ꓡꓯ꓾ ꓡꓳꓸ ꓠꓬꓲ ꓡꓯ

ꓮ ꓙꓵꓽ ꓔꓯ ꓧꓪꓸ ꓧꓪꓸꓼ꓾ ꓠꓬꓲꓸ ꓠꓬꓲ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓘꓴꓽ ꓗꓪ ꓕꓲ ꓣꓳ ꓥ ꓟ ꓙꓲꓻ ꓫꓬ ꓢꓴ ꓐ-ꓕꓳ-ꓡꓳ-ꓟꓲ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ= ꓠꓬꓲꓸ ꓠꓬꓲ ꓗꓪ ꓵꓻ ꓠꓹ ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ-ꓦ 1ꓽ45-51 ꓥ ꓡꓳ= ꓐ-ꓕꓳ-ꓡꓳ-ꓟꓲ ꓐꓰ ꓐꓯ ꓔ ꓟ ꓠ-ꓔ-ꓠꓰ ꓠꓬ ꓢꓲ ꓒ ꓬꓰ-ꓢꓴ ꓐꓰ ꓜꓲ ꓡꓯꓽ ꓘꓳꓹˍ ꓟ ꓟꓸ ꓟꓲꓽ ꓔꓯ ꓣꓳ ꓑ ꓙꓽ ꓪˍ ꓡꓳ= ꓒꓲ-ꓡꓲ ꓡꓰ ꓬꓲ ꓔꓯ ꓘꓴˍ ꓕꓯ ꓬꓲ ꓠꓬ ꓠ-ꓢ-ꓡꓱ ꓗꓪ ꓐꓰ ꓙꓲꓻˍ ꓟ ꓮ ꓫꓵꓽ ꓓꓳ ꓐ ꓡˍ ꓡ ꓐꓰ ꓠꓺ ꓠꓬꓲ ꓢꓴ ꓥ ꓡꓳ= ꓖꓳ ꓕꓯ ꓒꓲ-ꓡꓲ ꓡꓰ ꓬꓲ ꓔꓯ ꓡ ꓢꓲ ꓡꓳꓸ ꓠꓬꓲ ꓡꓯ꓾ ꓐꓯ ꓖꓶˍ ꓡꓳ= ꓖꓳ ꓕꓯ ꓠ-ꓔ-ꓠꓰ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓳꓻ ꓡꓰˍ ꓟ ꓥ ꓡꓳ=

ꓢꓲ ꓒ ꓬꓰ-ꓢꓴ ꓡꓰ ꓠ-ꓔ-ꓠꓰ ꓔꓯ ꓟꓳꓻˍ ꓕꓯ ꓠꓴ ꓔꓯ ꓒꓲ-ꓡꓲ ꓟꓽ ꓘꓴꓻ ꓕꓯ ꓡꓰ ꓠꓴ ꓔꓯ ꓥꓪ ꓘꓶꓽ ꓢꓶꓽ ꓜꓲ ꓠꓯꓸꓼ ꓘꓪ ꓟꓳꓻˍ ꓡꓳ ꓐꓰ ꓐꓯ ꓖꓶˍ ꓕꓯ ꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓡꓰˍ ꓡꓳ= ꓬꓲ ꓕꓲ ꓟ ꓔꓵꓸꓼ ꓔꓬ ꓕꓯ ꓬꓰ ꓗꓷ ꓟ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓟꓸ ꓖꓶˍ ꓟ ꓑꓶꓸ ꓓꓴ ꓬꓲ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓡꓰ ꓟ ꓥ ꓡꓳ=

ꓢꓲꓽ ꓫꓬ ꓕꓳ ꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ ꓣꓳ ꓠꓯꓸꓼ ꓗꓪ ꓟ ꓕꓲ ꓐꓱ ꓠꓬ ꓦꓵꓻ ꓡ ꓕꓯ ꓡꓰ ꓙꓵꓻ ꓢꓴ ꓙꓲ-ꓢꓴ ꓢꓲ ꓤ ꓐꓴ ꓥ ꓡꓳ= ꓕꓲ ꓐꓱ ꓠꓬ ꓞꓲꓼ ꓪꓴꓽ ꓡ ꓗ ꓠꓯꓸ ꓪꓴ-ꓢ ꓔꓯ ꓢꓷꓸ ꓡꓰ ꓢꓲ ꓙꓵꓻ ꓡ ꓢꓴ ꓐꓴ ꓥ ꓡꓳ= ꓮ ꓡꓲ ꓥ ꓟꓲ ꓣꓳ ꓐꓴ ꓔꓯ ꓫꓱꓸ ꓡꓯ ꓘꓳꓹ ꓟ ꓕꓲ ꓙꓰꓽ ꓠꓬ ꓣꓳ ꓤꓶꓻ ꓗꓪ ꓕꓲꓽ ꓔꓳꓸ ꓟꓽ ꓥ ꓕꓲꓽ ꓔꓳꓸ ꓗꓪ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓬꓰ ꓙ ꓡˍ ꓟ꓾ ꓪꓴ-ꓢ ꓬꓲ ꓢꓯꓼ ꓪ ꓗꓪ ꓐꓰ ꓣꓳ ꓔꓯ ꓚꓬꓴꓸ ꓙ ꓗꓷ ꓟ꓾ ꓪꓴ-ꓢ ꓣꓱꓽ ꓛꓰꓽ ꓟꓽ ꓖꓶ ꓡ ꓕꓯ ꓣꓳ ꓬꓰ ꓟꓽ ꓐ ꓡ ꓟˍ ꓟꓲ ꓣꓳ ꓤꓶꓻ ꓠꓯꓸꓼ ꓗꓪ ꓙꓳˍ ꓡꓳ꓾ ꓐꓯ ꓟ ꓥ ꓡꓳ=

ꓳ ꓪꓴ-ꓢ ꓠꓽ ꓚꓵ ꓚꓵ ꓙꓳ ꓔꓬ ꓫꓵꓽ ꓥ ꓐꓭ꓾ ꓪꓴ-ꓢ ꓠꓬ ꓥꓪ ꓔꓯ ꓬꓰ ꓙ ꓔꓬ ꓐꓭ꓾ ꓐꓰ ꓓꓵꓽ ꓙ ꓢꓲ ꓙꓵꓻ ꓪ ꓡꓰ ꓟ꓾ ꓢꓷꓸ ꓪ ꓡꓰ ꓟˍ ꓟꓲ ꓣꓳ ꓔꓯ ꓙꓳ ꓗꓳꓸ ꓡˍ ꓡꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓔꓯ ꓠꓲꓹ ꓫ ꓟꓬ ꓫ ꓓꓴ ꓔꓳꓹ ꓜꓳꓽ ꓡ ꓕꓯ꓾ ꓝꓮꓲ ꓓꓵꓽ ꓙꓽ ꓟꓬꓽ ꓓꓵꓽ ꓙꓽ ꓪꓴꓽ ꓧꓶ ꓓꓴ ꓔꓳꓹ ꓜꓳꓽ ꓡˍ ꓕꓯ ꓕꓱ ꓟ ꓔꓯ ꓣꓳ ꓙꓵꓻ ꓠꓲꓹ ꓪꓴꓽ ꓡ ꓖꓴ ꓖꓳ ꓕꓲ ꓔꓳꓸ ꓔꓯ ꓓꓵꓽ ꓙꓽ ꓠꓬꓲ ꓠ ꓗˍ ꓡꓳ= ꓔꓯꓺ ꓥꓳꓽ꓾ ꓣꓳ ꓫꓸ ꓙꓵ ꓟꓷꓼ ꓙꓵ ꓡˍ ꓕꓯ꓾ ꓓꓵꓽ ꓙꓽ ꓟꓬꓽ ꓓꓵꓽ ꓙꓽ ꓪꓴꓽ ꓧꓶ ꓡˍ ꓕꓯ ꓪꓴ-ꓢ ꓔꓯ ꓟꓽ ꓙꓵꓻ ꓗꓷ ꓡˍ ꓕꓯ꓾ ꓗꓳꓸ ꓡ ꓟ ꓦꓬꓼ ꓠꓬꓲ ꓗꓪ ꓪꓴ-ꓢ ꓣꓳ ꓔꓯ ꓬꓰ ꓙ ꓗꓷ ꓟ ꓣꓳ ꓙꓵꓻ ꓠꓲꓹ ꓪꓴꓽ ꓡ ꓖꓴ ꓖꓳ ꓟ ꓾ ꓣꓳ ꓔꓯ ꓪꓴ-ꓢ ꓡꓰ ꓬꓰ ꓙˍ ꓡꓳ ꓐꓯ ꓟ ꓔꓯ ꓢꓷꓸ ꓡꓰ ꓠꓯꓹ ꓟ ꓕꓲ ꓙꓰꓽ ꓙꓰꓽ ꓓꓳꓻ ꓡ ꓟ꓾ ꓖꓳ ꓟ ꓔꓯ ꓓꓵꓽ ꓙꓽ ꓠꓬꓲ ꓠꓹ ꓟ ꓬꓳꓸ ꓚꓵˍ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓠ-ꓔ-ꓠꓰ ꓐꓰ ꓘꓴˍ ꓟ ꓐ-ꓕꓳ-ꓡꓳ-ꓟꓲ ꓑꓮꓲꓽ ꓗꓪ ꓣꓳ ꓓꓵꓽ ꓙ ꓠꓬꓲ ꓠꓹ ꓟ ꓠꓬ꓾ ꓬꓲ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓳꓻ ꓡꓰ ꓗ ꓠꓯꓸ ꓙꓵꓻˍ ꓟ ꓡꓰ ꓐꓰ꓾ ꓣꓳ ꓥˍ ꓟꓲ ꓢꓲ ꓒ ꓬꓰ-ꓢꓴ ꓔꓯ ꓚꓵ ꓚꓵ ꓙꓵꓻ ꓠꓹ ꓟ꓾ ꓗꓳꓸ ꓡ ꓟ ꓦꓬꓼ ꓠꓬꓲ ꓗꓪ ꓪꓴ-ꓢ ꓡꓰ ꓣꓳ ꓔꓯ ꓖꓶ ꓡ ꓟ ꓶꓼ ꓤ ꓫꓱꓹ ꓤ ꓔꓯ ꓒꓵꓽ ꓗ ꓗꓷ ꓢꓲ ꓠꓬꓲ ꓪꓴ-ꓢ ꓔꓯ ꓙꓵꓻ ꓢꓲ꓾ ꓣꓳ ꓤꓶꓻ ꓠꓬ ꓪꓴ-ꓢ ꓐꓱ ꓶ ꓢꓯꓼ ꓟꓬ ꓖꓶ ꓗꓴꓸ ꓠꓹ ꓟ꓾ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓛꓳ ꓫꓱꓽ ꓬꓰˍ ꓟ ꓗꓪ ꓪꓴ-ꓢ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓠꓹ ꓟ꓾ ꓣꓳ ꓔꓯ ꓪꓴ-ꓢ ꓙꓵꓽ ꓝꓲ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓙꓰˍ ꓠꓬ ꓣꓳ ꓥˍ ꓟꓲ ꓪꓴ-ꓢ ꓬꓲ ꓝꓲ ꓓꓴ꓾ ꓢꓲ ꓒ ꓝꓲ ꓓꓴ ꓕꓲ ꓣꓳ ꓒꓬꓱꓼ ꓡˍ ꓥꓳ ꓐꓰ ꓐꓯ ꓖꓶ ꓠꓲꓹ ꓫꓵˍ ꓡꓳ=