲˍ ꓟ ꓥ ꓡꓳ=

ꓝꓲ ꓓꓴ ꓮ ꓙꓵꓽ ꓠꓬ ꓬꓰ-ꓢꓴ ꓐꓱ ꓶ ꓢꓯꓼ ꓟꓬ ꓖꓶ ꓗꓷˍ ꓡꓳ= ꓙꓲˍ ꓟ ꓐꓱ ꓶ ꓢꓯꓼ ꓟꓬ ꓖꓶ ꓗꓷꓳ= ꓣꓳ ꓠꓬ ꓬꓲ ꓪ ꓡꓰ ꓐꓰ ꓢꓯꓼ ꓟꓬ ꓖꓶꓽ ꓟꓽ ꓐ ꓡ ꓥˍ ꓟꓲ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓬꓰ ꓐ ꓡ ꓕ ꓑꓳꓸꓼ ꓬꓰ ꓢꓲ ꓠꓬꓲ ꓪꓴ-ꓢ ꓔꓯ ꓝꓮꓲ ꓠꓬ ꓚꓳꓺ ꓡꓳ ꓚꓳꓺ ꓫꓵ ꓐꓴ ꓔꓯ ꓣꓳ ꓡꓯꓽ ꓒꓯꓹ ꓛꓱꓹ ꓔꓴ ꓖꓶ ꓠꓹ ꓟ ꓣꓳ ꓢꓯꓼ ꓕꓵꓼ ꓡꓯ=